1. Neyi tuhosha netu “chalala” twatalishaña mudihi?

“MWADIZILI ñahi chalala?” “Komana ayikulishilili muchalala?” “Munashakami muchalala yaaka yiñahi?” Hadaha mwayihulahu dehi akwenu awa malwihu indi kwiji wena diwu ayihwili. Tunatalishi mudihi neyi tuhosha netu “chalala”? Neyi tuhosha netu chalala, tunakuhosha hayuma yitwakuhwelela, njila yitwadifukwilañamu nichekala chihandilu chetu. Antu adi muchalala eluka chatañishaña Bayibolu nawa alondelaña yishina yekalamu. Nawa hiyekala muwuduñu wakulondela yuma yatañishañawu mukwitiya kwakutwambaku nawa adiluñishaña chihandilu chachiwahi hela chakwila adi mukaayi katama.—Yow. 8:32.

2. Kwesekeja naYowanu 13:34, 35, chumanyi chatachi chinateli kumukokola muntu kwinza muchalala?

² Yumanyi yayikojejeli kwinza muchalala? Hadaha yilwilu yayiwahi yawantu jaYehova diyayikokweli. (1 Pet. 2:12) Indi kwiji kukeña kwamwekeshañawu. Amavulu amweni iku kukeña hiyenjili nakupompa katachi nawa dichuma chanukañawu kubadika mpanji yatiyiliwu. Chumichi chatuhayamishaña wanyi muloña Yesu wahosheli nindi atumbanji twindi akayilukila kukudikeña wumu namukwawu. (Tañenu Yowanu 13:34, 35.) Ilaña kudi yuma yikwawu yitwatela kwila hakwila nawu twikali nachikuhwelelu chakola.

3. Chumanyi chinateli kumwekana neyi chikuhwelelu chenu chashindamena hakukeña kwamwekeshaña amanakwenu niahela?

³ Chikuhwelelu chetu hichatela hohu kushindamena hakukeña kwawakwaKristu kwekala nawantu jaNzambiku. Muloñadi? Twili netu mukwenu mukwakwitiya, mukulumpi hela payiniya yakoña nshidi yeneni. Hela neyi manakwetu indi kwiji  muhela yayila chatama? Hela neyi muntu yekala mukwakusekesha, nakuhosha nindi yuma yitwakuhwelela yakutwamba. Neyi yuma yamuchidiwu yimwekana, mukuzeya muleka nikumukalakela Yehova? Chikuma chidi chakwila nawu: Neyi chikuhwelelu chenu mudi Nzambi chashindamena hayilwilu yawantu amakwawu chatela chishindameni hawubwambu wenu naYehova, chikwikala chakola wanyi. Chikuhwelelu chenu hichatela hohu kushindamena hachimwatiyaña hadi Yehova niantu jindiku, ilaña chatela kushindamena cheñi hakudiza Bayibolu, kwiluka yuma yimunakudiza nikusandujola kulonda mwiluki nenu munakudiza chalala.—Rom. 12:2.

4. Kwesekeja naMatewu 13:3-6, 20, 21, Antu amakwawu elaña ñahi neyi chikuhwelelu chawu anacheseki?

⁴ Yesu wahosheli nindi antu amakwawu aketeja chalala “namuzañalu,” ilaña chikuhwelelu chawu chikoma neyi ayeseka. (Tañenu Matewu 13:3-6, 20, 21.) Hadaha elukili wanyi nawu neyi anakumulondela Kristu anateli kumona kukala. (Mat. 16:24) Indi kwiji atoñojokeleña nawu neyi ekala mukwaKristu akamonaña wanyi kukala, ilaña yuma yayiwahi hohu. Ilaña mukanu kaayi katama, mudi kukala kwakuvulu. Yuma yinateli kuhimpika nawa muzañalu wetu wunateli kukeha.—Mas. 6:6; Mukwa. 9:11.

5. Amanakwetu niahela amavulu anakumwekesha ñahi nawu yuma yakuhwelelawu dichalala?

⁵ Amanakwetu niahela amavulu anakumwekesha chikupu nawu yuma yakuhwelelawu dichalala. Munjilanyi? Chikuhwelelu chawu hichanyikeshañaku hela chakwila mukwawu mukwakwitiya nayineñeshi hela navulumuni. (Mas. 119:165) Neyi amona kweseka chikuhwelelu chawu hichazeyañaku, ilaña chakolelañaku. (Yak. 1:2-4) Munateli kwikala ñahi nachikuhwelelu chamuchidiwu?

