Tata yaRehobowami wadiña Solomoni, wayuulili muIsarela yaaka 40. (1 Anya. 11:42) Solomoni wafwili mu 997 B.C.E. Rehobowami wayili kukabeta kakuchimunswa kufuma kuYerusalema nakuya kuShekemi kulonda amuwayishi nakwikala mwanta. (2 Kushi. 10:1) Mukutoñojoka nenu watiyileña woma kulondela mumahaji aSolomoni, elukiliwu nawu wadiña namaana asweja? Rehobowami wadi kwiluka ñahi nindi wuswa windi wakumanisha kukala kwasweja wukumana?

Rehobowami watela wawanini yuma yatama dehi muIsarela. Mukuhita kwampinji, akulumpi ahosheleleñaku antu enjili kudi yena nakumuleja nyaabu yawantu nawu: “Tata yeyi watukalishilili mpanda yetu, ichi dinu tupepesheli nyidimu yatata yeyi yakala, nimpanda yindi yalema yatutwikiliyi, etu twakakukalakelaña.”—2 Kushi. 10:3, 4.

Hadaha Rehobowami watoñojokeli nindi wudi mukukala! Neyi yayilila antu yuma yakeñeleñawu, yena, chisaka chindi niamuyota yindi adi kukeheshaku yuma yayiwahi nikuleka kuyilomba antu yuma yayivulu. Munjila yikwawu, neyi yakaana, antu niwena akumwovwahila wanyi. Wadi kwila ñahi? Chatachi, mwanta wamuha wayili nakwihula akulumpi amulejeleña Solomoni maana. Hela chochu, Rehobowami wetejeli mwamulejeliwu kudi akwawu atwansi. Chineli wetejeli mwamulejeliwu kudi akwawu atwansi, Rehobowami kwafukwilihu kukabisha antu. Wakwili nindi: “Tata yami wayetelaña yikotu ami nakayeta tunjimbu.”—2 Kushi. 10:6-14.

Munamoni chuma chitwatela kudizilaku? Mwamweni, chachiwahi kutambwila wukwashu kudi akulumpi apama kuspiritu. Chineli anashimbuli nawa eluka yuma yayivulu anateli kufuukula mwamana nawa anateli kutukwasha chiwahi.—Yoba 12:12.

Chadikañiliwu antu, Rehobowami wapompesheli mashidika indi. Ilaña Yehova wamukaanishili kuhitila mudi kaprofwetu Shemaya,  wahosheli nindi: “Bayi mwakalwa nawana kwenu anyana kaIsarelaku. Funtenu kumatalenu wejima wenu. Muloña chumichi chinafumi kudami.”—1 Anya. 12:21-24. *

Komana wukambuka chakubula kuzuña? Hadaha Rehobowami watiyili kutama. Antu atela atoñojokeleña nawudi hadi mwanta watiyishili antu jindi woma nindi wakayeta “tunjimbu” ilaña yeteji mwadikañiliwu? (Esekejenu 2 Kushindulula 13:7.) Hela chochu, mwanta nimashidika indi “Hiyakutiyilila mwizu daYehova, hiyakufuntamu, hiyakudiyila kwawu, mwomwizu daYehova.”

Chumanyi chitukudizilaku? Chachiwahi kumutiyilila Nzambi hela chakwila kwila mwenimu kunateli kutusawisha. Kumutiyilila Nzambi kukuleñela yatukwashi nikutukiswila.—Kuhit. 28:2.

Yumanyi yafumini muyuma yelili Rehobowami? Wovwahilili nakuleka mwafuukwiliyi, kulwa namuza wawuha nakutachika kutuña nyisumba muñinza yaYuda niBenjamin mwadiña cheñi nakuyuulayi. Wakwashili nyisumba yayivulu “nankashi.” (2 Kushi. 11:5-12) Chuma chalema, mpinji yimu wovwahilili nshimbi jaYehova. Wanta wanyitaña 10 yawaIsarela wayuulileñawu kudi Yerobowami watachikili kudifukula kudi ankishi, ilaña antu amavulu muniwu wanta ‘hiyakumwinka Rehobowami ñovu’ kuhitila mukuya kuYerusalema nakuhakwilaku kudifukula kwalala. (2 Kushi. 11:16, 17) Dichi, Rehobowami chovwahililiyi wanta windi wakoleli.

