1-2. Njilanyi munateli kwikalilayi mukaKristu neyi kaposhi kakalehi? (1 AKorinda 15:58)

 MU 1978, muTokyo, kuJapan, atuñilimu kaposhi kakalehi chikupu. Antu adiña nakujinoka neyi chakwila kakahumuka wanyi, muloña muniwu musumba mwaswejeli nyitentanshi. Chumanyi chaletesha kabuli kuhumuka? Akakutuña akituñili kakola hampinji yoyimu kekala kakwovu chakwila kanateli kudinyinkesha kulonda kabuli kuhumuka namutentanshi. AkaKristu niwena ekala neyi aka kaposhi. Munjilanyi?

² MukaKristu watela kwikala wakola mbe-e hampinji yoyimu watela kwikala wamwovu. Watela kwikala wakola mbe-e kutalisha kukwovwahila nshimbi jaYehova niyuma yakeñañayi. (Tañenu 1 AKorinda 15:58.) ‘Wanyakalaña kwovwahila’ nawa hetejaña chakumukanjikijaku. Munjila yikwawu, watela kwikala ‘wamwovu muchima,’ kwesekeja nachidi yuma neyi chinatwesheki hela chinateleli kwila mwenomu. (Yak. 3:17) MukaKristu watoñojokaña muniyi njila hekalaña wasweja kukalisha hela wasweja kwovwahaku. Muchinu chibaaba, tukuhanjeka chitunateli kwikala akadi kuswijewa. Tukwiluka cheñi njila jitanu jazatishañayi Satana kulonda atuzeyeshi nawa tukwiluka chitunateli kudikaña nindi.

3. Nshimbinyi jaMukakuhana Nshimbi Wabadika jawanikaña haYilwilu 15:28, 29?

³ Hamu neyi Mukakuhana Nshimbi Wabadika, Yehova natwalekihu kuyinka antu jindi nshimbi jatiyakana. (Isa. 33:22) Chakutalilahu, izanvu dalombolaña damumafuku awakaKristu akusambila dashimwini njila jisatu munateli kutwalekelahu akaKristu kwikala akola mbe-e: (1) kuhitila mukudifukula hohu kudi Yehova nikukaana kudifukula kudi ankishi, (2) kuhitila  mukulemesha lushimbi lwahosha nawu mashi ajila, nawa (3) kuhitila mukwovwahila nshimbi jamuBayibolu jahosha hakubula kwila wuvumbi. (Tañenu Yilwilu 15:28, 29.) AkaKristu makonu anateli ñahi kutwalekahu kwikala akola mbe-e muniyi yuma yisatu?

4. Njilanyi mutwadifukwilaña hohu kudi Yehova? (Chimwekeshu 4:11)

⁴ Twadifukulaña hohu kudi Yehova nikukaana kudifukula kudi ankishi. Wayilejeli aIsarela nindi adifukuleña hohu kudi yena. (Kuhit. 5:6-10) Hamwesekeliwu kudi Diyabolu, Yesu wamwekesheli hatooka nindi twatela hohu kudifukula kudi Yehova. (Mat. 4:8-10) Dichi, hitwadifukulaña kudi ankishiku. Cheñi hitwadifukulaña kudi antu, chili akulumpi jakwitiya, anlomboli amumapolitiki hela antu ayampuhu mujayisela mukaayi nakuyimona neyi anzambiku. Twatwalekañahu kwikala kukabadi kaYehova nawa twadifukulaña hohu kudi owu “waleñeli yuma yejima.”—Tañenu Chimwekeshu 4:11.

