1, 2. (a) Antu ejima atela kusha maana kuchumanyi? (b) Kuhakwilaku ichi chiyuulu kwalemenadi?

ANTU amavulu makonu asha maana hamali. Afwilaña kwikala namaheta amavulu hela kutwalekahu kwikala namaheta akwetiwu. Amakwawu asha maana hachisaka chawu, kukola kwakumujimba nihayuma yafwilaña kwilawu.

² Hela chochu, chuma chalema chitwatela kusha maana hikuhakwilaku chiyuulu chaYehova. Twatela kutondolwela yuma yikutuleñela kuleka kusha maana kukuhakwilaku ichi chiyuulu. Chumichi chinateli kumwekana ñahi? Tunateli kusha maana kuyuma yitwakamenaña hefuku-hefuku chakwila tukukañanya kwiluka kulema kwakuhakwilaku chiyuulu chaNzambi. Hela tunateli kwiteja makabi kutukañesha kumona kulema kwakuhakwilaku chiyuulu. Munjila yikwawu, neyi tukumona kulema kwakuhakwilaku chiyuulu chaYehova, chikutukwasha kushinda kukala kutwamonaña. Nawa chumichi chikutukwasha kuswina kwakwihi naYehova.

3. Satana wahosheleña nindidi kutalisha kuchiyuulu chaNzambi?

³ Yuma yeliliyi Satana Diyabolu yamwekeshaña nawu wajinokeli wuswa waYehova wakuyuula. Wahoshaña nindi Nzambi wayuulaña chiwahi wanyi nawa Yehova wakanishaña yileñaleña yindi yuma yayiwahi. Diyabolu wahoshaña nindi, antu akwikala namuzañalu neyi adiyuulaña awenawu. (Kutach. 3:1-5) Satana wahoshaña cheñi nindi antu akutwesha wanyi kwikala ashinshika kudi Nzambi chakufuma hamuchima nawa neyi adi mukukala kweneni akukaana chiyuulu chaYehova. (Yoba 2:4, 5) Kwesekeja nachahosheliyi Diyabolu, Yehova wenkaku mpinji kulonda antu amoni neyi mwalala anateli kudiyuula aweni chakadi chiyuulu chaNzambi.

4. Muloñadi kukala kwachiyuulu chiyatela kukwimanishila?

⁴ Hela chochu, Yehova weluka nindi Diyabolu watwambili. Hanu dinu muloñadi Nzambi chinetejeliyi iku kukala kutwalekahu nakumwinka Satana mpinji yakumwekesha neyi mwahosheliyi mwalala? Antu niañelu niwena atela kwakula ilu lwihu. (Tañenu Masamu 83:18.) Muloña antu atachi akaanini chiyuulu chaYehova nawa antu amakwawu achidi kukaana. Chumichi chikuletesha antu kujinoka neyi Diyabolu wahosheli mwalala. Neyi lwihu abula kulwakula kudi antu niañelu, chambu chanyuza, makowa, madimi, yisaka nichawantu chinateli kumwekana. Ilaña neyi chiyuulu chaYehova anachihakwiliku dehi, antu ejima akwovwahilaña chiyuulu chindi chaloña. Kuwunda kwakweni kwakafunta.—Efwes. 1:9, 10.

5. Chumanyi chitwatela kwila hakuhakwilaku chiyuulu chaYehova?

⁵ Wuswa waNzambi wakuyuula akawihakwilaku nawa chiyuulu chaSatana nichawantu chikakañanya nawa akachifumishahu. Nzambi wakayuula kuhitila mudi Wanta wawuMesiya nawa ejima ashinshika akeluka nawu antu atela kuhakwilaku chiyuulu chaNzambi. (Isa. 45:23, 24) Munakukeña kwikala hakachi kawakwakuhemba kashinshi ahakwilañaku chiyuulu chaYehova? Chakadi nikujina munakukeña. Hakwila nawu twikali ashinshika, twatela kusha maana hakuhakwilaku ichi chiyuulu nikutiyishisha kulema kwachu.

