“MUDI ñahi mwani?”

Chakadi nikujina mwemushahu dehi muniyi njila. Hekwawu mwemushahu dehi muntu mumakasa hela kumukumbata. Mazu imwazatishaña hakwimusha anateli kwambuka, ilaña njila yakwimushilamu yahimpaña wanyi. Kuhosha hohu walala, kwosi muntu wunateli kuhosha hela kwiteja nindi iku kwimusha kwamwekeshaña kukeña wanyi hela kwakutwamba.

Ilaña, bayi neyi antu ejima emushañaku. Amakwawu emushaña wanyi muloña wansonyi hela wakudimona neyi ashikilamu wanyi. Amakwawu chayikalilaña kwimusha antu ekowa dacheñi, chisemwa hela akweti yifulu yamaneni. Hela chochu, muntu nateli kuzañalala neyi mumubayibisha.

Dihulenu nenu: ‘Mukudimusha mwafumañadi? Nawa Izu daNzambi dinateli kundizishadi kutalisha hakwimusha?’

Kapostolu Petulu hamutambwilileñayi kaJentili watachi Konelisu muchipompelu chawakwaKristu, wahosheli nindi: “Nzambi hakweti chaambuku.” (Yilw. 10:34) Kuhiñahu Petulu wasonekeli nindi Nzambi “wakeñaña nindi antu ejima ekali nakukooleka kwakubalumuka munyichima.” (2 Pet. 3:9) Hadaha twatela kusambila kuhanjeka iji nsona namuntu wunakudiza chalala. Ilaña Petulu wayilejeli cheñi akwaKristu nindi: “Lemeshenuña antu ejima, keñenuña anakwenu ejima.” (1 Pet. 2:17) Komana chikuwaha wanyi kwimusha antu ekowa dacheñi, chisemwa chacheñi hela akweti yitachi yashiyashana? Neyi tuyimusha tukumwekesha netu twayilemesha nawa twayikeña.

Kapostolu Pawulu wayikonkomweneni antu amuchipompelu nindi: “Ditambwilenuña wumu namukwawu neyi chayitambwililiwu enu kudi Kristu.” (Rom. 15:7) Pawulu wateneni amanakwetu ‘amukolesheleña.’ Antu jaNzambi makonu atela kudikoleshaña chikupu kubadika mumafuku aPawulu. Muloña Satana nahililiku chikupu munanu mafuku akukuminina.—Kol. 4:11, tth.; Chim. 12:12, 17.

Yakutalilahu yamuNsona yamwekeshaña nawu neyi muyimusha antu akwikala akasunuka nawa kudi cheñi yuma yikwawu yikwamwekesha.

Chashikili mpinji yakutuntulwila wumi waMwana kaNzambi mwivumu daMariya, Yehova watemesheli kañelu kuhosha naMariya. kañelu watachikili namazu akwila nawu: “Kolaku, eyi wakiswilewa chikupu, Yehova wudi naneyi.” Mariya “waluwankeni nankashi,” welukili wanyi chaletesheli kañelu yahoshi nayena. Kañelu chamweniyi chumichi, wahosheli nindi: “Bayi wutiya womaku Mariya, muloña Nzambi nakutiyi kuwaha.” Wamulumbulwilili nindi yadiña nkeñelu yaNzambi yena kuvwala Mesiya. Chatela yatwalekihu kwikala waluwankana, Mariya wamwakwili nakalemesha nindi: “Talaña!, ami nduñu waYehova wamumbanda! Lekaku chimwekani kudi ami kwesekeja nachiwunahoshi.”—Luka 1:26-38.

Kañelu wadiña nakukooleka chikupu kwakwikala ntemesha yaYehova; hela chochu, hachimweni kubula kushikilamu kuhosha namuntu wabula kuwaninaku. Wasambilili kumwimusha. Kwila tudizila kunichi chakutalilahu nehi? Twatela kwimushaña akwetu nikuyikolesha. Mazu antesha hohu, anateli kukwasha amanakwetu kwiluka nawu ekala hakachi kawantu jaYehova.

