Komana Mweluka?
Matafwali awaniniwu muBabiloni yajilumwiniwu ninjila mwayifwatwililiwu jamwekeshaña ñahi nawu nsañu yekala muBayibolu yoloka?
AKAKUVUMBUJOLA avumbula matafwali amavulu akwocha muBabiloni azatishiliwu kutuña nachu musumba. Kwesekeja nachahosheliyi mukakuvumbujola wejina daRobert Koldewey, awa matafwali ayifwatwilileña mumaluteñu adiña “hanji yatawuni, hadiña ndambu yayiwahi ninchawa . . . jajivulu.”
Nsañu jakunyaaka jamwekeshaña nawu ayilolu amuBabiloni azatishileña cheñi maluteñu kwililamu yuma yatama nankashi. Paul-Alain Beaulieu, muntu wadiza chikupu nsañu jakunyaaka jawaAsiriya wahaUniversity yaToronto, wahosheli nindi: “Nsañu yayivulu yasonekeliwu aBabiloni yamwekeshaña nawu . . . mwanta wahanini lushimbi nindi antu ejima adikañileña nayena hela abulileña kulemesha yuma yajila, ateleleli kuyinatila muluteñu nakuyochela mwenomu.” Chakutalilahu, nsañu yimu yasonekeliwu mumafuku aMwanta Nebukaneza yahosha nawu: “Yikisañanenu, yochenu, yikañenu . . . mwijiku . . . wishi wawu wukakumuki nakuya mwiwulu, yijahenu kuhitila mukuyuumbila mumulañi wakesi.”
Yumiyi yayanukishaña antu atañaña Bayibolu yuma yamwekeni yasonekawu muDanyeli kapetulu 3. Kwesekeja nachahosha iyi nsañu yakunyaaka, Mwanta Nebukaneza wemikili nkishi weneni wakutuña nawuru muchana chaDura, hanji yamusumba waBabiloni. Chelili anyikwenzi asatu aHeberu, aShadiraki, Mishaki niAbedinego akaani kufukamina iwu nkishi, Nebukaneza wazuwili nankashi, wahanini lushimbi nindi “luteñu lwakesi alutatishi mapampa 7 kubadika chilwadiña,” nawa ana amayala asatu ayinatilili ‘muluteñu lwakesi kabidimineña.’ Kañelu wañovu wayamwinini kukufwa.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Itafwali dakwocha hanabaziliwu ijina daNebukaneza
Nimatafwali awaBabiloni amwekeshaña nawu nsañu yekala muBayibolu yoloka. Hakachi kanawa matafwali, amavulu abazililihu nsona jakumushimeka nachu mwanta. Haniji nsona, hadiña nsona jakubaza nawu: “Nebukaneza, Mwanta waBabiloni . . . Chipañu, iluña dinatuñili mwakushakama wami Mukawukeleñi . . . Ejikulwami akayuulilañamu haya nyaaka.” Iji nsona jinadifwani chikupu nansañu yasonekawu haDanyeli 4:30, hadivwimbiliyi Nebukaneza nindi: “Komana iwu hidiyi Babiloni Muneni inadituñilili ami aweni nañovu jami niwuswa wami kulonda ekali itala dawanta nikutiyakeshelamu wukeleñi wamiku?”
