Wunsahu wamwekeshaña nawu Yesu wekalili Kapristu Muneni mpinji yapapatisheweliyi mu 29 C.E. Tuneluki ñahi? Hampinji yamupapatishileñawu, wadihanini hakameña kachifwikija kemenañaku “nkeñelu” yaNzambi. (Ñal. 1:4; Heb. 10:5-10) Chineli kameña kachifwikija kanatwalekihu kwikalaku kufuma tuhu mpinji yamupapatishiliwu Yesu, tembeli yakuspiritu yemenañaku kudifukula kwalala kutwadifukulaña kudi Yehova kushindamena hefutu danyiloña, kwatela nikwena kwatachikili haniyi mpinji. Aka kameña hichuma chalema muniyi tembeli yakuspiritu.—Mat. 3:16, 17; Heb. 5:4-6.

Mutembeli yakuspiritu mwakeñekeleña kapristu muneni. Dichi Yesu amwinkeli “ñovu nikumuwayisha naspiritu yajila” hakwila yekali kapristu muneni. (Yilw. 10:37, 38; Maku 1:9-11) Hanu dinu, tuneluki ñahi netu Yesu amutondeli kwikala Kapristu Muneni henohu kanda yafwi nikusañuka? Chakutalilahu chaAroni niantu amakwawu amuswanineña neyi kapristu muneni chikutukwasha kwakula ilu lwihu.

Kwesekeja nanshimbi jaMosi, kapristu muneni diyi hohu weñilileña Mwajila Chikupu mutabanaka, kuhiñahu diyi weñilileña Mwajila Chikupu mutembeli. Kufuma Mwajila nakwiñila Mwajila Chikupu hadiña ihina dambwili kapeka. Kapristu muneni weñilileña Mwajila Chikupu Hefuku Dakubuta Nshidi. (Heb. 9:1-3, 6, 7) Aroni niatupristu amakwawu amuswanineña ayiwayishileña kwikala kapristu muneni henohu kanda ahiti “mwihina dakujika nachu” damutabanaka. Munjila yoyimu, hadaha Yesu adiña amutonda dehi kwikala Kapristu Muneni mutembeli yaYehova yakuspiritu henohu kanda yofwi nihanyima yakuhita “mwihina dakujika nachu, dikwila nawu, mujimba windi” nakuya mwiwulu. (Heb. 10:20) Muloña wachumichi, kapostolu Pawulu wahosheli hakwinza kwaYesu neyi “kapristu muneni” nawa nakwiñila “mwitenti deneni nankashi nawa dawanina chikupu, bayi dakutuña namakasaku” dikwila nawu “mwiwulu mwamweni.”—Heb. 9:11, 24.

Mpinji yakasiliwu chitiyañenu chachiha nimpinji yichatachikili kuzatika hiyambukaku. Muloñadi? Yesu chayiliyi mwiwulu nakuhana wumi windi wawanina kukola etu, welili chuma chatachi hayuma yisatu yakukolesha nachu chitiyañenu chachiha. Yuma yeniyi diyaletesheli chitiyañenu kutachika kuzatika. Yumanyi yeniyi?

Chatachi wayili kudi Yehova; kuhiñahu wahanini mulambu windi kudi Yehova; nawa nkumininaku, Yehova watambwili kulema kwamashi aYesu apwekeli. Chitiyañenu chachiha chadiña nakuzatika wanyi henohu kanda eli iyi yuma yisatu.

Bayibolu hiyashimuna ifuku detejeliyi Yehova mulambu waYesuku. Dichi, hitunateli kushimuna mpinji niifuku dakasiliwu chitiyañenu chachiha nimpinji yichatachikili kuzatikaku. Hela chochu, tweluka hohu netu Yesu wayili mwiwulu hanyima yamafuku 10 kufuma haPentekosta. (Yilw. 1:3) Hashimbwili wanyi kufuma hayiliyi mwiwulu, Yesu wahanini mulambu windi walema kudi Yehova nawa wawitejeli. (Heb. 9:12) Tweluka chumichi muloña wayuma yamwekeni haPentekosta. (Yilw. 2:1-4, 32, 33) Haniyi mpinji, chitiyañenu chachiha adiña achituña dehi nawa chadiña nakuzatika.

Muwihi, chitiyañenu chachiha achikasili nawa chatachikili kuzatika mpinji yetejeliyi Yehova mulambu walema wamashi aYesu apwekeli. Nkumininaku, ichi chitiyañenu chatachikili kuzatika nakaPristu Muneni Yesu, wekala Ihaku.—Heb. 7:25; 8:1-3, 6; 9:13-15.