1. Kwesekeja na Akolosi 2:4, 8, Satana waluwañeshaña ñahi yitoñojoka yetu kulonda yikali muwunkoli?

SATANA nakukeña kutufumisha kudi Yehova. Hakwila yeli mwenimu, watachikaña kuluwañesha yitoñojoka yetu, kulonda yikali muwunkoli nawa nindi tutoñojokeña neyi chatoñojokañayi. Wesekaña kutukanjikija hela kutudimba kuzatisha yuma yitwafwilaña kulonda tumulondeleña.—Tañenu Akolosi 2:4, 8.

2-3. (a) Muloñadi chitwatela kushila kashinshi kukusoñamisha kwekala haAkolosi 2:8? (b) Tukuhanjekadi muchinu chibaaba?

² Komana tudi muwubanji wakutuluwañesha kudi Satana? Eña! Mwatela kwanuka nenu kusoñamisha kwekala haAkolosi 2:8, bayi neyi Pawulu wayisonekeleleli antu abula kwitiyaku. Ilaña wasonekeleleli akaKristu awayishiliwu naspiritu yajila. (Kol. 1:2, 5) Kunyima awa akaKristu adiña muwubanji, ninetu tudi muwubanji weneni. (1 Kor. 10:12) Muloñadi? Satana amunatila hamaseki nawa nakuzata nañovu kulonda yaluwañeshi ambuña aNzambi ashinshika. (Chim. 12:9, 12, 17) Kubombelahu, tunakushakama mumpinji yineli antu atama niakwakuluwañesha anakuya “nakutaminaku.”—2 Tim. 3:1, 13.

³ Muchinu Chibaaba, tukuhanjeka chazatishañayi Satana “ntañishilu yamukunkulwayi” kulonda yaluwañeshi yitoñojoka yetu. Tukwiluka “tufuta” twindi tusatu. (Efwes. 6:11) Kuhiñahu, muchibaaba chinalondelihu, tukashinshika chitunateli  kufumisha yuma yatama yaletaña twenitu tufuta muyitoñojoka yetu. Chatachi, tuhanjekenu hachaluwañesheliyi Satana aIsarela hanyima yakwiñila Mwituña daChikaninu niyuma yitunateli kudizilaku.

4-6. Kwesekeja na Kuhituluka 11:10-15, njilanyi yayiha yakudiminamu yateleleli kudizawu aIsarela chashikiliwu Mwituña daChikaninu?

⁴ Satana wayiletesheli aIsarela kutachika kupesha. Welili ñahi mwenimu? Welukili nindi akeñeleña yakuda, dichi wazatishili yumiyi kulonda eleña yuma yakeñeleñayi. Cheñililiwu aIsarela Mwituña daChikaninu, ateleleli kuhimpa njila yakudiminamu yakuda yawu. Hampinji yadiñawu muEjipitu, adiña nakutukumwina namenji afumineña muNile. Hela chochu, Mwituña daChikaninu wundimi wawu hiwashindameneni hamenji akutaha mukaloña weneniku, ilaña washindameneni hanvula kushilahu niwuumi. (Tañenu Kuhituluka 11:10-15; Isa. 18:4, 5) Dichi, aIsarela ateleli kudiza njila yayiha yakudiminamu. Chumichi hichadiña chapelaku muloña antu amavulu adiña akulukila munsañu yakudima afwilili muchinkalampata.

⁵ Yehova wayilumbulwilili antu jindi nindi yuma yinahimpiki. Cheñi wabombelelihu kusoñamisha kukubula kumwekana neyi kwakundamini wanyi kuwundimi nindi: “Babalenu kuchina nyichima yenu kuyidimba, himukusenuka hambadi nakupesha akishi, himukudifukula kudi wena.” (Kuhit. 11:16, 17) Muloñadi Yehova chasoñamishililiyi antu kubula kudifukula kudi anzambi akutwamba iku wahosheleña cheñi hakudiza njila yayiha yawundimi?

