1-2. (a) Kusoñamishanyi kwayisoñamishiliyi Yesu atumbanji twindi? (b) Muloñadi atumbanji chamushililiwu Yesu? (Talenu cheñi nyevulu.)

 “CHALALA spiritu yinakukeña, ilaña mujimba wunazeyi.” a (Mat. 26:41b) Awa mazu amwekeshaña nawu Yesu welukili nindi twawanina wanyi nawa twaluwañeshaña. Ilaña munawa mazwindi mwekala cheñi nikusoñamisha: Hitwatela kusweja kudikuhwelelaku. Hawowuna wufuku henohu Yesu kanda ahoshi awa mazu, atumbanji ahosheli chakufuma hamuchima nawu akutwalekahu kwikala naMwanta wawu. (Mat. 26:35) Yitoñojoka yawu yadiña hohu chiwahi. Hela chochu, elukili wanyi nawu neyi kukala kusweja akushikena kuzeya. Dihafumini Yesu ayisoñamishi nindi: “Dichi tonenuña nawa lombenuña kulonda mubuli kwiñila mukweseka.”—Mat. 26:41a.

² Chawushona, atumbanji akañenyi kutwalekahu kwikala atona. Chamukwatiliwu Yesu, komana atwalekelihu kwikala hamu nayena, tahindi atiyili woma nakutemuka? Chineli hiyatwalekelihu kwikala atonaku, atumbanji elili chuma chakaaniniwu nawu hiyakuchiilaku—amushiyili Yesu.—Mat. 26:56.

3. (a) Hakwila tutwalekihu kwikala ashinshika kudi Yehova, muloñadi chitwatela kutondolwela kusweja kudikuhwelela? (b) Yumanyi yitukuhanjekahu muchinu chibaaba?

³ Bayi tusweja kudikuhwelela netu tukwilaña yuma yaloña mpinji yejimaku. Mwamweni, twafwilaña kubula kwila chuma chidi chejima chikutufumisha kudi Yehova. Hela chochu, twawanina wanyi nawa kala mpinji tunateli kwiñila mukweseka. (Rom. 5:12; 7:21-23) Chakadi kukuhwelela, tunateli kwikala mukweseka kwakwila  chuma chatama. Hakwila tutwalekihu kwikala ashinshika kudi Yehova niMwanindi, twatela kwovwahila kufumba kwaYesu kwakudihemba kulonda tubuli kwiñila mukweseka kwakukoña nshidi. Achinu chibaaba chikutukwasha kwila mwenimu. Chatachi, tukuhanjeka sweje-e muyuma mutwatela kudihemba. Kuhiñahu, tukuhanjeka chitunateli kudihemba etu aweni kulonda tubuli kwiñila mukweseka. Nkumininaku, tukuhanjeka chitunateli kutwalekahu kudihemba.

TWATELA KUDIHEMBA MUYUMANYI?

4-5. Muloñadi chichalemena kutondolwela kukoña ninshidi janyanya?

⁴ Ninshidi yitunateli kumona netu yanyanya yinateli kuluwañesha wubwambu wetu naYehova. Cheñi yinateli kutuletesha kukoña nshidi yahamesu bwi-i.

⁵ Wejima wetu twamonaña kweseka kwakukoña nshidi. Ilaña wejima wetu hamuntu-hamuntu hadi hitwazeyela, hadaha tukweti muchima wakukeña kukoña nshidi yahamesu bwi-i, kudiñija muyilwilu yawuzondu, indi kwiji kwiteja yitoñojoka yamukaayi. Chakutalilahu, hadaha muntu wumu nakulwisha nakweseka kwakufwila kwila wuvumbi. Mukwawu hadaha nakulwisha nayaaku yatama, chidi neyi kudichuka hela kutala nyevulu yanzekesi. Mukwawu cheñi hadaha nakulwisha nawoma wakuchiina antu, yitoñojoka yakudimena, kuhila swayi hela kukala kukwawu. Neyi chahosheliyi Yakoba nindi, “muntu wejima amwesekaña kuhitila mukumukokola nikumudimbeka nakufwila kwindi yomweni.”—Yak. 1:14.

