1, 2. (a) Kaayi kanakuswejelaku ñahi kudambula? (b) Tukwakula malwihwinyi muniku kudiza?

MUHELA wakusouthern Europe wanukili yuma yamumwekeneni kunyima wahosheli nindi: “Namoni wuñanji waheña kufuma hohu kuwansi. Dichi nakaanini jipolitiki jadiña mwituña detu nawa natachikili kuhoshelaku yitoñojoka yamweneña antu nawu yayiwahi. Hadi yaaka yayivulu nadiña kajila kamukwakuzuñañesha nfulumendi.” Manakwetu wamusouthern Africa niyena walekeli kudiñija munsañu yamadombu. “Wahosheli nindi: “Namweneña nami muchidi wami wadiña walema kubadika nyichidi yikwawu nawa nadiñijili mumapolitikisi.” “Atulejeli kujaha akwetu amumapati acheñi namayoña kushilahu niantu amuchidi wetu akwashileñaku mapati acheñi.” Muhela washakamaña mucentral Europe wahosheli nindi: “Nadiña nachaambu nawa naheleli antu ejima akumatuña acheñi hela ayileña munsakililu yacheñi.”

² Yilwilu yinakumwekana mukaayi kamakonu diyilwilu yadiña nanawa antu asatu. Mazanvu awantu amadombu akeñeleña kudimena aswejeli, kudambula kwamapolitiki nawa mumatuña  amakwawu, antu afumineña kwacheñi atiyileña kutama. Neyi chashimwineñahu dehi Bayibolu, antu ejima ‘anakukeña wanyi kutiyañana nawakwawu’ munanu mafuku akukuminina. (2 Tim. 3:1, 3) Chineli chaambu chinakuswejelaku mukaayi, akwaKristu anateli kuhemba ñahi kunuñañana kwawu? Tukudiza yuma yayivulu neyi tushinshika cheliliyi Yesu hayuma yayimwekeneni akwaKristu akusambila chelili mwiluña mwashakamineñawu muluwankani nansañu jamapolitikisi. Tushinshikenu yikuma yasatu: Yesu wakaaninidi kudiñija mumazanvu akeñeleña kudimena? Wamwekesheli ñahi antu jaNzambi chatela kubulilawu kudiñija munsañu jamapolitikisi? Nawa Yesu watudizishili ñahi nindi madombu amawahi wanyi?

3, 4. (a) Yumanyi yakuhweleleliwu aYudeya amumafuku aYesu? (b) Yitoñojoka yeniyi yaluwañesheli ñahi atumbanji twaYesu?

³ A Yudeya amavulu atañishileñayi Yesu akeñeleña kudimena kufuma muchiyuulu chawaRoma. A Yudeya ahakwilileñaku chiyuulu chimu, aletesheli antu kutachika kukeña kudimena. Antu akeñeleña kudimena atachikili kulondela yitoñojoka yaYudasi wakuÑaliliya. Wadiña mesiya wakutwamba waluwañesheli antu amavulu mumafuku awapostolu. Mukwakushimuna nsañu yakunyaka hadi aYudeya Josephus wahosheli nindi, iwu Yudasi “walejeleña antu amwituña dindi kudikaaña nikuyileja nawu chimwayinkaña aRoma nyisonku mwayitiyaña woma.” A Roma amujahili Yudasi. (Yilw. 5:37) Antu amakwawu akeñeleña kudimena alekeli madombu.