Wanta windi chiwakoleli, Rehobowami welili yuma yakuhayamisha. Walekeli kulondela nshimbi jaYehova nakutachika kudifukula kwakutwamba! Hanu dinu muloñadi? Amuluwañesheleña kudi mama yindi wadiña kaAmoni? (1 Anya. 14:21) Hela chakwila tuneluki wanyi chuma chaletesheli, ilaña muza wejima wamulondeleleli. Dichi Yehova wetejeli Shishaki Mwanta wakuEjipitu kutambula nyisumba yawaYuda yayivulu hela chakwila Rehobowami wayikolesheli.—1 Anya. 14:22-24; 2 Kushi. 12:1-4.

Antu atachikili kutiya iyi nsañu chelili Shishaki yashiki muYerusalema mwayuulileñayi Rehobowami. Haniyi mpinji kaprofwetu Shemaya washimwini mazu aNzambi kudi Rehobowami niatulamba twindi nindi: “Enu munanleki dehi ami nawa nayilekeli dehi muchikasa chaShishaki.” Rehobowami welili ñahi chatiyiliyi awa mazu akubabesha? Bayibolu yashimuna nawu: “Atulamba twawaIsarela nimwanta hiyakudizoza hiyakwila nawu Yehova waloña.” Dichi, Yehova wamupulwishili Rehobowami niYerusalema.—2 Kushi. 12:5-7, 12.

Kuhiñahu, Rehobowami watwalekelihu kuyuula wanta wakukabeta kakuchidilu. Henohu kanda yafwi, wayinkeli anyanindi yawaana, chuma chamwekesheleña nawu wayikañesheli nindi abuli kudikaña namanakwawu Abiya, nswana yindi. (2 Kushi. 11:21-23) Chuma cheliliyi chamwekeshaña nawu Rehobowami wamwekesheli kashinshi kabulili kumwekeshayi kunyima.

Hela chochu, wakañenyi kwikala ibwambu daNzambi. Bayibolu yalumbulula chiyuulu chindi chiyahosha nayu: “Welili chatama.” Muloñadi? “Muloña wabulili kusha muchima windi hakukeñakeña Yehova.”—2 Kushi. 12:14.

Toñojokenu chumichi: Rehobowami wadiña nakumwovwahila Nzambi mpinji yikwawu. Nawa wakoñeleli muza waYehova yuma yayiwahi. Ilaña wakañenyi kukolesha wumbwambu windi naYehova hela kumutiyisha kuwaha. Dichi welileña yuma yatana nawa wadifukwileña kudi anzambi acheñi. Munateli kudihula nenu: ‘Komana Rehobowami chovwahilileñayi neyi anamufumbi kudi Nzambi, wovwahilileña muloña wakwila amukwashileña kudi antu acheñi tahindi wabalumukileña mumuchima nikukeña kumutiyisha Nzambi  kuwaha?’ (2 Kushi. 11:3, 4; 12:6) Mukuhita kwampinji watachikili cheñi kwila yuma yatama. Wambukili chikupu nankaka yindi, Mwanta Davidi. Mwamweni, Davidi waluwañesheleña, ilaña chihandilu chindi chashindameneni hakumukeña Yehova, kudifukula kwalala nikubalumuka chikupu mumuchima neyi naluwañeshi.—1 Anya. 14:8; Mas. 51:1, 17; 63:1.

Dichi twatela kudizila kudi Rehobowami. Chachiwahi nankashi antu kukeñela yisaka yawu yuma yakeñañawu nikufwila yuma yayiwahi. Ilaña hakwila twikali amabwambu jaNzambi, chatachi twatela kukwasha nikukakela mukudifukula kwalala.

Tunateli hohu kwila mwenimu neyi tusweja kumukeña Yehova. Neyi chitwasonselaña kesi kulonda kabuli kujima, twatela kutwalekahu kumukeña Nzambi kuhitila mukudiza Izu dindi mafuku ejima, kutoñojoka chikupu hayuma yitunadizi nikulomba chakadi kuleka. (Mas. 1:2; Rom. 12:12) Kukeña kutwamukeña Yehova kukutusañumuna kwilaña yuma yikumutiyishaña kuwaha mpinji yejima. Kukutukwasha kubalumuka mumuchima neyi tunakoñi nshidi. Kwambukaku naRehobowami, etu twatela kutwalekahu kwikala mukudifukula kwalala.—Yuda 20, 21.