Pawulu welukili antu amavulu muyipompelu yamuAsia Minor nimuEurope. Munyikanda yindi yayivulu watenamu majina awantu emushileñayi. Chakutalilahu, mukanda waAroma kapetulu 16. Pawulu  watemesheli mazu akwimusha akwawu akwaKristu amavulu. Wamuteneni Fwibi, “muheletu,” nawa walejeli amanakwetu nindi “[amutambwili] mudi Mwanta munjila yatelela akwakujila, nakumukwasha muyuma yejima yikukaankilayi.” Pawulu wemushili aPrisila naAkwila, wahosheli nindi: “Bayi neyi yami hohu wunakuyisakililaku, ilaña anakuyisakilila nikudi yipompelu yejima yawakwanyuza.” Wemushili antu amakwawu abula kwilukawu makonu—“Epenetu inakeña,” wemushili cheñi “aTirifwena naTirifwosa, ambanda anakukalakala nañovu mudi Mwanta.” Mwamweni, Pawulu wemushili amanakwindi niahela.—Rom. 16:1-16.

Fwikijenu muzañalu watiyiliwu hakwiluka nawu adiña nakuyanuka chikupu. Atela amukeñeli chikupu Pawulu nikudikeña mulwawu. Nawa chatiyiliwu iku kwimusha kwatela kwayikolesheli akwawu akwaKristu, chayikwashili kwimana chakola muchikuhwelelu. Mwamweni, kwimusha kwakufuma hamuchima kwakooleshaña wubwambu nawa kwanuñañeshaña ambuña aNzambi ashinshika.

Pawulu chashikiliyi kuPuteyoli nawa hayileñayi kukabadi kakuRoma, akwaKristu enjili kufuma kukabeta kambwela nakumukinkilila. Chayimweniyi hahalehi anakwinza, Pawulu “wamusakilili Nzambi nawa wakolesheweli.” (Yilw. 28:13-15) Mpinji yikwawu, twatela kwimusha antu kuhitila mukutumba chimwemweta hela kuyibayibisha. Nawa chumichi chinateli kuzañalesha muntu sweje-e wunadishoni hela wunaneñi.

Kambanji Yakoba wateleleli kuhana kufumba kwakubula kuhita mumbadi. AkwaKristu amakwawu elileña wuvumbi wakuSpiritu kuhitila mukukwata wubwambu nakaayi. (Yak. 4:4) Ilaña, talenu Yakoba chatachikiliyi mukanda windi:

“Ami Yakoba, nduñu yaNzambi niyaMwanta Yesu Kristu, kudi enu ejima nyichidi 12 yapalañena mweñi namweñi: Nayimushi!” (Yak. 1:1) Chakubula nikujina, antu atañili atambwilili kufumba muloña mukanda windi wakwimusha wamwekesheli nawu niwena adiña alema kudi Nzambi. Mwamweni, kwimusha kunateli kuletesha kutachika kuhanjeka hansañu yalema.

Kwimusha kwalala hela chakwila kwakwihi, kwatela kufuma hamuchima nawa kunakumwesha kukeña kwalala. Dichitwatela kwila hela chakwila antu anatumoni wanyi. (Mat. 22:39) Muhela wakuIreland chashikiliyi Hetala daWanta wawanini kupompa hikukukeña kutachika. Cheñilileñayi, manakwetu wumu wamutalili nakutumba chimwemweta nawa wahosheli nindi: “Mwinzaña mwani. Mudi ñahi?” Iwu muhela wayili nakushakama.

Chimwahitili nyilungu yantesha, iwu muhela wayili nakumuwana manakwetu nawa wamulumbulwilili nindi wadiña nakukala kwitala hadi mpinji yayilehi. Wahosheli nindi: “Adina ifuku kudi yuma yaneñesheli chakwila nakeñeleña kuya Kwitala daWanta wanyi. Hinnakwanuka yuma yitwadizili hakupompaku, ilaña inakwanuka hohu chimwañimushili nakasunukili. Kusakililaku.”

Iwu manakwetu welukili wanyi nindi mukwimusha kwindi mukufuma yuma yamuchidiwu. Wahosheli nindi: “Chanlejeliyi nindi kwimusha kwami kwamuletesheli yakasunuki, natiyili kuwaha chikupu nami nelili chiwahi kumwimusha. Ninami natiyili kuwaha.”

Solomoni wasonekeli nindi: “Natilaku yakudya yeyi hameji, neyi munahiti dehi mafuku amavulu wakayiwana cheñi.” (Mukwa. 11:1) Neyi twimushaña mpinji yejima, sweje-e akwetu akwaKristu, tukuyikolesha nawa ninetu tukukolelaku. Dichi twimushenuña, kwimusha kwakuwahi.