Atata adiña akulumpi muchechi yaUnited Church of Canada yamwiluña mutwashakamineña, dichi mulungu-nimulungu atata atulejeleña ami nimuhelami kuya kuSunday school, nkumininaku twatachikili kuya nakutaña nawu kuchechi ha 11:00 koloku. Namwaana, twayileña nawamama Kwitala daWanta. Twatachikili kumona chaambu chadiña hakachi kaniku kudifukula kuyedi.

Amama atachikili kulejaku amabwambu jawu aBob naMarion Hutcheson adikundiliwu nawu hadi mpinji yayilehi yuma yakuhweleleliwu, nawa niwena ekalili aYinsahu jaYehova. Mu 1958, chisaka chawaHutcheson chansendeli ami ninyanawu awamayala kukupompa kwamafuku 8 kwaDivine Will International Assembly muNew York City. Ichi neluki nami azatili nañovu hakwila ansendi, ilaña iku kupompa kudi hayuma yayiwahi nankashi yinanukaña muchihandilu chami.

Hinadiña kansi, twashakamineña hafamu nawa natiyileña kuwaha kwakamena ayimuna. Nafwilileña chikupu kudiza kulonda nakekali ndotolu wawanyama. Amama alejeli mukulumpi wumu wamuchipompelu iyi nsañu. Wañanukishili nindi tunakushakama “mumafuku akukuminina” nawa wanlejeli wubwambu wami naYehova chiwunateli kuluwankana neyi niya kuyunivesiti hadi yaaka yayivulu.  (2 Tim. 3:1) Chafuminimu, nafuukwilihu kubula kuya kuyunivesiti.

Hela chochu, nakañenyi kwiluka chuma chinakela neyi namanishi shikola. Hela chakwila nayileña mumudimu wakushimwina kunsa yamulungu-himulungu, hinakeñeli kushimwinaku, nawa namweneña nami kwila nikala payiniya nehi. Haniyi mpinji, atata niatata awanyiki abulili kwikala aYinsahu ankolesheleña kwiñila mudimu kukampani yeneni yainshuwaransi muToronto. Atata awanyiki adiña nachifulu cheneni haniyi kampani, dichi netejeli iwu mudimu.

MuToronto, nakañenyeña kwila yuma yakuspiritu mpinji yejima muloña wakuzata maora amavulu mpinji yejima nikudikunda nawantu abulileña kudifukula kudi Nzambi. Hakusambila nashakamineña nawankaaka awamayala abulili kwikala aChinsahu, ilaña chafwiliwu, nakeñeleña kunatela kuya nakushakama.

Chisaka chawaHutcheson ana ansendeli kukupompa mu 1958, adiña tuhu neyi anvwali jami. Anlejeli nawu nishakameña nawu nawa ankwashili kwikala nawubwambu wakola naYehova. Mu 1960, napapatisheweli hamu namwanawu John. John watachikili wupayiniya nawa chumichi chaletesheli ninami nitachiki kushimwina nankashi. Amanakwetu muchipompelu amweni chinapamineña kuspiritu, nkumininaku antondeli kwikala nkoñi washikola itunakutena makonu netu nkoñi waKupompa kwaChihandilu niMudimu.

Mu 1966, nasumbwili Randi Berge, payiniya wadikita wafwilileña kuzatila kudi kukaankila. Nkoñi wetu wañinza watukwashili kuhitila mukutuleja nindi tuyi nakukwasha chipompelu chamuOrillia, Ontario. Dichi twaloñejekeli yuma yetu nawa twayili.

Chitwashikili muOrillia, ninami nekalili payiniya. Nekalili namuzañalu neyi wadiña naRandi! Chinatachikili kudikita wupayiniya, nekalili namuzañalu muloña wakuzatisha Bayibolu nikumona antu chatiyishishileñawu chalala. Natiyili kuwaha chinakwashili adisumbula amu muOrillia kuhimpa yilwilu yawu nakwikala ambuña aYehova.