⁴ Kwambukaku nawaYudeya akeñeleña kudimena, aYudeya abulili kukeña kudimena adiña nakuhembelela kwinza kwaMesiya nawu wakahimpa chiyuulu. Dichi akuhweleleli nawu neyi Mesiya yenza, wukaletesha ituña akadilemeshi nikwikala asubuka kumpaanda yawaRoma. (Luka 2:38; 3:15) Amavulu akuhweleleli nawu Mesiya wukelisha wanta hamaseki muIsarela. A Yudeya amavulu apalañeneni mumatuña acheñi ateleleli kufunta mwituña dawu neyi chumichi chimwekana. Anukenu Yowanu Mupapatishi chamwihwiliyi Yesu nindi: “Komana Yeyi itwatalilaña nawu wunakwinza tahindi kudi wacheñi?” (Mat. 11:2, 3) Yowanu watela wakeñeleña kwiluka neyi chakwila kudi muntu wacheñi wukashikija yuma yatalilileñawu aYudeya. Atumbanji ayedi amuhumañeni Yesu asañwiliwu hampinji yayileñawu munjila yaya kuEmawusi niwena adiña nakutalila nawu Mesiya watela kuwahisha yuma. (Tañenu Luka 24:21.) Haleheli wanyi, apostolu aYesu amwihwili nawu: “Mwanta, wunakufuntisha wanta kudi aIsarela hayoyinu mpinji tahindi?”—Yilw. 1:6.

5. (a) Muloñadi antu amuÑaliliya chakeñeleleñawu nawu Yesu yekali mwanta wawu? (b) Yesu wolweli ñahi yitoñojoka yawu?

⁵ Chakadi nikujina, yuma yakuhweleleliwu hadi Mesiya yaletesheli antu amuÑaliliya akeñi nawuYesu yekali mwanta wawu. Atoñojokeleña nawu Yesu watela kwikala nlomboli wamuwahi, muloña wadiña ntañishi wamuwahi, wookileña antu akata nawa wadishiileña antu adiña nanzala. Yesu chelili yadiishi antu akushika ku 5,000, washikeneni kwiluka yitoñojoka yadiña mudi antu. “Yesu chelukiliyi nindi akeñeleña kwinza nakumukwata kulonda amwilishi kwikala mwanta, wafuminiku kwenoku nakuya cheñi kumpidi kwakankawindi.” (Yow. 6:10-15) Ifuku dalondelelihu kwishinadi daKaluñalwiji kaÑaliliya, iyena dadiña nawantu amakwawu dakeheli. Dichi Yesu wayilumbulwilili antu mudimu windi. Wenjili nakuleta maheta akuspiritu bayi maheta akumujimba kunyuzaku. Wayilejeli nindi: “Bayi muzatila yakuda yakisikañaku, ilaña zatilenu yakuda yashakamaña haya nyaaka.”—Yow. 6:25-27.

6. Yesu wamwekesheli ñahi nindi henjili nakukeña kwikala mwanta hamasekiku? (Talenu mwevulu wakutachikilahu.)

 ⁶ Kwakwihi nakufwa kwindi, Yesu welukili nindi antu amakwawu amulondeleleña akuhweleleli nawu wukwilisha wanta hamaseki muYerusalema. Wayolweli kuhitila mukuyileja chishimu chamamina. Ichi chishimu chamwekeshaña nawu Yesu “muntu wumu wamuchisaka chawanta” wateleleli kuya kwiluña dacheñi hadi mpinji yayilehi. (Luka 19:11-13, 15) Yesu wayilejeli akulumpi jawaRoma nindi yena hadiñijili munsañu jamapolitikisiku. Pontusi Pilatu wamwihwili Yesu nindi: “Yeyi Mwanta wawaYudeya tahindi?” (Yow. 18:33) Hadaha nguvulu watiyili woma nindi Yesu wukuleta wufwinda mumapolitikisi, chuma chabulileñayi kukeña Pilatu muchiyuulu chindi. Yesu wamwakwili nindi: “Wanta wami hiwudi wamukanu kaayiku.” (Yow. 18:36) Hateleleli kudiñija mumapolitikisiku muloña Wanta windi wadiña wamwiwulu. Wamulejeli Pilatu nindi mudimu windi hamaseki wadiña “[wakushimuna] wunsahu wachalala.”—Tañenu Yowanu 18:37.

