1, 2. Muntu wudi wejima watela kwilukadi? (Talenu mwevulu wakutachikilahu.)

NEYI chitwahanjekeli muchibaaba chinafumihu, Diyabolu wahoshaña nindi Yehova wayuulaña munjila yatama nawa antu atela kudiyuula awenawu. Komana Satana wahosheli mwalala? Fwikijenu neyi chakwila antu atondelihu kudiyuula aweni anakushakama haya nyaaka. Akushakama chiwahi chakadi kuyiyuula kudi Nzambi? Komana mukwikala namuzañalu neyi chakwila mudimena iku munakuhanda haya nyaaka?

² Kwosi muntu watela kuyakwila awa malwihu. Muntu himuntu watela kutoñojoka chikupu haniyi nsañu. Kwila mwenimu, kukuyikwasha kwiluka nenu chiyuulu chaNzambi dichalala. Dichiyuulu chachiwahi. Nawa twatela kuchihakwilaku chikupu. Bayibolu yashimuna muloña waweni wutwatela kuchihakwilaku. Chakutalilahu, toñojokenu haNsona jatukwashaña kwiluka nawu Yehova wukweti wuswa wakuyuula.

3. Muloñadi Yehova chekalilayi Nyuuli watelela?

³ Yehova diyi Nyuuli watelela muloña diyi Nzambi wabadika  nawa diyi Nleñi. (1 Kushi. 29:11; Yish. 4:24) A 144,000 akayula hamu naKristu ayimwekesha muchimwenu haChimwekeshu 4:11, anakuhosha nawu: “Yehova Nzambi yetu, watelela kutambwila kulema, kalemesha niñovu, muloña yeyi waleñeli yuma yejima nawa muloña wankeñelu yeyi, dichiyekalililiku nawa dichiwayileñeleli.” Mwamweni, chineli Yehova diyi waleñeli yuma yejima, wukweti wuswa wakuyuula antu ejima kushilahu niyileñaleña yakuspiritu.

4. Tukuhosheladi netu kudikaña nachiyuulu chaNzambi hikuzatisha wuswa wakudifuukwila munjila yatama?

⁴ Kwosi chuma chaleñayi Satana. Watela nikuhosha wanyi nindi wukweti wuswa wakuyuula. Chadikañiliyi nachiyuulu chaYehova, yena niantu atachi adivwimbili. (Yere. 10:23) Chineli yadiña yileñaleña yikweti wuswa wakudifuukwila, adi kutondahu kudimena chakadi kuyiyuula kudi Nzambi. Hanu dinu, komana adiña nawuswa wakwila mwenimu? Inehi. Wuswa wakufuukula wakwashaña antu kutonda yuma yayiwahi mpinji yejima. Hela chochu, bayi neyi atela kudikaña naNleñi yawu nawa Mukwakuhana Wumiku. Kuhosha hohu chalala, kudikaña naYehova hikuzatisha wuswa munjila yatama. Yehova diyi watelela kutuyuula etu antu.

5. Muloñadi chitukuhoshela netu mwafuukulañayi Nzambi mwejima mwalala?

⁵ Kudi chuma chikwawu chitukuhoshela netu Yehova hiNyuuli watelela. Wazatishaña ñovu jindi jakuyuula munjila yawuñaji walala. Wahosheli nindi: “Yami Yehova nelaña mwaluwi mwawuñaji nimwaloña hamaseki; muloña natiyaña kuwaha nayumiyi.” (Yere. 9:24) Washinshikaña wanyi munyikanda yanshimbi yasonekawu kudi antu abula kawanina kulonda yasompesheleñahu. Wuñaji windi waloña wafumaña kudi yomweni nawa diyi wayisonekeleli antu nshimbi. “Itanda dindi . . . adituñila hakuloña nihawuñaji,” dichi tunakuhweleli netu nshimbi, yishina yindi nimwafuukulañayi mwejima mwalala. (Mas. 89:14; 119:128) Kwambukaku naSatana wunakañanyi kuleta kuwunda mukaayi kejima, chiyuulu chaYehova chikaleta kuwunda.

