1. Yumanyi yimwelukili himwatachikili kudiza Bayibolu?

 KOMANA mwanukaña yuma yimwelukili himwatachikili kudiza Bayibolu? Mwatela mwahayamini hakwiluka nenu Nzambi wukweti ijina. Hadaha mwatiyili kuwaha chimwelukili nenu Nzambi hababeshaña antu mukesi kaheluku. Nawa mwatela mwatiyili kuwaha hakwiluka nenu mwakamona cheñi antaña jenu afwa dehi nawa mwakashakama nawu muparadisa hamaseki.

2. Kubombela hakudiza chalala chamuBayibolu, yumanyi yikwawu yimwelili? (AEfwesesa 5:1, 2)

² Chimwatwalekelihu kudiza Izu daNzambi, mwaswejeleleñaku kumukeña Yehova. Iku kukeña kwayisañumwini kuzatisha yuma yimwadizileña. Mwatachikili kufuukula chiwahi kushindamena hayishina yamuBayibolu. Mwahimpili yilwilu yenu muloña mwakeñeleña kumutiyisha Nzambi kuwaha. Neyi mwana chembujolañayi nvwali wukweti kukeña, ninenu mwadiña nakumwimbujola Tata yenu wamwiwulu.—Tañenu AEfwesesa 5:1, 2.

3. Malwihwinyi itunateli kudihula?

³ Tunateli kudihula netu: ‘Komana naswejeliku kumukeña Yehova kubadika hinekalili mukaKristu? Kufuma hinapapatisheweli, komana natoñojokaña nikwila yuma neyi chelañayi Yehova, sweje-e kumwekeshela amanakwetu niahela kukeña?’ Neyi “kukeña [kumwadiña] naku hakusambila” kunakehañani, bayi muzeyaku. Chuma chamuchidiwu dichayimwekeneni niakaKristu akusambila. Yesu halekeli kuyikwashaku, ninetu hamba kaleka kutukwashaku. (Chim. 2:4, 7) Weluka nindi  tunateli cheñi kwikala nakukeña kutwadiña naku hampinji yitwadizili chalala.

4. Yumanyi yitukuhanjekahu muchinu chibaaba?

⁴ Achinu chibaaba chikushimuna chitunateli kutwalekahu kusweja kumukeña Yehova niakwetu. Kuhiñahu tukwiluka yuma yayiwahi yitwatambwilaña niyatambwilaña akwetu neyi tusweja kumukeña Yehova niakwetu.

5-6. Kukalanyi kwamweneñayi kapostolu Pawulu hampinji yashimwinineñayi, ilaña chumanyi chamukwashili kutwalekahu kumukalakela Yehova?

⁵ Kapostolu Pawulu wadiluñishileña mumudimu waYehova, ilaña wamweneña kukala kwakuvulu. Kakavulu Pawulu wadiña nakwenda maluña amalehi nawa ñendelu yadiña yakala munana mafuku. Hawenyi windi, mpinji yikwawu Pawulu wahitileña “muwubanji wahatuloña” nawa “akeñeleña [kumujaha] kudi atupondu.” Mpinji yikwawu cheñi adiña nakumweta kudi ayilumbu jindi. (2 Kor. 11:23-27) Nawa amanakwindi akaKristu hiyamwekesheleña kusakilila mpinji yejima hachazatileñayi nañovu kuyikwashaku.—2 Kor. 10:10; Fwili. 4:15.

⁶ Chumanyi chamukwashili Pawulu kutwalekahu kumukalakela Yehova? Pawulu wadizili yuma yayivulu kutalisha hachekalayi Yehova kuhitila muNsona nimuyuma yahitileñamu. Wenjili nakwiluka chikupu nindi Yehova Nzambi wadiña wamukeña. (Rom. 8:38, 39; Efwe. 2:4, 5) Nawa wamukeñeli chikupu Yehova. Pawulu wamwekesheli nindi wamukeña Yehova ‘nachayikalakeleleñayi akakujila nichatwalekeliyi nakuyikalakela.’—Heb. 6:10.

