1. Yumanyi yatuzañaleshaña?

TWAZAÑALALAÑA hakutiya nyidimu yawantu jaYehova chiyinakuyilaku hambidi. Chaaka chinamani twalombweli atudizi aBayibolu kubadika ha 10,000,000. Chumichi chinakumwekesha hatooka nawu ambuña aNzambi anakwiteja chejeji chawu kutoñeka. Nawa toñojokenu cheñi hadi mamiliyoni awantu akweti mpwila enjili kuChanukishu. Adizili kukeña kwamwekesheliyi Nzambi hakuhana ifutu danyiloña.—1 Yow. 4:9.

2, 3. (a) Chumanyi chabulaña kutukañesha kutoñeka “neyi yejeji mukaayi”? (b) Kwesekeja namazu aYesu ekala haMatewu 5:14-16, tukuhanjekadi?

² Kunyeñumuka kaayi kejima, antu jaYehova ahoshaña madimi ashiyashana. Hela chochu, chumichi hichatukañeshaña kumushimeka Tata yetu, Yehova mukunuñañanaku. (Chim. 7:9) Hichikweti muloña nedimi ditwahoshaña hela kwiluña kutwashakamañaku, tunateli kutoñeka “neyi yejeji mukaayi.”—Fwi. 2:15.

³ Kuvula kutunakumona, kunuñañana kutwadiluñishaña  niyilwilu yayiwahi yitwekala nayu yaletaña kalemesha kudi Yehova. Muchinu chibaaba tukuhanjeka chejeji chetu chichinateli kutoñeka muniyi yuma.—Tañenu Matewu 5:14-16.

4, 5. (a) Kubombela hakushimwina, tunateli kwiteja ñahi cheñi chejeji chetu kutoñeka? (b) Yumanyi yayiwahi yinateli kufuma muyilwilu yetu yayiwahi? (Talenu mwevulu wakutachikilahu.)

⁴ “Kwosi muntu niwumu wadi kwikala washinshika nawa walala kudi Mwanta munanu mafuku anashaliku . . . chiña neyi yadinkaku chikupu nakwiteja chejeji chindi kutoñeka.” Awa diwu mazu asonekeliwu muchibaaba chahosheleña nawu, “Chejeji muMwidima,” muKaposhi Kakutalila kachizungu kaJune 1, 1925. Ichi chibaaba chalumbulwili nawu: “Watela kutoñeka kuhitila mukushimwina nsañu yayiwahi kudi antu ahamaseki nikutwalekahu kutoñeka.” Mwamweni, njila yimu mutwetejelaña chejeji chetu kutoñeka hikushimwina nsañu yayiwahi nikwilisha atumbanji. (Mat. 28:19, 20) Kubombelahu, twamulemeshaña Yehova kuhitila muyilwilu yetu yawakwaKristu. Eni matala niantu ahitaña ashinshikaña yilwilu yetu. Yimwemweta yitwatumbaña nikuyimusha antu namuzañalu jamwekeshaña chitwekala nichekala Nzambi itwadifukulañaku.

⁵ Yesu walejeli atumbanji twindi nindi: “Chimweñila mwitala, imushenu antu amunodu itala.” (Mat. 10:12) Mwiluña mwashimwinineñayi Yesu niapostolu indi, antu hiyetejeleña muntu iyabula kwiluka kwiñila mumatalawuku. Ichi chuma chazatikaña wanyi makonu kumaluña amavulu. Ilaña neyi twikala akasunuka nawa anakumwekesha muzañalu nikuyilumbulwila chuma chitunendeli anateli kuleka kwakama. Kutumba chimwemweta hinjila yayiwahi yakutachikilamu kuhanjeka nawantu. Chumichi dichelañawu amanakwetu niahela hampinji yashimwinañawu kumaluña kwawanikaña antu amavulu kuzatisha jingolofwana. Neyi mutumbaña chimwemweta nikwimusha antu mumudimu wakushimwina, niwena akwikala akasunuka nawa akuyitambwila. Chikuyileñelaña kwinza kudi etu nakusendahu nyikanda yetu. Yilwilu yenu yayiwahi yinateli cheñi kuyikwasha kutachika kuhanjeka nawantu.

