1. AkaKristu atela kwikala ñahi neyi mutondu? (Talenu cheñi mwevulu.)

 “MPEPELA hiyakotolaña mutondu watepokañaku.” Iyi nhoshelu yinakumwekesha nawu mutondu watela kwikala: wawovu hela watepokaña hakwila wubuli kukotoka neyi kunenzi mpepela yeneni. Hakwila tutwalekihu kumukalakela Yehova, ninetu twatela kwikala amwovu, adiloñesha kuhimpa. Tunateli kwila ñahi mwenimu? Twatela kwikala amwovu kuhitila mukuhimpa kwesekeja nachidi yuma muchihandilu chetu nikulemesha yitoñojoka yawakwetu nimunafuukuliwu.

2. Yilwilwinyi yikutukwasha kuhimpa kwesekeja nachidi yuma muchihandilu chetu, nawa tukuhanjekadi muchinu chibaaba?

² Etu ambuña aYehova twatela kwikala amwovu. Twatela cheñi kwikala adizoza nawa akweti wushona. Muchinu chibaaba, tukumona iyi yilwilu chiyayikwashili akaKristu amakwawu kuhimpa chelili yuma yihimpiki muchihandilu chawu. Tukumona cheñi iyi yilwilu chiyinateli kutukwasha ninetu. Ilaña, tusambilenu ntahi kudizila kudi Yehova niYesu amwekeshaña chikupu nawu amwovu.

3. Wunsahwinyi wamwekeshaña nawu Yehova wekala wamwovu?

³ Yehova amutenaña nawu “hiIlola” muloña wekala wakola mbe-e nawa haswijewañaku. (Kuhit. 32:4) Ilaña, wekala cheñi wamwovu. Yuma chiyinakuhimpika mukanu kaayi, Nzambi yetu natwalekihu kuhimpa kulonda ashikiji nkeñelu yindi. Yehova waleñeli antu muchifwanisha chindi nawuswa wakuhimpa kwesekeja  nachidi yuma. Watwinkaña yishina yamuBayibolu yatiyakana yatukwashaña kufuukula chachiwahi hela chakwila tunamoni kukala kwamuchidinyi. Yuma yelayi Yehova niyishina yatwinkayi yamwekeshaña hatooka nawu hela chakwila “hiIlola,” Yehova wekala cheñi wamwovu.

4. Shimunenu chuma chinakumwekesha nawu Yehova wekala wamwovu. (ALevi 5:7, 11)

⁴ Yuma yelañayi Yehova yaloña nawa yamwekeshaña nawu wamwovu. Hakanjikijaña antu nindi eleña yuma yinakukeñayiku. Chakutalilahu, talenu Yehova chamwekesheliyi kudi aIsarela nindi wekala wamwovu. Wakeñeleña wanyi nindi antu ejima ahaneña mulambu wowumu, chili waheta indi kwiji hikazweñi. Mpinji jikwawu, wetejeleña muntu himuntu kulambula mulambu wukutweshayi.—Tañenu ALevi 5:7, 11.

5. Shimunenu chuma chinakumwekesha nawu Yehova wadizoza nawa wukweti wushona.

⁵ Yehova wekala wamwovu muloña wakwila wadizoza nawa wukweti wushona. Chakutalilahu, Yehova wamwekesheli nindi wadizoza hampinji yadiñayi kwakwihi nakukisañana antu atama amuSodoma. Yehova wazatishili añelu jindi kumuleja muntu waloña Loti nindi atemukili kwiluña damapidi. Loti watiyileña woma kuya kunidi iluña. Dichi walembeli nindi yena nichisaka chindi ayiteji kuya nakushakama kuZowari, tawuni yanyanya yashimwiniyi Yehova nindi wukuyikisañana. Yehova wadi kumukanjikija Loti nindi chiña ovwahili mwamulejeliyi. Ilaña wetejeli mwalombeliyi Loti, hela chakwila chumichi chadi kuletesha abuli kukisañana Zowari. (Kutach. 19:18-22) Chimwahitili yaaka yayivulu, Yehova wayimwekesheleli antu ashakamineña muNiniva wushona. Watemesheli kaprofwetu Yona kuya nakubidika nsañu yakujilumuka kwamusumba niantu atama adiñamu. Ilaña aNiniva chabalumukiliwu mumuchima, Yehova wayitiyilili luwi nawa musumba hawujilumwiniku.—Yona 3:1, 10; 4:10, 11.