7. Njilanyi yimu yinateli kutukwasha kusweja kumukeña Yehova?

⁷ Tunateli kusweja kumukeña Nzambi kuhitila mukudiza Izu dindi. Chimukutañaña Bayibolu, toñojokenu hanoyu nsañu chiyinakumwekesha chekalayi Yehova. Dihulenu nenu: ‘Iyi nsañu yinakumwekesha ñahi nawu Yehova wankeña? Yumanyi yinashimuniwu yikuletesha nimukeñi Yehova?’

8. Kulomba kunateli kutukwasha ñahi kusweja kumukeña Nzambi?

⁸ Chuma chikwawu chinateli kutukwasha kusweja kumukeña Yehova hikulomba mpinji yejima nakumuleja yuma yidi kumuchima wetu. (Mas. 25:4, 5) Chikufumamu, Yehova niyena wukwakula kulomba kwetu. (1 Yow. 3:21, 22) Muhela Khanh wakuAsia washimwini nindi: “Kukeña kunamukeñeli Yehova hakusambila kwashindameneni hayuma yinadizili, ilaña iku kukeña kwaswejeleliku chinamweneña chakwileñayi kulomba kwami. Chumichi chaletesheli nileña yuma yamutiyishaña kuwaha.” b

9. Timotewu wamwekesheli ñahi nindi waswejeleleñaku kuyikeña akwawu?

⁹ Chimwahitili yaaka kufuma habalumukiliyi nakwikala mukaKristu, Pawulu wadilukili nakansi weyala wejina daTimotewu. Timotewu wamukeñeli Yehova niantu. Pawulu wayilejeli aFwilipi nindi: “Muloña hinukwetihu muntu mukwawu wudi namuchima neyi [Timotewu] wukwakamena chikupu yuma yinakuyakamishaku.” (Fwili. 2:20) Aha Pawulu hamuhamekeleña Timotewu hawuswa wadiñayi nawu wakuloñesha yuma hela kuhana jimpanji kudi antu amavuluku, ilaña Pawulu wamutiyili Timotewu kuwaha hakukeña kwayimwekesheleleñayi amanakwindi niahela. Chakadi nikujina, yipompelu yakalakeleleñayi Timotewu yafwilileña kumumona chakenzayi.—1 Kor. 4:17.

10. Muhela Anna nanfumwindi amwekesheli ñahi nawu ayikeña amanakwawu niahela?

 ¹⁰ Ninetu twakeñañaku njila mwakuyikwashila amanakwetu niahela. (Heb. 13:16) Talenu chuma cheliliyi muhela Anna ashimwiniwu muchibaaba chinafumihu. Hanyima yanvula yeneni yamalola, yena ninfumwindi ayili nakuhempula kwitala dachisaka chawaYinsahu nawa awanini itala danichi chisaka dinahotoki malata. Muloña wachumichi, ichi chisaka chadiña nayakuvwala yitooka wanyi. Muhela Anna wahosheli nindi: “Twasendeli yakuvwala yawu, twayikoseli nawa twayifuntishili iku tunayichiisi nikuyivuña chiwahi. Etu twamweni neyi chuma chitwelili chadiña chanyanya, ilaña chumichi chaletesha tudikundi chikupu kushika nikulelu.” Muloña wakwila muhela Anna nanfumwindi ayikeñeli nankashi amanakwawu niahela, chumichi chaletesheli ayikwashi.—1 Yow. 3:17, 18.

11. (a) Akwetu atiyaña ñahi neyi tumwekeshaña netu twayikeña? (b) Kwesekeja naYishimu 19:17, Yehova welaña ñahi neyi tumwekesha kukeña?