6. Kuhakwilaku chiyuulu chaYehova kwalema kubadika chumanyi?

⁶ Neyi chitwahosha dehi, kuhakwilaku chiyuulu chaYehova dichuma chalema chatela kwilawu antu ejima. Chumichi chalema kubadika muzañalu watiyañayi muntu. Komana chumichi chinayi mukwila nawu kupuluka kwalema wanyi hela nawu Yehova watwakamenaña wanyi? Inehi. Muloñadi?

7, 8. Muloñadi kuhakwilaku chiyuulu chaNzambi chikwabombelamu kushikija nkeñelu yindi?

⁷ Yehova wayikeña chikupu antu nawa wayilemesha. Wafwilileña kuzatisha mashi aMwanindi kulonda twakamoni wamwinu wahaya nyaaka. (Yow. 3:16; 1 Yow. 4:9) Neyi Yehova wakañenyi kushikija yikaninu yindi, Diyabolu wadi kumutena Nzambi nindi hintwambi nawa hahanaña yuma yayiwahiku dikwila nawu chiyuulu chindi chatama. Nawa chadi kumwekesha nawu akwakudikaña ahoshaña mwalala hakwihula nawu: “Indi chikaninu chakwikalahu kwindi chakanawu chidi kudihi? Muloña kufuma tuhu mpinji yafwiliwu ankakulula jetu, yuma yejima yinatwalekihu kwikala neyi chiyadiña hampinji yatachikiliwu kuleña yuma.” (2 Pet. 3:3, 4) Dichi, Yehova wakahakwilaku chiyuulu chindi kuhitila mukwamwina antu ovwahila. (Tañenu Isaya 55:10, 11.) Kubombelahu, kukeña kwaYehova kwamwekeshaña nawu wukweti  wuswa wakuyuula. Dichi tunakuhweleli netu wayikeña, wayilemesha nawa wayihamekaña ambuñindi.—Kwid. 34:6.

⁸ Kwiluka kulema kwachiyuulu chaYehova, kunatalisha wanyi mukwila nawu tunakudiwula wamwinu wetu hela chitwalema kumesu indi. Ilaña tunakuhakwilaku chiyuulu chindi niwamwinu munjila yatelela. Kumona yuma munjila yatelela kwalema neyi tunakukeña kusha maana hayuma yalema nikuhakwilaku chiyuulu chaYehova chaloña.

9. Satana wahosheli nindidi kutalisha hadi Yoba? (Talenu mwevula wakutachikilahu.)

⁹ Chuma chinateli kutukwasha kubula kumona yuma munjila yambukaku achishimuna mumukakanda waYoba, mukanda wumu hakachi kanyikanda yasonekeleñahu dehi. Muniwu mukanda twadizañamu chahosheliyi Satana nindi neyi yamuletela Yoba yihuñu yasweja wukumukaana Nzambi. Satana wakeñeleña nindi Nzambi yamuleteli Yoba yihuñu. Yehova welili wanyi mwenimu, ilaña wamwitejeli Satana kumweseka Yoba, chahosheliyi nindi: “Yuma yejima yakwetiyi yidi muchikasa cheyi.” (Tañenu Yoba 1:7-12.) Mukapinji kantesha hohu, Yoba wajimbesheli añamba jindi, yuma yindi yejima nianyanindi ejima ikumi. Satana waleteli iyi yihuñu munjila yamwekesheleña neyi Nzambi yomweni diyi waleteli iku kukala hadi Yoba. (Yoba 1:13-19) Cheñi Satana wamukatishili Yoba nachikatu chayeña chikupu. (Yoba 2:7) Yihuñu yindi yaswejeleleliku namazu atama ahosheliyi ñodindi niamabwambu jindi asatu amwekeneña neyi enjili nakumukundeja.—Yoba 2:9; 3:11; 16:2.

10. (a) Chumanyi cheliliyi Yoba chamwekeshaña nawu wadiña washinshika kudi Nzambi? (b) Waluwañesheli munjilanyi?

¹⁰ Yumanyi yafuminimu? Mwahosheliyi Satana mwadiña mwakutwamba chikupu. Yoba wetejeli wanyi kumufutalela Nzambi. (Yoba 27:5) Hela chochu, Yoba watachikili kumona yuma munjila yambukaku. Watachikili kudimona kuloña nikukeña kwiluka chuma chaletelesheli yakabakani. (Yoba 7:20; 13:24) Tunateli kuhosha netu wahosheli muniyinjila muloña wakabakeni. Hela chochu, Yehova wolweli yitoñojoka yaYoba. Yehova wamulejeli nindidi?

