Navwalikilili kuSt. Paul, Minnesota, U.S.A., mu 1954, anvwali jami adiña aKatolika nawa hiyadiña aheta hela atuzweñiku. Twavwalikili 5 nawa yami chilondela wedi. Nayileña kushikola yawaKatolika nawa nadiña wanyi yuma yayivulu yamuBayibolu. Hela chakwila nakuhweleli nami kwatela kwikala Nzambi waleñeli yuma yejima, nakuhweleleli nami muChechi munayileña hiyanateli kunkwasha kudifukula kudi yenaku.

Chaaka chinatachikili kudiza jawuhaku hashikola yaWilliam Mitchell, aYinsahu jaYehova añendeleli. Hanidi ifuku nadiña nakukosa, dichi ahosheli nawu akafunta. Chenjiliwu nayihwili malwihu ayedi nami: “Muloñadi antu atama chahandilañawu chiwahi kubadika antu amawahi?” nawa “Antu anateli kwikala ñahi namuzañalu?” Anyinkeli mukanda waThe Truth That Leads to Eternal Life niBayibolu yaNew World Translation of the Holy Scriptures yadiña yawulombu wamenji amatamba. Kuhiñahu netejeli kundizisha Bayibolu. Kudiza kwankwashili  kwiluka yuma yayivulu. Natiyili kuwaha hakwiluka nami Wanta waNzambi diyi nfulumendi hohu yikamanisha kukala kwawantu hamaseki. Nelukili nami chiyuulu chawantu chinakañanyi kuyuula nawa chinakuleta hohu yihuñu, wuñanji waheña niwubanji.

Nadihanini kudi Yehova mu 1982 nawa muchaaka chochimu napapatisheweli haKupompa Kweneni kwadiña namutu nawu “Kingdom Truth” kuSt. Paul Civic Center. Mulungu wahiñilihu, nafuntili kucivic center nakusoneka kweseka kwakwikala ihaku. Mu October natiyili nawu neli chiwahi mukweseka nawa natela kwikala ihaku.

Hakupompa Kweneni kwadiña namutu nawu “Kingdom Truth” twabulakeni namanakwetu Mike Richardson wadiña nakuzatila haBeteli muBrooklyn, wanlejeli nindi hakasanji keneni anashihu dipatimenti yikutalaña hanyiloña. Nanukili mazu antuñu kaEtopiya adi haYilwilu 8:36 nawa nadihwili nami, ‘Chumanyi chikunkañesha kwihula kulonda nikazatileña kuDipatimenti Yatalaña haNyiloña?’ Dichi nasonekesheli kuya nakuzatilaku haBeteli.

Anvwali jami atiyili kutama chinekalili Chinsahu chaYehova. Atata añihwili nawu kuBeteli kuwunakuya akukufwetaña mali añahi? Nayilumbulwilili nami nikuzataña chawana. Ilaña nayilejeli nami akunyinkaña $75 hakakweji, kawukwashu kayinkeleñawu antu ahaBeteli.

Hanyima yakuleka mudimu wunazatileña, natachikili kuzatila haBeteli muBrooklyn, New York, mu 1984. Anlejeli kuzatila kuDipatimenti Yatalaña haNyiloña. Mudimu wunazatiliku muchota chanyiloña wankwashili kukulukila.

MuNovember 1983, alandili itala datenañawu nawu Stanley Theater muJersey City, New Jersey. Amanakwetu alombeli lusesa kudi akwanshimbi nawu awahishi jakesi kawuneñu nijamenji munidi itala. Chabulakeniwu nawakwanshimbi, amanakwetu alumbulwilili nawu anakukeña Stanley Theater yikali itala dakupompela kupompa kweneni kwawaYinsahu jaYehova. Hadiña kukala. Muloña nshimbi yamuJersey City yahosheleña nawu matala akupompela atela kwikala munyikala yawantu. Stanley Theater yadiña mwiluña dakulandishila, dichi akwanshimbi akaanini kuhana lusesa. Dichi  amanakwetu adinatili kuchota kulonda atali mwafukwili akwanshimbi, ilaña ayikaaninini.

