1. Chalemenadi kudiloñeshela chadimu henohu kukala kanda kumwekani?

 NEYI tudiloñeshela chadimu tunateli kupulwisha mawumi etu. Chakutalilahu, neyi kudi wubanji, antu anadiloñesheli chadimu anateli kupuluka nakukwashaku akwawu. Mutayi wakwashaña antu muEurope wahoshaña nawu: “Kudiloñeshela chadimu kunateli kupulwisha mawumi.”

2. Muloñadi chitwatela kudiloñeshela chadimu nalukadi lwasweja? (Matewu 24:44)

² “Lukadi lwasweja” lwakenza mukukasumwisha. (Mat. 24:21) Hela chochu, kwambukaku nawubanji wawuvulu wamwekanaña, lukadi lwasweja hilwakashintakesha antu ejimaku. Kwakwihi nayaaka 2,000 yinahitihu, Yesu wayisoñamishili akakumulondela kudiloñeshela chadimu nanidi ifuku. (Tañenu Matewu 24:44.) Neyi tudiloñeshela chadimu, chakatupelela kuumika muyina mpinji yakala nawa twakakwasha akwetu kwila chochimu.—Luka 21:36.

3. Kuumika, wushona nikukeña jakatukwasha ñahi kudiloñeshela chadimu nalukadi lwasweja?

³ Talenu yilwilu yisatu yinateli kutukwasha kudiloñeshela chadimu nalukadi lwasweja. Twakela ñahi neyi atuleja kushimwina nsañu yakala yawunsompeshi nawa antu abula kwitiya akaana? (Chim. 16:21) Twakakeñekaña kwikala omika hakwila twakamwovwahili Yehova nakukuhwelela netu wukutukiñaña. Twakela ñahi neyi amanakwetu ajimbesha yuma yawu yantesha, indi kwiji yejima? (Hab. 3:17, 18) Twakakeñekaña kwikala nawushona kulonda wakatukwashi kuyinkaku yuma yakakeñekaña. Twakela ñahi neyi kulukuka kwanyuza kwakaletesha twakakeñekeña kushakama hamu nawamanakwetu niahela hakapinji kantesha? (Ezek. 38:10-12) Twakakeñekaña kwikala nakukeña chikupu hakwila  akatukwashi kuumika hayina mpinji yakala.

4. Bayibolu yamwekeshaña ñahi nawu twatela kwikala nachilwilu chakuumika, wushona nikukeña?

⁴ Izu daNzambi datukoleshaña kutwalekahu kwikala nachilwilu chakuumika, wushona nikukeña. Luka 21:19 yahoshaña nawu: “Neyi mwakomika, mwakapulwisha mawumi enu.” AKolosi 3:12 yahoshaña nawu: “Vwalenu muchima wawushona.” Nawa 1 ATesalonika 4:9, 10 yahoshaña nawu: “Ayidizisha dehi kudi Nzambi chakudikeña wumu namukwawu. . . . Ilaña tunakuyilembelela enu anakwetu netu, mutwalekihu chikupu kwila mwenimu.” Awa mavasi ejima ayisonekeleli atumbanji adiña amwekeshahu dehi chilwilu chakuumika, wushona nikukeña. Hela chochu, ateleleli kutwalekahu kwikala naniyi yilwilu. Ninetu dichitwatela kwila. Hakwila twili mwenimu, tukushinshika hadi akaKristu akusambila chamwekesheliwu iyi yilwilu yejima. Kuhiñahu tukumona chitunateli kuyimbujola ana atumbanji nichitunateli kumwekesha netu tunadiloñesheli chadimu nalukadi lwasweja.

