1-2. Zadoki wadiñanyi? (1 Kushindulula 12:​22, 26-​28)

 FWIKIJENU ichi chuma chamwekeni. Izanvu dawamayala akubadika 340,000 dapompeli hamu kulonda amwilishi Davidi kwikala mwanta wakuyula aIsarela ejima. Hadi mafuku asatu, awa amayala ashakamini kutupidi kwakwihi naHebironi. Kwadiña tusehu, kuhanjeka nawa embileña tumina twamuzañalu twakumushimeka Yehova. (1 Kushi. 12:39) Hanidi izaza dawantu hadiña kansi weyala wejina daZadoki, antu amavulu hiyamwilukiliku. Ilaña, Yehova wamwilukili nawa wakeñeleña nindi ninetu twiluki netu wadiña hanidi izaza. (Tañenu 1 Kushindulula 12:​22, 26-28.) Zadoki wadiñanyi?

² Zadoki wadiña kapristu wazatilili hamu chikupu naKapristu Muneni Abiyatari. Zadoki wadiña cheñi mukakumona jakumbidi watwesheleña kwiluka nkeñelu yaNzambi nawa amwinkeli kashinshi kabadika. (2 Sam. 15:27) Antu ayileña kudi Zadoki neyi anakukeña kufumba kwakuwahi. Wadiña cheñi wahamuka. Muchinu chibaaba tukudiza Zadoki chamwekesheliyi chilwilu chakuhamuka.

3. (a) Muloñadi akakudifukula aYehova chatela kwikalilawu ahamuka? (b) Yumanyi yitukuhanjeka muchinu chibaaba?

³ Munanu mafuku akukuminina, Satana nakuzata nañovu kulonda alukuki antu jaNzambi. (1 Pet. 5:8) Twatela kwikala ahamuka hampinji yitunakumutalila Yehova kumufumishahu Satana nikaayi kindi katama. (Mas. 31:24) Tuhanjekenu njila jisatu mutunateli kwimbujolela chilwilu chakuhamuka chadiña naZadoki.

 KUHAKWILAKU WANTA WANZAMBI

4. Muloñadi antu jaYehova chatela kwikalilawu ahamuka hakwila ahakwiliku Wanta waNzambi? (Talenu cheñi mwevulu.)

⁴ Chineli tudi antu jaYehova, twahakwilañaku Wanta waNzambi namuchima wejima, ilaña mpinji yejima twatela kwikala ahamuka hakwila twili mwenimu. (Mat. 6:33) Chakutalilahu, mukanu kaayi katama twatela kwikala ahamuka hakwila twovwahileña nshimbi jaYehova nikushimwina nsañu yayiwahi yaWanta. (1 Tes. 2:2) Nawa kakavulu chakeñekaña kwikala ahamuka hakwila tubuli kudiñija munsañu jamapolitiki mukanu kaayi katama kanakuswejelaku kudaambula. (Yow. 18:36) Amavulu hakachi kawantu jaYehova anakumona kukala kwamali, kuyeta hela kuyikasa mutuleya muloña wakubula kudiñija munsañu jamapolitiki hela mumudimu wawushidika.

5. Muloñadi Zadoki chakeñekeleleñayi kwikala wahamuka hakwila amukwashi Davidi?

⁵ Zadoki hayili kuHebironi muloña hohu wakuwanika kuchidika chakumwilisha Davidi kwikala mwantaku. Wayili kweniku iku nadimanyeki nawa nadiloñeshi kuzuña njita. (1 Kushi. 12:38) Wadihanini kumulondela Davidi kunjita nikukiña aIsarela kudi ayilumbu jawu. Hela chakwila Zadoki hadiña mushidika wakulukila mukuzuña njitaku, ilaña wadiña wahamuka.

6. Davidi wamwekesheli ñahi chilwilu chakuhamuka chikupu chembujoleliyi Zadoki? (Isamu 138:3)

⁶ Kapristu Zadoki wadizilili kudanyi kwikala wahamuka nankashi? Welukili amayala amavulu adiña akola nawa ahamuka. Chakadi nikujina, wadizilili yuma yayivulu kudi wena. Chakutalilahu, chilwilu chaDavidi chakuhamuka chamwekesheliyi ‘hakulombola aIsarela kumajita awu,’ chakojejeli aIsarela ejima kumukwasha namuchima wejima. (1 Kushi. 11:1, 2) Mpinji yejima Davidi wamushindameneneña Yehova hakwila amukwashi kwimika mushindu ayilumbu jindi. (Mas. 28:7; tañenu Isamu 138:3.) Zadoki wadizilili cheñi kudi amayala ahamuka, chidi neyi Yehoyada nimwanindi Benaya wadiña  mushidika, kushilahu niakulumpi 22 anyichidi adiña kukabadi kaDavidi. (1 Kushi. 11:22-25; 12:26-28) Awa amayala ejima afuukwilihu kumwilisha Davidi kwikala mwanta wawu nikumukiña.