 ⁶ Yehova welukili nindi aIsarela akwikala mukweseka kwakudiza wundimi wazatishileña nyuza yayinyeñumukili yadifukwileña kudi anzambi akutwamba. Hela chochu, antu adikumashanini nawu adiña akulukila mukudima kubadika aIsarela. Antu jaNzambi ateleleli kudizila kudi wena chakuzata, ilaña adi kuyiluwañesha. Andimi amuKenani adifukwileña kudi Bayali nawa aluwankeni naniku kudifukula. Amumweneña Bayali neyi diyi mwini iwulu nawa diyi wanokesheleña nvula. Yehova hakeñeleña antu jindi kuyiluwañesha naniku kwitiyaku. Hela chochu, aIsarela atondeli kutwalekahu kudifukula kudi Bayali. (Kuch. 25:3, 5; Ansomp. 2:13; 1 Anya. 18:18) Ichi dinu tutalenu Satana chayishiliyi aIsarela muwunkoli.

7. Chikuhwelelu chawaIsarela achesekeli ñahi heñililiwu Mwituña daChikaninu?

⁷ Kafuta katachi kazatishiliyi Satana hiyuma yafwilileñawu antu kulonda nvula yovwahishi iseki. Mwituña daChikaninu mwadiña nvula wanyi kufuma tuhu muApril kushika muSeptember chaaka nichaaka. Hakwila nawu aIsarela ekali nayakuda yayivulu, ashindameneni hanvula yatachikileña muOctober. Satana wayidimbili aIsarela kulonda akuhweleli nawu hakwila ekali nayakuda yayivulu, ateleleli kulondela tushidikilu twawantu ayinyeñumukili abulileña kudifukula kudi Nzambi. Awa antu ayinyeñumukili akuhweleleli nawu anzambi jawu anateli kunokesha nvula chiña neyi adifukula kudi wena hela kulondela tushidikilu twawu. Dichi ana abulili chikuhwelelu mudi Yehova akuhweleleli nawu iyi diyi njila hohu yateleleli kuletesha kubuli chaaña, dichi akoñeli yuma yakundama kukwitiya kwakutwamba nikulemesha Bayali nzambi wakutwamba.

8. Kafutanyi kamuchiyedi kazatishiliyi Satana? Lumbululenu.

⁸ Satana wazatishili kafuta kamuchiyedi hadi aIsarela. Wayisañumwini nampwila yawuvumbi. Nyunza yawasenji yadifukwileña kudi anzambi jawu kuhitila mukwila yishimashima. Muniku kudifukula mwadibombeleli ambanda niamayala ayivumbi. Wutumwa niyilwilu yikwawu yawuvumbi ayimweneña nawu yetejewa. (Kuhit. 23:17, 18; 1 Anya. 14:24) Iyi nyunza yakuhweleli nawu iku kwitiya kwaletesheleña anzambi jawu kuleñela iseki kwikala nawushi. AIsarela amavulu ayikwokweli natushidikilu twawuvumbi twakoñeleña antu abulileña kudifukula kudi Yehova nawa atachikili kudifukula kudi anzambi akutwamba. Chakadi nikujina, Satana wayitwalili muwunkoli.

9. Kwesekeja na Hoseya 2:16, 17, Satana wayileñeleli ñahi aIsarela kuvulamena chekalayi Yehova?

⁹ Satana wazatishili kafuta kamuchisatu. Waluwañeshaña yitoñojoka yawantu kutalisha hadi Yehova. Mumpinji yakaprofwetu Yeremiya, Yehova washimwini nindi atuprofwetu akutwamba elishili antu jaNzambi kuvulamena ijina Dindi ‘muloña waBayali.’ (Yere. 23:27) Chinamwekani neyi antu jaNzambi alekeli kuzatisha ijina daYehova nakuhiñishamu ijina daBayali, chayamukwila nawu ‘Yomweni’ hela “Bayali.” Chumichi chayikalilili aIsarela kwiluka chaambu hakachi kaYehova naBayali.—Tañenu Hoseya 2:16, 17.