6. Shimunenu chuma chinakumwekesha Yesu chamwimbujoleliyi Yehova kwikala wamwovu.

⁶ Yesu wamwimbujoleli Yehova mukwikala wamwovu. Amutemesheli heseki kulonda ashimwini kudi “anyikoku ajimbala amwitala daIsarela.” Ilaña wamwekesheli nindi wamwovu chetejeliyi iwu mudimu. Mpinji yimu, mumbanda wumu wabulili kwikala kaIsarela wamulembeleli nindi amuukili mwanindi wamumbanda wakabakeneña “nankashi nandemoni.” Muloña wawushona Yesu welili chuma chalombeliyi iwu mumbanda, wamuukilili mwanindi. (Mat. 15:21-28) Talenu chuma chikwawu chamwekeni. Hatachikiliyi mudimu windi, Yesu wahosheli nindi: “Wejima wukunkaana . . . , ninami nakamukaana.” (Mat. 10:33) Hanu dinu komana wamukaanini Petulu, owu wamukaanini kapampa kasatu? Inehi. Yesu welukili nindi Petulu wabalumukili chikupu mumuchima nawa wadiña nachikuhwelelu. Chamusañwiliwu, Yesu wamwekeni kudi Petulu nawa chakadi nikujina, wamulejeli nindi wamwanakeneni nawa wamukeña.—Luka 24:33, 34.

7. Kwesekeja naAFwilipi 4:5, twakeñaña antu atumoneña ñahi?

⁷ Tunamoni netu Yehova Nzambi niYesu Kristu ekala amwovu. Indi etu? Yehova wakeñaña nindi twikaleña amwovu. (Tañenu AFwilipi  4:5.) MuBayibolu yimu iyi vasi ayibalumuna nawu: “Mwekeshenuña kudi antu nenu mudi amwovu.” Tunateli kudihula netu: ‘Komana antu ammonaña nawu nekala muntu wamwovu nawa wadiwulaña yuma yikwawu? Tahindi ammonaña nawu nakalisha, nazuwa, indi kwiji nachinchika? Komana nakanjikijaña akwetu nami alondeli hohu mwinnakukeña? Tahindi natiyililaña kudi akwetu nakulondela yitoñojoka yawu neyi chinatwesheki?’ Neyi twikala amwovu tukumwekeshaña netu tunakumwimbujola Yehova niYesu. Tuhanjekenu hanjila jiyedi mutunateli kumwekeshela netu tudi amwovu, neyi yuma yinahimpiki muchihandilu chetu nawa neyi yitoñojoka yawakwetu niyuma yinafuukuliwu yinambuki nayitunakukeña.

8. Yumanyi yinateli kutukwasha kwikala amwovu neyi yuma yinahimpiki muchihandilu chetu? (Talenu cheñi tumazu twaheshina.)

⁸ Twatela kwikala amwovu neyi yuma yinahimpiki muchihandilu. Iku kuhimpika kunateli kutuletesha kumona kukala kutwabula kukuhwelela. Hadaha tunateli kushikena kukata yikatu yamaneni. Hadaha kuhimpika munsañu jamali indi kwiji mujamapolitiki, kunateli kuletesha yuma kukala chikupu muchihandilu chetu. (Mukwa. 9:11; 1 Kor. 7:31) Nikuhimpika kwamudimu wutukweti mukuloñesha kunateli kusha chikuhwelelu chetu mukweseka. Kukala kwejima kutunateli kumona, tukutwesha kuhimpa kwesekeja nachidi yuma muchihandilu neyi twila iyi yuma yiwaana: (1) itejenu chidi yuma hanoyu mpinji, (2) toñojokenuña hayuma yimukutwesha kwila chayinu mpinji, bayi yimwelileña kunyimaku, (3) shenuña muchima hayuma yayiwahi, nawa (4) ililenuña akwenu yuma yayiwahi. b Tuhanjekenu hadi amanakwetu niahela kulonda twiluki kulondela yumiyi chikwayikwashili.