6. Chikuhwelelu chawakwaKristu akusambila chashindameneni hachumanyi?

⁶ Chikuhwelelu chawakwaKristu akusambila chashindameneni hayuma yadizileñawu muNsona niyuma yatañishileñayi Yesu Kristu, dikwila nawu “chalala chansañu yayiwahi.” (Ñal. 2:5) Ichi chalala hiyuma yejima yakuhwelelawu akwaKristu, kushilahu mulambu wefutu danyiloña daYesu nikusañuka kwindi. Kapostolu Pawulu welukili chikupu nindi iyi ntañishilu yadiña yalala. Muloñadi? Muloña wazatishileña Nsona nakumwekesha nindi “chateleleli Kristu kukabakana nikumusañula kufuma mudi afu.” (Yilw. 17:2, 3) Atumbanji akusambila etejeli iyi ntañishilu nawa ashindameneni haspiritu yajila kulonda yiyikwashi kutiyishisha Izu daNzambi. Asandujoleli kulonda amoni neyi mwamweni iyi ntañishilu yashindameneni haNsona. (Yilw. 17:11, 12; Heb. 5:14) Chikuhwelelu chawu hichashindameneni hachatiyileñawuku. Nawa hiyamukalakeleleña Yehova muloña wamuzañalu wakudikunda nawakwawu akwakwitiyaku. Ilaña chikuhwelelu chawu chashindameneni “[hakwiluka] kwalala kwaNzambi.”—Kol. 1:9, 10.

7. Chikuhwelelu chetu chashindamena hayuma yatañishaña Bayibolu chinateli kutukwasha ñahi?

⁷ Chalala chaMwizu daNzambi hichahimpikañaku. (Mas. 119:160) Chakutalilahu, chahimpikaña wanyi neyi mukwetu mukwakwitiya yatuvulumuna hela chakwila nakoñi nshidi yeneni. Nawa chahimpikaña wanyi neyi tunakumona yihuñu. Dichi twatela kwiluka nankashi yuma yatañishaña Bayibolu nikukuhwelela chikupu netu dichalala. Neyi twikala nachikuhwelelu chashindamena hayuma yatañishaña Bayibolu chikatukwasha mumpinji yakweseka, neyi chikuñu chakwimika nachu watu  chichakwashaña watu kubula kujiya muloña wamankanda asweja. Munateli kwiluka ñahi chikupu nenu yuma yimwakuhwelela dichalala?

8. Neyi chinamwekeshiwu ha 2 Timotewu 3:14, 15, Timotewu welukili ñahi chikupu nindi yuma yakuhweleleliyi dichalala?

⁸ Timotewu welukili chikupu nindi yuma yakuhweleleliyi dichalala. Welukili ñahi chumichi? (Tañenu 2 Timotewu 3:14, 15.) Mama yindi ninkaka yindi diwu atachi kumudizisha “nsona jajila.” Ilaña niyomwenindi wadiña nampinji yakudiza nsona. Chafuminimu ‘amushinjilili kwitiya’ nindi dichalala. Kuhiñahu, Timotewu mama yindi ninkaka yindi enjili nakwiluka yuma yakuhweleleliwu akwaKristu. Chakadi nikujina Timotewu watiyili kuwaha nakukeña kwamwekesheleñawu atumbanji twaYesu nawa chamusañumwini kutwalekahu kudikunda nawamanakwindi niahela nikutwalekahu kwakamena amanakwindi. (Fwi. 2:19, 20) Hela chochu, hekalili nachikuhwelelu muloña wakukeña kwayikeñeliyi antuku, ilaña muloña wakuswina kwakwihi naYehova. Ninenu mwatela kutoñojokaña chikupu hayuma yimunakudiza muBayibolu kutalisha hadi Yehova kulonda mumoni neyi dichalala.

9. Yumanyi yisatu yashindamena hachalala yimwatela kukuhwelela?

⁹ Chatachi, mwatela kukuhwelela ntahi yuma yisatu yashindamena hachalala. Chuma chatachi, mwatela kukuhwelela chikupu nenu Yehova Nzambi diyi Nleñi wayuma yejima. (Kwid. 3:14, 15; Heb. 3:4; Chim. 4:11) Chamuchiyedi mwatela kukuhwelela nenu Bayibolu himazu aNzambi onenewa asonekelawu antu. (2 Tim. 3:16, 17) Nawa chamuchisatu, mwatela kwiluka nenu Yehova wukweti kuloñesha mudi antu anakudifukula kudi yena kuhitila muwunlomboli waKristu nawa nenu awa antu hiyaYinsahu jaYehova. (Isa. 43:10-12; Yow. 14:6; Yilw. 15:14) Hakwila mukuhweleli iyi yuma hichinakukeñeka kwiluka yuma yejima yekala muBayiboluku. Ilaña mwatela  kuzatisha “[wuswa] wenu wakutoñojoka” kulonda chiyikwashi kukuhwelela chikupu nenu yuma yimunakudiza dichalala.—Rom. 12:1.