7. Muloñadi chichinateli kwikala chakala kubula kuhakwilaku mazanvu ajipolitikisi akeñaña kudimena?

⁷ Neyi twiluka mudimu wetu neyi chelukiliyi Yesu mudimu windi, tukuleka kwiteja, kuhosha hela kwila yuma yinakumwekesha nawu tunakuhakwilaku mazanvu amapolitikisi akeñaña kudimena. Chumichi chapela wanyi. Nkoñi wumu wañinza wahosheli nindi: “Antu mwiluña detu anakukeña kuhimpa yuma chikupu. Yilwilu yakukeña kudimena yinaswejeliku nawa antu amavulu anakutoñojoka nawu mazanvu adimena ajipolitiki anateli kuyiwahishila yuma. Twatiyaña kuwaha hakumona amanakwetu chiyanakutwalekahu kuhemba kunuñañana kwawu kwawakwaKristu kuhitila mukusha maana hakushimwina nsañu yayiwahi yaWanta. Amutalilaña Nzambi kulonda yakafumishihu wuñanji waheña nikukala kukwawu kutwamonaña.”

8. Shimunenu chakutalilahu chinakumwekesha kukala kwamweneñawu aYudeya amumafuku awapostolu.

⁸ Wuñanji waheña kakavulu waleteshaña antu kudiñija munsañu jamapolitikisi. Mumpinji yaYesu nsañu yamapolitikisi yahosheleñawu antu nankashi hinyisonku. Mukwakudikaña Yudasi wakuÑaliliya itwatena hakusambila, amwinkeli muloña wakubula kulondela nshimbi yakwila nawu antu ahaneña nyisonku kudi aRoma. Antu ashakamineña muRoma, kushilahu niantu amutiyilileña Yesu, ayifwetesheleña nyisonku yayivulu yidi neyi yuma, mpata nimatala. Akwakusonkesha nyisonku aswejeli majika kanwa. Akandamishili wuseya chakwila antu akañenyeña kufweta. Akwakusonkesha  nyisonku ahanineña majika kanwa kudi akulumpi janfulumendi kulonda asonkesheña nyisonku yayivulu. Zakewu, mukulumpi wawansonkeshi muYeriku, waheteli muloña wakudiila antu mali. (Luka 19:2, 8) Akwawu akwakusonkesha nyisonku amavulu atachikili kumwimbujola.

9, 10. (a) Ayilumbu jaYesu akeñeleña ñahi kumuletesha yadiñiji munsañu yamapolitikisi? (b) Yumanyi yitwatela kudizila kuchayakwiliyi Yesu? (Talenu mwevulu wakutachikilahu.)

⁹ Ayilumbu jaYesu amwihwili Yesu mukubabala kulonda yatachiki kuhosha hansañu yanyisonku. Amwihwili hamusonku wadenari yimu, walejeliwu antu ejima amuRoma kuhana. (Tañenu Matewu 22:16-18.) A Yudeya atiyileña kutama naniwu musonku. Wayiletesheleña ayovwahileña aRoma. “Akwakumulondela Herodi” aleteli iyi nsañu ahosheleña nawu neyi Yesu yakaanishi iwi musonku, akumwinka muloña wakudikaaña nanfulumendi. Nawa neyi Yesu yahosha nindi chatama kuhana musonku, akwakumulondela akuleka kumulondela.

¹⁰ Yesu wadiña wasoñama hakwila yabuli kudiñija munsañu yanyisonku. Wayilejeli nindi: “Yuma yaKesari, mwinkenu Kesari nawa yuma yaNzambi, mwinkenu Nzambi.” (Mat. 22:21) Yesu welukili nindi akwakusonkesha nyisonku elileña majika kanwa. Ilaña Yesu wakeñeleña wanyi kudiñija muniyi nsañu, yadi kumuletesha yabuli kusha maana hachuma chalema. Wanta waNzambi, diwatela kumanisha iku kukala. Wamwekesheli chuma chatela kwila antu amulondeleleña. Ateleli kutondolwela kudiñija munsañu jamapolitikisi, hela chakwila yuma yinakumwekana neyi yaloña hela yalala. AkwaKristu akeñaña Wanta waNzambi nikuloña kwindi. Elaña mwenimu chakadi kuhosha chatama hawuñanji waheña wudi wejima wunakumwekana.—Mat. 6:33.