10. Tufutanyi twazatishañayi Satana makonu?

¹⁰ Satana wazatishaña tufuta totumu makonu. Walawulaña antu nayuma yafwilañawu,  kutandisha wuvumbi nikuputisha antu hamesu kulonda abuli kumwiluka Yehova. Tuhanjekenu ntahi kafuta kakukumishaku kazatishañayi.

11. Satana nabuti ñahi antu kulonda abuli kumwiluka Yehova?

¹¹ Satana waputishaña antu mesu kulonda abuli kumwiluka Yehova. Hanyima yakwila apostolu aYesu anafwi dehi, antu aditeneneña nawu akakristu atachikili kutandisha ntañishilu yakutwamba. (Yil. 20:29, 30; 2 Tesa. 2:3) Awa akwakusekesha atachikili kuyisweka antu kulonda abuli kwiluka Nzambi walala. Chakutalilahu, alekeli kuzatisha ijina daNzambi mumaBayibolu awu nakutachika kuzatisha mazu adi neyi “Mwanta.” Chafumishiliwu ijina daNzambi dadeni nakuhiñishamu izu dakwila nawu “Mwanta,” chaletesheli chikali chakala kudi antañi aBayibolu kwiluka chaambu chidi hadi Yehova nihadi “anyanta” amakwawu atenawu muNsona. (1 Kor. 8:5) Azatishili izu dodimu dakwila nawu “Mwanta” hadi Yehova niYesu, chumichi chayikalilileña antu kwiluka nawu Yehova niMwanindi ambuka. (Yow. 17:3) Iku kuluwankana kwaletesheli aleti ntañishilu yakwila nawu Nzambi wekala musatu, ntañishilu yabula kwikala Mwizu daNzambi. Muloña wachumichi, antu akuhwelela nawu atela kumwiluka Nzambi wanyi. Awa himakudi.—Yil. 17:27.

12. Yumanyi yatandishaña ntañishilu yakutwamba, nawa yumanyi yinafumimu, kwesekeja nachinalumbululiwu haAroma 1:28-31?

¹² Satana wakokolaña antu nayilwilu yawuvumbi. Mumafuku awaIsarela, Satana wazatishileña ntañishilu yakutwamba kulonda yatandishi wuvumbi. Nimakonu dichelañayi. Ntañishilu yakutwamba yeteja yilwilu yatama nikutandisha yilwilu yawuvumbi. Chinafumimu, antu aditenaña nawu amukalakelaña Nzambi aleka kwovwahila nshimbi jindi jahosha hawuvumbi. Kapostolu Pawulu washimwini mumukanda wayisonekeleliyi Aroma yuma yafuminimu. (Tañenu Aroma 1:28-31.) Dichi, hakachi “kayuma yabula kutelela” hinyichidi yejima yawuvumbi, kushilahu niwutumwa. (Rom. 1:24-27, 32; Chim. 2:20) Dichi, chalema kwovwahila ntañishilu yekala muBayibolu.

13. Kafutanyi kakwawu kazatishañayi Satana?

 ¹³ Satana wakokolaña nakufwila kutwekala naku. Twafwilaña kudiza mudimu wunateli kutukwasha nikukwasha chisaka chetu. (1 Tim. 5:8) Kakavulu, tunateli kudiza iyi nyidimu neyi tuya kushikola nikudikita chikupu. Ilaña twatela kwikala asoñama. Mumatuña amavulu, kumashikola hiyadizishaña atudizi chakuzata mudimu hohuku, ilaña adizaña nimaana awantu. Akashikola ayikoleshaña kujinoka neyi Nzambi wekala kwoku nikubula kulemesha Bayibolu. Alejaña akashikola nawu antu akweti maana atela kukuhwelela nawu yuma yadileñeli yayeni. (Rom. 1:21-23) Ntañishilu yamuchidiwu ayidiwula kudi “maana aNzambi.”—1 Kor. 1:19-21; 3:18-20.