¹¹ Neyi twikalaña chachiwahi nawakwetu nikuyimwekeshela kukeña, amonaña nawu tunakuzata nañovu kumwimbujola Yehova. Nawa anateli kusakilila hakukeña kutwayimwekeshelaña kubadika nichitunakuhweleli. Muhela Khanh ashimunawu hakusambila, wanukaña antu amukwashili. Wahosheli nindi: “Nayisakililaña ahela ejima ansendeleñaku mumudimu wakushimwina. Enjileña nakunsenda, kuntambikaku kuya nakudiila nawu hamu nikunfuntisha cheñi kwitala. Ichi neluki nami adiña nakuzata nañovu chikupu. Nawa adiña namuzañalu hakuñilila iyi yuma.” Hela chochu, bayi neyi ejima anateli kusakilila hayuma yitwayililañaku. Muhela Khanh wahosheli hadi antu amukwashili nindi: “Natoñojokaña neyi chakwila ninami natela kuyililaku yuma yayiwahi hakukeña kwammwekesheleliwu,  ilaña amakwawu hineluka kwashakamañawuku. Hela chochu, Yehova weluka, nawa nalombaña nami akayifweti hayuma yañilililiwu.” Mwahosheliyi muhela Khanh diimu. Yehova wamonaña nituyuma twanyanya tutwayililaña akwetu. Wamonaña nindi himulambu walema nawa himukudi wakafwetayi.—Tañenu Yishimu 19:17.

12. Amanakwetu anateli kumwekesha ñahi nawu akeña chipompelu? (Talenu cheñi nyevulu.)

¹² Neyi mudi manakwetu, munateli kumwekesha ñahi nenu mwayikeña akwenu nikuyililaku yuma kulonda muyikwashi? Manakwetu wakansi Jordan wehwili mukulumpi wumu nindi amuleji chinateli kuzatayi nankashi kulonda akwasheña chipompelu. Iwu mukulumpi wamuhamekeli hachazatileñayi nañovu, kuhiñahu wamukwashili chinateli kuzatayi nankashi mumudimu windi. Chakutalilahu, wamulejeli Jordan nindi ashikeña swayi Hetala daWanta kulonda emusheña antu, kwakulahu hakupompa, kushimwina mpinji yejima nezanvu dindi nikuwanaku njila mwakukwashila akwawu. Jordan chatachikiliyi kwila mwamulejeliwu, welukili yuma yimu yabulili kwilukayi nawa waswejeli kuyikeña amanakwindi niahela. Jordan welukili nindi neyi manakwetu nekali nkoñi wakuzatila, bayi neyi dihatachikañayi kuyikwasha akwawuku, ilaña watwalekañahu kuyikwasha.—1 Tim. 3:8-10, 13.

13. Kukeña kwamukwashili ñahi manakwetu Christian kushikahu cheñi kwikala mukulumpi?

¹³ Indi neyi mwadiñahu dehi nkoñi wakuzatila hela mukulumpi? Yehova wanukaña nyidimu yimwazatili nikukeña kwayisañumwini hakwila muzatiku oyu nyidimu. (1 Kor. 15:58) Wamonaña cheñi kukeña kumunatwalekihu kumwekesha. Manakwetu Christian waneñeli chamufumishiliwu hawukulumpi. Ilaña wahosheli nindi, “Natwalekelihu kumukalakela  Yehova kwesekeja nahanakumini ñovu jami muloña wakukeña, hela chakwila nadiña nakukooleka hela nehi.” Mukuhita kwampinji, amutondeli cheñi kwikala mukulumpi. Wahosheli nindi: “Nakeñeleña wanyi kwikala cheñi mukulumpi. Ilaña natoñojokeli nami, neyi Yehova nantiyili luwi nawa nakukeña cheñi nindi niikali mukulumpi, nukwiteja muloña wakukeña kunamukeña kushilahu niamanakwetu niahela.”