Mumulungu wunatachikili kuzatila haBeteli, kuloñesha kwatwalili muloña kuchota kulonda eluki chaletesheli ayikaanini. Chineli nazatili muchota hadi yaaka yiyedi muSt. Paul, Minnesota, nelukili chakusompa nyiloña yamuchidiwu. Ihaku detu wumu wahosheli nindi, muStanley Theater adiña nakuhemenamu yisela yayivulu chidi neyi kutala nyivwimbimbi nikwimbilamu tumina. Hanu dinu tukufumpa ñahi nshimbi neyi tupompelamu? Chota chatalili haniyi nsañu nawa chahosheli nawu akwanshimbi amuJersey City alemesheli wanyi wuswa wetu wakudifukula. Chota chalejeli akwanshimbi kuhana lusesa nawa natachikili kumona Yehova chakiswililiyi kuloñesha hakuzatisha dipatimenti yatalaña hanyiloña kutwala mudimu windi hambidi. Nazañaleli hakuzataku iwu mudimu.

Amanakwetu atachikili mudimu weneni wakuwahisha, nawa hahitili wanyi chaaka kufuma hawahishililiwu, haSeptember 8, 1985, muJersey City Assembly Hall, mwadiña kubulakana kwawakashikola amanishili Shikola yaGileyadi yanambala 79. Natiyili kuwaha hakuzataku iwu mudimu waYehova. Iwu mudimu wantiyishileña kuwaha kubadika mudimu wawuhaku wunazatileña henohu kanda ninzi muBeteli. Hinelukili nami kwadiña nyiloña yayivulu yikwawu mwateleleli kunzatishayi Yehovaku.

Muma 1980 andotolu nimuyipateli alemesheleña wanyi wuswa wamuntu wakumuuka chakadi kumusha mashi mumujimba. Sweje-e dimu ambanda adi namavumu amweneña iku kukala, muloña ansompeshi ahosheleña nawu adana wuswa wakukaana kuyisha mashi, muloña neyi yofwa mwana wukushala nakukabakana.

HaDecember 29, 1988, muhela Denise Nicoleau mashi amukeheli mumujimba hanyima yakuvwala mwana. Mashi amukeheli chikupu nawa ndotolu wamwihwili neyi nateli kumusha mashi mumujimba. Muhela Nicoleau wakanini. Chikwachili, akwachipatela ayili nakutambula lusesa kuchota kulonda amushi mashi. Chakadi kumulejamu muhela Nicoleau hela nfumwindi, nsompeshi wayitejeli akwachipateli kumusha mashi mumujimba.

Hachitanu, haDecember 30, ankoñi amuchipateli amushili Muhela Nicoleau mashi mumujimba hela chakwila yena, nfumwindi niantaña jindi amuhembeleña akaanini. Hanidi ifuku namelela, antaña jamuhela nimukulumpi wumu hela ayedi ayikwatili nawu akañesheleña kumusha Muhela Nicoleau mashi. Hamposu December  31, muyipapilu yansañu, haTV nihayikuzulemba adiña nakuhosha haniyi nsañu yanawa amanakwetu akasiliwu.

Hachimu nantetemena, nahanjekeli nansompeshi wamuchota cheneni, Milton Mollen. Nashimwini chadiña nsañu, nakumuleja nami nsompeshi wahana lusesa lwakumusha muhela mashi chakadi kutiya kudi muyeji yomweni. Nsompeshi Mollen wanlejeli kuya nakumuwana namwaana nindi tuhanjeki hanshimbi yinakundami kuniyi nsañu. Manakwetu Philip Brumley wantwaliliku hinayileña nakudimona nansompeshi Mollen kukasanji kindi. Nsompeshi Mollen niyena watambikili ihaku wakuchipateli. Nsañu yitwahanjekeleña yatatashanini. Mpinji yimu Manakwetu Brumley wansonekeleleli tumazu mumukanda windi nakunleja nindi “wundishaku muchima.” Welili chiwahi hakunfumba muloña natachikili kuzuwa nami ihaku wemeneneñaku chipateli waluwañesheli.

Hanyima yakuhanjeka hadi ora yimu, nsompeshi Mollen wahosheli nindi nsañu yetu diyi yitukasambila kuhanjekahu kumadiki. Chitwafumineña mukasanji kindi, Nsompeshi Mollen wahosheli nindi, ihaku wemeneneñaku chipatela “wadiña namudimu weneni ifuku dahiñilihu.” Watalishili mukwila nindi chikamukalila ihaku wachipateli kuhana wunsahu wamwekesheleña nawu chipateli chadiña nawuswa wakumusha muhela mashi chakumukanjikija. Natoñojokeli nami Yehova wanlejeleña nindi mukuyiña namuloña. Natiyili kuwaha hakumona Yehova chatuzatishileñayi hakushikija nkeñelu yindi.

