DON, Chinsahu chaYehova wakuCanada, wazataña nañovu kushimwina antu abula matala akamaña munyikwakwa. Don wahosheli kutalisha hadi antu amuchidiwu nindi: “Iyala wumu inabulakeni wejina daPeter wadiña namajilu nankashi nawa kanda nimoneñahu dehi muntu wamuchidiwu. Wadiña nakumwekana chatama nawa antu adiña nakumuchinujoka. Wadiña nakukaana yuma yamwinkeleñawu kudi antu.” Hela chochu, Don watwalekelihu kumukwasha iwu iyala wabula itala hadi yaaka 14.

Ifuku dimu, Peter wamwihwili Don nindi: “Wunakudikabishiladi? Antu ejima antondolwelaña. Muloñadi chiwañakamenaña?” Don wazatishili nsona jiyedi mukubabala hakwila nawu yamushiki Peter hamuchima. Chatachi, wamwihwili Peter kulonda yatiyi neyi weluka ijina daNzambi nawa wamulejeli kutaña muBayibolu haMasamu 83:18. Kuhiñahu, hakwila nawu yamuleji chamwakameneneñayi, Don wamwilili Peter kutaña Aroma 10:13, 14, yalumbulula nawu “muntu wejima watambikaña hejina daYehova akamwamwina.” Nkumininaku, Don watañili Matewu 9:36 nawa wamwilili Peter kuditañila yomweni. Iyi vasi yahosha nawu: “Chamweniyi mazaza awantu, [Yesu] wayitiyilili wushona, muloña ayikabishileña nikuyidiwula neyi anyikoku akadi kabiña.” Chatiyiliyi awa mazu, Peter wehwili iku nakudila nindi: “Ninami nidi hakachi kanawa anyikoku?”

Peter watachikili kuhimpa. Waweleli, wakehesheliku wevu nawa wavwalili yakuvwala yamwinkeliwu kudi Don. Peter watwalekelihu kumwekana chiwahi.

Peter wadiña nakumukanda. Kumatachikilu akamukanda kindi wasonekeliku yuma yatama yamwilileñawu, ilaña nsañu yatachikili kusonekayi yambukiliku. Nsañu yimu yasonekeliyi yadiña nawu: “Dalelu nadizi ijina daNzambi. Neyi inakulomba nikulombaña kudi Yehova. Chachiwahi kwiluka ijina dindi. Don wahosheli nindi Yehova nateli kwikala Ibwambu dami, muntu wekala nampinji yankutiyilila mpinji yejima nawa kudi kwejima.”

 Mazu akukumishaku asonekeliyi Peter wasonekeleli manakwindi nimuhelindi. Wasonekeli nindi:

“Inakutiya chiwahi wanyi lelu. Namoni nashinakaji dehi. Ilaña hela chakwila lelu didi ifuku dami dakukumishaku, neluki nami nakamumona cheñi ibwambu dami [Don] muParadisa. Neyi munakutaña awunu mukanda, ami nidiku wanyi. Ilaña neyi mwakamona iyala nenzi kuchipenji nawa wabula kwikala ntaña yetu, mwakahoshi nindi nawa mwakamutañili iwu mukanda wawusombu [wadiña nakutena mukanda wazatisheleñayi hakudiza Bayibolu ‘waIcine Icitungulula ku Bumi bwa Ciyayaya’ wamwinkeliwu]. * Wahosha nawu nakamumona cheñi ibwambu dami muParadisa. Nakuhweleli chumichi namuchima wami wejima. Yami manakwenu mwakeña, Peter.”

Chipenji chichamanini, Ummi muhela Peter walumbulwili nindi: “Hanahiti yaaka yiyedi kufuma hitwahanjekeli naPeter. Watiyakeneña muzañalu. Watumbili chimwemweta.” Wamulejeli Don nindi: “Nikutaña iwu mukanda muloña chuma chamushikili manakwami hamuchima chatela chadiña chalema.” Ummi niyena wetejeli kudiza mumukanda wakatataka waChumanyi Chacheni Chatañishaña Bayibolu? naChinsahu chaYehova.

Ninetu bayi tudiwula muntu wudi wejima ilaña twatela kumwekesha kukeña kwakweni nikudiwunjika nawantu ejima. (1 Tim. 2:3, 4) Neyi tukwila mwenimu, tunateli kukwasha antu adi neyi Peter hela chakwila twayimonaña chiwahi wanyi ilaña adi nanyichima yayiwahi. Tunateli kukuhwelela chikupu netu Nzambi ‘watalaña mumuchima,’ wukukulisha chalala munyichima yawantu akweti nyichima yatelela.—1 Sam. 16:7; Yow. 6:44.