1. Kapostolu Pawulu wayisoñamishili nindidi akaKristu awayishewa?

KAPOSTOLU PAWULU wasoñamishili nindi “lekenu.” Kulekadi? “[Kuleka] kwiteja yuma yamunshakaminu yamakonu yiyibalumuni.” (Rom. 12:2) Pawulu walejeleña akaKristu akusambila awa mazu. Muloñadi chayisoñamishiliyi chakubula kuyihita mumbadi awa amayala niambanda adihanini kudi Nzambi nawa awayishiliwu naspiritu yajila?—Rom. 1:7.

2-3. Satana wesekaña ñahi kutufumisha kudi Yehova, hanu dinu tunateli kubwita ñahi ‘yuma yatama yashimata chikupu’ muyitoñojoka yetu?

² Pawulu wakameneni muloña akaKristu amakwawu adiña nakuyiluwañesha nayitoñojoka nimaana atama awantu atandishileña kaayi kaSatana. (Efwes. 4:17-19) Chumichi chinateli kutumwekena wejima wetu. Satana diyi wayuulaña kanu kaayi, dichi nateli kuzatisha tufuta twambokamboka kulonda yatuluwañeshi. Chakutalilahu, neyi tunakufwila kutulemesha hela kuya mpuhu, nateli kuzatisha iku kufwila kulonda yatufumishi kudi Yehova. Nateli cheñi kuzatisha yuma yatumwekeneni muchihandilu, chisemwa hela shikola kulonda yaluwañeshi yitoñojoka yetu.

³ Komana chinateli kutupelela kubwita yuma “yashimata chikupu” muyitoñojoka yetu? (2 Kor. 10:4) Eña! Talenu chakwiliyi Pawulu: “Tunakubalumuna yitoñojoka yawantu  yatama niyuma yejima yakañeshaña antu kumwiluka Nzambi, nawa tunakutwala yitoñojoka yejima yatama muwuduñu kulonda yimwovwahileña Kristu.” (2 Kor. 10:5) Yehova nateli kutukwasha kufumisha yitoñojoka yatama. Neyi chafwomonañawu wulembi wudi mumujimba kudi yitumbu, Izu daNzambi nidena dinateli kutukwasha kuleka yitoñojoka yatama yidi mukaayi kaSatana.

4. Yumanyi yitwalekeli etu amavulu chitwadizili chalala?

⁴ Toñojokenu hayuma yimwahimpili chimwadizili chalala chekala Mwizu daNzambi nichimwatondelihu kumukalakela Yehova. Hakwila tumukalakeli Yehova, etu amavulu twalekeli yuma yatama. (1 Kor. 6:9-11) Twasakililaña kudi Yehova muloña watukwashili kuleka yuma yatama!

5. Yumanyi yiyedi yashimunawu haAroma 12:2?

⁵ Hela chochu, bayi tutoñojokaña netu kwosi yuma yikwawu yitunateli kubula kuhimpaku. Hela chakwila twalekeli kukoña nshidi yitwakoñeleña henohu kanda tupapatishewi, twatela kuzata nañovu kulonda tutondolweleña yuma yinateli kutuleñela kufunta cheñi kuyuma yitwakoñeleña. Tunateli kwila ñahi mwenimu? Pawulu wahosheli nindi: “Lekenu kwiteja yuma yamunshakaminu yamakonu yiyibalumuni, ilaña balumukenu kuhitila mukuhimpa yitoñojoka yenu.” (Rom. 12:2) Dichi twatela kwilahu yuma yiyedi. Chatachi, bayi twiteja ‘kutubalumuna’ kudi kanu kaayiku. Chamuchiyedi, twatela ‘kubalumuka’ kuhitila mukuhimpa yitoñojoka yetu.