6. Yumanyi yitwatela kwiluka?

⁶ Komana mweluka yuma yanyakalaña kuyisha mukweseka? Munateli kufuma yuma yatama neyi tudiwulaña kuzeyazeya kutukweti hela neyi tutoñojokaña netu twakola nankashi kwila tuvulumuna nehi. (1 Yow. 1:8) Anukenu, Pawulu wahosheli nindi ninana ‘apama kuspiritu’ anateli kwiñila mukweseka neyi abulaña kudihemba. (Ñal. 6:1) Twatela kudiluka chitwekala nikwiluka mutwazeyela.—2 Kor. 13:5.

7. Twatela kusha muchima nankashi kuyumanyi? Shimunenu chakutalilahu.

⁷ Neyi tuneluki dehi yuma yatuleteshaña kunyakala kwiñila mukweseka, chumanyi chitwatela kwila? Twatela kuzata nañovu kuwana njila yinateli kutukwasha kutondolwela oku kweseka. Talenu chakutalilahu, mumpinji yakunyima maluña adiña aswayi kulukukilahu musumba, hikuyenzelu. Dihafumini kuyenzelu asheñaku ahembi amavulu. Munjila yoyimu, twatela kusha nankashi muchima kukuzeyazeya kutuneluki netu dikutukweti kulonda tutwesheña kukaana kweseka.—1 Kor. 9:27.

 CHAKUDIHEMBA

8-9. Chumanyi chadi kwilayi mukwenzi ashimunawu muYishimu kapetulu 7 hakwila atondolweli kukoña nshidi yahamesu bwi-i? (Yishimu 7:8, 9, 13, 14, 21)

⁸ Tunateli kudihemba ñahi etu aweni? Talenu yuma yitunateli kudizila kudi mukwenzi ashimunawu muYishimu kapetulu 7. Welili wuvumbi namumbanda chivumbi. Vasi 22 yatulejaña nawu iwu mukwenzi “hohenohu” wamulondeleli. Ilaña mavasi ahanyima amwekeshaña nawu kudi yuma yikwawu yafuukwiliyi chatama henohu kanda eli ichi chuma chamuletesheli avulumuni.

⁹ Yumanyi yamuletesheli avulumuni? Chatachi, namelela “wahitilileña munjila yadiña kwakwihi namaakenu [amumbanda chivumbi].” Kuhiñahu watachikili kuya kwekalila itala daniwu mumbanda. (Tañenu Yishimu 7:8, 9.) Nkumininaku, chamumweniyi iwu mumbanda wamushiyili wanyi. Ilaña iwu mukwenzi wetejeli kumufufwa nawa watachikili kumutiyilila iwu mumbanda chahosheleñayi hanyilambu yakuwunda yalambwiliyi, hadaha wakeñeleña amukojeji iwu mukwenzi atachiki kutoñojoka nindi hadiña muntu watamaku. (Tañenu Yishimu 7:13, 14, 21.) Neyi chakwila iwu mukwenzi welili wanyi iyi yuma yamukojejeli akoñi nshidi, wadi kutondolwela kwiñila mukweseka kwakwila chuma chatama nawa hadi kuvulumunaku.