5. Muloñadi chitwovwahilaña lushimbi lwaYehova lwahosha nawu wumi nimashi jajila?

⁵ Twovwahilaña lushimbi lwaYehova lwahosha nawu wumi nimashi jajila. Muloñadi? Muloña Yehova wahosha nindi mashi emenañaku wumi, chawaana chalema chafuma kudi yena. (Lev. 17:14) Yehova hayitejeliyi antu kuda mbiji, wayilejeli kubula kuda mashi. (Kutach. 9:4) Wafuntishilihu cheñi ilu lushimbi hampinji yayinkeliyi aIsarela Nshimbi jaMosi. (Lev. 17:10) Nawa walejeli izanvu dalombolaña damumafuku awakaKristu akusambila kushaku lushimbi nawu akaKristu ejima atela ‘kuleka mashi.’ (Yilw. 15:28, 29) Twovwahilaña chikupu ilu lushimbi neyi tunakufuukula njila yatela kutuukilamu. b

6. Chumanyi chitwelaña hakwila twovwahili nshimbi jaYehova jahoshaña hakubula kwila wuvumbi?

⁶ Twovwahilaña chikupu nshimbi jaYehova jahoshaña hakubula kwila wuvumbi. (Heb. 13:4) Kuhitila mukuzatisha nhoshelu yankinji, kapostolu Pawulu watulejeli ‘kujaha’ yiidi yetu yamujimba, dikwila nawu, kuzata nañovu kulonda tufumishi yilwilu yatama yafwilaña mujimba. Twatondolwelaña kutala hela kwila chuma chidi chejima chinateli kutuletesha kwila wuvumbi. (Kol. 3:5; Yoba 31:1) Neyi tudi mukweseka kwakwila yuma yatama, twashikenaña kukaana yitoñojoka hela yilwilu yinateli kukisañana wubwambu wetu naNzambi.

7. Chumanyi chitwatela kufwilaña kwila, nawa muloñadi?

⁷ Yehova wakeñaña ‘tumwovwahileña namuchima wetu wejima.’ (Rom. 6:17) Yuma yatulejañayi kwila yatukwashaña mpinji yejima nawa nshimbi jindi kwila tujihimpa nehi. (Isa. 48:17, 18; 1 Kor. 6:9, 10) Twafwilaña kumutiyisha Yehova kuwaha nikumwekesha chilwilu neyi chamwekesheliyi ñimbi yaMasamu wahosheli nindi: “Nadikasi mumuchima wami kwovwahila nshimbi jeyi mpinji yejima, kushika nikunsa.” (Mas. 119:112) Hela chochu, Satana wukufwilaña kutuzeyesha. Tufutanyi twazatishañayi?

8. Satana wazatishaña ñahi ikabisha kulonda atuzeyeshi?

⁸ Ikabisha. Diyabolu watulukukaña kumujimba nimuyitoñojoka kulonda atuzeyeshi. Wafwilaña ‘kutwida,’ dikwila nawu kukisañana wubwambu wetu naYehova. (1 Pet. 5:8) AkaKristu amumafuku awapostolu ayichiinishileña, ayeteleña nikuyijaha muloña wakufwila kutwalekahu kwimana akola mbe-e. (Yilw. 5:27, 28, 40; 7:54-60) Nimakonu, Satana natwalekihu kuzatisha ikabisha. Chumichi chinakumwekena muchinakuyikabishawu amanakwetu niahela muRussia nimumatuña amakwawu  kushilahu nichinakuyilukukawu amanakwetu kudi akakudimbulula.

9. Lumbululenu muloña wutwatela kwikalila ababala kwikakeja damwekanaña neyi didi hohu chiwahi.

⁹ Ikakeja damwekanaña neyi didi hohu chiwahi. Kubombela hekabisha, Satana wazatishaña cheñi “tufuta.” (Efwe. 6:11) Talenu chuma chamwekeni kudi manakwetu Bob atentekeliwu muchipateli kulonda amuladiki. Wayilejeli andotolu nindi hela chakwila chikukala chamuchidinyi, wukwiteja wanyi kumusha mashi. Mukakuladika wetejeli mwamulejeliwu kudi iwu manakwetu. Hela chochu, hawufuku wakwila nawu kumadiki akamuladika, ndotolu mukwawu wenjili nakumutala manakwetu Bob hanyima yakwila chisaka chindi chinayi dehi kwitala. Ndotolu wamulejeli manakwetu Bob nindi hadaha akumusha mashi wanyi ilaña atela kwikalahu namashi kwakwihi hekwawu yuma yikukala. Hadaha iwu ndotolu watoñojokeleña nindi manakwetu Bob wukuhimpa yitoñojoka yindi chineli chisaka chindi chadiñahu wanyi. Ilaña manakwetu watwalekelihu kwikala wakola mbe-e nakumuleja ndotolu nindi hela chikukala chamuchidinyi, wukwiteja wanyi kumusha mashi.

