1, 2. (a) Mahetanyi asatu akuspiritu atwinkayi Yehova? (b) Tukushinshika hayumanyi muchinu chibaaba?

YEHOVA diyi Muntu waheta nankashi kwiwulu nihamaseki. (1 Kushi. 29:11, 12) Chineli hiTata yetu wukweti chisambu, wahana maheta indi ejima akuspiritu kudi antu eluka kulema kwawu. Twazañalalaña nankashi muloña Yehova watwinka maheta akuspiritu adi neyi (1) Wanta waNzambi, (2) mudimu wakushimwina, (3) nichalala chekala Mwizu dindi! Neyi kubabala nehi, tukumona wanyi kulema kwanawa maheta, nawa tunateli kuyijimbesha. Hakwila nawu tutwalekihu kwikala nawu, twatela kuyizatisha chiwahi nikutwalekahu kuyikeña. Yesu wahosheli nindi: “Kudi maheta enu, dikukwikala ninyichima yenu nawa.”—Luka 12:34.

² Tushinshikenu chitunateli kukeña nichitunateli kulemesha Wanta, mudimu wakushimwina nichalala. Chitukuhanjekaña,  toñojokenu chikupu chimunateli kutwalekahu kukeña awa maheta akuspiritu.

3. Mukwakulanda nakulandulula wamuchishimu chaYesu wafwilileña kwiladi hakwila nawu yalandi mperola yasweja wuseya? (Talenu mwevulu wakutachikilahu.)

³ Tañenu Matewu 13:45, 46. Yesu washimwini chakutalilahu chamukwakulanda nakulandulula wakeñakeñeleña mperola. Chakadi nikujina, iwu iyala wadiña nakulanda nikulandisha mperola hadi yaaka yayivulu. Ilaña, wawanini mperola yasweja wuseya chakwila chayimweniyi hohu watiyili kuwaha. Hakwila nawu yayilandi watela kulandisha yuma yejima yikwetiyi. Toñojokenu iwu iyala chalemesheliyi iyi mperola.

4. Neyi tukeña Wanta waNzambi neyi chakeñeliyi mperola ona mukwakulanda nakulandulula, chumanyi chitukwila?

⁴ Tukudizilaku chumanyi? Wanta waNzambi wudi neyi mperola yasweja wuseya. Neyi tukuwukeña chikupu neyi chakeñeliyi mperola ona mukwakulanda nakulandulula, tukuleka kwila yuma yejima kulonda twikali amuniwu Wanta. (Tañenu Maku 10:28-30.) Tushinshikenu hadi antu ayedi elili mwenimu.

5. Zakewu wamwekesheli ñahi nindi nakufwila chikupu Wanta waNzambi?

⁵ Zakewu wadiña mukwakutambula nyisonku waheteli kuhitila mukutambula antu mali. (Luka 19:1-9) Hela chochu, iwu iyala wabula kuloña chatiyiliyi Yesu nakushimwina nsañu yaWanta, welukili kulema kwayuma yatiyiliyi nawa wabalumukili hohenohu. Wahosheli nindi: “Mwanta, talaña! Chibalu chayuma yami, inakwinka atuzweñi, nawa yuma yejima yinatambwili kudi muntu wejima munjila yawupwapoki, nukumushilahu yikwawu yiwana.” Wahanini maheta indi aheteliyi munjila yatama nawa walekeli kufwila maheta munjila yatama.

6. Yumanyi yeliliyi mumbanda wumu hakwila nawu yakeñi Wanta Nzambi, nawa muloñadi chelililiyi mwenimu?

⁶ Yaaka yinahitihu, mumbanda wumu wadiña nakudikama nawakwawu ambanda, watiyili nsañu yaWanta. Wadiña mukulumpi wezanvu dahakwilañaku antu nawu atela kudikama mulwawu. Hela chochu, chatachikiliyi kudiza Bayibolu, welukili kulema kwachalala chahosha haWanta waNzambi. Dichi welukili nindi watela kuhimpa chikupu. (1 Kor. 6:9, 10) Muchima windi wamulejeli kuleka wuna wukulumpi nikuleka yilwilu yakudikama nawakwawu ambanda. Iwu mumbanda wapapatisheweli mu 2009, nawa chaaka chalondelihu, wekalili payiniya wampinji yejima. Watwalekelihu kumukeña Yehova niWanta windi kubadika yuma yejima yakumujimba.—Maku 12:29, 30.