6. Chumanyi chitwadizilaña kumazu aYesu ekala haMatewu 12:43-45?

⁶ Bayi neyi Pawulu wadiña nakuhosha hakuhimpa mmwekenu yetu hohuku. Ilaña kuhimpa muyuma yejima. (Talenu chikasha chinakwila nawu “ Komana Twabalumuka Tahindi Twadifwikija Hohu?”) Twatela kuhimpa  chikupu yitoñojoka yetu, wuntu wetu wamukachi, chitwatiyaña niyuma yitwafwilaña. Dichi wejima wetu twatela kudihula netu, ‘Komana inakuhimpa kulonda nimwekaneña hohu kumesu awantu nami nidi mukaKristu tahindi inakuhimpa mumuchima kulonda nikali mukaKristu walala?’ Chalema kuhimpa. Yesu wateneni chuma chitwatela kwila haMatewu 12:43-45 (Tañenu.) Mazu adi haniyi nsona atudizishaña chikuma chalema: Twatela kufumisha yitoñojoka yatama mudi etu nakuhiñishamu yitoñojoka yaNzambi.

7. Tunateli kuhimpa ñahi wuntu wetu wamukachi?

⁷ Komana chapela kuhimpa wuntu wetu wamukachi? Izu daNzambi dakula nawu: “Mwatela kutwalekahu kubalumuka nakwikala amaha muyitoñojoka nimuyilwilu yenu, nikuvwala wuntu wawuha waleñeliwu kwesekeja nankeñelu yaNzambi mukuloña kwalala nimukashinshi.” (Efwes. 4:23, 24) Eña, chapela kuhimpa wuntu wetu wamukachi, ilaña chaswayi wanyi. Bayi neyi twatela kukumina dakukaana yitoñojoka yakufwila nikuleka kwila yuma yatamaku. Ilaña twatela kuhimpa “muyitoñojoka nimuyilwilu [yetu.]” Chumichi, munabombeli kuhimpa yitoñojoka yakufwila, yilwilu nimuloña waweni wutwelilaña yuma. Chakeñekaña kutwalekahu kuzata nañovu kulonda tuhimpeña.

8-9. Yuma yamumwekeneni iwu manakwetu yinakumwekesha ñahi chitwatela kuhimpa wuntu wetu wamukachi?

⁸ Tuhanjekenu hadi manakwetu wadiña namadombu kunyima. Chalekeliyi kusheta nimadombu, wapapatisheweli nawa watachikili kushimwina mwiluña mwadiña nakushakamayi. Ilaña hashimbwili wanyi kufuma hapapatisheweliyi, ifuku dimu namelela wadiña mukweseka kwabulili kukuhwelelayi. Iyala wumu wenjili hetala dindi iku nasheti nawa wakeñeleña nindi azuñi. Hakusambila, manakwetu watondolweleli iku kweseka. Ilaña chelili iwu iyala yatachiki kuhosha chatama hejina daYehova, manakwetu wahilili chakwila wakañenyi kudiyuula kuzuwa kwadiña kumuchima. Wedikili mwitala nawa wamweteli iwu iyala. Kukalanyi kwadiña naniwu manakwetu? Hela chakwila kudiza Bayibolu kwamukwashili kutondolwela yilwilu yamadombu, wachidiña kanda yahimpi yitoñojoka niyilwilu yindi. Munjila yikwawu, wachidiña kanda yahimpi wuntu windi wamukachi.

⁹ Hela chochu, iwu manakwetu walekeli wanyi kuzata nañovu kulonda yahimpi. (Yish. 24:16) Ilaña nawukwashu wawakulumpi, watachikili kuhimpa. Nkumininaku, washikilihu nawa wekalili mukulumpi. Dichi ifuku dimu namelela Hetala daWanta, wadiña cheñi mukweseka kunadifwani nakwamweniyi kunyima. Iyala wumu washeteli wakeñeleña kweta mukulumpi mukwawu. Iwu manakwetu welili ñahi? Mukuwunda nawa mukudizoza, wahanjekeli naniwu iyala washeteli, wamuwundishili muchima nawa wamushinjikijiliku. Muloñadi iwu manakwetu chazatililiyi munjila yambukaku? Manakwetu wahimpili chikupu yitoñojoka niyilwilu yindi. Wekalili muntu wawunda nawa wadizoza. Chumichi chamuzañalesheli Yehova.