6. Indi adisumbula akula dehi ashimwinaña ñahi?

⁶ Adisumbula akula dehi akuEngland, akañanyaña kushimwina kwitala nikwitala muloña wakukata kumujimba. Afuukulahu kwiteja chejeji chawu kutoñekela hetala dawu. Ashaña nyikanda yashindamena haBayibolu hamesa kulonda anvwali chakuyañawu nakusenda anyanawu kushikola asendeñahu nyikanda. Chumichi chinaleñeli amavulu kusenda mukanda waQuestions Young People Ask—Answers That Work, Volumes 1 ni 2, kushilahu nimabuloshuwa. Muhela payiniya wamuchipompelu chawu niyena watachikili kuzatila hamu nawu. Yilwilu yindi yayiwahi nikuzata nañovu kwanawa adisumbula kunaleñeli nvwali wumu weyala kwiteja kudiza Bayibolu.

7. Munateli kuyikwasha ñahi antu anenzi mwiluña denu?

⁷ Hadi yaaka yinahitihu, mumatuña amavulu munahwili antu anakutemuka njita mumatuña awu. Munateli kuyikwasha ñahi antu amuchidiwu kulonda amwiluki Yehova ninkeñelu yindi? Kwila mudiza chakwimusha mwidimi dahoshañawu awa antu anenzi mwiluña denu nehi? JW Language app dichozelu chinateli kuyikwasha. Kubombelahu, kwila mudizaku chakuhosha nyikuku yantesha mwidimi dawu kulonda muyikokoli nachu nehi? Mwatela cheñi kuyilombola ha jw.org nakuyileja mavidiyo ashiyashana ninyikanda yamwidimi dawu.—Kuhit. 10:19.

8, 9. (a) Yumanyi yitwadizaña hakupompa kwetu kwamukachi kamulungu? (b) Anvwali anateli kukwasha ñahi anyanawu kwakulahu hakupompa?

 ⁸ Yehova watuloñeshela Chihandilu niMudimu kulonda tushimwineña chachiwahi mwiha. Yuma yitwadizaña haniku kupompa yatukwashaña kwikala ahamuka hakufuntila nikuyidizisha antu Bayibolu.

⁹ Antu enzaña katachi kukupompa amonaña anyanetu chiyakulañahu hakupompa. Enu anvwali, kwashenuña anyanenu atoñekeña chejeji chawu kuhitila mukuyidizisha chakwakula mumazu awu. Mazu ahoshañawu chakufuma hamuchima anakwashi antu amaha kwiluka chalala.—1 Kor. 14:25.

10. Kudifukula kwachisaka kwazataña mudimwinyi kutalisha hakuleta kunuñañana?

¹⁰ Njila yikwawu yimunateli kutoñekelamu chejeji hikuleta kunuñañana muchisaka nimuchipompelu chenu. Njila yikwawu muyanateli anvwali kutoñekelawu chejeji, hikwikala nantanjikilu yaKudifukula kwaChisaka mafuku ejima. Amavulu atalaña niJW Broadcasting mafuku amakwawu mukakweji. Hanyima yakutala iyi progiramu, kwila muhanjeka hayikuma yadiñamu nehi? Anvwali neyi anakulombola kudifukula kwachisaka, atela kwanuka nawu wukwashu wukukeñeka kudi mwana wanyanya wunateli kwambuka nawukukeñeka kudi kampululu. Zatishenuña chiwahi yuma yakudiza kulonda ejima muchisaka chiyikwasheña.—Mas. 148:12, 13.

11-13. Wejima wetu tunateli kuleta ñahi kunuñañana muchipompelu nikukwasha amakwawu kutoñeka chejeji?