9. Amishonali amu adisumbula omikili ñahi kukala kwabulili kukuhwelelawu?

⁹ Itejenu chidi yuma hanoyu mpinji. AEmanuele nawaFrancesca ayitemesheli kuya nakuzata wumishonali mwituña dacheñi. Chatachikiliwu hohu kudiza idimi nikudiluka nawamanakwetu muchipompelu mwayiliwu, chipupu chaCOVID-19 chatachikili nawa adambwili nakuleka kudimona nawantu. Kuhiñahu amama yamuhela Francesca afwili mukukasumwisha. Wafwilileña kwikala hamu nachisaka chindi, ilaña chipupu chamukañesheli kuya. Yumanyi yamukwashili kuumika iku kukala kwejima? Chatachi, aEmanuele nawaFrancesca alombeli maana kulonda atwesheña kuumika kukala kwahefuku-hefuku. Yehova wakwili kulomba kwawu hampinji yatelela kuzatisha kuloñesha kwindi. Chakutalilahu, mazu ahosheli manakwetu wumu wadiña muvidiyo yakwihujola, ayikolesheli, akwila nawu: “Neyi twiteja chidi yuma hanoyu mpinji, tukwikala cheñi namuzañalu nawa chikutukwasha kuzatisha chiwahi iyi mpinji kulonda tumukalakeli Yehova.” c Chamuchiyedi, elukili chakuzatisha chiwahi foni hakushimwina nawa atachikili kudizisha muntu Bayibolu. Chamuchisatu, etejeli kuyikolesha nikuyikwasha kudi amanakwetu niahela nawa asakililili hakukeña kwayimwekesheleliwu. Muhela wumu wukweti luwi wayitemesheleleña nsañu yantesha mwabombeleleña vasi yamuBayibolu hefuku-hefuku hadi chaaka chimu. Ninetu neyi tuhimpaña kwesekeja nachidi yuma muchihandilu, tukuzañalalaña nayuma yitukutwesha kwila.

10. Muhela wumu wahimpili ñahi chamweniyi kuhimpika kweneni muchihandilu chindi?

¹⁰ Toñojokenuña hayuma yimukutwesha kwila chayinu mpinji, bayi yimwelileña kunyimaku. Muhela Christina wakuRomania washakamaña  muJapan, waneñeli chelili chipompelu chaIngilishi mwapompeleñayi achilekeshi. Hela chochu, hashili muchima hachuma chamwekeniku. Ilaña wazatili nañovu muchipompelu chedimi dachiJapanese mwayileñayi kuhitila mukushimwina chikupu munidi idimi. Walejeli mukwawu azatileñayi nindi kunyima kulonda amukwashi kwilukisha idi idimi. Iwu mumbanda wetejeli kumudizisha muhela Christina chiJapanese kuzatisha Bayibolu nibroshuwa yaMunateli Kwikala naMuzañalu Haya Nyaaka! Muhela Christina welukili kuhosha chiwahi chiJapanese nawa ona mumbanda watachikili kwikala nampwila yakudiza Bayibolu. Neyi tuleka kutoñojoka hayuma chiyadiña kunyima ilaña tutoñojokaña hayuma yitunateli kwila chayinu mpinji, mukuhimpika kutwabulili kukuhwelela munateli kufuma yuma yayiwahi yitwabulili kukuhwelela.

