Komana mwatañili nakanañachima yibaaba yakatataka yaKaposhi Kakutalila? Talenu neyi mukutwesha kwakula awa malwihu:

Yumanyi yatela kwilawu amanakwetu ankoñi añinza niaeluda amuyipompelu neyi atambwila nshimbi kufuma mukuloñesha kwaNzambi?

Atela kwovwahila. Atela kudihula nawu: ‘Komana nakoleshaña amanakwami kuspiritu? Komana netejaña nikulondela wunlomboli wahanañawu amanakwetu alombolaña?’—w16.11, ifu 11.

Mpinjinyi yekaliliwu akwaKristu alala muwuduñu muBabiloni?

Eñilili muwuduñu chelili apostolu afwi. Hayoyina mpinji, izanvu dawakulumpi jamachechi datachikili. Machechi niNfulumendi atachikili kusekesha ntañishilu yawakwaKristu nawa akeñeleña kukokola akwaKrsitu adiña neyi tidiku. Ilaña muyaaka yakutachika mu 1914, awayishewa atachikili kufumamu.—w16.11, mafu 23-25.

Mudimu wazatiliyi Lefèvre d’Étaples walemenadi?

Muma 1520, Lefèvre wabalumwini Bayibolu muFrench idimi dahosheleñawu antu amavulu. Chalumbulwiliyi nsañu yamuBayibolu chiwahi chakwashili antu adi neyi Martin Luther, William Tyndale niJohn Calvin.—wp16.6, mafu 10-12.

Chambwinyi chidi ‘hakutoñojoka yuma yakumujimba’ ‘nakutoñojoka yuma yakuspiritu’? (Rom. 8:6)

Muntu watoñojokaña yuma yakumujimba washa chikupu maana kuyuma yafwilaña mujimba, watoñojokaña hohu nikuhosha yuma yakumujimba. Muntu watoñojokaña yuma yakuspiritu yena washa maana hadi Nzambi nawa yitoñojoka yanowu mukwaKristu ayiyuulaña kudi spiritu yajila. Yuma yakumujimba yatwalaña kukufwa, ilaña yuma yakuspiritu yatwalaña kuwumi nikukuwunda.—w16.12, mafu 15-17.

Njilanyi mutunateli kukeheshelaku kwakama?

Imikenu yikonkwanyi yatelela, toñojokenu hayuma yikuyikwasha, ikalenu nampinji hefuku yakushakama kwamwena, talenuña yileñaleña yaYehova, ikalenu namuzañalu, ikalenu nampinji yakuhema nawa mwenda mukama swayi.—w16.12, mafu 22-23.

“Enoki amutuntulwili kulonda yabuli kumona kufwa.” (Heb. 11:5) Munjilanyi?

Chidi neyi Nzambi watuntulwili wumi waEnoki chovu-chovu nakuwutwala mukufwa chakadi kwiluka nindi hakufwa.—wp17.1, mafu 12-13.

Kudikehesha Kwalemenadi?

Kudikehesha kwatalisha mukwiluka chitwekala niyuma yitunateli kubula kwila. Twatela kwiluka yilwilu yetu chiyinateli kuhetesha hela kutiyisha antu amakwawu kutama nikubula kudivwimba.—w17.01, ifu 18.

Wunsahwinyi wunakumwekesha nawu Nzambi walombweleña izanvu dalombolaña damumafuku awapostolu, neyi chinakulombolayi Izanvu Dalombolaña makonu?

Nawukwashu waspiritu yajila, elukili chalala chamuNsona. Alombweleña mudimu wakushimwina nawukwashu wawañelu nawa ashindameneni Hezu daNzambi neyi anakulombola. Dichelañawu nimakonu.—w17.02, mafu 26-28.

Yumanyi yatukwashaña kwiluka netu ifutu danyiloña dalema?

Yikuma yiwana: Wadiheni, chiyadihanini, kudihana kwadiñahu hakudihana niyuma yidabutili. Twatela kutoñojokahu chikupu haniyi yikuma.—wp17.2, mafu 4-5.

Komana mukwaKristu nateli kuhimpa neyi nafuukuli dehi?

Twatela kwila mutunahoshi. Ilaña, mpinji yikwawu twatela kuhimpa mutwafuukwili. Chelili antu abalumuki, Nzambi wahimpili mwayifuukwililiyi antu aku Nineve. Mpinji yikwawu, yuma yayiha hela nsañu yayiwahi yinateli kuletesha ninetu kuhimpa mutwafuukwili.—w17.03, mafu 16-17.

Nhoshelu yatama yataminadi?

Nshoshelu yatama yaleteshaña yuma kutaminaku. Hela jitunakuhosha dimu hela jakutwamba, nshoshelu yatama kwila yiwahisha yuma nehi.—w17.04, ifu 21.