5. AkaKristu akusambila omikili ñahi kukala kwamweneñawu?

⁵ AkaKristu akusambila akeñekeleña kuumika. (Heb. 10:36) Hela chakwila amweneña kukala kwamweneñawu antu ejima, amweneña cheñi kukala kukwawu. Amavulu hakachi kawu ayikabishileña, bayi hohu kudi akulumpi jakwitiya kwawaYudeya niakawuswa amuRomaku, ilaña nikudi antaña jawu. (Mat. 10:21) Nawa muchipompelu, mpinji jikwawu adiña nakuzata nañovu kulonda abuli kuyiluwañesha kudi akakusekesha ninantañishilu yawu yakutwamba. (Yilw. 20:29, 30) Hela chochu, awa akaKristu omikili. (Chim. 2:3) Omikili ñahi? Atoñojokeleña chikupu hadi antu ashimunawu muNsona, adi neyi Yoba. (Yak. 5:10, 11) Alombeleña kulonda ayinki ñovu. (Yilw. 4:29-31) Nawa ashili muchima hayuma yayiwahi yakafumamu neyi omika.—Yilw. 5:41.

6. Chumanyi chimunadizili kuchuma cheliliyi muhela Merita hakwila omiki ikañesha?

⁶ Ninetu tunateli kuumika neyi tudizaña nikutoñojoka chikupu hadi antu omikili ashimunawu Mwizu daNzambi nimunyikanda yetu. Muloña wakwila chumichi, muhela Merita wakuAlbania, watwesheli kuumika ikañesha dasweja damuchisaka. Wahosheli nindi: “Nsañu yamuBayibolu yahosha hadi Yoba yankolesheli nankashi. Wakabakeni chikupu chakwila welukili wanyi waletesheli ahiteña muniku kweseka. Hela chochu, wahosheli nindi: ‘Nukuhembaña kashinshi kami, nichinakafwa!’ (Yoba 27:5) Natoñojokeli hakukala kwaYoba chikwaswejeli kubadika kwami. Kwambukaku naYoba, ami nelukili wakojejeleña kukala kunamweneña.”

7. Hela chikwila hitunakumona kukala kwasweja chayinu mpinjiku, chumanyi chitwatela kwilaña?

⁷ Tunateli cheñi kwikala nachilwilu chakuumika chikupu neyi tumulejañamu Yehova mpinji yejima yuma yinakutwakamisha. (Fwili. 4:6; 1 Tes. 5:17) Hadaha himunakumona kukala kwasweja chayinu mpinjiku. Hela chochu, komana mwamulombaña Yehova nenu ayikwashi mpinji yejima yimunahili, yimunaluwankani, indi kwiji yinabuli kwiluka chakwila? Neyi mukulombaña kudi Nzambi yetu nenu ayikwasheña nakukala kumwamonaña hefuku-hefuku chayinu mpinji, himwakashintajala kulomba wukwashu neyi mumona kukala kweneni kumbidiku. Kuhiñahu, mwakeluka chikupu nenu weluka mpinji yakuyikwasha nichatela kuyikwashayi.—Mas. 27:1, 3.

8. Chakutalilahu chamuhela Mira chinakumwekesha ñahi nawu neyi tuumika kukala makonu chikatukwasha kuumika nikumbidi? (Yak. 1:2-4) (Talenu cheñi mwevulu.)

⁸ Twakatwesha kuumika lukadi lwasweja ludi kumbidi neyi tuumikaña kukala kutunakumona makonu. (Rom. 5:3) Tunahoshelidi mwenimu?  Amanakwetu amavulu ahoshaña nawu chomikawu kukala kumu chayikwashaña kuumika kukala kukwawu neyi kumwekana. Neyi omika kukala nawukwashu waYehova, akuhwelelaña chikupu nawu Yehova wafwilaña kuyikwasha. Nawa chineli amukuhwelela, anateli kuumika kukala kukwawu kunateli kumonawu. (Tañenu Yakoba 1:2-4.) Muhela Mira, payiniya muAlbania, wahosheli nindi chomikiliyi kukala kunyima chamukwashaña kutwalekahu kuumika. Wetejaña nindi mpinji jikwawu wamonaña nindi yena hohu diyi wamonaña kukala kwakuvulu. Ilaña wanukaña Yehova chinamukwashiyi hadi yaaka 20 yinahitihu, nawa wadilejaña yomweni nindi: ‘Twalekakuhu kwikala washinshika. Bayi wuleka kumukalakela Yehova hanyima yakukukwasha kuumika kukala kwejimiku kuwunahitimuku.’ Ninenu munateli kutoñojoka hachinayikwashiyi Yehova kuumika. Kuhwelelenu chikupu nenu wamonaña mpinji yejima yimwomikaña kukala nawa wakayisomwena. (Mat. 5:10-12) Dichi neyi lukadi lwasweja lunatachiki, mwakekala mweluka dehi chakuumika nawa mwakafwilaña kutwalekahu kuumika.