¹¹ Atwansi anateli kuleta ñahi kunuñañana muchipompelu nikukolesha amakwawu kulonda atoñekeña chejeji? Neyi wudi mukwenzi mukwaKristu, kwila wufwilaña kudikunda nawakulumpi nehi? Mwatela kuyihula nakalemesha kulonda ayilumbulwiliku yuma yinadiluñishiwu mumudimu waNzambi. Chumichi chikuyikolesha nawa chikuyikwasha enu niwena kutoñeka chejeji chachalala. Nawa wejima wetu twatela kwikala nachaaku chakutambwila antu enzaña kukupompa Kwitala daWanta. Neyi mwila mwenimu, mukuleta kunuñañana nawa mukukwasha antu anenzi kutoñeka chejeji. Mwatela kwimusha antu anenzi namuzañalu, hadaha nikuyikeñela hakushakama. Yilumbululenu kudi akwenu, nawa chumichi chikuyikwasha kwikala akasunuka.

¹² Neyi anayinki kulombola mudimu wakuya  nakushimwina, mwatela kuzata nañovu mukwasheña anakuli kulonda ashimwineña. Komana akweti iluña dadiwahi dakushimwinamu? Neyi chinatwesheki, munateli kuyambula nakansi wunateli kuyikwasha kumujimba. Mwatela cheñi kutoñojokelaku anakukañanya kuzata nankashi muloña wakukata kumujimba. Kuyitoñojokelaku nikashinshi kenu chinateli kuyikwasha atwansi niakulumpi akulukila niabula kukulukila kushimwina nsañu yayiwahi neyena.—Lev. 19:32.

¹³ Ñimbi yamasamu wahosheli nindi: “O kuwaha o kutowala antu amwivumu dimu akushakama hamu nakutiyañana!” (Tañenu Masamu. 133:1, 2.) Antu amakwawu muIsarela ayikwashileña neyi ashakama hamu nawantu amawahi adifukwileña kudi Yehova. Chadiña tuhu neyi manji akuwayisha akweti ivumba dadiwahi. Zatenuña nañovu kulonda mwikali nayilwilu yayiwahi nikuleta kunuñañana hakachi kawamanakwetu niahela. Neyi dichimwelaña, tunayisakilili. Kwila ‘mutoheshaku kukeña kwenu’ dikwila nawu, kuzata hakumina ñovu nikutwalekahu nehi?—2 Kor. 6:11-13, tth.

14. Mwatela kwiladi hakwila chejeji chenu chitoñekeña mwiluña mumwashakamaña?

¹⁴ Kwila muzata nañovu kulonda mwitejeña chejeji chachalala chamuBayibolu chitoñekeña mwiluña mumwashakamaña nehi? Nhoshelu yenu niyilwilu yayiwahi yinateli kuleñela antu imwashakamaña nawu kwiteja chalala. Dihulenu nenu: ‘Antu amwiluña detu añiluka nawu nekala nayilwilu yamuchidinyi? Nahembaña hetala niyuma yami nawunyonji, yikuletesha antuñi nami ammoneña nawu nekala nayilwilu yayiwahi? Komana nakwashaña amakwawu?’ Neyi munakuhanjeka nawaYinsahu amakwawu, kwila muyihameka haluwi niyilwilu yawu yayiwahi chiyinakwashi antañajawu, antuñi nawu, akwawu muyatilañawu hela akwawu akashikola nehi? Mukutiya yuma yayiwahi yinadiluñishiwu.—Efwe. 5:9.

15. Muloñadi chitwatela kutwalekahu kwikala atona?

¹⁵ Yilwilu yetu yamwekanaña hampinji yitwazataña nañovu hakwila chejeji chetu chitoñekeña. Yesu watwalekelihu kuyikonkomwena atumbanji twindi nindi: “Tonenuña.” (Mat. 24:42; 25:13; 26:41) Dichi neyi tumonaña netu “lukadi lwasweja” luchidi kwakulehi nawa netu lukenza mumafuku etu wanyi, tukuleka kudikita nankashi mumudimu wakushimwina. (Mat. 24:21) Chatela chejeji chetu chitoñekeña nankashi mwiluña detu, ilaña chikukeha nawa chikujima.

16, 17. Yumanyi yimwatela kwila hakwila mutwalekihu kwikala atona?