11. Adisumbula amu adiña nakukala kwamali, yumanyi yayikwashili kuumika?

¹¹ Ililenuña akwenu yuma yayiwahi. Adisumbula amu ashakamaña mwituña mwalekeshawu mudimu wetu ekalili nakukala kwamali chelili mali akehi mwituña. Yumanyi yayikwashili? Chatachi, akehesheliku yuma yakulanda. Chamuchiyedi, chatela asheña maana hakukala kwamweneñawu, afuukwilihu kusha muchima hakukwasha antu kuhitila mukudikita nankashi mumudimu wakushimwina. (Yilw. 20:35) Iyala wahosheli nindi, “Kudikita mumudimu wakushimwina kwatukwashili kubula kutoñojoka nankashi hakukala kutwadiña naku, ilaña twashileña muchima hakwila nkeñelu yaNzambi.” Neyi yuma yinahimpiki muchihandilu chetu, twatela kwanuka kulema kwakutwalekahu kukwasha akwetu, sweje-e mumudimu wetu wakushimwina.

12. Chuma cheliliyi kapostolu Pawulu chinateli kutukwasha ñahi kwikala amwovu neyi yuma yinahimpiki mumudimu wetu wakushimwina?

¹² Twatela kwikala amwovu mumudimu wetu wakushimwina. Twawanaña antu akuhwelela yuma yashiyashana, akweti yilwilu yashiyashana ninkulilu yashiyashana. Kapostolu Pawulu wahimpileña kwesekeja nachidi yuma, nawa ninetu tunateli kudizila kudi yena. Yesu wamutondeli Pawulu kwikala “kapostolu kunyuza.” (Rom. 11:13) Muloña waniwu mudimu, Pawulu washimwinineña kudi aYudeya, aGiriki, antu ataña, antu amunyikala, antu alema nianyanta. Hakwila ashiki hanyichima yanawa antu ejima ashiyashana, Pawulu wekalili “yuma yejima kudi antu ejima.” (1 Kor. 9:19-23) Washileña muchima kuchisemwa chawu, nkulilu niyuma yakuhweleleli antu ashimwinineñayi kulonda awani njila yayiwahi yakuyishimwinamu. Ninetu tunateli kushimwina chiwahi neyi twikalaña amwovu nawa tuhimpaña njila yakushimwinamu kwesekeja nakukala kukwetiwu antiyilili jetu.

13. Kukalanyi kwashimunawu ha 1 AKorinda 8:9 kutunateli kutondolwela neyi tulemeshaña yitoñojoka yawakwetu?

¹³ Kwikala amwovu kwatukwashaña cheñi kulemesha yitoñojoka yawakwetu. Chakutalilahu, ahela jetu amakwawu akeña jakudipentapenta, ilaña amakwawu nehi. AkaKristu amakwawu anwaña walwa nakwesekeja, ilaña amakwawu afuukulahu kubula kunwa. AkaKristu ejima akeñaña kwikala akola kumujimba, hela chochu, afuukulaña njila jashiyashana jakuyuukilamu. Neyi tudimonaña kuloña mpinji yejima nikukanjikija akwetu muchipompelu netu eleña yuma yitunakukeña, tukuhukesha akwetu nikuleta chaambu. Hitunakukeña kwila chuma chamuchidiwuku! (Tañenu 1 AKorinda 8:9; 10:23, 24) Tuhanjekenu njila jiyedi jinakumwekesha kuzatisha yishina yamuBayibolu chikunateli kutukwasha kwikala amwovu nikutwalekahu kuleta kuwunda.

14. Yishinanyi yamuBayibolu yinateli kutukwasha kutalisha hansañu janvwalilu nimmwekenu?

¹⁴ Nvwalilu nimmwekenu. Chatela atwinki nshimbi hayuma yitwatela kuvwala, Yehova watwinka  yishina yitwalondelaña. Twatela kuvwala yakuvwala yatelela akakumukalakela Nzambi, yinakumwekesha kwikala amwovu, kalemesha “nikutoñojoka mwamaana.” (1 Tim. 2:9, 10; 1 Pet. 3:3) Dichi hitwavwalaña munjila yakwila antu atoñojokeña hohu hachitunakumwekanaku. Yishina yamuBayibolu yinateli cheñi kukwasha akulumpi kubula kushaku nshimbi kutalisha hayakuvwala ninsuki yatela kuyindawu hela kutewula antu amuchipompelu. Chakutalilahu, akulumpi muchipompelu chimu akeñeleña kukwasha amanakwetu atwansi atachikili kwimbujola ntewilu jawakwawu atwansi ahembeleña nsuki jajihi namajilu chikupu. Akulumpi ayikwashili ñahi chakadi kushaku nshimbi? Nkoñi wañinza wayilejeli akulumpi nindi ayileji awa amanakwetu nawu, “Neyi wudi hachinañamu nawa antu mwizaza anakusha nankashi maana hachiwunakumwekana chatela asheña maana hayuma yiwunakuhosha, dikwila nawu, nvwalilu nimmwekenu yeyi yidi chiwahi wanyi.” Awa mazu antesha amanishili iku kukala chakadi kushahu lushimbi. d