11. Tunateli kwolola ñahi yitoñojoka yetu yakukeña wuñanji?

¹¹ A Yinsahu jaYehova amavulu aleka chikupu kuhosha hansañu jamapolitikisi. Muhela wamuGreat Britain wahosheli nindi: “Hanyima yakuya kuyunivesiti nakudiza janshakaminu yawantu, natachikili kutoñojoka nami natela kuhimpa yuma. Nakeñeleña kuhakwilaku wuswa wawantu eyila chineli atukabishileña nankashi. Hela chakwila nadiña nababala mukuhosha, ilaña nahilileña hanyima yakuditadeka. Nelukili wanyi nami antu atela kufumisha chaambu chekowa munyichima yawu. Hela chochu, chinatachikili kudiza Bayibolu nelukili nami natela kutachikilahu kufumisha chaambu mumuchima wami. Nawa muhela chindeli diyi wankwashili kuhimpa. Ichi nidi payiniya wampinji yejima muchipompelu chawatumama nawa inakudiza chakushimwina kudi antu ejima.”

12. Yesu wayilejeli atumbanji twindi kutondolwela “Iluñi” damuchidinyi?

¹² Mumafuku aYesu, nsakililu yadiña nakudibomba mujipolitikisi. Mukanda waDaily Life in Palestine at the Time of Christ washimuna nawu “Nsakililu hinsakili mwayileñawu aYudeya yadiña namazanvu ashiyashana ajipolitikisi iyadiña nakuhakwilaku.” Dichi Yesu wayisoñamishili atumbanji twindi nindi: “Tonenuña nawa babalenu neluñi dawaFwarisi niiluñi daHerodi.” (Maku 8:15) Chamuteneniyi Herodi watela wateneneña antu amulondeleleña Herodi. Chakadi nikujina, Afwarisi niwena akeñeleña nawu aYudeya adimeni. Mukanda waMatewu wamwekeshaña nawu Yesu niyena wateneni aSadusi. A Sadusi akeñeleña nawu kubuli kwikala kuhimpika. Antu jawu amavulu atiyileña kuwaha kuyiyuula kudi aRoma. Yesu wayisoñamishili atumbanji twindi kubula kusha maana kuntañishilu hela kwiluñi danawa mazanvu asatu. (Mat. 16:6, 12) Yesu watachikili kuyileja iyi nsañu kufuma hakeñeleñawu antu kumwilisha mwanta.

13, 14. (a) Nsañu yamapolitikisi ninsakililu yaletesheli ñahi madombu niwuñanji waheña? (b) Muloñadi wuñanji waheña chiwabulilaña kumanisha madombu? (Talenu mwevulu wakutachikilahu.)

 ¹³ Neyi nsakililu yidibomba mujipolitikisi, ndombu yashimbulaña wanyi nakuvulumuka. Yesu walejeli atumbanji twindi nindi hiyatela kudiñija munsañu jamapolitikisiku. Dichuma chaletesheli mukulumpi wawatupristu niAfwarisi kumukasila Yesu mpuña yakumujiha. Amweneña nawu wukuyitambula yifulu yawu mumapolitikisi nimunsakililu. Ahosheli nawu: “Neyi tukumuleka yeleña chochichi, antu ejima akumukuhwelela, nawa aRoma akwinza nakututambula iluña detu nimuza wetu.” (Yow. 11:48) Dichi, Kayafwasi Kapristu Muneni diyi waletesheli antu amujahi Yesu.—Yow. 11:49-53; 18:14.