Hitwayili kuToronto, nadibulakeni namanakwetu  Arnold MacNamara, wadiña hakachi kawamanakwetu alombweleña haBeteli. Watwihwili neyi chakwila tukukeña kwikala apayiniya adimena. Nashikeneni kwakula nami: “Eña! Hela chochu, chiña hohu muQuebec!” Naluwankeni nayitoñojoka yawantu ahosheleña Ingilishi adiña mwiluña dimu damuCanada chatoñojokeleñawu hakabeta kaQuebec mwashakamineña antu ahosheleña idimi daFrench. Hayina mpinji, antu adikañileña nanfulumendi nawa akeñeleña kabeta kaQuebec kadimeni, kabuli kwikala mbadi yaCanada.

Manakwetu Arnold watulejeli nindi, “Hayinu mpinji kasanji kamutayi kanakutemesha apayiniya adimena muQuebec hohu.” Hohenohu netejeli kuya. Nadiña neluka dehi nami Randi wakeñeleña kuya nakuzatila kwenoku. Nkumininaku, nenjili nakwiluka nami chuma chitwelili chadiña chachiwahi.

Chitwamanishili shikola yamwidimi daFrench yanyilungu yitanu, ami naRandi kushilahu nieyala namumbanda amu adisumbula twayili kuRimouski, hadiña chintampu chamakilomita 540 (mamayilu 336) kuya kukabeta kakuchimunswa namusela waMontreal. Kwadiña yuma yayivulu yitwachidiña kanda twiluki, nawa chumichi chamwekeni hatooka hakupompa hinadiña nakukooleka kwakutaña yakubidika. Nabidikili nami hakupompa kweneni kunakwinza, twakatambwila antu amavulu “akafuma kuostrich” chatela nibidiki nami “akafuma kuAustria.”

MuRimouski, etu awana twatachikili kuzatila hamu nawahela ajiki awana adikita kushilahu nichisaka chawaHuberdeau nianyanawu ayedi awambanda. Chisaka chawaHuberdeau chasonkeleleña itala dadiña natupeka 7 twakukaamamu, itala dawapayiniya ditwateneneña netu White House muloña yishimi yadu nimbañu yakumbidi jadiña jitooka. Kakavulu twashakamineñamu antu 12 nakushika ku 14. Chineli twadiña apayiniya adimena, ami naRandi twayileña nakushimwina nabudidi, namwaana nimelela, dichi twatiyileña kuwaha neyi kwikalaña muntu wakuya nindi nakushimwina—nihampinji yikwatuutileña nankashi namelela.

Twadikundili nankashi nanana apayiniya ashinshika chakwila twekalili tuhu neyi chisaka. Mpinji jikwawu twashakamineña hamu kukesi hela kwikala “nefuku dakutelekela hamu.” Manakwetu wumu wadiña ñimbi, dichi Mposu-hiMposu nawufuku twadiña nakwimba nikuhañana.

Antu amavulu muRimouski akeñeleña kudiza chalala. Muyaaka yitanu, twadiña namuzañalu wakumona atudizi aBayibolu amavulu anakupapatishewa. Chipompelu chakulililiku nakwikala nawakakushimwina kwakwihi na 35.

MuQuebec, atudizishili chiwahi chakuzata mudimu wakushimwina. Twamweni Yehova chatukwashileñayi muniwu mudimu nimuyuma yakumujimba. Kubombelahu, twatachikili kuyimwekeshela antu ahosheleña idimi daFrench kukeña, twakeñeli idimi dawu nichisemwa chawu, nawa chumichi chaletesheli tutachiki kukeña niyisemwa yikwawu.—2 Kor. 6:13.

Chakadi kukuhwelela, kasanji katulejeli kuya nakuzatila mutawuni yaTracadie, kumujika wachikumu chaNew Brunswick. Chumichi chatukalilili muloña twafumini tuhu nakufwachika chipapilu chakusonkelelahu itala nawa neñilili mudimu wawuntañishi hamafuku amakwawu mumulungu. Kubombelahu, atudizi etu aBayibolu amakwawu dihekaliliwu tuhu akakushimwina nawa twadiña kanda tumanishi kutuña Itala daWanta.