7. Tunateli kutwalekahu ñahi kukeña Wanta waNzambi namuchima wejima?

⁷ Kuhosha hohu chalala, wejima wetu kudi yuma yitunahimpi muchihandilu kulonda twikali antu amuWanta waNzambi. (Rom. 12:2) Hela chochu, tuchidi kuhimpa. Twatela kubabala nayuma yafwilaña mujimba, yidi neyi kufwila maheta nikufwila kwila wuvumbi. (Yish. 4:23; Mat. 5:27-29) Hakwila nawu tutwalekihu kukeña Wanta waNzambi namuchima wejima, Yehova watwinka iheta dikwawu dalema wuseya.

8. (a) Muloñadi kapostolu Pawulu chateneneniyi mudimu wetu wakushimwina nindi wudi neyi “iheta munsaba jamawumba”? (b) Pawulu wamwekesheli ñahi nindi walemesheli mudimu windi wakushimwina?

⁸ Yesu watwinka mudimu wakushimwina nikudizisha antu nsañu yayiwahi yaWanta waNzambi. (Mat. 28:19, 20) Kapostolu Pawulu welukili nindi kushimwina kwalema. Washimwini nindi mudimu wakushimwina wachitiyañenu chachiha wudi neyi “iheta munsaba jamawumba.” (2 Kor. 4:7; 1 Tim. 1:12)  Hela chakwila tudi nsaba jamawumba jabula kuwanina, nsañu yitwashimwinaña yinateli kutukwasha etu niantu itwashimwinaña kutambwila wumi wahaya nyaaka. Kapostolu Pawulu wahosheli kutalisha haniyi nsañu nindi: “Nakoñaña yuma yejima muloña wansañu yayiwahi, kulonda niyishimwini kudi antu amakwawu.” (1 Kor. 9:23) Mwamweni, Pawulu chakeñeliyi mudimu wakushimwina chamukwashali kuzata nañovu kwilisha atumbanji. (Tañenu Aroma 1:14, 15; 2 Timotewu 4:2.) Chumichi chamukwashili kuumika cheñi ikañesha dasweja. (1 Tesa. 2:2) Tunateli kumwekesha ñahi netu twakeña mudimu wakushimwina?

9. Njilanyi mutunateli kumwekesha netu twalemesha mudimu wakushimwina?

⁹ Njila yimu yamwekesheleliyi Pawulu nindi walemesheli mudimu wakushimwina, wadiña wadiloñesha kuhosha nawantu mpinji yejima. Kufwana apostolu niakwaKristu amumafuku awapostolu, twashimwinaña wunsahu wamumpanji, kushimwina kudi antu amavulu nikushimwina kwitala nikwitala. (Yil. 5:42; 20:20) Twafwilaña kuzata nañovu mumudimu wakushimwina, hadaha kuzataku wupayiniya wakukwasha hela wampinji yejima kwesekeja nahanakumini ñovu jetu. Hekwawu tunateli cheñi kudiza idimi dacheñi, kuya kwiluña dacheñi damwituña detu hela dakwituña dacheñi.—Yil. 16:9, 10.

10. Irene amukiswilili ñahi hakufwila kuzata mudimu wakushimwina nsañu yayiwahi?

¹⁰ Toñojokenu cheliliyi muhela Irene wakuUnited States. Wafwilileña kushimwina añinza ahosheleña idimi daRussian. Chatachikili kuyishimwinayi mu 1993, kwadiña hohu akwakushimwina 20 ahosheleña idimi daRussian muNew York City. Hadi yaaka 20 yinahitihu, Irene nazati nañovu munidi iluña dazatishaña idi idimi. Irene wahosheli nindi: “Nichidi kanda nilukishi idimi daRussian.” Hela chochu, Yehova namukiswili yena niantu amakwawu hakuzata nañovu. Chayinu mpinji, muNew York City mudi yipompelu 6 yazatishaña idimi daRussian. Hakachi kawantu adizishiliyi Irene, antu 15 apapatishewa. Hakachi kawu, amu azatilaña haBeteli, amakwawu hiyapayiniya nawa amakwawu hiyaeluda. Irene wahosheli nindi, “Neyi nitoñojoka hayuma yikwawu yinateleli kwila, kwosi chuma chinatoñojokañahu chateleleli kunletela muzañalu.” Mwamweni, walemesha chikupu mudimu windi wakushimwina!