9. Chipompelu chamuAntiyoki yamuSiriya chamwekesheli ñahi wushona?

⁹ Talenu chuma chamwekeni hampinji yadiñawu akaKristu amuYudeya munzala yakapwelendendi. Chelili chipompelu chamuAntiyoki yamuSiriya chitiyi nawu kudi nzala yakapwelendendi, chakadi nikujina, ayitiyilili amanakwetu ashakamineña muYudeya wushona. Kufumahu amwekesheli wushona kuhitila mukuyikwasha. “Afuukwilihu hamuntu-hamuntu, kuhana yuma yakutemesha kudi anakwawu ashakamineña muYudeya kwesekeja nahakuminini ñovu jawu.” (Yilw. 11:27-30) Hela chakwila amanakwetu adiña munzala yakapwelendendi ashakamineña kwakulehi, akaKristu muAntiyoki afwilileña kuyikwasha.—1 Yow. 3:17, 18.

10. Njilanyi mutunateli kumwekeshela wushona neyi akwetu mutwadifukwilaña adi mukukala kweneni? (Talenu cheñi mwevulu.)

¹⁰ Ninetu makonu tunateli kumwekesha wushona neyi twiluka netu akwetu mutwadifukwilaña adi mukukala kweneni. Twanyakalaña kukwashana, hadaha kuhitila mukwihula akulumpi neyi chakwila tunateli kuzataku mudimu wumu, kuhanaku yawaana kumudimu wamukaayi kejima hela kuyilombelaku ana adi mukukala. b (Yish. 17:17) Chakutalilahu, mu 2020, atondeli Jikomiti Jakwashaña Antu Adi Mukukaankila kubadika ha 950 kulonda akameni antu akeñekeleña wukwashu mumpinji yachipupu chaCOVID-19. Twayisakililaña nankashi amanakwetu niahela azataña mujikomiti jakukwasha antu adi mukukaankila. Muloña wakwila ayitiyilaña amanakwawu niahela wushona, ayitwalilaña yuma yakumujimba, kuyakamena kuspiritu nawa mpinji jikwawu awahishaña hela kutuñulula matala nimaluña akudifukwila.—Esekejenu 2 AKorinda 8:1-4.

11. Twamulemeshaña ñahi Tata yetu wamwiwulu neyi tumwekeshaña wushona?

¹¹ Neyi tumwekesha wushona hampinji yikunamwekani wubanji, antu amonaña chitwadihanaña. Chakutalilahu, mu 2019, mpepela yeneni yaHurricane Dorian yakisañeni Itala daWanta muBahamas. Hampinji yatuñulwileñawu amanakwetu Itala daWanta, ehwili kontilakita wabula kwikala Chinsahu kulonda ayileji mali akukeñeka hakwila amanishi iwu mudimu. Wayilejeli nindi: “Inakufwila kuhanaku . . . ikina, akakuzata niyuma yakuzatisha. . . . Inakukeña hohu kukwashaku kuloñesha kwenu. Natiyaña kuwaha [chimwayikwashaña] akwenu.” Antu amavulu mukaayi amwiluka Yehova wanyi. Ilaña amavulu hakachi kawu amonaña  aYinsahu jaYehova chakwashañawu akwawu. Twazañalalaña chikupu hakwiluka netu wushona wutwamwekeshaña wunateli kuswija antu kwakwihi nanowu “wasweja luwi nankashi”!—Efwe. 2:4.