10. Makonu muntu nateli kukoña ñahi chiluwa chochimu neyi cheliliyi ona mukwenzi?

¹⁰ Nsañu yasonekeli Solomoni yinakumwekesha chuma chinateli kumumwekena mukakudifukula waYehova wejima. Hadaha nateli kukoña nshidi yeneni nawa mukuhita kwampinji hakutoñojoka nindi yuma yejima yashikena hohu ‘kumwekana.’ Indi kwiji nateli kuhosha nindi, “Chamwekana hohu neyi mukulabula kwadisu.” Ilaña neyi ahudikila nakutoñojoka hachuma chacheni chaletesha chumichi chimwekani, hadaha wukuwana kwila nindi kudi yuma yafuukulayi chatama hakusambila yaletesha akoñi iyi nshidi. Hadaha wadikundaña nawantu atama, wadiñijaña muyisela yatama hela wayili hawebusayiti indi kwiji kumaluña kwabula kutelela akaKristu. Hekwawu walekeli nikulomba, kutaña Bayibolu, kuya nakupompa hela kuya nakushimwina. Neyi chichadiña kudiwu mukwenzi ashimunawu muYishimu, chinamwekani neyi hashikena kukoña nshidi ‘hohenohuku.’

11. Hakwila tubuli kukoña nshidi, yumanyi yitwatela kutondolwela?

¹¹ Yumanyi yitunakudizilaku? Twatela kutondolwela nshidi niyuma yaleteshaña tukoñi nshidi. Solomoni wakolesheli ichi chikuma hanyima yakuhosha hansañu yahosha hadi mukwenzi nimumbanda chivumbi. Kutalisha hadi iwu mumbanda, wahosheli nindi: “Bayi musenuka nakuya munjila jindiku.” (Yish. 7:25) Wahosheli cheñi hadi iwu mumbanda mukanshidi nindi: “Imenaku hahalehi nayena; bayi wuswina kwakwihi nawiñililu wetala dindiku.” (Yish. 5:3, 8) Mwamweni, twadihembaña kulonda tubuli kukoña nshidi kuhitila mukutondolwela kwila yuma yikutuletesha tuvulumuni. b Chumichi munabombeli kutondolwela kwila yuma yimu yabula kukaanishawu akaKristu ilaña yelukewa nawu yinateli kutuletesha kwiñila mukweseka.—Mat. 5:29, 30.

12. Yoba wadikasili nindidi, nawa chumichi chamukwashili ñahi kudihemba kulonda abuli kwiñila mukweseka? (Yoba 31:1)

¹² Hakwila tutondolweli yuma yinateli kutuletesha tukoñi nshidi, twatela kudikasa mumuchima chikupu. Dichuma cheliliyi Yoba. ‘Wakwatili chitiyañenu namesu indi’ kulonda abuleña kutala ambanda namesu akuyifwila. (Tañenu Yoba 31:1.) Kwila mwadikasiliyi kwamukwashileña kubula kukoña wujila. Ninetu twatela kutondolwela chuma chidi chejima chinateli kutuletesha kwiñila mukweseka.

13. Muloñadi chitwatela kuhembela yitoñojoka yetu? (Talenu cheñi nyevulu.)

 ¹³ Twatela cheñi kuhemba yitoñojoka yetu. (Kwid. 20:17) Antu amakwawu atoñojokaña nawu chidi hohu chiwahi kufwikija wunakwila chuma chatama chakala hohu wunakuchiila wanyi. Ilaña yitoñojoka yamuchidiwu yatama. Muntu watwalekañahu kutoñojoka hachuma chatama waswejelañaku kwikala namuchima wakufwila kuchikoña ochu chuma. Neyi ela mwenimu, chikumukalila nankashi kutondolwela kwila chuma chatama. Hela chochu, mpinji jikwawu tunateli kwikala nayitoñojoka yatama. Chuma chinateli kutukwasha hikushikena kuleka kutoñojoka hanoyu yuma yatama nakutachika kutoñojoka hayuma yayiwahi. Neyi twila mwenimu, tukudikiña etu aweni kulonda tubuli kukoña nshidi yahamesu bwi-i, muloña hituneteji yitoñojoka yatama yisweji kutaanda muyitoñojoka yetuku.—Fwili. 4:8; Kol. 3:2; Yak. 1:13-15.

