Malwihu Kufuma Kudi Antañi
“Mumbanda” atenawu haIsaya 60:1 hinyi, nawa ‘wanyamukaña’ ‘nikutoñeka chejeji’ ñahi?
Isaya 60:1 yatañewaña nawu: “Eyi mumbanda, nyamukaku, toñekaku chejeji, muloña chejeji cheyi chinenzi. Kulema kwaYehova kunakutoñekeli.” Awa mazu anakumwekesha nawu iwu “mumbanda” wadiña Ziyona, hela Yerusalema, musumba weneni muYuda hayina mpinji. a (Isa. 60:14; 62:1, 2) Yerusalema wemenañaku muza wejima waIsarela. Kudi malwihu ayedi itukwakula kutalisha haniyi nsona: Lwatachi, mpinjinyi nawa munjilanyi Yerusalema ‘mwanyamukililiyi’ nikutoñeka chejeji chakuspiritu? Lwamuchiyedi, komana mazu aIsaya anakushikijewa chikupu muyinu mpinji yitunakushakamamu?
Mpinjinyi nawa munjilanyi Yerusalema ‘mwanyamukililiyi’ nikutoñeka chejeji chakuspiritu? Yerusalema nitembeli yadiñamu jashalili kwamahembi hampinji aYudeya yadiñawu muwunkoli muBabiloni hadi yaaka 70. Ilaña hanyima yakumwimika mushindu Babiloni kudi aMediya nawaPeresi, aIsarela ejima apalañeneni muWanta waBabiloni wejima ayuumbiliku kulonda afunti kwituña dawu nakufuntisha kudifukula kwalala. (Ezera 1:1-4) Kutachika mu 537 B.C.E., ashalahu ashinshika munyichidi yejima 12 elili mwenimu. (Isa. 60:4) Atachikili kulambula nyilambu kudi Yehova, kwikala nayawija nikutuñulula tembeli. (Ezera 3:1-4, 7-11; 6:16-22) Cheñi, kulema kwaYehova kwatachikili kutoñekela chejeji haYerusalema, dikwila nawu hadi antu jaNzambi afuntili. Kuhiñahu, niwena atachikili kutoñekela chejeji hanyuza yadiña mumwidima wakuspiritu.
Hela chochu, wuprofwetu waIsaya wahosheleña hakufuntisha kudifukula kwalala washikijeweli hohu chanti hadi Yerusalema wakushankulu. AIsarela amavulu hiyatwalekelihu kumwovwahila Nzambiku. (Nehe. 13:27; Mal. 1:6-8; 2:13, 14; Mat. 15:7-9) Mukuhita kwampinji, amukaanini niMesiya, Yesu Kristu. (Mat. 27:1, 2) Mu 70 C.E., Yerusalema nitembeli yadiñamu ajijilumwini kamuchiyedi.
Yehova washimwineñahu dehi nindi ichi chuma chatama chakamwekana. (Dan. 9:24-27) Mwamweni, yadiña nkeñelu yindi wanyi yakwila nawu Yerusalema yahamaseki yakashikiji wuprofwetu wejima wahosha hakufuntisha kudifukula kwalala kwashimunawu muIsaya kapetulu 60.
Komana mazu aIsaya anakushikijewa chikupu muyinu mpinji yitunakushakamamu? Eña, ilaña anakushikijewela mudi mumbanda mukwawu wachifwikija—“Yerusalema wamwiwulu.” Kapostolu Pawulu wasonekeli kutalisha hadi iwu mumbanda nindi: “Diyi mama yetu.” (Ñal. 4:26) Yerusalema wamwiwulu himbadi yakuloñesha kwaNzambi kwamwiwulu, watuñewa nayileñaleña yakuspiritu yashinshika. Anyanindi mwabombela Yesu nia 144,000 akaKristu awayishewa naspiritu, akweti kuchiñeja kwamwiwulu neyi Pawulu. AkaKristu awayishewa diwu “muza wajila”, dikwila nawu “Isarela waNzambi.”—1 Pet. 2:9; Ñal. 6:16.
Yerusalema wamwiwulu ‘wanyamukili’ ‘nikutoñeka chejeji’ ñahi? Welili mwenimu kuhitila mudi anyanindi awayishewa ahamaseki. Talenu yuma yiyahitilimu chiyesekana nawuprofwetu wekala muIsaya kapetulu 60.