11, 12. Yehova wamukwashili Yoba kwilukadi, nawa Yoba welili ñahi?

¹¹ Mazu ahosheliyi Nzambi kudi Yoba ekala mumukanda waYoba kapetulu 38 nakushika ku 41. Hosi hitwatañaña nawu Nzambi wamulejeli Yoba muloña wakabakeneniyi. Yehova hakeñeleña kumulumbulwila Yoba muloña waweni wakabakeneneñayi, neyi kwiji Nzambi  nakukeña kudiyiñishaku. Ilaña, Yehova wakeñeleña kumukwasha Yoba kulonda yeluki nindi wakehelamu kudi Nzambi. Nawa wamukwashili Yoba kulonda yeluki cheñi nindi kwadiña yuma yamaneni yateleleliyi kwakama. (Tañenu Yoba 38:18-21.) Chumichi chamukwashili Yoba kumona yuma munjila yatelela.

¹² Komana Yehova wahosheli chatama chamuzuwililiyi Yoba chakubula kuhita mumbadi hanyima yakumona makabi asweja? Nzambi wahosheli chatama wanyi nawa Yoba dichatoñojokeliyi wanyi. Hela chakwila waluwañesheli, Yoba watachikili kudanakena. Wahosheli nindi: “Nabalumuki dehi mumuchima mulunkuñu namawuti.” Dichakeñeleñayi Yehova ilaña wamufumbili munjila yayiwahi. (Yoba 42:1-6) Hakusambila, Yoba wetejeli kufumba kwamufumbiliwu kudi kansi Elihu. (Yoba 32:5-10) Hanyima yakwila Yoba neteji dehi mwamufumbiliwu kudi Nzambi, Yehova walejeli antu amakwawu kashinshi kamwekesheliyi Yoba mumpinji yakala.—Yoba 42:7, 8.

13. Kufumba kwaYehova kwamukwashili ñahi Yoba hanyima yakwila yihuñu yindi yinamani dehi?

¹³ Kufumba kwamufumbiliwu Yoba kudi Yehova kwamukwashili nihanyima yakwila yihuñu yindi yinamani dehi. Munjilanyi? Hela chakwila, ‘Yehova wamukoolekesheli Yoba; kukooleka kwamukoolekesheliyi kwakukuminina kwabadikili kwakusambila,’ hatela hahitili mpinji hakwila nawu yakoli nawa amufuntishili yuma yindi. Mukuhita kwampinji wavwalili “anyana amayala atanu nayedi, awambanda asatu.” (Yoba 42:12-14) Chakadi nikujina, Yoba wanukileña anyanindi ajahiliwu kudi Satana. Hatela hahitili mpinji hakwila nawu yaleki kwanuka makabi amweniyi. Hela chakwila nkumininaku welukili chaletesheli yakabakani, hadaha mpinji yikwawu watoñojokeñeleña chakojejeli yakabakani nankashi. Neyi yatoñojoka hakukala kwindi, watela wanukileña kufumba kwamufumbiliwu kudi Nzambi. Kwanuka kufumba kwamufumbiliwu kudi Nzambi kwatela kwamukwashileña kumona yuma munjila yatelela nawa wakundejeweleña.—Mas. 94:19.

14. Nsañu yaYoba yatudizishañadi?

¹⁴ Nsañu yaYoba yinateli kutukwasha ninetu kumona yuma munjila yatelela nawa yinateli kutukundeja. Muloña Yehova wayisoneka iyi nsañu “kulonda etu tudiziliku, kulonda mukuumika kwetu nimukukundeja kwamuNsona, twiikali nakuchiñeja.” (Rom. 15:4) Tunateli kudizilaku chumanyi? Chatachi: Bayi tudiñija muyuma yakumujimba yikuletesha tubuli kusha maana hachuma chalema, kuhakwilaku chiyuulu chaYehova. Nawa twatela kumona netu mudimu wutukweti  wakuhakwilaku chiyuulu watukwashaña kwikala ashinshika neyi tudi mukukala kweneni, neyi cheliliyi Yoba.