10. Yumanyi yitwatela kwila kubombela hakwiluka chalala?

¹⁰ Neyi muneluki dehi nenu iyi yuma yisatu dichalala kutalisha hadi Nzambi, Bayibolu niantu jaNzambi, mwatela kuzatisha Bayibolu kulonda mukwashi antu kukuhwelela iyi yuma. Muloñadi? Muloña etu akwaKristu tukweti mudimu wakudizisha antu akututiyilila chalala chitwadiza. * (1 Tim. 4:16) Chikuhwelelu chetu chakolelañaku hampinji yitunakukwasha antu kukuhwelela chalala chamuBayibolu.

11. Kapostolu Pawulu welileña ñahi neyi nakudizisha chalala, nawa tunateli kumwimbujola ñahi?

¹¹ Kapostolu Pawulu neyi nakutañisha antu wadiña, “nakuyishinjila hadi Yesu kufuma muNshimbi jaMosi nimumazu awaTuprofwetu.” (Yilw. 28:23) Tunateli kumwimbujola ñahi Pawulu neyi tunakudizisha antu chalala? Hitwatela hohu kuyileja chahoshaña Bayiboluku. Ilaña twatela kukwasha atudizi etu aBayibolu kutoñojoka chikupu haNsona hakwila aswini kwakwihi naYehova. Tunakukeña eteji chalala bayi hamuloña wakwila atulemeshaku, ilaña hamuloña wakwila aneluki chikupu nawu yuma yinakudizawu hadi Nzambi yetu wukweti kukeña dichalala.

12-13. Anvwali anateli kukwasha ñahi anyanawu kutwalekahu kwikala muchalala?

¹² Chakadi nikujina, anvwali munakukeña anyanenu kutwalekahu kwikala muchalala. Munateli kutoñojoka nenu neyi adikundaña nawantu amawahi muchipompelu, akupama swayi kuspiritu. Ilaña neyi munakukeña anyanenu akuhweleli nawu ichi dichalala, kudi yuma yayivulu yatela kwilawu kubombela hakwikala nawamabwambu amawahi. Atela kwikala amabwambu jaNzambi nikukuhwelela chikupu yuma yatañishaña Bayibolu.

¹³ Neyi anvwali anakufwila kudizisha anyanawu chalala kutalisha hadi Nzambi, awenawu atela kudizaña Bayibolu. Atela kwikala nampinji yakutoñojoka chikupu hayuma yinakudizawu. Dihu dinu hakukwashawu anyanawu kwila chochimu. Atela kudizisha anyanawu chakuzatisha yozelu yetu yitwazatishaña hakudiza Bayibolu, neyi chochadizishañawu atudizi awu aBayibolu. Neyi ela mwenimu, akukwasha anyanawu kumukeña Yehova nikukuhwelela “nduñu wamaana nikashinshi” wazatishañayi kutuloñeshela yakuda yakuspiritu. (Mat. 24:45-47) Anvwali  himwatela kukumina dakudizisha hohu anyanenu chalala chapela chamuBayiboluku. Yikwashenu ekali nachikuhwelelu chakola kuhitila mukuyidizisha ‘yuma yakunama yaNzambi’ kwesekeja nahanakumini wuswa wawu wakudiza yuma.—1 Kor. 2:10.

14. Muloñadi chitwatela kudizila wuprofwetu wamuBayibolu? (Talenu chikasha chinakwila nawu “ Munateli Kulumbulula Iwu Wuprofwetu?”)