14. Chumanyi chikwawu chinateli kutukwasha kudihemba kulonda tubuli kwiñila mukweseka?

¹⁴ Chumanyi chikwawu chitwatela kwila hakwila tudihembi kulonda tubuli kwiñila mukweseka? Twatela kukuhwelela chikupu netu neyi twovwahilaña nshimbi jaYehova mukufumaña yuma yayiwahi mpinji yejima. Mpinji jikwawu, chinateli kutukalila kutoñojoka nikwila yuma yitunakufwila kwesekeja nachinakukeñayi Nzambi nindi twili, ilaña neyi tuzata nañovu kwila mwenimu, tunateli kwikala namuzañalu chikupu.

15. Kwikala namuchima wakufwila kwila yuma yayiwahi kunateli kutukwasha ñahi kudihemba kulonda tubuli kwiñila mukweseka?

¹⁵ Twatela kwikala namuchima wakufwila kwila yayiwahi. Neyi ‘tuhelaña yuma yatama nakukeña yayiwahi,’ tukufwilaña chikupu kwila yuma yaloña nikutondolwela kwila yuma yikuletesha tukoñi nshidi. (Amosi 5:15) Muchima wakufwila kwila yuma yayiwahi wunateli cheñi kutukwasha kukaana kweseka neyi tudiwana mukukala kwakukasumwisha kutwabula kukuhwelela hela kukañesha.

16. Kwila yuma yakuspiritu kunateli kutukwasha ñahi kutwalekahu kudihemba? (Talenu cheñi nyevulu.)

¹⁶ Tunateli kwikala ñahi namuchima wakufwila kwila yuma yayiwahi? Tunateli kwila mwenimu neyi tudikitaña chikupu munyidimu  yakuspiritu. Neyi tudi kukupompa kwawakaKristu hela mumudimu wakushimwina, chekalaña wanyi chaswayi kutweseka kwila chuma chatama. Ilaña twaswejelañaku kwikala namuchima wakufwila kumuzañalesha Yehova. (Mat. 28:19, 20; Heb. 10:24, 25) Neyi tutañaña nikudizaña Izu daNzambi nikutoñojokahu chikupu, twaswejelañaku kukeña yuma yayiwahi nikuhela yuma yatama. (Yosh. 1:8; Mas. 1:2, 3; 119:97, 101) Anukenu, Yesu wayilejeli atumbanji twindi nindi: “Lombenuña kulonda mubuli kwiñila mukweseka.” (Mat. 26:41) Hampinji yitunakuhanjeka naTata yetu wekala mwiwulu mukulomba, twamwinkaña mpinji yakutukwasha nawa twaswejelañaku kwikala namuchima wakufwila kumuzañalesha.—Yak. 4:8.

TWALEKENUHU KUDIHEMBA

17. Kuzeyazeyanyi kwamwekesheliyi Petulu hadi kapampa kakavulu?

¹⁷ Hadaha tunateli kumanisha chikupu kuzeyazeya kukwawu kutukweti. Hela chochu, tunateli kutwalekahu kulwisha nakuzeyazeya kukwawu hadi mpinji yayilehi. Talenu chuma chamumwekeneni kapostolu Petulu. Watiyili antu woma hampinji yamukaaniniyi Yesu kapampa kasatu. (Mat. 26:69-75) Chinamwekani neyi Petulu wemikili mushindu awuna woma hampinji yayishimwininiyi nakuhamuka akaSanihedirini. (Yilw. 5:27-29) Hela chochu, chimwahitili yaaka, “muloña watiyili woma antu adiña aalama” walekeli kudiila hamu nawakaKristu akunyuza hakapinji. (Ñal. 2:11, 12) Haniyi mpinji Petulu watiyili cheñi woma. Hadaha wachidiña naniku kuzeyazeya.