6. Tukuhosheladi netu Yehova wukweti wuswa wakuyuula kaayi kejima?

⁶ Kubombelahu, Yehova hiNyuuli waloña muloña wukweti maana nikwiluka kwakwakamena yileñaleña. Chakutalilahu, toñojokenu Nzambi chamwinkeliyi Mwanindi ñovu yakuuka yikatu yinakukañanya kuukawu andotolu makonu. (Mat. 4:23, 24; Maku 5:25-29) Kudi Yehova, chumichi chadiña chihayamisha wanyi. Welukili ñovu jazatishiliyi hakuuka nawa wukweti ñovu jakuyifumishahu. Nateli cheñi kusañula afu nikukañesha wubanji wadimwekenaña.

7. Maana aYehova abadika ñahi maana adi mukaayi kaSatana?

⁷ Kaayi kanakuluwañeshawu kudi Satana kanakañanyi kuwana njila yakumanishilamu yikonkojola yinakumwekana munyuza. Yehova hohu diyi wukweti maana akuleta kuwunda mukaayi. (Isa. 2:3, 4; 54:13) Chitweluka maana nikwiluka kwaYehova, tukutiya neyi chatiyiliyi kapostolu Pawulu, oneneniwu kusoneka nawu: “Ochijavula nkisu jaNzambi jakuspiritu nimaana nikwiluka! Wunsompeshi windi ochiwakala kuwiluka nawa njila jindi ochijakala kujilondela!”—Rom. 11:33.

8. Chumanyi chayitiyishaña kuwaha hachayuulañayi Yehova?

⁸ Bayibolu hiyashimuna hohu wuswa wukwetiyi  Yehova wakuyuulaku. Yamwekeshaña cheñi chiyuulu chindi chichabadika yiyuulu yejima yawantu. Chuma chimu chidi chakwila nawu wayuulaña mukukeña. Mwamweni, twatiyaña kuwaha chayuulañayi munjila yayiwahi. “Wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala.” (Kwid. 34:6) Nzambi wayilemesha ambuñindi chikupu. Watwakamenaña chikupu kubadika chitwatela kudakamena etu aweni. Kwambukaku nachahoshañayi Diyabolu, Yehova hakaanishaña ambuñindi yuma yayiwahiku. Muloña watwinkeli niMwanindi akeñayi kulonda twikala nakuchiñeja kwakushakama haya nyaaka!—Tañenu Masamu 84:11; Aroma 8:32.

9. Tuneluki ñahi netu Nzambi wayakamenaña antu hamuntu-hamuntu?

⁹ Yehova wakamenaña antu jindi ejima. Nawa wayakamenaña hamuntu-hamuntu. Chakutalilahu, toñojokenu mpinji yelili Yehova yatondi ansompeshi nikuyinka ñovu jakufumisha muza wawaIsarela mumakasa awayilumbu jawu hadi yaaka nkulakaji yisatu. Muniyi mpinji yakala, wamweni Luti wabulili kwikala kaIsarela. Wadihanini nakwikala mukwakudifukula walala. Yehova wamukiswilili Luti nakumwinka iyala nimwana. Akamukiswila cheñi kumbidi. Neyi anamusañuli dehi, Luti wakeluka nindi mwanindi wadiña hakachi kawankakulula yaMesiya. Nawa wakatiya kuwaha kwiluka nindi nsañu yachihandilu chindi ayisonekeli muBayibolu nawa azatishili ijina dindi!—Luti 4:13; Mat. 1:5, 16.

10. Muloñadi antu ekala muchiyuulu chaYehova chekalilawu akasunuka?

¹⁰ Yehova hayuulaña munjila yatamaku. Muchiyuulu chindi antu akekala akasunuka nawa amuzañalu. (2 Kor. 3:17) Davidi wahosheli muniyi njila nindi: “Kumesu indi [aNzambi] kwekala nikulema niwanta; mwindi mwekalayi mudi niñovu nikuzañajala.” (1 Kushi. 16:7, 27) Ñimbi yamasamu Etani niyena wasonekeli nindi: “Antu akwiluka chakwimbawu mpuña anakooleki; hiyakwenda muchejeji chakumesu eyi, eyi Yehova. Hiyakutiya kuwaha nejina deyi mwaana wejima, hiyakutuumbakana nakuloña kweyeyi.”—Mas. 89:15, 16.