10. Yitoñojoka yawantu yekala ñahi neyi muhetu? (1 AKorinda 3:19, 20)

¹⁰ Yitoñojoka yawantu. Neyi tumonaña yuma neyi chayimonañawu antu, tunateli kuleka kumwovwahila Yehova ninshimbi jindi. (Tañenu 1 AKorinda 3:19, 20.) “Maana amukanu kaayi” kakavulu akojejaña antu kwila yuma yafwilaña mujimba. AkaKristu antesha adiña muPerigamu nimuTiyatira atachikili kumona yilwilu yakudifukula kudi ankishi niyakwila wuvumbi neyi chayimweneñawu antu amuyina nyisumba. Yesu wayifumbili chikupu iyi yipompelu yiyedi muloña wakwiteja yilwilu yawuvumbi. (Chim. 2:14, 20) Makonu antu itwashakamaña nawu atukanjikijaña kwikala nayitoñojoka neyi yawu. Antu amuchisaka niakwetu anateli kutachika kutukundeja nikutukolesha kulonda tufumpi nshimbi jaNzambi. Chakutalilahu, anateli kutuleja nawu chatama wanyi kwila yuma yatama yitunakufwila nawa nawu nshimbi jamuBayibolu jakaanisha kwila wuvumbi jaleka dehi kuzatika.

11. Hampinji yitunakutwalekahu kwikala akola mbe-e, twatela kutondolweladi?

¹¹ Mpinji jikwawu tunateli kutachika kutoñojoka netu nshimbi jatwinkayi Yehova jatiyakanaña wanyi. Hadaha tunateli nikwikala mukweseka “[kwakubadika] hayuma yasonekawu.” (1 Kor. 4:6) Ichi dichelileñawu niakulumpi jakwitiya mumafuku aYesu. Abombeleleña nshimbi jawu kuNshimbi jaNzambi, nawa chumichi chayiletesheleña antu chiyikalileña kwovwahila Nshimbi. (Mat. 23:4) Yehova watwinkaña nshimbi jatiyakana kuhitila Mwizu dindi nimukuloñesha kwindi. Kwosi chuma chikuletesha tubombeli nshimbi jetu kunshimbi jatwinkañayi. (Yish. 3:5-7) Dichi, hitwabadikaña hayuma yasonekawu muBayibolu hela kutuñila akwetu akakwitiya nshimbi kwesekeja nachitunakutoñojokaku.

12. Satana wazatishaña ñahi “ntañishilu yamukunkulwayi”?

¹² Ntañishilu yamukunkulwayi. Satana wazatishaña “ntañishilu yamukunkulwayi” “[niyuma] yawansi yamukaayi” kulonda aluwañeshi nikwambula antu. (Kol. 2:8) Mumafuku awapostolu, muniyi yuma mwabombeleli maana awantu ashindameneni hayitoñojoka yawantu, hantañishilu yawaYudeya yabulili kwikala yamunsona nihantañishilu yakwila nawu akaKristu atela kwovwahila Nshimbi jaMosi. Iyi yitoñojoka yadiña yakutwamba muloña yaletesheleña antu aleki kusha muchima kudi Nsulu yamaana alala, Yehova. Makonu, Satana wazatishaña maprogilamu ahayikunzulemba niintaneti kulonda ataandishileñamu  mbonji ninsañu yakutwamba yahoshañawu kudi anlomboli jamapolitiki. Ichi dichuma chamwekeneña nankashi mumpinji yachipupu chaCOVID-19. c AYinsahu jaYehova atiyilileña wunlomboli watwinkeleña kuloñesha kwetu hiyakamineña nankashi neyi chakamineñawu antu atiyilileña kunsañu jakutwambaku.—Mat. 24:45.