Twaloñesheli nawufuku mazu itwatela kuhosha ifuku dahiñilihu. Chota chanyiloña chadiña mukamwihi naBeteli yamuBrooklyn, dichi amanakwetu ayili nakusompa endeli hamaseki. Chelili añanji awana atiyi mutwahosheli, alekesheli kukanjikija kumusha muntu mashi. Chota cheneni chamuhakwililiku muhela Nicoleau nawa chahosheli nawu kufwachika chakadi kumwihula muntu yomweni hikufumpa lushimbi lwahosha hawuswa wamuntu.

Chota cheneni chamuNew York chahosheli nawu Muhela Nicoleau wadiña nawuswa wakumuuka chakadi kumusha mashi. Diwu muloña watachi hanyiloña yiwana yamashi yinasompeliku muyota yamaneni yidi mumaluña  amboka-mboka muUnited States. (Talenu chikasha chinakwila nawu “ Nyiloña Yitwayiñili muYota Yamaneni.”) Nazatiliku cheñi nawamahaku amakwawu haBeteli munyiloña yahosha hawuswa wakuhemba anyana, kudiseña, maluña nimatala.

Mpinji yitwadimweni namwinikwami Dawn, wadiña nanyana yisatu nawa amuseñeli. Wadiña payiniya nawa diyi wadiña nakukeñela chisaka yakuda. Wahitili mukukala kweneni, ilaña chuma chanzañalesheli hiiyena dindi dakumukalakela Yehova. Mu 1992, twayili Kukupompa kwaNkambi muNew York City kwahosheleña nawu “Light Bearers” nawa namwilili nami tudiluki. Twadisumbwili chimwahitili chaaka chimu. Yehova wanyikeli mumbanda wakeña yuma yakuspiritu nawa wukweti kukeña. Tunadiluñishi nankashi yuma yayivulu naDawn muchihandilu chetu.—Yish. 31:12.

Hinamusumbwili, mwana wumu wadiña nayaaka 11, mukwawu 13 nawa mukwawu wadiña na 16. Nafwilileña kwikala nvwali wamuwahi kudi awa anyana, dichi natañileña nikuzatisha yuma yejima yasonekawu munyikanda yetu kutalisha hadi nvwali wakuwanamu. Kwadiña kukala kwakuvulu hadi yaaka yayivulu, ilaña natiyileña kuwaha muloña anyana añitejeli kwikala ibwambu dawu nawa tata yawu. Amabwambu jawu adiña nakwinza mpinji yejima kwitala nawa twatiyileña kuwaha neyi anenzi.

Mu 2013, ami niDawn twayili kuWisconsin nakuhemba anvwali jetu akula dehi. Chuma chanhayamishili, mudimu wami wahaBeteli wamanini wanyi. Antambikili kuya nakuzata mudimu wakapinji kantesha kukwashaku kuloñesha kwetu kudipatimenti yatalaña hanyiloña.

MuSeptember 2018, hanshiñu hadiña nakufwasa. Ndotolu wampimini, ilaña wawanini wanyi chuma chaletesheleña iku kukala. Nkumininaku, ndotolu mukwawu wanlejeli kuya nakutala ndotolu watalaña hachikatu chaneurological. MuJanuary 2019, ndotolu mukwawu wanlejeli nindi nidi nachikatu chabulaña kukewa chikaletesha mujimba wejima kuluwankana.

Chimwahitili mafuku asatu, nahemeneña chisela, dichi nadimbukili nawa chikasa chakotokeli. Nahemi ichi chisela hadi yaaka yayivulu nawa nachilukili chikupu. Dichi nelukili nami ñovu yatachikili kumana. Ichi chikatu chatoheli chakwila natachikili kukañanya kuhosha, kwenda nikuminya yakuda.

Nidi namuzañalu muloña nakwashiku kuloñesha kwaYehova kuhitila mukuzataku mudimu wawuhaku. Nazañalalaña muloña nasonekiku yibaaba yayivulu mumagazini yatañañawu andotolu, mahaku niansompeshi. Nadiña cheñi nakukooleka kwakuhosha hawuswa wukwetiwu antu jaYehova wakutondahu kuyuuka nikuyiladika chakadi kuyisha mashi. Dichi inakuhosha muwihi mazu ekala haLuka 17:10: ‘Nidi hohu nduñu wamukunkulwayi. Yuma yinnakoñi diyi yinatela kwila.’