14. Yumanyi yimunadizili kumazu ahosheli muhela wakuGeorgia?

¹⁴ Ambuña aYehova cheñi amwekeshelaña antuñi nawu kukeña. (Mat. 22:37-39) Chakutalilahu, muhela Elena wakuGeorgia wahosheli nindi: “Hakusambila, nadiña nakushimwina hohu muloña wakumukeña Yehova. Ilaña chinaswejeli kumukeña Tata yami wamwiwulu, naswejeli cheñi nikukeña antu. Natoñojokeleña hakukala kwamweneñawu ninsañu yinatela kuhanjeka nawu yikuyishika hamuchima. Neyi nitoñojoka hadi wena muniyi njila, nafwilileña kuyikwasha chikupu.”—Rom. 10:13-15.

15-16. Neyi chinamwekeshiwu hanyevulu, yumanyi yayiwahi yafumaña mukumwekeshela akwetu kukeña?

¹⁵ Kukeña kutwayimwekeshelaña amanakwetu hikwayikwashaña wena hohuku. Chatachikili chipupu chaCOVID-19, manakwetu Paolo nimwinikwindi akwashili antu amavulu akula dehi chakuzatisha yozelu yawu hakushimwina. Muhela wumu hakusambila chamukalilileña  kwiluka chakuzatisha chozelu chindi, nkumininaku wadizili. Wachizatishili kutambika nachu antaña jindi kuChanukishu. Antaña jindi 60 apompeli kuzatisha vidiyo konfalensi! Yuma yelili manakwetu Paolo namwinikwindi yamukwashili iwu muhela niantaña jindi ejima. Chimwahitili mpinji, iwu muhela wamusonekeleli manakwetu Paolo nindi: “Kusakililaku hakutudizisha etu atushinakaji. Hinamba kavulamena chatwakamenañayi Yehova nichiwazatili nañovu kutukwashaku.”

¹⁶ Yuma yidi neyi ichi chuma chamwekeni yamudizishili manakwetu Paolo chuma chalema. Chamwanukishili nawu kukeña kwalema nankashi kubadika yuma yelukayi muntu hela wuswa wukwetiyi. Wanukaña nindi: “Nadiña nkoñi wañinza. Chayinu mpinji natoñojokaña nami, hela chakwila akakushimwina anateli kuvulamena mpanji jinahanineña, ilaña achidi kwanuka chinayikwashileña.”

17. Anyi amakwawu akuhetelamu neyi tumwekesha kukeña?

¹⁷ Neyi tumwekeshelaña akwetu kukeña, ninetu aweni twahetelañamu munjila jitunabuli kukuhwelela. Manakwetu Jonathan washakamaña kuNew Zealand wetejeli chumichi. Ifuku dimu haMposu namwaana hikwadiña nkanza, wamweni payiniya wumu nakushimwina kumukwakwa. Manakwetu Jonathan watachikili kuzata naniwu payiniya Mposu-hiMposu namwaana. Hakusambila welukili wanyi nindi chuma chatachikiliyi kwila chakamukwasha niyena. Wahosheli nindi: “Hayina mpinji, nakeñeli wanyi mudimu wakushimwina. Ilaña chinatiyilileña kunjila yashimwinineñamu iwu payiniya niyuma yayiwahi yafumineña mumudimu windi wakushimwina, chansañumwini kukeña chikupu iwu mudimu. Cheñi nekalili nebwambu wamuwahi wankwashileña kupama kuspiritu, kukeña mudimu wakushimwina nikuswina kwakwihi naYehova.”

18. Yehova wakeñaña nindi twileñadi?

¹⁸ Yehova wakeñaña nindi wejima wetu tuswejeña kumukeña yena niakwetu antu. Neyi chitunadizi, tunateli kuswejelaku kumukeña Yehova neyi tutañaña Izu dindi nakutoñojokahu chikupu nikuhanjeka nindi mukulomba mpinji yejima. Tunateli kusweja kuyikeña amanakwetu neyi tuyikwashañaku munjila jashiyashana. Kukeña kwetu chikukuswejelañaku, tukuswina nankashi kwakwihi naYehova nikudi amanakwetu niahela. Nawa iwu wubwambu wetu wakatwalekahu haya nyaaka!