13. Muloñadi chitwatela kwikalila asoñama kuyuma yaluwañeshaña?

¹³ Yuma yaluwañeshaña. Twatela kusha muchima “[kuyuma] yalema nankashi.” (Fwili. 1:9, 10) Yuma yaluwañeshaña yinateli kutudiila mpinji yeneni nawa yikutuletesha kubula kusha maana kuyuma yalema nankashi. Yuma yitwelaña muchihandilu—chidi neyi kuda, kunwa, kuhema ninyidimu yakumujimba—yinateli kutuluwañesha neyi tusweja kuyilemesha nankashi muchihandilu chetu. (Luka 21:34, 35) Kubombelahu, ifuku niifuku tunakutiyaña nsañu jakubula kutiyañana ninsañu jamapolitiki. Bayi twiteja iyi yuma yituluwañeshiku. Neyi kubabala nehi, tunateli kutachika kukokwela kumu muyitoñojoka yetu nimumuchima. Satana wazatishaña iji njila jejima jitunahanjekihu kulonda atuzeyeshi tuleki kwila yuma yayiwahi. Tuhanjekenu chitunateli kudikaña nindi nichitunateli kutwalekahu kwikala akola mbe-e.

14. Chumanyi chimu chinateli kutukwasha kutwalekahu kwikala kukabadi kaYehova?

¹⁴ Toñojokenuña hachuma chayiletesheli mudihani nikupapatishewa. Mwelili yumiyi muloña mwakeñeleña kwikala kukabadi kaYehova. Anukenu yuma yayikwashili kwiluka chikupu nenu munawani chalala. Mwamwilukili Yehova nawa mwatachikili kumulemesha nikumukeña hamu neyi Tata yenu wamwiwulu. Mwekalili nachikuhwelelu nawa mwabalumukili mumuchima. Muchima wenu wayisañumwini kuleka kwila yuma yatama nakutachika kwila yuma kwesekeja nankeñelu yaNzambi. Mwatiyili kuwaha chimwelukili nenu Nzambi nayanakeni. (Mas. 32:1, 2) Mwatachikili kupompa nikulejaku antu yuma yayiwahi  yimwadizili. Chineli mudi mukaKristu wadihana nawa wapapatishewa, ichi munakwenda munjila yatwalaña kuwumi nawa himunakufwila kufumamuku.—Mat. 7:13, 14.

15. Kudiza nikutoñojokahu chikupu kwalemenadi?

¹⁵ Dizenuña Izu daNzambi nikutoñojokahu chikupu. Neyi chochinateli kukola mutondu wudi nanyiji yajiyama, ninetu tunateli kutwalekahu kwikala akola mbe-e neyi tukuhwelela chikupu Izu daNzambi. Mutondu neyi wunakukula, nyiji yawu yajiyamaña nikutwalekahu kutaanda. Neyi tudizaña nikutoñojokahu chikupu, twakoleshaña chikuhwelelu chetu nikwiluka chikupu netu yuma yatulejañayi Nzambi nindi twileña yayiwahi. (Kol. 2:6, 7) Toñojokenuña hanshimbi jaYehova nikufumba kwindi chijayikwashileña ambuñindi akunyima nikuyikiña. Chakutalilahu, Ezekeli washiliku chikupu muchima hampinji yapimineñayi kañelu chakekala tembeli yamweniyi muchimwenu. Ichi chimwenu chamukolesheli Ezekeli nawa chatukwashaña kwiluka chitwatela kwovwahila nshimbi jaYehova jahosha hakudifukula kwalala. (Ezek. 40:1-4; 43:10-12) Ninetu neyi tudizaña nikutoñojoka chikupu hayuma yakunama yaMwizu daNzambi, mwafumaña yuma yayiwahi.