11. Yumanyi yayiwahi yafumañamu neyi tutwalekahu kushimwina hela chakwila anakutukabisha?

¹¹ Neyi tulemesha mudimu wetu wakushimwina, tukwikala neyi kapostolu Pawulu watwalekelihu kushimwina hela chakwila amukabishileña. (Yil.14:19-22) Amanakwetu muUnited States amweni ikañesha dasweja chikupu kufuma muyaaka yamuma 1930 kushika kumatachikilu ayaaka yamuma 1940.  Hela chochu, kufwana Pawulu, adiña ahamuka nawa atwalekelihu kushimwina. Hakwila nawu akiñi wuswa wetu wakushimwina, azatili nañovu kuya kuyota. Mu 1943, Manakwetu Nathan H. Knorr chahosheleñayi hachayiñiliwu muloña wumu muChota Cheneni mu U.S., wahosheli nindi: “Mwayiñaña nyiloña muloña mwazataña nañovu. Neyi akwakushimwina alekeli kuya nakushimwina kasi kwosi nyiloña kuChota Cheneni; ilaña muloña enu akwakushimwina, amanakwetu amukaayi kejima, mwatwalekañahu kulwisha nawa himwakazeya muloña wamakabishaku. Kuhamuka kwawantu jaMwanta dikunaleteshi afuukuli muniyi njila.” Amanakwetu mumatuña amakwawu niwena anakumwekesha kuhamuka kwokumu kunakuyikwasha kuyiña nyiloña. Mwamweni, kukeña mudimu wetu wakushimwina kunateli kutukwasha kushinda makabisha.

12. Yumanyi yimunakufwila kwila kutalisha kumudimu wenu wakushimwina?

¹² Neyi tumonaña mudimu wetu wakushimwina kwikala iheta dalema datwinkayi Yehova, hitukukuminaña “dakuchinda hohu mpinjiku.” Ilaña, tukuzataña hakumina ñovu jetu “kushimwina chikupu wunsahu wansañu yayiwahi.” (Yil. 20:24; 2 Tim. 4:5) Hanu dinu yumanyi yitukushimwina antu amakwawu? Shinshikenu heheta dikwawu datwinkayi Nzambi.

13, 14. Yesu watalishili mudi hakuhosha mazu ekala haMatewu 13:52 akwila nawu “mwakuhembela maheta,” nawa twenzeshañamu ñahi?

¹³ Iheta damuchisatu dakuspiritu, himwetu mwakuhembela chalala chinasololiwu. Yehova hiNzambi yachalala. (2 Sam. 7:28; Mas. 31:5) Chineli hiTata yetu wukweti chisambu, wasololaña chalala chindi kudi antu amutiyaña woma. Kufuma tuhu hampinji yitwadizili chalala katachi, twadizili chalala Mwizu dindi Bayibolu, munyikanda yetu yawakwaKristu, kukupompa kweneni nikwañinza nikupompa kwamumulungu. Mukuhita kwampinji, twekalili nachisweku chateneniyi Yesu nindi “mwakuhembela maheta” achalala chitwadizili kunyima nichitunakudiza katataka. (Tañenu Matewu 13:52.) Neyi tukukeñakeña chalala chamuchidiwu neyi maheta aswekawu, Yehova wukutukwasha kuwana chalala chachiha chidi “mwakuhembela maheta.” (Tañenu Yishimu 2:4-7.) Tunateli kwila ñahi mwenimu?

¹⁴ Twatela kwikala nachaaku chakudiza nkawetu mpinji yejima nikusandujola chikupu Mwizu daNzambi nimunyikanda yetu. Chumichi chikutukwasha kuwana chalala “chachiha” chitwabulili kwiluka. (Yosh. 1:8, 9; Mas. 1:2, 3) Kaposhi Kakutalila katachi kasonekeliwu muJuly 1879, kahosheli nawu: “Chalala chidi neyi nkenu yanyanya yidi muchinkalampata, yinanyeñumukiwu kwakwihi nakuyibuta kudi matahu amalehi. Neyi muyiwana mwatela kuyitalatala. . . . Neyi munakukeña kuyisenda mwatela kubandama nakuyibwita. Bayi mumona hohu muchidi wumu wankenu yachalala nenu wunawanini. . . Keñelenuhu jikwawu jajivulu.” Mwamweni, twatela kufwila kwinzesha mwetu mwakuhembela nachalala chaNzambi.

15. Tukutenenadi chalala chikwawu netu “chachikulu,” nawa chalalanyi chimwalemesha?

¹⁵ Twatachikili kuwana chalala chalema hampinji yitwatachikili kudiza nawantu jaNzambi. Ichi chalala tunateli kuchitena netu “chachikulu,” muloña twachilukili hampinji yitwatachikili mudimu wetu wawakwaKristu. Ichi chalala chabombelamu yumanyi? Twadizili netu Yehova diyi Nleñi, Mukwakuhana Wumi nawa wukweti nkeñelu kumuchidi wamuntu. Nawa twadizili cheñi netu Nzambi mukukeña watwinkeli mulambu wefutu danyiloña daMwanindi kulonda ditukuuli kunshidi  nikukufwa. Kuhiñahu twadizili netu Wanta windi wakamanisha makabi ejima nawa twakashakamaña haya nyaaka mukuwunda ninamuzañalu muchiyuulu chaWanta.—Yow. 3:16; Chim. 4:11; 21:3, 4.