15. Nshimbinyi niyishina yamuBayibolu yatukwashaña chitunateli kufuukula njila yakutuukilamu? (ARoma 14:5)

¹⁵ Njila yakutuukilamu. MukaKristu wejima watela kudifuukwila njila yakumuukilamu. (Ñal. 6:5) Nshimbi jantesha hohu jamuBayibolu, chidi neyi nshimbi jahosha hakutondolwela mashi nikupesha dijinateli kuletesha mukaKristu kutondolwela njila jikwawu jakumuukilamu. (Yilw. 15:20; Ñal. 5:19, 20) Kutalisha hanjila jikwawu jakuukilamu, mukaKristu watela kudifuukwila yomweni. Antu amakwawu atambwilaña wukwashu kudi antu amuchituñilu eluka jayitumbu kulonda ayuuki, ilaña amakwawu atondañahu njila jambukaku jakuyuukilamu. Hela chakwila tuneluki chikupu netu njila yimu yakuukilamu yayiwahi indi kwiji yatama, twatela  kulemesha wuswa wawamanakwetu niahela wakudifuukwila njila yatela kuyuukilamu. Kutalisha haniyi nsañu, twatela kwanukaña iyi yikuma: (1) Wanta waNzambi hohu diwu wakooka antu chikupu. (Isa. 33:24) (2) MukaKristu wejima watela ‘kwiluka chikupu’ njila yakumuukilamu yinamoniyi nindi yayiwahi. (Tañenu ARoma 14:5.) (3) Hitwasompeshaña akwetu hela kusha chuma chakuyihukeshaku. (Rom. 14:13) (4) AkaKristu amwekeshaña kukeña nawa eluka nawu kunuñañana kwekala muchipompelu kwalema nankashi kubadika yuma yakeñañawu. (Rom. 14:15, 19, 20) Neyi twanukaña iyi yuma, tukutwalekahu kudikunda nawamanakwetu niahela nawa muchipompelu mukwikalaña kuwunda.

16. Mukulumpi nateli kwikala ñahi wamwovu nawakwawu akulumpi? (Talenu cheñi nyevulu.)

¹⁶ Akulumpi atela kwikala nachakutalilahu chachiwahi chakwikala amwovu muchima. (1 Tim. 3:2, 3) Chakutalilahu, mukulumpi hatela kukuhwelela nindi yitoñojoka yindi akuyitejaña mpinji yejima muloña wakwila himukulumpi kubadika akwawuku. Weluka nindi spiritu yaYehova yinateli kuletesha mukulumpi wudi wejima hezanvu kuhosha mazu anateli kuletesha afuukuli chachiwahi. Nawa neyi kwosi chishina chamuBayibolu chinafumpiwu, akulumpi akweti muchima wamwovu etejaña munafuukuli akulumpi amavulu, hela chakwila adiña nakutoñojoka munjila yambukaku.

17. Yumanyi yayiwahi yadiluñishaña akaKristu amwovu?

¹⁷ AkaKristu adiluñishaña yuma yayivulu neyi ekala amwovu. Twadikundaña chikupu nawamanakwetu niahela nawa chipompelu chekalaña mukuwunda. Twatiyaña kuwaha yilwilu yayiwahi yashiyashana niyisemwa yekala nawakakudifukula aYehova anuñañana. Chasweja kubadika, twazañalalaña hakwiluka netu tunakumwimbujola Nzambi yetu wamwovu, Yehova.