16. Kwikala namuchima wakola chikupu kwamukwashili ñahi manakwetu Bob? (Isamu 112:7)

¹⁶ Ikalenu namuchima wakola chikupu. Mwanta Davidi wahosheli nindi hamba kaleka kumukeña Yehovaku, nanochu chembiliyi nindi: “Muchima wami wakola chikupu, eyi Nzambi.” (Mas. 57:7) Ninetu tunateli kwikala namuchima wakola, nakukuhwelela chikupu mudi Yehova. (Tañenu Isamu 112:7.) Talenu chumichi chichamukwashili manakwetu Bob ashimunawu hakusambila. Chamulejeliwu nawu akwikalahu namashi kwakwihi hadaha yuma yikukala, washikeneni kumuleja ndotolu nindi neyi kukumwekana kukala kudi kwejima kukuletesha amushi mashi, wukufuma muchipateli hohenohu. Nkuminaku, manakwetu Bob wahosheli nindi, “Hinashintajalili hela kwakama hachuma chadi kummwekenaku.”

17. Chumanyi chitunateli kudizila kudi manakwetu Bob? (Talenu cheñi mwevulu.)

¹⁷ Manakwetu Bob wadiña wakola muloña wafuukwilili chadimu kutwalekahu kwikala wakola mbe-e henohu kanda ayi kuchipateli.  Chatachi, wakeñeleña kumuzañalesha Yehova. Chamuchiyedi, wadizili chikupu chahosha Bayibolu ninyikanda yetu kutalisha hachitwatela kumona wumi nimashi netu jajila. Chamuchisatu, welukili nindi neyi alondelaña nshimbi jaYehova, mwakafuma yuma yayiwahi yahaya nyaaka. Ninetu tunateli kwikala namuchima wakola chikupu hela chakwila tunakumona kukala kwamuchidinyi.

18. Chuma cheliliyi Baraki chinakutudizisha ñahi kumukuhwelela Yehova? (Talenu mwevulu wudi hakava.)

¹⁸ Mukuhwelelenuña Yehova. Talenu Baraki chashindiliyi muloña wakukuhwelela nshimbi jaYehova. Hela chakwila mwituña dejima himwadiñahu nkebu hela iyoñaku, Yehova wamulejeli kuya nakuzuña njita namukulumpi wamashidika awaKenani, Sisera hamu nimashidika indi, owu adiña nayitwa yanjita yayivulu. (Anso. 5:8) Kaprofwetu wamumbanda Debora wamulejeli Baraki kukunkumuka nakuya muchana chesekana kulonda adibulakani naSisera nimakalu indi 900. Hela chakwila makalu adi kuyikwasha ayilumbu jawu kuzuña chiwahi njita heseki desekana, Baraki wovwahilili. Amashidika chakunkumukileñawu haMpidi yaTabori, Yehova wanokesheli nvula yeneni. Makalu aSisera atapamini mumalowa nawa Yehova wamukwashili Baraki kushinda. (Anso. 4:1-7, 10, 13-16) Munjila yoyimu, ninetu Yehova wukutukwasha kwimika mushindu neyi tumukuhwelela yena ninshimbi jatwinkañayi kuhitila mukuloñesha kwindi.—Kuhit. 31:6.

19. Muloñadi chimwatela kutwalekelahu kwikala akola mbe-e?

¹⁹ Hampinji yituchidi kushakama mukanu kaayi katama, twatela kuzata nañovu hakwila tutwalekihu kwikala akola mbe-e. (1 Tim. 6:11, 12; 2 Pet. 3:17) Bayi mwiteja ikabisha, ikakeja damwekanaña neyi didi hohu chiwahi, yitoñojoka yawantu, ntañishilu yamukunkulwayi niyuma yaluwañeshaña yiyilelujoleñaku. (Efwe. 4:14) Ilaña twikalenu akola mbe-e, nakutwalekahu kumukeña Yehova nikwovwahila nshimbi jindi. Hampinji yoyimu, twatela kwikala amwovu muchima. Muchibaaba chinalondelihu, twakahanjeka hadi Yehova niYesu chamwekeshañawu chikupu nawu amwovu muchima.