7. (a) Yakutalilahwinyi yamakonu yawantu amwekesheli kuhamuka yitunateli kudizilaku? (b) Yumanyi yitunateli kudizila kuchuma chamumwekeneni Manakwetu Nsilu, neyi chinamwekeshiwu muvidiyo?

⁷ Twekalaña nañovu nawa ahamuka neyi tudizaña hadi antu ahakwililiku chiyuulu chaYehova nakuhamuka. Mwanta wetu, Kristu Yesu, wakaanini chikupu ikakeja dakudiñija munsañu jamapolitiki jamukaayi kaSatana. (Mat. 4:8-11; Yow. 6:14, 15) Mpinji yejima wamushindameneneña Yehova kulonda amwinki ñovu. Muyaaka yamakonu, tukweti cheñi yakutalilahu yayivulu yawamanakwetu atwansi akaanaña kwiñila wushidika hela kudiñija munsañu jamapolitiki. Kwila mutaña nsañu yahosha hayuma yayimwekeneni yekala ha jw.org nehi? a

KWASHENUÑA AMANAKWENU

8. Mpinjinyi akulumpi yakeñekañawu kwikala ahamuka kulonda ayilili amanakwawu niahela yuma yinakukeñawu?

⁸ Antu jaYehova akeña kudikwasha wumu namukwawu. (2 Kor. 8:4) Hela chochu, mpinji jikwawu chakeñekaña kwikala ahamuka hakwila twili mwenimu. Chakutalilahu, neyi kudi njita akulumpi muyipompelu elukaña nawu amanakwawu niahela anakukeñeka kuyikolesha, kuyikwasha, nawa hadaha muyuma yakuspiritu hela yakumujimba. Muloña wakukeña anyikoku, akulumpi ashaña wumi wawu muwubanji kulonda ayilili yuma yinakukeñawu. (Yow. 15:​12, 13) Kuhitila mukwila mwenimu, alondelaña chakutalilahu chaZadoki chakwikala ahamuka.

9. Neyi chinamwekeshiwu ha 2 Samweli 15:​27-​29, Davidi wamulejeli Zadoki kwiladi? (Talenu cheñi mwevulu.)

⁹ Wumi waDavidi wadiña muwubanji. Mwanindi Abisalomi wafwilileña kumuhukula wanta. (2 Sam. 15:12, 13) Davidi wakeñekeleña kufuma muYerusalema chakadi kuumba mpinji!  Davidi watambikili ambuñindi nakuyileja nindi: “Nyamukenu, tuyenu tutemuki, muloña kwosi niwumu hakachi ketu wukupuluka kudi Abisalomiku!” (2 Sam. 15:14) Ambuñindi chatachikiliwu kuya, Davidi wanukili nindi kwateleleli kushala kambuñindi wumu hakachi kawu kulonda amulejeña tufuta twaAbisalomi. Dichi wamulejeli Zadoki niatupristu amakwawu kufunta mumusumba kulonda ekali akakumuleja nsañu. (Tañenu 2 Samweli 15:27-29.) Ateleleli kwikala asoñama hakuzata iwu mudimu. Chuma chayilejeliyi Davidi awa atupristu kwila chadiña chakala nawa wumi wawu wadiña muwubanji. Abisalomi wadiña iyala wamadombu nawa wadikeña yomweni, wamubalumukililimu tata yindi wamuvweli. Fwikijenu chadi kumwilayi Zadoki niakwawu atupristu neyi chakwila welukili nindi awa amayala akeñakeñeleña kwiluka tufuta twindi kulonda amukiñi Davidi!

10. Zadoki ninowu adiñayi nawu amukiñili ñahi Davidi?

¹⁰ Davidi wakasili kafuta hamu naZadoki niHushayi, ibwambu daDavidi mukwawu washinshika. (2 Sam. 15:​32-​37) Kuzatisha aka kafuta, Hushayi wamudimbili Abisalomi neyi kwiji nakumukwasha nawa wamulejeli chuma chatela kwilayi hakwila amulukuki Davidi, dichi chumichi chamukwashili Davidi kwikala nampinji yakudiloñesha chatela kulukukayi. Kuhiñahu, Hushayi wamulejeli Zadoki niAbiyatari aka kafuta. (2 Sam. 17:8-16) Awa amayala ayedi atemesheli mazu kudi Davidi. (2 Sam. 17:17) Nawukwashu waYehova, Zadoki niakwawu atupristu azatili mudimu walema hakukiña wumi waDavidi.​—2 Sam. 17:21, 22.