¹⁴ Kayafwasi watumini mashidika kuya nakumukwata Yesu mukachi kawufuku. Yesu welukili aka kafuta kakasiliwu, dichi hampinji yadiileñawu kuda kwakukumishaku nawapostolu indi wayilejeli kusenda jimpoku jakabali. Mpoku jiyedi jashikilili muloña wakeñeleña kuyidizisha nachu chikuma chalema. (Luka 22:36-38) Kuhiñahu, hawowuna wufuku Petulu wazatishili mpoku yakabali kutapa nachu wumu hakachi kanana antu enjili nakumukwata Yesu. Chakadi nikujina, watiyili kutama hawuñanji waheña wamumwekesheleliwu Yesu mukachi kawufuku. (Yow. 18:10) Ilaña Yesu wamulejeli Petulu nindi: “Funtishaku mpoku yeyi yakabali muchindalu chayu, muloña antu ejima azatishaña mpoku yakabali akafwa kumpoku yakabali.” (Mat. 26:52, 53) Ichi chikuma chalema chesekeni nakulomba kwalombeliyi Yesu hawowuna wufuku nindi hiyatela kwikala amukanu kaayiku. (Tañenu Yowanu 17:16.) Nzambi hohu diyi wateleli kumanisha wuñanji waheña.

15, 16. (a) Izu daNzambi dinayikwashi ñahi akwaKristu kutondolwela kubula kutiyañana? (b) Chaambwinyi chamonañayi Yehova neyi yashinshika kaayi kamakonu?

¹⁵ Muhela wakusouthern Europe itwatena hatachi niyena wadizili ichi chikuma chalema. Wahosheli nindi: “Ichi neluki nami ndombu yamanishaña wuñanji waheña wanyi. Antu amavulu adiña nakuleta madombu afwili. Nawa amavulu hiyakweti muzañaluku. Natiyili kuwaha chinadizili muBayibolu nami Nzambi hohu diyi wunateli kuleta wuñanji waloña hamaseki. Diyi nsañu yinnashimwini hadi yaaka 25.” Manakwetu musouthern Africa wahimpa iyoña dindi “[nampoku] yakabali yaspiritu,” Izu daNzambi, hampinji yashimwinañayi nsañu yakuwunda kudi antuñi nindi hichikweti muloña nedimi dahoshañawuku. (Efwe. 6:17) Hanyima yakwikala Chinsahu chaYehova, muhela wamucentral Europe wasumbukili namanakwetu wakumuchidi waheleliyi hakusambila. Wejima wawu asatu ahimpili muloña akeñeli kwikala neyi chekalayi Kristu.

¹⁶ Elili chiwahi kuhimpa. Bayibolu yesekeja yilwilu yawantu nakaluñalwiji kabwankañilaña nikuvundujola, kaluñalwiji kabulaña kuwunda. (Isa. 17:12; 57:20, 21; Chim. 13:1) Nsañu yamapolitikisi yinakuhilisha antu, kuyambula nikuleta madombu abula kutelela, ilaña etu twahembaña kuwunda nikunuñañana kwetu. Nawa Yehova chashinshikayi kaayi kabula kukwatankana, watela kutiya kuwaha hakumona kunuñaña kudi hakachi kawantu jindi.—Tañenu Zefwaniya 3:17.

17. (a) Njilanyi jisatu mutunateli kuletela kunuñañana? (b) Tukahanjekadi muchibaaba chinalondelihu?

¹⁷ Tunadizi netu twatela kuleta kunuñañana hakachi kawakwaKristu munjila jisatu: (1) Tunakuhweleli netu Wanta waNzambi wamwiwulu diwunateli kumanisha wuñanji waheña, (2) twadiñijaña wanyi munsañu jamapolitikisi, ni (3) twakaana madombu. Hela chochu, mpinji yikwawu kunuñañana kwetu kunateli kuluwankana muloña wachaambu. Chibaaba chinalondelihu chikahosha hachitunateli kumanisha ichi chaambu, neyi cheliliwu akwaKristu amumafuku awapostolu.