18. Chumanyi chinateli kumwekana kutalisha hakuzeyazeya kukwawu?

¹⁸ Hadaha tunateli kudiwana mukukala kwokumu. Munjilanyi? Kufwana Petulu, mpinji jikwawu tunateli kulwisha nakuzeyazeya kutwatoñojokeleña netu tunakwimiki mushindu. Chakutalilahu, manakwetu wumu wahosheli nindi: “Nalekeli kutala nyevulu yanzekesi hadi yaaka 10 nawa nakuhweleleli chikupu nami kukala kwamanini. Ilaña kuzeyazeya kwami kwadiña neyi kanyama kazuwa kanabelamini nakuhembelela mpinji yikatela kulukuka.” Chasweja kuwaha, manakwetu hazeyeliku. Wamweni nindi wateleleli kuzata nañovu hefuku-hefuku kulonda akañesheña iku kuzeyazeya, hadaha kwila mwenimu muchihandilu chindi chejima mukanu kaayi katama. Nawukwashi wañodindi niwawakulumpi  amuchipompelu mwadiñayi, wazatili nañovu kwila yuma yamukwashili kutondolwela kutala nyevulu yanzekesi.

19. Tunateli kukañesha ñahi kuzeyazeya kutukweti kunakutwalekahu?

¹⁹ Tunateli kukañesha ñahi kuzeyazeya kutukweti kunakutwalekahu kulonda kubuli kutuletesha kukoña chuma chatama? Kuhitila mukwovwahila kufumba kwaYesu kwahosha hakweseka, kwakwila nawu: “Dichi tonenuña.” Nihampinji yimunakutiya nenu mwakola tondolwelenu kwila yuma yikuyiletesha mwiñili mukweseka. (1 Kor. 10:12) Twalekenuhu kwila yuma yayikwashili kwimika mushindu oku kuzeyazeya. Yishimu 28:14 yahosha nawu: “Wudi namuzañalu yowu muntu wasoñama mpinji yejima.”—2 Pet. 3:14.

YUMA YAYIWAHI YAFUMAÑAMU NEYI TUTWALEKAHU KUDIHEMBA

20-21. (a) Yumanyi yayiwahi yitwakadiluñisha neyi tutwalekahu kudihemba kulonda tubuli kwiñila mukweseka? (b) Neyi tuzataku mbadi yetu, Yehova wakatwililadi? (2 AKorinda 4:7)

²⁰ Twatela kukuhwelela chikupu netu kutwalekahu kudihemba kulonda tubuli kwiñila mukweseka mwafumaña yuma yayiwahi. Neyi tuvulumuna tunateli “kudiluñisha chiseki . . . chahakapinji kantesha,” ilaña neyi twovwahilaña yuma yakeñañayi Yehova, twakekala namuzañalu wabadika. (Heb. 11:25; Mas. 19:8) Chekala mwenimu muloña atuleñeli kulonda tuhandeña kwesekeja nanjila jindi. (Kutach. 1:27) Neyi twilaña yuma yamuzañaleshaña Yehova, tukwikalaña nachinleji chamuchima chitooka nawa ifuku dimu twakadiluñisha wumi wahaya nyaaka.—1 Tim. 6:12; 2 Tim. 1:3; Yuda 20, 21.

²¹ Mwalala, “mujimba wunazeyi.” Ilaña ichi chinatalishi wanyi mukwila nawu kwosi watela kutukwasha. Yehova wadiloñesha kutwinka ñovu yinakukeñeka. (Tañenu 2 AKorinda 4:7.) Hela chochu, ilukenu nenu ñovu yatwinkañayi Nzambi hiñovu yabadika hañovu jawantu. Ilaña twatela ntahi kuzatisha ñovu jetu kudikiña kulonda tubuli kwiñila mukweseka. Neyi tuzataku mbadi yetu, twatela kukuhwelela chikupu netu Yehova wukwakula kulomba kwetu kwakutwinkelahu ñovu jikwawu hampinji yitunakujikeña. (1 Kor. 10:13) Mwamweni, nawukwashu waYehova tunateli kudihemba kulonda tubuli kwiñila mukweseka.