11. Tunateli kutwalekahu ñahi kukuhwelela chikupu netu chiyuulu chaYehova dichachiwahi?

¹¹ Kutoñojokahu chikupu hakuwaha kwaYehova mpinji yejima kunateli kutukwasha kukuhwelela netu chiyuulu chindi dichachiwahi. Twatiyaña neyi chatiyiliyi ñimbi yamasamu wembeli nindi: “Ifuku dimu muyipañu yeyi dinabadiki ikombakaji kuwaha.” (Mas. 84:10) Chinateli kwikala ñahi mwenimu? Chineli hiNleñi yetu, Yehova weluka yuma yitwakankilaña yinateli kutuletela muzañalu nawa watwinkañayi yejima. Yuma yatulejañayi yatukwashaña nawa yatuletelaña muzañalu. Hela chakwila yuma yatulejañayi kwila yakeñekaña kudihana.—Tañenu Isaya 48:17.

12. Chumanyi chikuletesha tuhakwiliku chiyuulu chaYehova?

¹² Bayibolu yamwekeshaña nawu neyi Kristu nayuuli dehi Yaaka Ikombakanji, antu amakwawu akadikaña nachiyuulu chaYehova. (Chim. 20:7, 8) Chumanyi chikaletesha akadikañi? Diyabolu, akamukasununa mukaleya nawa wakafwila kudimba antu. Wakadimba antu adikeña aweni neyi chinakuyidimbayi makonu. Hadaha wakeseka kudimba antu nindi kudi njila yayiwahi yakushakaminamu haya nyaaka chakubula kumwovwahila Yehova. Hela chochu, bayi neyi dichikamwekanaku. Ilaña chikuma chidi chakwila nawu:  Komana twakela mwakatudimbayi? Neyi twamukeña Yehova nawa twamukalakelaña muloña wakuwaha kwindi nawa muloña diyi Nyuuli watelela, akatudimba wanyi. Hitwakafwila chiyuulu chakadi wunyuuli waYehova wawuwahiku.

13. Kumwimbujola Nzambi kwamwekeshaña ñahi nawu tunakuhakwilaku chiyuulu chindi?

¹³ Chakadi nikujina, twatela kuhakwilaku chiyuulu chaYehova namuchima wejima. Neyi chitunahanjeki, wukweti wuswa wakuyuula nawa wayuulaña munjila yayiwahi. Tunateli kuhakwilaku chiyuulu chaYehova neyi twikala ashinshika nikumukalakela Nzambi nakashinshi. Tunateli cheñi kuchihakwilaku munjilanyi? Kuhitila mukwila yuma neyi chelañayi Yehova. Neyi tukwilaña yuma neyi chelañayi Yehova, tukumwekesha netu twamukeña nawa tunakuhakwilaku chiyuulu chindi.—Tañenu Aefwesesa 5:1, 2.

14. Aeluda ninyitu yayisaka anateli kumwimbujola ñahi Yehova?

¹⁴ Twadizaña muBayibolu netu Yehova wazatishaña wuswa windi wakuyuula munjila yayiwahi. Munjila yoyimu, nyitu yayisaka niaeluda akeña chiyuulu chindi akwikalaña akalisha wanyi neyi kwiji akweti wuswa wanti wakuyuula. Ilaña, akumwimbujolaña Yehova. Pawulu wamwimbujoleli chikupu Nzambi niMwanindi. (1 Kor. 11:1) Pawulu hasawileña antu amakawu hela kuyikanjikija kwila yumaku. Ilaña, wadiña nakuyilembelela. (Rom. 12:1; Efwes. 4:1; Fwile. 8-10) Dichelañayi Yehova. Dichatela kwilawu niantu ejima akeña chiyuulu chindi nawa achihakwilañaku.

15. Kulondela nshimbi jamukuloñesha kwamwekeshaña ñahi nawu twakeña chiyuulu chaYehova?

¹⁵ Chumanyi chitwatela kwila kudi antu  enkawu mudimu wakulombola? Neyi tuzatilaña nawu hamu munjila yayiwahi, tukumwekesha netu twahakwilañaku chiyuulu chaYehova. Hela chakwila tuneluki wanyi hela kwiteja munafuukuliwu, twatela kulondela nshimbi yamukuloñesha. Antu amukaayi dichelañawu wanyi, ilaña antu ayuulañawu kudi Yehova dichelañawu. (Efwes. 5:22, 23; 6:1-3; Heb. 13:17) Twahetelañamu neyi twovwahila, muloña Nzambi watwakamenaña chikupu.