Twalombeli kutalisha haniwu wenyi kunsa yaniwu mulungu wejima nawa twayili kuTracadie nakutalaku, iluña dambukili chikupu naRimouski. Ilaña  twafuukwilihu netu chineli Yehova nakukeña nindi tuyi kwenoku, tukuya. Twamwesekeli Yehova nawa twamweni chatufumishililihu yuma yatukañesheleña. (Mal. 3:10) Chineli Randi wadiña nawubwambu wakola naYehova, muchima wakudihana nawa wadiña waseha nawantu, chatupeleleli kuya.

Muchipompelu mutwayili mwadiña hohu mukulumpi wumu, manakwetu Robert Ross. Wayili nakuzatila wupayiniya kweniku nañodindi Linda nawa chavwalikili mwanawu watachi, afuukwilihu kushakama kweniku. Nihampinji yakameneneñawu mwanawu wanyanya, atukolesheli chikupu nachisambu chawu niyena dakudikita mumudimu wakushimwina.

Hanyima yakukalakala wupayiniya muTracadie hadi yaaka yiyedi, twatambwilili cheñi nsañu yitwabulili kukuhwelela—mutambi wakuya mumudimu wakwenda. Hadi yaaka 7, twakalakeleli mujiñinza mwahosheleñawu Ingilishi, kuhiñahu atulejeli kuya nakukalakela muñinza mwahosheleñawu French, muQuebec. Nkoñi wetu wankambi muQuebec, manakwetu Léonce Crépeault, wanhamekeleña hampanji jinahanineña. Nkumininaku, wañihwileña nindi, “Yumanyi yiwatela kwila hakwila mpanji jeyi jitiyakaneña nankashi?” a Ichi chuma chelileñayi chankwashili kusha muchima kuntañishilu yami kulonda yikaleña yaswayi kutiya.

Mudimu wunanukaña nankashi, himudimu wañinkeliwu hakupompa kwamatuña kwadiñaku mu 1978 muMontreal, kwadiña namutu nawu “Victorious Faith.” Nazatilili kuDipatimenti yaYakuda. Twakuhweleleli kutambwila antu 80,000 nawa atulejeli njila yayiha yakuyinkelamu yakuda. Yuma yejima yadiña yayiha, yuma yakuzatisha, ndandanda yayakuda yakulondela ninjila yakuloñeshelamu. Twadiña namafuliji amaneni kwakwihi na 20 nawa mpinji jikwawu hiyazatileñaku. Henohu ifuku datachi dakupompa kanda, hitwatwesheli kuya mwibulu dangunja nakuwahisha namwaanaku, ilaña twayili nawufuku muloña ahemeneneñamu ngunja hanodu ifuku. Nawa twambwileña masitovu henohu itena kanda diseli nakuloñesha yakuda yantetemena! Twazeyeli, ilaña nadizilili yuma yayivulu kudi akwetu akakudihana azatileña nañovu, chadiñawu apama nawa aseha. Twadikundili chikupu nawa chumichi chaletesha tutwalekihu kwikala amabwambu kushika nikulelu. Wenowu muzañalu wutwatiyili haniku kupompa kweneni muQuebec, kabeta  mwakabishiliwu antu chikupu muyaaka yamuma 1940 nama 1950!

Nadizilili yuma yayivulu kudi akwetu akulumpi hakupompa kwamaneni kwadiña muMontreal. Chaaka chimu, manakwetu David Splane, ichi wudi Mwizanvu Dalombolaña, diyi wadiña mukulumpi watalileña kupompa kweneni. Hakupompa kweneni kwalondelelihu chanlejeliwu kuzata iwu mudimu, manakwetu David wankwashili kuzata chiwahi iwu mudimu.

