1, 2. Yehova watukundejaña ñahi neyi tudi mukweseka, nawa Izu dindi datukana nawudi?

MANAKWETU wumu wabula kusumbula wadiña nakukala, dichi wamulejelimu Stephen eluda wasumbula iku kukala. Iwu manakwetu wadiña nakutoñojoka mazu itwatañaña ha 1 Akorinda 7:28 akwila nawu: “Antu [akusumbula hela akusumbuka] akumonaña yihuñu mumujimba wawu.” Wenhwili nindi, “Yihuñu yamuchidinyi yeniyi nawa nakayimanisha ñahi neyi nisumbula?” Henohu kanda yakuli ilu lwihu, Stephen wamulejeli iwu manakwetu kutoñojoka mazu amakwawu asonekeliyi kapostolu Pawulu nindi, Yehova ‘hiNzambi wakukundeja kwejima watukundejaña mukweseka kwejima kutwamonaña [“mulukadi,” ftn.].’—2 Kor. 1:3, 4.

² Mwamweni, Yehova diyi Tata wukweti kukeña, nawa watukundejaña neyi tunakumona kukala. Hadaha mwamonahu dehi chayikwashiliyi Nzambi nikuyikiña, sweje-e kuhitila Mwizu dindi.  Tunateli kukuhwelela netu wukutukwasha neyi chakwashiliyi ambuñindi akunyima.—Tañenu Yeremiya 29:11, 12.

3. Tukuhanjeka malwihwinyi?

³ Chakadi nikujina, neyi twiluka chinaleteshi oku kukala hela oyu yihuñu chikutukwasha kuumika. Dichekala niyihuñu yekala muwulu hela muyisaka. Hanu dinu yumanyi yinateli kuleta “yihuñu mumujimba” yateneniyi Pawulu? Yakutalilahwinyi yashimunawu muBayibolu niyinakumwekana makonu yinateli kutukundeja? Neyi twiluka iyi yakutalilahu chikutukwasha kuumika.

4, 5. Yumanyi yaletaña “yihuñu mumujimba”?

⁴ Tunateli kutoñojoka mazu ahosheliyi Nzambi hakusambila nindi: ‘Iyala wakashiya tata yindi nimama yindi nakumukakela iñodindi; niwena akela mujimba wumu.’ (Kutach. 2:24) Yehova wahosheli awa mazu hampinji yasumbwishileñayi antu atachi. Hela chochu, kubula kuwanini kunateli kuletesha wulu nichisaka kwikala mukukala. (Rom. 3:23) Neyi antu anadisumbili, iyala diyi wekalaña mutu wachisaka. Nzambi wamwinka iyala wuswa wakwikala mutu hadi ñodindi. (1 Kor. 11:3) Antu neyi dihu hanadisumbuliwu chayikalilaña kwila mwenimu. Kwesekeja nachahosha Izu daNzambi, mumbanda watela kwiluka nindi akumulombolaña kudi nfumwindi bayi kudi anvwali jindiku. Antu anafumi hakudisumbula chinateli kuyikalili kutiyañana nawatuwuku nawa chumichi chikuyiletela yihuñu.

⁵ Anateli cheñi kutachika kwakama neyi mumbanda yaleja nfumwindi nindi, “Nidi nevumu.” Kakavulu, adisumbula atachikaña kwakamena chakuhemba mwanawu kutalisha hansañu yakuya kuyipatela hampinji yidiyi mumbanda nevumu hela neyi mwana navwaliki dehi. Nawa akutoñojokaña hansañu yamali akudikwasha nachu chakatataka nikumbidi. Yuma yayivulu yahimpikaña neyi mwana navwaliki dehi. Mama yawantu wazatishaña mpinji yeneni hakuhemba mwana. Iyala kakavulu wamonaña nindi anamumbilili muloña mumbanda washaña maana hakwakamena mwaana. Iyala niyena wukwikala nanyidimu yikwawu yayiha. Nyidimu yikumuvulila muloña nekali namuntu mukwawu muchisaka wakuhemba nikwakamena.

6-8. Kukalanyi kwekalañaku neyi muntu nakufwila kwikala nanyana ilaña kuvwala nehi?

⁶ Kwekala yihuñu yikwawu yamonañawu adisumbula. Akufwila nawu ekali nanyana ilaña kuvwala nehi. Neyi mumbanda yabula kwimita waneñaña nankashi. Kusumbula hela kuvwala anyana diyi yihuñu hohu wanyi, ilaña neyi muntu nakufwila kuvwala mwana ilaña kuvwala nehi niyena ‘hiyihuñu mumujimba.’ (Yish. 13:12) Kunyima, kubula kusema kwatiyisheleña nsonyi. Racheli, ñoda Yakoba watiyili kutama kumona muhelindi nakuvwala nyana. (Kutach. 30:1, 2) Amishonali akalakelaña mumatuña mwekala antu avwalaña anyana amavulu ayihulaña chaleteshaña abuleña kuvwala anyana. Hela chakwila akwakula mukubabala, ilaña ahoshaña nawu, “Tukuyikeñela yitumbu!”