¹⁴ Wuprofwetu wamuBayibolu hinsañu yalema yatukwashaña kumukuhwelela chikupu Yehova. Wuprofwetwinyi wunakoleshi chikuhwelelu chenu? Hadaha munateli kuhosha hawuprofwetu ‘wamumafuku akukuminina.’ (2 Tim. 3:1-5; Mat. 24:3, 7) Ilaña wuprofwetwinyi wukwawu wunakoleshi chikuhwelelu chenu? Chakutalilahu, munateli kulumbulula chashikijeweli wuprofwetu wekala muDanyeli kapetulu 2 hela haDanyeli Kapetulu 11 nichiwunakushikijewa makonu? * Neyi chikuhwelelu chenu chashindamena haBayibolu, hichikazeyaku. Talenu chakutalilahu chawamanakwetu akabishiliwu nankashi muGermany haNjita Yakaayi Yamuchiyedi. Hela chakwila atiyishishili wanyi wuprofwetu wamuBayibolu kutalisha kumafuku akukuminina, akuhweleleli chikupu Izu daNzambi.

15-17. Kudiza Bayibolu kwayikolesheli ñahi amanakwetu akabishileñawu kudi aNazi?

¹⁵ Muchiyulu chaNazi muGermany, amanakwetu niahela amavulu ayitwalili muyilombu yakuyandishila. Hitler niSS Chief Heinrich Himmler aheleli aYinsahu jaYehova. Kwesekeja nachahosheli muhela wumu, Himmler walejeli izanvu dawahela adiña muchilombu chakuyandishila nindi: “Yehova watela wayuulilaña mwiwulu, ilaña hanu heseki yetu twayuulaña. Tukutala akushimbula enu tahindi etu!” Yumanyi yayikwashili antu jaYehova kwikala ashinshika?

¹⁶ Atudizi aBayibolu elukili nawu Wanta waNzambi watachikili kuyuula mu 1914. Hiyahayamini namakabisha amweniwuku. Hela  chochu, antu jaYehova adikasili mumuchima nawu kwosi nfulumendi yawantu yinateli kukañesha nkeñelu yaNzambi kuzatikaku. Hitler hatwesheli kujiyisha kudifuukula kwalalaku hela tuhu kushahu nfulumendi yadi kubadika Wanta waNzambiku. Amanakwetu elukili chikupu nawu chiyuulu chaHitler chikamana.

¹⁷ Yuma yakuhweleleliwu awa amanakwetu niahela yadiña yalala. Hashimbwili wanyi, chiyuulu chaNazi chajiyili nawa Heinrich Himmler iyala wahosheli nindi, “hanu heseki yetu twayuulaña, watemukili kuchiina kumujaha. Hampinji yatemukileñayi wabulakeni Manakwetu Lübke wakasiliwu nawa welukiliyi. Himmler wamwihwili Manakwetu Lübke iku naneñi nindi: “Eyi Kadizi waBayibolu, chumanyi chinamwekani?” Manakwetu Lübke wamulumbulwilili Himmler nindi aYinsahu jaYehova elukili nawu chiyuulu chawaNazi chakajiya nawa akayifumisha mukaleya. Himmler wahosheleña yuma yayivulu yatama hadi aYinsahu jaYehova kunyima, ilaña haniyi mpinji wakañenyi nimwakuhoshela. Hashimbwili wanyi, wadijahili. Tunakudizilaku kwodi? Kudiza Bayibolu, kushilahu niwuprofwetu wekalamu, kunateli kutukwasha kwikala nachikuhwelelu chakola mudi Nzambi nikuumika neyi anakutuyandisha.—2 Pet. 1:19-21.

18. Neyi chinamwekeshiwu haYowanu 6:67, 68, Muloñadi chitwatela kwikalila “nakwiluka kwalala nikashinshi kakeni” kwasonekeliyi Pawulu?

¹⁸ Wejima wetu twatela kumwekeshaña kukeña, chinjikijilu chakuyilukilaku nachu akwaKristu alala. Ilaña cheñi twatela kwikala “nakwiluka kwalala nikashinshi kakeni.” (Fwi. 1:9) Neyi nehi anateli kutuluwañesha “[nantañishilu] yakutwamba yawantu adimbaña akwawu,” nikudi akwakusekesha. (Efwe. 4:14) Chelili atumbanji akusambila amavulu aleki kumulondela Yesu, kapostolu Petulu wahosheli chakufuma hamuchima nindi Yesu “wukweti mazu awumi wahaya nyaaka.” (Tañenu Yowanu 6:67, 68.) Hela chakwila haniyi mpinji Petulu welukili wanyi yuma yejima yahosheleñayi Yesu, wadiña washinshika muloña welukili chalala hadi Kristu. Ninenu munateli kukuhwelela chikupu muyuma yatañishaña Bayibolu. Neyi mwila yumiyi, chikuhwelelu chenu chikwikala chakola hela munamoni kweseka nawa mukakwasha amakwawu kukolesha chikuhwelelu chawu.—2 Yow. 1, 2.