15. Kwikala ashinshika neyi tudi mukukala kwatukwashañadi?

¹⁵ Muloñadi chichinekalili chakukundeja kutoñojojaka hakulema kwakwikala ashinshika? Muloña kweseka kutwamonaña kwekala nankeñelu. Hela chakwila kwamuneñeshaña Yehova, kwatukwashaña kulonda tumwekeshi netu twahakwilañaku chiyuulu chaNzambi. (Yish. 27:11) Kuumika “kwamuleñelaña Nzambi kututiya kuwaha” nawa kwatukwashaña kuchiñeja. (Tañenu Aroma 5:3-5.) Nsañu yaYoba yamwekeshaña nawu “Yehova wukweti wushona chikupu niluwi.” (Yak. 5:11) Dichi tunateli kukuhwelela netu wukutukiswila kushilahu niantu ahakwilañaku chiyuulu chindi. Kwiluka chumichi chikutukwasha kuumika “chikupu nakuwunda nimuzañalu.”—Kol. 1:11.

16. Muloñadi chitwatela kutoñojokela hakulema kwakuhakwilaku chiyuulu chaYehova?

¹⁶ Mwamweni, chinateli kwikala chakala kusha maana hakuhakwilaku chiyuulu chaYehova. Mpinji yikwawu, kukala kutunakumona kunateli kutuzeyesha. Nikukala kwantesha kunateli kutoha neyi tutwalekahu kutoñojokahu. Dichi, twatela kutoñojokaña mpinji yejima hakulema kwakuhakwilaku chiyuulu chaNzambi neyi tudi mukukala.

17. Kudikita mumudimu waYehova kunateli kutukwasha ñahi kusha maana hachuma chalema?

¹⁷ Neyi tudikitaña mumudimu waYehova mpinji yejima chikutukwasha kusha maana hachuma chalema. Chakutalilahu, Chinsahu wejina daRenee wakatili chikatu chakalepa nawa wadiña nakansa. Iku wudi muchipatela, washimwinini ankoñi amuchipatela, ayeji niantu enjilaña nakuhempula. Muchipatela chimu, wazatili maora 80 munyilungu yiyedi nachikunku. Nihampinji yafwileñayi, Renee watwalekelihu kusha maana kuchiyuulu chaYehova. Chumichi chamukwashili kuwundishaku yikatu yindi.

18. Yuma yamumwekeneni muhela wumu yamwekeshaña ñahi kuwaha kwekala mukuhakwilaku chiyuulu chaYehova?

¹⁸ Tunakufwila kutwalekahu kusha maana kuchiyuulu chaYehova nihampinji yitunakumona kukala. Jennifer washakamini mafuku asatu kwibulu dandeki nakuhembelela kulonda yafunti kwawu. Ndeki jejima jayileña wanyi kwayileñayi. Watela watiyili wudi nawa wazeyeli, dichi wadi kutiya kutama. Ilaña, walombeli kulonda yekali nañovu yakukwasha amakwawu anakutiya kutama. Yumanyi yafuminimu? Washimwinini antu amavulu nawa wahanini nyikanda yayivulu. Wahosheli nindi, “Natiyili nami Yehova nankiswili hela chakwila nindi mukukala nawa wanyinkeli ñovu yakushimwina hejina dindi munjila yayiwahi.” Mwamweni, washili maana hankeñelu yaYehova.

19. Antu jaYehova ekala kukabadinyi kutalisha kuchiyuulu chindi?

¹⁹ Kuhakwilaku chiyuulu chaYehova kunamwekeshi chambu chidi hansakililu yalala niyakutwamba. Antu jaNzambi ahakwilañaku chiyuulu chindi. Etu akwakuhakwilaku chalala, twatela kumona yuma kwesekeja nachahosha Nsona.

20. Yehova watiyaña ñahi hachitwazataña nañovu kuhakwilaku chiyuulu chindi?

²⁰ Ilukenu nenu Yehova walemesha chimwazataña nañovu kuhakwiluka chiyuulu chindi kuhitila munyidimu yimwazataña nikuumika makabi. (Mas. 18:25) Chibaaba chinalondelihu chikashimuna chimunateli kukwasha chiyuulu chaYehova namuchima wejima nichimunateli kuchihakwilaku.