16. Twatela kwiladi neyi kudi kuhimpika kwantiyishishilu yetu yachalala?

¹⁶ Mukuhita kwampinji, ntiyishishilu yetu yawuprofwetu wamuBayibolu hela nsañu yikwawu yamuNsona anateli kuyihimpa. Neyi anahimpi ntiyishishilu, twatela kwikala nampinji yakudiza oyu nsañu nakanañachima nikutoñojokahu chikupu. (Yil. 17:11; 1 Tim. 4:15) Bayi neyi twatela kutiyishisha hohu nsañu yayeni yinahimpiwuku ilaña twatela nikutiyishisha nsañu yanyanya kulonda twiluki chambu chidi hansañu yitwelukili kunyima niyituneluki katataka. Neyi tukwila mwenimu, dikwila nawu tunakusha chalala chetu muchisweku chakuhembela maheta. Muloñadi chitwatelela kwila mwenimu?

17, 18. Spiritu yajila yinateli kutukwasha ñahi?

¹⁷ Yesu wahosheli nindi spiritu yajila yaNzambi yinateli kutwanukisha nsañu yitwadiza dehi. (Yow. 14:25, 26) Chumichi chinateli kutukwasha ñahi etu akwakushimwina nsañu yayiwahi? Shinshikenu yuma yamumwekeneni manakwetu Peter. Mu 1970 wadiña nayaaka 19 nawa dihayiliyi nakukalakela haBeteli kuBritain. Hampinji yadiña nakushimwinayi kwitala nikwitala, wabulakeni iyala wadiña nawevu wawulehi. Peter wamwihwili iwu iyala neyi wukukeña kudiza chalala chamuBayibolu. Iwu iyala wakwili iku nahayami nindi idi itala dawarabi awaYudeya. Hakumweseka Peter, rabi wamwihwili nindi, “Eyi kansi, mukanda waDanyeli awusonekeli mwidiminyi?” Peter wakwili nindi, “Chibalu chimu achisonekeli muchiAramayiki.” Peter wahosheli nindi: “Rabi wahayamini chinahanini ñakwilu yaloña, ilaña wahayamini neyi chinahayamini wanyi! Nelukili ñahi ñakwilu? Chinayili kumukala nakutaña magazini yaKaposhi Kakutalila niLoleni! akakweji kafuminihu, mwadiña chibaaba chalumbulwileña nawu mukanda waDanyeli awisonekeli muchiAramayiki.” Mwamweni, spiritu yajila yinateli kutwanukisha nsañu yitwadizili hela yitwashili mwakuhembela maheta.—Luka 12:11, 12; 21:13-15.

¹⁸ Neyi tukulemesha maana afumaña kudi Yehova, muchima wetu wukutusañumuna kuhemba chalala chachiha nichachikulu muchisweku chakuhembela maheta. Chitwatwalekahu kukeña nikulemesha maana aYehova, tukwikala akwakushimwina adiloñesha.

19. Muloñadi chitwatelela kukiña maheta etu akuspiritu?

¹⁹ Satana nikaayi kindi anakufwila kutuzeyesha hela kuletesha tukisañani maheta etu akuspiritu itunahanjeki muchinu chibaaba. Twakiñewa wanyi kunitu tufuta twindi twejima. Tunateli kufwa mumuhetu wakufwila nyidimu yakumujimba, kushakama chihandilu chachiwahi hela kufwila maheta. Kapostolu Yowanu watusoñamishili nindi kaayi kanakuhita nikufwila kwaku. (1 Yow. 2:15-17) Dichi, twatela kuzata nañovu kulonda tutwalekihu kukiña nikulemesha maheta etu akuspiritu.

20. Munakufwila kwiladi kulonda mukiñi maheta enu akuspiritu?

²⁰ Bayi mudiñija muyuma yidi yejima yinateli kuyikañesha kukeña Wanta waNzambiku. Twalekenuhu kushimwina neyena nikutwalekahu kulemesha mudimu wakupulwisha mawumi awantu. Twalekenuhu kukeñakeña chikupu chalala chaNzambi. Neyi mukwila mwenimu, mukwikala namaheta “mwiwulu, mwabulañayi ikombi kuswina kwakwihi nitububu twakisañanaña. Muloña kudi maheta enu, dikukwikala ninyichima yenu nawa.”—Luka 12:33, 34.