12. Kwikala nawushona makonu kunateli kutukwasha ñahi kudiloñeshela chadimu nalukadi lwasweja? (Chimwekeshu 13:16, 17)

¹² Muloñadi chitwakakeñekelaña kumwekesha wushona mumpinji yalukadi lwasweja? Bayibolu yamwekeshaña nawu ana akabula kudiñija munsañu jamatuña nachiyuulu akumonaña kukala, chayinu mpinji nimumpinji yalukadi lwasweja. (Tañenu Chimwekeshu 13:16, 17.) Amanakwetu niahela akakeñekaña kuyikwasha muyuma yakabulishañawu hakwila akatwalekihu kuhanda. Mwanta wetu, Kristu Yesu, chakenzayi nakusompesha akatuwani tunakumwekesha wushona kulonda akatutambiki ‘twakaswani Wanta.’—Mat. 25:34-40.

13. Neyi chinamwekeshiwu haARoma 15:7, akaKristu akusambila aswejeleleñaku ñahi kudikeña wumu namukwawu?

¹³ Kukeña dichinjikijilu chayilukilileñaku akaKristu akusambila. Komana chayipeleleleña kumwekesha kukeña? Talenu kushiyashana kwadiña hakachi kawantu adiña muchipompelu chamuRoma. Hakachi kawu hihadiña hohu aYudeya ana akulishiliwu nakwovwahila Nshimbi jaMosiku, ilaña hadiña niAkamatuña adiña nankulilu yambukaku chikupu. AkaKristu amakwawu atela adiña anduñu ilaña amakwawu adiña asubuka, hadaha amakwawu adiña ninawanduñu. Ana akaKristu atwalekelihu ñahi kudimwekeshela kukeña wumu namukwawu hela chakwila adiña ashiyashana? Kapostolu Pawulu wayikonkomweneni “[kuditambwila] wumu namukwawu.” (Tañenu ARoma 15:7.) Watalishili mudihi? Izu dabalumunawu nawu “ditambwilenuña” datalisha mukutambwila muntu chachiwahi hela nachisambu, chidi neyi kwitala hela hakachi kawamabwambu. Chakutalilahu, Pawulu wamulejeli Fwilemoni chakumutambwila nduñu Onesimusa wadiña itunduka nindi: “Wakamutambwili chachiwahi.” (Fwile. 17) Nawa aPrisila naAkwila amutambwilili Apolosi, owu welukili yuma yantesha hadi akaKristu kubadika chelukiliwu wena, kuhitila ‘mukumutwala hambadi.’ (Yilw. 18:26) Hiyetejeli kushiyashana kwawu kuleti kukala hakachi kawuku, ilaña ana akaKristu aditambwilili wumu namukwawu.

14. Muhela Anna nanfumwindi amwekesheli ñahi kukeña?

¹⁴ Ninetu tunateli kuyimwekeshela amanakwetu niahela kukeña kuhitila mukuyilisha kwikala amabwambu jetu. Niwena akutachika kutumwekeshela kukeña. (2 Kor. 6:11-13) Talenu chuma chamumwekeneni muhela Anna nanfumwindi. Chabuukililiwu hohu kuWest Africa mumudimu wawumishonali, chipupu chaCOVID-19 chatachikili. Chineli kwadiña ichi chipupu, hiyadiña nakupompela hamu nachipompeluku. Awa adisumbula adi kumwekesha ñahi kukeña? Azatishileña mavidiyo konfalensi kulonda ahanjekeña nawamanakwetu niahela nawa ayilejeleña chafwilileñawu kuyiluka chiwahi. Yisaka yatiyileña kuwaha nankashi nawa yatachikili kuyitemeshela mafoni kakavulu nimameseji. Muloñadi awa adisumbula chafwilileñawu kuyiluka amanakwawu niahela? Muhela Anna wahosheli nindi, “Hinakavulamena kukeña kwammwekesheleliwu ami nichisaka chami mumpinji yayiwahi niyatamaku. Nawa chumichi chanleteshaña ninami kumwekesha kukeña.”