16. Antu ahakwilañaku chiyuulu chaNzambi afuukulaña ñahi?

¹⁶ Tunateli cheñi kuhakwilaku chiyuulu chaNzambi nayuma yitwafuukulaña. Yehova wenkanku wanyi nshimbi muyuma yejima. Ilaña, watulejaña chatoñojokañayi neyi nakutulombola. Chakutalilahu, washimuna wanyi yakuvwala yatela kuvwalawu akwaKristu. Ilaña, watulejaña chakeñañayi nindi tutondeña yakuvwala yakalemesha nawa yatelela akwaKristu. (1 Tim. 2:9, 10) Cheñi wakeñaña nindi tubuleña kuhukesha akwetu nayuma yitwafuukulaña. (1 Kor. 10:31-33) Neyi tuyuula nyendu yetu kwesekeja nachatoñojokañayi Yehova bayi nachitunakukeñaku, tukumwekesha netu twakeña chiyuulu chindi nawa twachihakwilañaku.

17, 18. Adisumbula anateli kumwekesha ñahi nawu ahakwilañaku chiyuulu chaYehova?

¹⁷ Toñojokenu njila munateliwu akwaKristu adisumbula kuhakwilaku chiyuulu chaYehova. Indi neyi chihandilu chamuwulu chikola kubadika chimwakuhweleleli? Indi neyi yuma yiswejelaku nikutama? Mwatela kutoñojoka chelileñayi Yehova nawaIsarela. Waditeneni yomweni kwikala nfumwaniwu muza wakushakunkulu. (Isa. 54:5; 62:4) “Wulu” wawu wadiña mukukala! Hela chochu, Yehova hashikeneni dakuwulekaku. Watwalekelihu kuwutiyila luwi iwu muza nikuhemba chitiyañenu chindi chatiyañeniwu. (Tañenu Masamu 106:43-45.) Komana twatiyaña kuwaha nakukeña kwamuchidiwu kwamwekeshañayi Yehova?

¹⁸ Antu adisumbula akeña wunlomboli waYehova amwimbujolaña. Hiyadiseñaña hanyiloña yabula kushimunawu munsonaku. Eluka nawu Yehova wayibomba hamu nawa nakukeña nindi ‘adikakeli.’ Muloña wumu hohu wetejawu muNsona wuyatela kudiseñelawu chiña neyi wumu yela wuvumbi. (Mat. 19:5, 6, 9) Neyi amanisha kukala kunakumonawu nikufwila kushakama chiwahi, akuhakwilaku chiyuulu chaYehova.

19. Chumanyi chitwatela kwila neyi tuvulumuna?

¹⁹ Chineli twawanina wanyi, mpinji yikwawu tukwilaña yuma yamuneñeshaña Yehova. Weluka chumichi nawa watwinka mulambu wefutu danyiloña daKristu. Dichi, neyi tuvulumuna, twatela kulomba kwanakena kudi Yehova. (1 Yow. 2:1, 2) Chatela tutwalekihu kuluwañesha, twatela kudizila kuyiluwa yetu. Neyi tuswina kwakwihi naYehova, wukatwanakena nikutukwasha kulonda twakamanishi nikushinda oku kukala neyi kutumwekena cheñi kumbindi.—Mas. 103:3.

20. Muloñadi chitwalela kuhakwilaku chiyuulu chaYehova chayinu mpinji?

²⁰ Mwituña dadiha, ejima akayiyuula kudi chiyuulu chaYehova nawa twakadiza njila jindi jaloña. (Isa. 11:9) Hela chochu, makonu tunakudiza yuma yayivulu. Nawa nsañu yakuhakwilaku chiyuulu yinatwalekihu. Ayinu diyi mpinji yakuhakwilaku chiyuulu chaNzambi kuhitila mukwikala ashinshika, kuzata mudimu wakushimwina nikufwila kumwimbujola muyuma yejima yitwelaña.