10. Yumanyi yinabombeli mukuhimpa wuntu wetu wamukachi?

¹⁰ Kuhimpa kwamuchidiwu hikwenzaña nañoma hela muloña wakubula kuzata nañovuku. Twatela ‘kuzata nañovu chikupu’ hadi mpinji yayilehi. (2 Pet. 1:5) Iku kuhimpa hikunateli kumwekana muloña wakwila tunamuzatili Yehova hadi yaaka yayivuluku. Twatela kuzata nañovu chikupu kulonda tuhimpi wuntu wetu wamukachi. Kudi njila jajivulu jinateli  kutukwasha kuhimpa. Twayenu tuhanjeki haniji njila.

11. Kulomba kunateli kutukwasha ñahi kuhimpi yitoñojoka niyilwilu yetu?

¹¹ Kulomba dichuma chatachi chitwatela kwila. Twatela kulomba neyi cheliliyi ñimbi yamasamu nindi: “Nleñelumu muchima wutooka eyi Nzambi; mbalumwini spiritu yayiha yakashinshi mukachi kami.” (Mas. 51:10) Twatela kwiteja chikupu netu tunakukeña kuhimpa yitoñojoka niyilwilu yetu nawa twatela kumulomba Yehova kulonda yatukwashi. Tunateli kukuhwelela ñahi netu Yehova nateli kutukwasha kuhimpa? Tunateli kukundejewa nachikaninu chaYehova kutalisha hadi aIsarela achinchika nyichima adiña mumafuku aEzekeli: “Nakayinka wena muchima wumu nakasha spiritu yayiha mudenu . . . nakayinka muchima wamusunyi [wetejaña kuleja kwaNzambi].” (Ezek. 11:19) Yehova wakeñeleña kuyikwasha aIsarela kulonda ahimpi nawa nakufwila kutukwasha ninetu kulonda tuhimpi.

12-13. (a) Kwesekeja na Masamu 119:59, yumanyi yitwatela kutoñojokañahu chikupu? (b) Malwihwinyi imwatela kudihula?

¹² Kutoñojokahu chikupu hinjila yamuchiyedi yalema. Mpinji yitunakutaña Izu daNzambi nakanañachima ifuku nifuku, twatela kwikala nampiji yakutoñojakahu chikupu kulonda tumoni yuma yitwatela kuhimpa. (Tañenu Masamu 119:59; Heb. 4:12; Yak. 1:25) Twatela kwiluka yilwilu hela yitoñojoka yenzaña muloña wamaana amukaayi. Twatela kwiteja netu kudi mutwazeyela nawa twatela kuzata nañovu kulonda tuzatili hakuzeyazeya kwetu.

¹³ Chakutalilahu, dihulenu nenu: ‘Komana mumuchima wami mudi lwisu hela ichima?’ (1 Pet. 2:1) ‘Komana naditiyaña muloña weluña kunafuma, shikola yinataña hela mali inikweti?’ (Yish. 16:5) ‘Komana nadiwulaña antu amakwawu abula yuma yinikweti hela muloña wakwambuka kwekowa?’ (Yak. 2:2-4) Komana nakeña yuma yekala mukaayi kaSatana? (1 Yow. 2:15-17) ‘Komana nadiluñishaña yilwilu yatama niyisela yamadombu?’ (Mas. 97:10; 101:3; Amosa 5:15) Neyi mwakula awa malwihu, mukwiluka himwatela kuzatila. Neyi tuhimpa yuma “yashimata chikupu” mumuchima wetu, tukumuzañalesha Tata yetu wekala mwiwulu.—Mas. 19:14.