¹⁶ Wejima wetu twatela kutwalekahu kwikala atona chineli yuma yinakutaminaku muyinu mpinji yakala. Yehova wakaleta kukuma hampinji yatelela nawa yatoñolayi dehi. Dichi bayi tujinokañaku. (Mat. 24:42-44) Ilaña chayinu mpinji, twatela kuduñumika nikwikala atona mpinji yejima. Tañenuña Izu daNzambi mafuku ejima nikwikala adiloñesha kulonda mulombeña. (1 Pet. 4:7) Dizilenuña kudi amanakwetu niahela adi namuzañalu muloña wakwikala atona nikwiteja chejeji chawu kutoñeka. Chakutalilahu chimu chachiwahi achishimuna muchibaaba chakwila nawu “Nakwati Kwihina dakaYudeya Hadi Yaaka Makumi Atanu Nayedi,” chedishiliwu muKaposhi Kakutalila kaApril 15, 2012, mafu 18-21.

¹⁷ Zatenuña nyidimu yinateli kuyikolesha nawa dikundenuña nawantu anateli kuyikolesha. Chumichi chikuyiletela muzañalu chikupu nawa mukumona nenu mafuku anakwenda swayi-swayi. (Efwe. 5:16) Hadi yaaka 100 yinahitihu, amanakwetu adiña nakuzata nañovu nawa azatili nyidimu yayivulu.  Ilaña makonu tunakuzata nyidimu yayivulu nankashi muloña wachikasa chaYehova chinakutulombola. Tunakwiteja chejeji chetu kutoñeka chikupu kubadika chichadiña kunyima.

18, 19. Aeluda muchipompelu anateli kutukwasha ñahi kwikala atona nawa adikita? Lumbululenu.

¹⁸ Chikuhwelelu chetu chakolaña hakwiluka netu kubula kuwanina kwetu kwatukañeshaña wanyi kumukalakela Yehova. Dichi, musakililenuña Yehova hakuhana “amayala kwikala yawaana,” aeluda muchipompelu. (Tañenu Aefwesesa 4:8, 11, 12.) Neyi anayendeli kudi aeluda, zatishenu iku kukooleka kulonda mudizili kumaanawu nikuzatisha wukwashu wawu.

¹⁹ Aeluda ayedi akuEngland etejeli chayitambikiliwu kudi adisumbula adiña nakukala. Mumbanda wazeyeli kuspiritu. Nfumwindi walumbulwili hatooka nindi wadiña ntañishi wamuwahi wanyi nawa waloñesheleña wanyi kudifukula kwachisaka mpinji yejima. Aeluda ayilejeli awa adisumbulu chakutalilahu chaYesu. Wadiña nakwakamena atumbanji twindi nawa nikwiluka yuma yakeñeleñawu. Aeluda amulejeli iyala kumwimbujola Yesu. Amukolesheli cheñi mumbanda kwikala wadiwunjika. Aeluda ayilejeli adisumbula jinjila muyatela kuzatilawu hamu kulonda ekaleña nakudifukula kwachisaka hamu nawanyanawu ayedi. (Efwe. 5:21-29) Kuhiñahi, aeluda amuhamekeli iyala hakuzata nañovu. Amukolesheli kutwalekahu nikushindamena haspiritu yajila kulonda yimukwashi kwikala mutu wachisa waha kuspiritu. Wukwashu nikwakamena kwawu kunakwashi ichi chisaka kutwalekahu kutoñeka chejeji chawu.

20. Chumanyi chikufumamu neyi mwiteja chejeji chenu kutoñeka?

²⁰ Ñimbi yamasamu wembili nindi: “Anakooleki ejima amwakamaña Yehova, endaña munjila jindi.” (Mas. 128:1) Mukwikala namuzañalu chikupu neyi mwiteja chejeji chenu kutoñeka kuhitila mukukwashaku antu amakwawu kumukalakela Nzambi, kwikala nayilwilu yaletaña kuwunda nikwikala atona mpinji yejima. Antu amakwawu akumona nyidimu yenu yayiwahi nawa chumichi chikuleta kalemesha kudi Tata yetu.—Mat. 5:16.