Mu 2011, hanyima yakwila tunazati dehi yaaka 36 mumudimu wakwenda, anlejeli kwikala ntañishi muShikola Yawakulumpi muChipompelu. Muyaaka yiyedi, ami naRandi twakaamini hatudidi 75 twashiyashana, ilaña mwafumini yuma yayiwahi. Kunsa yamulungu-himulungu, akulumpi atiyileña kuwaha muloña amweneña Izanvu Dalombolaña chidayakamenaña akulumpi kuspiritu.

Nkumininaku, natañishileña muShikola Yawakakushimwina aWanta. Atudizi kakavulu azeyeleña nikwakama muloña yuma yakwila yayivulilileña: kushakama mushikola kwakwihi namaora 7 hefuku-hefuku, kuzatila hahomuweki hadi maora asatu melela-himelela, nikuzatila hanyidimu yiwana hela yitanu yayinkeleñawu mulungu-himulungu. Ami nantañishi mukwawu twayilejeli netu kwila azati iyi nyidimu chakadi wukwashu waYehova nehi. Nakavulamena wanyi atudizi chahayaminiwu hakumona nawu muloña wakumushindamena Yehova, atwesheli kuzata nyidimu yamweneñawu nawu akuyitwesha wanyi.

Muloña wakwila amama akwashileña akwawu, chumichi chaletesheli atudizi aBayibolu kupama nawa chayikwashili atata kumona chalala munjila yambukaku. Chimwahitili mafuku asatu kufuma hafwiliwu amama, atata atuhayamishili chenjiliwu Kwitala daWanta nakutiyilila kumpanji yawantu amavulu, nawa atwalekelihu kupompa hadi yaaka 26. Hela chakwila apapatisheweli wanyi, akulumpi anlejeli nawu atata diwu adiña atachi kushika kukupompa mulungu-himulungu.

Yilwilu yayiwahi yadiña nawamama yatukwashili ninetu anyanawu. Ahela jami ejima asatu nianfumu jawu amukalakelaña Yehova nakashinshi. Ahela jami ayedi akalakelaña hatusanji twamutayi, wumu muPortugal, mukwawu muHaiti.

Ami naRandi ichi tunakukalakala wupayiniya wadimena muHamilton, Ontario. Hitwadiña mumudimu wakwenda, twatiyileña kuwaha kuyitwalaku akwetu kukufuntila nikudi atudizi awu aBayibolu. Ilaña ichi twatiyaña kuwaha hakumona atudizi etu chinakupamawu kuspiritu. Nawa hampinji yitunakudikunda nawamanakwetu niahela muchipompelu chachiha mutudi, twakoleshewaña hakumona Yehova chinakuyikwashayi mumpinji yayiwahi niyatama.

Chitwanuka, twasakililaña chikupu chinatukwashiwu antu amavulu. Ninetu twazataña nañovu kumwekesha “[muchima] wakufwila” kukwasha akwetu, nakuyikolesha kulonda amukalakeleña Yehova kwesekeja nahanakumini ñovu jawu. (2 Kor. 7:6, 7) Chakutalilahu, muchisaka chimu, mama yawantu, mwanindi weyala nimwanindi wamumbanda, wejima wawu adiña mumudimu wampinji yejima. Namwihwili tata yawantu neyi chakwila watoñojokahu dehi kuzataku wupayiniya. Wanlejeli nindi wakwashileña apayiniya asatu. Dichi namwihwili nami, “Komana wunateli kuyikwasha kubadika chinateli kuyikwashayi Yehova?” Namukolesheli niyena kulonda adiluñisheña neyi chadiluñishileñawu. Mutukweji 6 twalondelelihu wekalili payiniya.

Ami naRandi tukutwalekahu “[kuleja] ikiñu dinakwinza” kutalisha ‘hanyidimu yaYehova yakuhayamisha,’ nawa tunakuhweleli netu akamukalakelaña Yehova namuzañalu neyi chitunamukalakeli.—Mas. 71:17, 18.