AkaKristu awayishewa ‘anyamukili’ muloña eñilili mumwidima wakuspiritu helili akakusekesha ataandi hanyima yakufwa kwawapostolu. (Mat. 13:37-43) Dihafumini ekali ankoli kudi Babiloni Muneni, wanta wamukaayi wakudifukula kwakutwamba. Awayishewa atwalekelihu kwikala ankoli kushika nikumpinji “[yakukuma] kwanshakaminu yamakonu,” mpinji yatachikili muchaaka cha 1914. (Mat. 13:39, 40) Hashimbwili wanyi, mu 1919, ayifumishili muniwu wunkoli nawa hohenohu atachikili kutoñeka chejeji chakuspiritu kuhitila mukudikita chikupu mumudimu wakushimwina. b Hadi yaaka yayivulu yinahitihu, antu akunyuza yejima anenzi munichi chejeji, kushilahu niashalahu amudi Isarela waNzambi, dikwila nawu “anyanta” ashimunawu haIsaya 60:3.—Chim. 5:9, 10.
Kumbidi, akaKristu awayishewa akaswejelaku kutoñeka chejeji chaNzambi. Chakafwawu hanu hamaseki, akekala kabadi “[ka]Yerusalema Yayiha,” hela kankaña kaKristu kawa 144,000 akayuula hamu nindi neyi anyanta nawa atupristu.—Chim. 14:1; 21:1, 2, 24; 22:3-5.
Yerusalema yayiha yakazata mudimu weneni hakushikija nsona yaIsaya 60:1. (Esekejenu Isaya 60:1, 3, 5, 11, 19, 20 naChimwekeshu 21:2, 9-11, 22-26.) Neyi chekalili Yerusalema yahamaseki iluña mwekalili nfulumendi muIsarela wakushankulu, Yerusalema Yayiha niKristu yakekala nfulumendi yanshakaminu yayiha. Yerusalema Yayiha “[yasulukaña ñahi] mwiwulu kufuma kudi Nzambi”? Yelaña mwenimu kuhitila mukwila yuma yakundama hanu hamaseki. Antu amutiyaña Nzambi woma munyuza yejima “[akenda] muchejeji chanowu musumba.” Nawa akayikuula kunshidi nikufwa. (Chim. 21:3, 4, 24) Chuma chakafumamu chakekala “[chakufuntisha] yuma yejima,” neyi chahoshelihu dehi Isaya niatuprofwetu amakwawu. (Yilw. 3:21) Iku kufuntisha yuma kwabadika kwatachikili hampinji Kristu yekaliliyi Mwanta nawa kwakamana kukuma kwaChiyuulu chaYaaka Ikombakaji.
a HaIsaya 60:1, Bayibolu yaNsona jaKaayi Kakaha yazatisha “mumbanda” chatela yizatishi “Ziyona,” hela “Yerusalema,” muloña mazu achiHeberu emenañaku izu dakwila nawu “nyamukaku” nimazu akwila nawu “toñekaku chejeji,” atalisha kudi muntu wamumbanda, neyi chochidi niizu dasonekawu nawu “kunakutoñekeli.” Izu dakwila nawu “mumbanda” dakwashaña muntu wunakutaña kwiluka nindi anakutena mumbanda wachifwikija.
b Kufuntisha kudifukula kwalala kwadiñaku mu 1919, akulumbulula cheñi haEzekeli 37:1-14 nihaChimwekeshu 11:7-12. Ezekeli washimwineñahu dehi kufuntisha kwakuspiritu kwawakaKristu ejima awayishewa hanyima yakwikala muwunkoli hadi yaaka yayivulu. Wuprofwetu wekala muChimwekeshu watalisha kukuvwalika kwamuchiyedi kwakuspiritu kwezanvu danyanya dawamanakwetu awayishewa anatwalekihu kulombola hanyima yakuyikañesha kumukalakela Yehova chiwahi hadi kapinji kantesha, muloña ayishili mukaleya chakadi muloña. Mu 1919, ayitondeli kwikala “nduñu wamaana nikashinshi.”—Mat. 24:45; talenu mukanda waPure Worship of Jehovah—Restored At Last!, ifu 118.