15. Chumanyi chimunakudizila kudi muhela Vanessa kutalisha hakumwekeshela amanakwetu niahela ejima kukeña? (Talenu cheñi mwevulu.)

¹⁵ Muyipompelu yetu yayivulu mwekala amanakwetu niahela afuma kuyitachi yashiyashana nawa akweti yilwilu yashiyashana. Tunateli kuyimwekeshela chikupu kukeña kuhitila mukusha maana hayilwilu yawu yayiwahi. Muhela  Vanessa, wakalakelaña kuNew Zealand, chamukalilileña kudikunda nawantu amakwawu muchipompelu. Ilaña wafuukwilihu nindi chatela ayitondolweleña antu adiña nayilwilu yamuneñesheleña, watachikili kuwanaku mpinji yakwikala nawu hamu. Kwila mwenimu kwamukwashili kwiluka yuma yakeñayi Yehova hadi awa antu. Wahosheli nindi: “Kufuma hekaliliyi nfumwami nkoñi wañinza, twawanikaña nawamanakwetu niahela amavulu akweti yilwilu yashiyashana nawa champelelaña kudikunda nawu. Ichi nakeña antu ashiyashana. Nakuhweleli Yehova niyena wayikeña muloña diyi watuleta munidi izanvu mwekala antu ashiyashana.” Neyi tutachika kumona akwetu neyi chayimonañayi Yehova, twamwekeshaña netu twayikeña.—2 Kor. 8:24.

16. Muloñadi chitwakakeñekelaña kuyimwekeshela amanakwetu niahela kukeña mumpinji yalukadi lwasweja? (Talenu cheñi mwevulu.)

¹⁶ Chakakeñekaña kumwekesha kukeña mumpinji yalukadi lwasweja. Neyi ilu lukadi lunatachiki, Yehova wakatukiña ñahi? Talenu Yehova chayilejeliyi antu jindi kwila hampinji yamulukukiliwu Babiloni, nindi: “Yenu, enu antu jami, iñilenu mutupeka twenu twamukachi, nawa mudenzeleliku. Swamenu hakapinji kantesha sampu kuzuwa kunahiti dehi.” (Isa. 26:20) Chinamwekani neyi awa mazu anatukundami ninetu twakahita mulukadi lwasweja. ‘Tupeka twamukachi’ tunakwimenaku yipompelu. Mumpinji yalukadi lwasweja, Yehova wakatukiña neyi chatukanayi hampinji yitunakutwalekahu kwikala anuñañana nawakwetu akakwitiya. Twatela kuzata nañovu yoyinu mpinji kulonda tuyimwekesheleña amanakwetu niahela kukeña chikupu. Hadaha twakapuluka muloña waniku kukeña!

17. Neyi tudiloñeshela chadimu yoyinu mpinji, yumanyi yitwakela mumpinji yalukadi lwasweja?

¹⁷ “Ifuku deneni daYehova” dakayiletela antu yihuñu. (Zef. 1:14, 15) Antu jaYehova niwena akakabakana. Ilaña neyi tudiloñeshela chadimu yoyinu mpinji, twakekala awunda nawa twakayikwashaña akwetu. Twakomika kukala kwejima kutwakamona. Neyi akwetu akakwitiya anakukabakana, twakazata kwesekeja nahanakumini ñovu jetu kuyikwasha kuhitila mukuyimwekeshela wushona nikuyinka yuma yakakaankilawu. Nawa twakasweja kudikunda nawamanakwetu niahela, itwatachika dehi kumwekeshela kukeña. Kuhiñahu Yehova wakatwinka wumi wahaya nyaaka mwituña mutwakabula kwanuka wubanji nimakabi adi ejima.—Isa. 65:17.