11. Tunateli kwikala ñahi ahamuka neyi Zadoki hampinji yitunakukwasha amanakwetu?

¹¹ Tunateli kwikala ñahi ahamuka neyi Zadoki neyi amanakwetu adi muwubanji nawa anatuleji nawu tuyikwashi? (1) Londelenu wunlomboli. Mumpinji jamuchidiwu, chalema nankashi kutwalekahu kwikala anuñañana. Londelenu wunlomboli wunakufuma kukasanji kamutayi kadi mwituña denu. (Heb. 13:17) Mumpinji-mumpinji akulumpi atela kuhitulukaña muntanjikilu yashawu kutalisha hachakudiloñeshela chadimu nawubanji wadimwekenaña, kushilahu  niwunlomboli wutwatambwilaña mukuloñesha wahosha hachitwatela kwila neyi kunamwekani wubanji. (1 Kor. 14:33, 40) (2) Ikalenu ahamuka ilaña ababala. (Yish. 22:3) Toñojokenuhu henohu kanda mwili chuma. Zatenu hakumina ñovu jenu kulonda mudikiñi. (3) Mushindamenenu Yehova. Anukenu nenu Yehova wakeñaña enu niamanakwenu kwikala akiñewa. Nateli kuyikwasha kulonda mukwashi amanakwenu kwikala akiñewa.

12-13. Yumanyi yimunakudizila kuyuma yayimwekeneni aViktor nawaVitalii? (Talenu cheñi mwevulu.)

¹² Talenu chuma chayimwekeneni aViktor nawaVitalii, amanakwetu ayedi akuspiritu azatili nañovu kutwalila akwawu akakwitiya yakuda nimenji muUkraine. Manakwetu Viktor wahosheli nindi, “Twayileña nakukeñakeña yakuda kumaluña ashiyashana. Kakavulu twatiyileña antu chalozeleñawu mata kwakwihi nanetu. Manakwetu wumu wahanini yakuda kufuma musitolu yindi. Ichi chawaana chayikwashili akakushimwina amavulu kwikala nayakuda yayikwashili kuhanda hadi mpinji yayilehi. Hitwaloñeleña yuma mumotoka wetu, mutendanzumbu waholokeli mamita 20 (mafiti 66) kufuma hitwadiña. Ifuku dejima, nalembeleña kudi Yehova nami ankwashi kwikala wahamuka kulonda nitwalekihu kukwasha akakushimwina.”

¹³ Manakwetu Vitalii wahosheli nindi, “Twakeñekeleña kwikala ahamuka nankashi. Nendeli maora 12 halwendu lwami lwatachi. Hanilu lwendu lwejima nalombeleña kudi Yehova.” Manakwetu Vitalii wadiña wahamuka, ilaña wadiña cheñi wababala. Wabombelelihu nindi: “Natwalekelihu kumulomba Yehova nami anyinki maana nikunkwasha kwikala wamwovu. Nazatishileña hohu nyikwakwa yetejeliwu kudi akawuswa. Chikuhwelelu chami chakoleleliku chinamweni amanakwetu niahela chazatilileñawu hamu. Afumishileña yuma yachiikileña mumukwakwa, atambwileña yuma yakukwasha adi mukukaankila nikuyiloñejeka mumotoka, nawa atwinkeleña yakuda nihakukaama hanilu lwendu lwetu.”

TWALEKENUHU KWIKALA ASHINSHIKA KUDI YEHOVA

14. Tunateli kutiya ñahi neyi muntu itwakeña aleka kumukalakela Yehova?

¹⁴ Kweseka kumu kwabadika nankashi kutunateli kumona, hikweseka kwekalañaku neyi ntaña yetu hela ibwambu detu aleka kumukalakela Yehova. (Mas. 78:40; Yish. 24:10) Neyi twadikunda nankashi nanowu muntu, chikutukalila kwiteja neyi chuma chamuchidiwu chinamwekani. Neyi mwamonahu dehi kukala kwamuchidiwu, kashinshi kamwekesheliyi Zadoki kanateli kuyikolesha.