⁷ Hela toñojokenu hadi muhela wakuEngland wafwilileña chikupu kwikala nanyana ilaña wavwalileña anyana wanyi. Nawa wabadikili hayaka yakuvwala anyana. Wahosheli nindi watiyili kutama, muloña welukili nindi wamba kasemahu cheñi wanyi. Yena ninfumwindi afuukwilihu kutachika  kuhemba mwana kamuntu wacheñi. Hela chochu, wahosheli nindi: “Natwalekelihu kuneña. Kuhemba mwana wacheñi kwambuka nakuhemba mwana wakudisemena.”

⁸ Bayibolu yashimuna nawu mumbanda mukwaKristu wakiñewa “kuhitila mukuvwala anyana.” (1 Tim. 2:15) Ilaña ichi chinayi wanyi mukwila nawu kusema hela kwikala nanyana dikwakamukwasha muntu kwikala nawumi wahaya nyaka. Ilaña chatalisha mukwila nawu neyi mumbanda wudi nanyana niyuma yikwawu yakwakamena mwitala chikumukwasha kubula matuñu hela kudiñija munsañu jawakwawu. (1 Tim. 5:13) Hela chochu, nateli kumona yihuñu yikwawu yekala muwulu nimuchisaka.

9. Kufwisha mwinikwenu kunateli kwikala ñahi kukala kwadimena?

⁹ Neyi tunakuhosha hayihuñu yakundama kuwulu kudi chuma chimu chabulaña kwinza muyitoñojoka yawantu. Hikufwisha. Mwamweni antu amavulu anamoni kukala kwakufwisha enikwawu. Iku dikukala kwabulaña kukuhwelelayi muntu. AkwaKristu akuhwelela chikupu muchikaninu chaYesu chakusañuka. (Yow. 5:28, 29) Ichi chikaninu chikumukwasha ñahi muntu wunafwishi? Chamukundejaña chikupu. Tata yetu wukweti kukeña wakwashaña nikukundeja antu amonaña yihuñu kuhitila Mwizu dindi. Tuhanjekenu hadi ambuña aNzambi chatiyiliwu hayikundejeliwu kudi Yehova.

10. Hana wakundejeweli ñahi? (Talenu mwevulu wakutachikilahu.)

¹⁰ Hana, ñoda Elikana wamweni kukala. Wadiña nakuvwala anyana wanyi ilaña muhadika nindi Penina ñoda Elikana mukwawu wavwalileña nyana. (Tañenu 1 Samweli 1:4-7.) Hana amuvulokeleña nankashi kudi muhadika nindi Penina “hamwaka hamwaka.” Chumichi chamutiyisheleña kutama Hana nikumukatisha kumuchima. Wamulejelimu Yehova kukala kwadiñayi naku mukulomba. Mwamweni, ‘walombeli lombe-e kumesu aYehova.’ Komana wakuhweleli nindi Yehova wukwakula kulomba kwindi? Watela wakuhweleleli. Muloña hampinji yimu, ‘haneñeli cheñi kumesu indiku.’ (1 Sam. 1:12, 17, 18) Wakuhweleleli nindi Yehova wukumukwasha kwikala nanyana hela kumukwasha munjila yikwawu.

11. Kulomba kunateli kutukundeja ñahi?

¹¹ Kukala niyihuñu jikutwalekañahu chineli twawanina wanyi nawa tunakushakama mukaayi kanakuyuulawu kudi Satana. (1 Yow. 5:19) Twazañalalaña hakwiluka netu Yehova ‘hiNzambi wakukundeja kwejima’! Kulomba hinjila yimu yinateli kutukwasha kutambwila wukwashu wakumanisha kukala niyihuñu. Hana wamulombeli Yehova chakufuma hamuchima. Munjila yoyimu, neyi tudi muyihuñu twatela kumulejamu Yehova yuma yayivulu kubadika chitunakutiya hohu. Twatela kulemba nakumulejamu yuma yejima yitunakutiya kuhitila mukulomba chakufuma hamuchima.—Fwi. 4:6, 7.

12. Chumanyi chamukwashali ntuluwa Ana kwikala namuzañalu?

¹² Tunateli kuwana kukundejewa hela chakwila tunaneñi muloña wakubula nyana hela kufwisha muntu itwakeña. Kaprofwetu wamumbanda Ana wafwishili nfumwindi hanyima yakudisumbula hadi yaaka 7. Bayibolu yashimuna wanyi nawu wadiña nanyana. Hanu dinu Ana wadiña nakwiladi hadiñayi nayaaka 84? Luka 2:37 yahosha nawu: “Mpinji  yejima wawanikileña hatembeli nakuzata mudimu wajila mwaana niwufuku, nakushakama chakadi kuda nakulomba nakulembelela.” Mwamweni, Ana wakundejeweleña nikwikala namuzañalu muloña wakudifukula kudi Yehova.

13. Shimunenu chakutalilahu chinakumwekesha mabwambu alala chiyanateli kudikundeja hela chakwila antaña anakañanyi kuyikundeja.