14. Maana awantu atandishaña yumanyi?

¹⁴ Maana awantu adiwulaña nikutadikisha nshimbi jaYehova jaloña. Hiyatiyakeshaña nyikabu yaNzambi yaspirituku, ilaña yatiyakeshaña “nyidimu yamujimba wanshidi.” (Ñal. 5:19-23) Awa maana aleñelaña antu kutachika kudisama nikudivwimba nawa chuma chafumañamu antu ekalaña “akwakudikeña awenawu.” (2 Tim. 3:2-4) Iyi yilwilu yambuka chikupu nayilwilu yakudizoza yakeñañayi Nzambi nindi ambuña indi ekali nayu. (2 Sam. 22:28) Akakristu amakwawu ayahu dehi kuyunivesiti ayiwumbili yitoñojoka yawu namaana awantu chatela ayiwumbi nayitoñojoka yaNzambi. Tushinshikenu chakutalilahu chimu hayuma yinateli kumwekana.

15-16. Yumanyi yimunadizili kuyuma yahitilimu iwu muhela?

¹⁵ Muhela wunazati mudimu wampinji yejima kubadika yaaka 15 wahosheli nindi:  “Hamu neyi Chinsahu wapapatishewa, natañileña nikutiya hawubanji wekala mukuya kuyunivesiti, ilaña nadiwileña iku kufumba. Natoñojokeli nami iku kufumba kwankundamini wanyi.” Kukalanyi kwafuminimu? Wahosheli nindi: “Shikola yadiña nankumanishila mpinji niñovu chakwila nakañenyeña kulomba kudi Yehova neyi chinelileña hakusambila, kuhanjeka nawakwetu muloña wakuzeya nikukañanya kuloñesha kupompa. Kukooleka, chinelukili nami kutaña shikola yahewulu kwaluwañesheleña wubwambu wami naYehova, nafukwilihu kuleka. Nawa nalekeli.”

¹⁶ Shikola yaluwañesheli ñahi yitoñojoka yaniwu muhela? Wahosheli nindi: “Natiyaña kutama kuhosha nami shikola yahewulu yinatañileña yanleñeleli kwikala wakalisha nawantu, sweje-e kudi amanakwetu niahela, nakeñeleña nami eleña yuma yabulileña kutwesha kwilawu nawa nadambwileña nawu. Hahitili mpinji hakwila nileki kutoñojoka muniyi njila. Yuma yinahitilimu yandizishili wubanji wekala mukudiwula yuma yatusoñamishañayi Tata yetu wamwiwulu kuzatisha kuloñesha kwindi. Yehova wañilukili chiwahi kubadika chinadilukili ami aweni. Chiña namutiyilili!”

17. (a) Yumanyi yitunateli kubula kwiteja? (b) Chumanyi chitukahanjeka muchibaaba chinalondelihu?

¹⁷ Bayi mwiteja kuyitwala muwunkoli “kwesekeja namaana awantu, nintañishilu yamukunkulwayi yamwaya tushidikilu twawantu” adi mwituña daSatanaku. Twalekenuhu kudihemba kutufuta twaSatana. (1 Kor. 3:18; 2 Kor. 2:11) Bayi mwiteja Satana yayikañeshi kumwiluka Yehova nikudifukula kudi yena kwesekeja nachakeñañayiku. Ovwahilenuña nshimbi jaYehova jabadika kuwaha. Bayi mwiteja Satana kuyidimba kulonda mudiwuleña kufumba kwaYehovaku. Munateli kwila ñahi neyi mwiluka nenu yitoñojoka yamukaayi yayiluwañesha dehi? Chibaaba chinalondelihu chikashimuna Izu daNzambi chidinateli kutukwasha kubalumuna yitoñojoka niyilwilu “yashimata chikupu.”—2 Kor. 10:4, 5.