15. Muloñadi Zadoki chakeñekeleleñayi kwikala wahamuka hakwila atwalekihu kwikala washinshika kudi Yehova? (1 Anyanta 1:​5-8)

¹⁵ Zadoki watwalekelihu kwikala washinshika kudi Yehova hampinji yelili ibwambu dindi Abiyatari aleki kwikala washinshika. Chumichi chamwekeni kumakumishilu achiyuulu chaDavidi. Davidi chadiñayi kwakwihi nakufwa, mwanindi Adoniya wakeñeleña kudilisha kwikala mwanta hela chakwila Yehova wakeñeleña nindi ­Solomoni ekali mwanta. (1 Kushi. 22:9, 10) Abiyatari wafuukwilihu kwikala kukabadi kaAdoniya. (Tañenu 1 Anyanta 1:5-8.) Cheliliyi mwenimu, Abiyatari walekeli kwikala washinshika kudi Davidi nikudi Yehova! Fwikijenu chineñi chatiyiliyi Zadoki. Muloña hadi yaaka 40 nakubadikahu, yena naAbiyatari azatilileña hamu mudimu wawupristu. (2 Sam. 8:17) Adiña nakwakamena hamu “Chimbañu chaNzambi walala.” (2 Sam. 15:29) Hakusambila, awa amayala ayedi amukwashileña Davidi hadiñayi mwanta, kushilahu nimuyuma yikwawu yayivulu.—2 Sam. 19:11-14.

16. Chumanyi chatela chamukwashili Zadoki kutwalekahu kwikala washinshika?

¹⁶ Zadoki watwalekelihu kwikala washinshika kudi Yehova hela chakwila Abiyatari wafuukwili  chatama. Davidi watwalekelihu kumukuhwelela Zadoki. Chelili kafuta kaAdoniya akifuñununi, Davidi watondeli Zadoki, Natani niBenaya nindi amuwayishi Solomoni ekali mwanta. (1 Anya. 1:32-34) Kwikala hamu nawakakudifukula aYehova ashinshika, chidi neyi Natani niantu amakwawu amukwashileña Mwanta Davidi, kwatela kwamukolesheli Zadoki. (1 Anya. 1:​38, 39) Solomoni chekaliliyi mwanta, “watondeli kapristu Zadoki nakumusinsisha hadi Abiyatari.”—1 Anya. 2:​35.

17. Munateli kumwimbujola ñahi Zadoki neyi muntu imwadikunda nindi chikupu aleka kwikala washinshika kudi Yehova?

¹⁷ Tunateli kumwimbujola ñahi Zadoki? Neyi muntu imwadikunda nindi afuukulahu kumushiya Yehova, twalekenuhu kwikala ashinshika. (Yosh. 24:15) Yehova wukuyinka ñovu nawa wukuyikwasha kwikala ahamuka. Mushindamenenu mukulomba nawa twalekenuhu kudikunda nawakwenu akakudifukula ashinshika. Yehova watiyaña kuwaha chimwatwalekañahu kwikala ashinshika, nawa wakayifweta.​—2 Sam. 22:.

18. Chumanyi chimunakudizila kuchuma chayimwekeneni aMarco nawaSidse?

¹⁸ Talenu chuma chayimwekeneni aMarco nawañodawu aSidse, akweti anyana awambanda ayedi akula dehi alekeli kumukalakela Yehova. Manakwetu Marco wahosheli nindi: “Kufuma tuhu hefuku davwalikaña mwana, kwekalaña kumukeña chikupu. Kwekalaña kuzata nañovu kulonda wumukiñi kuchuma chatama chinateli kumumwekena. Dichi neyi afuukulahu kuleka kumukalakela Yehova, chakataña nankashi kumuchima.” Watwalekelihu nindi: “Ilaña Yehova wudi kukabadi ketu. Natwalekihu kutukwasha chakwila neyi ami nizeya, ñodami wankoleshaña, nawa neyi yena azeya, ami namukoleshaña.” Muhela Sidse wabombelelihu nindi: “Hitwadi kutwesha kuumika neyi chakwila Yehova hatukolesheleñaku. Kakavulu nadinkeleñamu nyiloña nami yami wakojejeli, dichi namulejelimu Yehova chinatiyileña. Chimwahitili mpinji yantesha, muhela inabulili kumonahu hadi yaaka yayivulu wenjili kudi ami, wannañikili makasa hamafwiji, wantalili swi-i mumesu nawa wahosheli nindi: ‘Anukaku chumichi ­Sidse, yeyi wunaleteshi wanyi!’ Nawukwashu waYehova, natwalekihu kwikala namuzañalu mumpinji yinnakumukalakela.”

19. Munakufwila kwiladi?

¹⁹ Yehova wakeñaña akakudifukula indi ejima kwikala ahamuka neyi Zadoki. (2 Tim. 1:7) Hela chochu, hakeñaña nindi tushindameneña hañovu jetuku. Wakeñaña nindi tumushindameneña. Dichi neyi munakumona kukala kunakukeñeka enu kwikala ahamuka, mulombenu Yehova. Mwatela kwiluka chikupu nenu wakayikwasha kwikala ahamuka neyi chadiñayi Zadoki!—1 Pet. 5:​10.