¹³ Neyi tukudikundaña chikupu nawamanakwetu niahela tukuwana mabwambu alala. (Yish. 18:24) Paula wanukaña mpinji yaneñeliyi hadiñayi nayaaka 5 chelili amamayindi afumi muchalala. Chadiña chakala kuumika iku kukala. Ilaña mukuhita kwampinji wakolesheweli chelili Ann muhela payiniya yatachiki kumwakamena kuspiritu. Paula wahosheli nindi: “Ann chañakameneniyi chankundejeli chikupu. Chankwashili kutwalekahu kumukalekela Yehova.” Paula natwalekihu kukalakala nakashinshi. Wudi cheñi namuzañalu wakukalakela hamu namama yindi muchipompelu chochimu. Ann niyena wudi namuzañalu muloña wadiña neyi mama yaPaula wakuspiritu.

14. Antu akundejaña akwawu atambwilaña nkiswinyi?

¹⁴ Neyi tumwekesha kukeña kudi antu amakwawu, chikutukwasha kukeheshaku chineñi. Ahela asumbuka hela abula  kusumbuka eluka chikupu nawu kushimwina nsañu yayiwahi hamu naNzambi kwaletaña muzañalu. Afwilaña kumulemesha Nzambi kuhitila mukwila nkeñelu yindi. Amakwawu amonaña mudimu wakushimwina neyi yitumbu yakumanishilamu chineñi. Chakadi nikujina, wejima wetu twakwashaña chipompelu kwikala chanuñañana neyi tumwekesha kukeña kudi antu adi mwizanvu detu nimuchipompelu. (Fwi. 2:4) Kapostolu Pawulu wakeñeli amanakwindi. Wadiña neyi “mama yawantu wunakwamusha” kudi antu amuchipompelu chamuTesalonika nawa wadiña neyi nvwali wakuspiritu.—Tañenu 1 Atesalonika 2:7, 11, 12.

15. Anyi akweti mudimu wakudizisha nyana chalala?

¹⁵ Chuma chimu chitwatela kushaku muchima, hichitwakundejaña nichitwakwashaña yisaka. Mpinji yikwawu, akwakushimwina amaha alejaña akwakushimwina apama nawu ayidizishiliku anyanawu chalala nikudiza nawu Bayibolu. Kwesekeja nachahosha Nsona, anvwali diwu atela kudizisha anyanawu. (Yish. 23:22; Efwes. 6:1-4) Mpinji yikwawu twatela kulomba wukwashu kudi antu makwawu. Ilaña, bayi atambula wuswa wukwetiwu anvwaliku. Anvwali atela kuhanjekaña nawanyanawu mpinji yejima nawa munjila yayiwahi.

16. Neyi tunakukwasha anyana, chumanyi chitwatela kwanuka?

¹⁶ Neyi nvwali yafuukulahu kwinka muntu wacheñi kumudizishila anyanindi, muntu anenkiwu bayi yatambula mudimu wawanvwaliku. Mpinji yikwawu anvwali abula kwiluka chalala anateli kuleja Chinsahu kulonda yadizisheña anyanawu chalala. Chinsahu watela kwiluka nindi, nakuyikwasha hohu kuspiritu bayi neyi wukwikala nvwali yawanyanaku. Nawa neyi hiyakudiza, chikuwaha kuyidizishila mwitala dawanvwali jawa nyana chakwila nianvwali adi hohu hela hamu naChinsahu wapama hela heluña dakwila ejima anakuyimona. Chumichi chikukwasha antu ejima kwiluka yuma yinakwilawu. Mukuhita kwampinji, tunakuhweleli netu anvwali akatachika kuzata mudimu wawu wayinkayi Nzambi wakwakamena anyana kuspiritu.

17. Anyana anateli kukundeja ñahi chisaka?

¹⁷ Anyana adizaña kumukeña Nzambi nikulondela kufumba kwindi anateli kukundeja chisaka. Anateli kwila mwenimu kuhitila mukulemesha anvwali jawu nikuyikwasha kumujimba. Anateli cheñi nikuyikwasha kuspiritu. Henohu Dibaji kanda, Lameki wamuchisaka chaSeta wadifukwileña kudi Yehova. Iwu muntu wadiña nachisaka wahosheli hadi Nowa nindi: “Yeniwu diyi wakatukendeja namudimu wetu nakukabakana kutukukabakana namakasetu, neseki dashiñiliyi Yehova.” Iwu wuprofwetu washikijeweli hampinji yashiñulwiliwu idi ishiñu. (Kutach. 5:29; 8:21) Kuhosha hohu chalala, anyana afwilaña kudifukula kwalala akundejaña antu amuchisaka nikuyikwasha kuumika kukala kulonda akapuluki kukala kunabadiki Dibaji.

18. Chumanyi chikutukwasha kuumika chikupu hela chakwila tunakumona yihuñu hela makabi?

¹⁸ Kulomba, kutoñojokahu chikupu hadi antu ashimunawu muBayibolu nikudikunda nawantu jaYehova kunakukundeja antu mamavulu anakumona kukala makonu. (Tañenu Masamu 145:18, 19.) Kwiluka netu Yehova diyi Mukwakukundeja kwejima, kukutukwasha kuumika yihuñu yitunakumona makonu niyitukamona kumbidi.