14. Muloñadi chichalemena kutonda amabwambu amawahi?

¹⁴ Kutonda amabwambu amawahi hinjila yamuchisatu yalema. Hela chakwila tuneluki hela nehi, anateli kutuluwañesha kudi antu itwadikundaña nawu. (Yish. 13:20) Kumudimu hela kushikola, twadikundaña nawantu anateli kubula kutukwasha kwikala nayitoñojoka yaNzambi. Hela chochu, tunateli kwikala nawamabwambu amawahi hakupompa kwetu kwawakaKristu. Kukupompa dikutunateli kwikala namuzañalu hela kutusañumuna “kukeña nikukoña nyidimu yayiwahi.”—Heb. 10:24, 25.

15-16. Satana wesekaña ñahi kuhimpa yitoñojoka yetu?

¹⁵ Mwatela kwanuka nenu Satana nakufwila kuhimpa yitoñojoka yetu. Wazatishaña yitoñojoka yambokamboka kulonda yaluwañeshi chalala chaMwizu daNzambi.

¹⁶ Satana natwalekihu kwihula lwihu lwolumu lwamwihwiliyi Eva mwitempa daEdeni nindi: “Chalala Nzambi nahoshi nindi . . . ?” (Kutach. 3:1) Mukaayi kanakuyuulawu kudi Satana, twatiyaña malwihu anateli kutuleñela kujinoka yuma yitwakuhwelela, adi neyi: ‘Komana chalala Nzambi wakaanisha wutumwa?’  Chalala Nzambi wakaanisha kwanakana Kirisimasi nimafuku akuvwalika? Komana chalala Nzambi yenu wakeñaña nindi mukaaneña kuyisha mashi mumujimba? Komana chalala Nzambi wukweti kukeña wakeñaña nindi mutondolweleña kudikunda nawantaña jenu ahañawu muchipompelu?’

17. Yumanyi yitwatela kwila neyi muntu nakutwihula malwihu anateli kutuleñela kujinoka yuma yitwakuhwelela, nawa yumanyi yinateli kufumamu kwesekeja na Akolosi 2:6, 7?

¹⁷ Twatela kwiluka chikupu yuma yitwakuhwelela. Neyi tubula kuwana ñakwilu yanawa malwihu alema kutalisha hayuma yitwakuhwelela, tunateli kutachika kujinoka neyi yuma yitwakuhwelela yalala hela nehi. Iku kujinoka kunateli kuluwañesha yitoñojoka nichikuhwelelu chetu. Hanu dinu, chumanyi chitwatela kwila? Izu daNzambi datulejaña nawu tubalumuni yitoñojoka yetu kulonda twiluki chikupu “nkeñelu yaNzambi [netu] yayiwahi, wayiteja nawa yawanina chikupu.” (Rom. 12:2) Kuhitila mukudiza mpinji yejima tunateli kumwekesha netu yuma yitwadizaña Mwizu daNzambi yalala. Tukwiluka chikupu netu nshimbi jaNzambi jalala. Kufwana mutondu wudi nanyiji yakola, ninetu tukukola chikupu “muchikuhwelelu.”—Tañenu Akolosi 2:6, 7.

18. Yumanyi yinateli kutukwasha kudikiña kuyuma yatama yidi mukaayi kaSatana?

¹⁸ Kwosi wunateli kuyikoleshela chikuhwelelu chenu, dichi twalekenuhu kubalumuka nakwikala amaha muyitoñojoka nimuyilwilu yenu. Lombenuña mpinji yejima nikumulembelela Yehova yayinki spiritu yindi. Toñojokenuña chikupu nikutwalekahu kushinshika yitoñojoka niyilwilu yenu. Tondenu amabwambu amawahi; ikalenuña nawantu anateli kuyikwasha kubalumuna yitoñojoka yenu. Neyi mwila mwenimu, mukutwesha kushinda nikudikiña kuyuma yatama yidi mukaayi kaSatana nikubalumuna “yitoñojoka yawantu yatama niyuma yejima yakañeshaña antu kumwiluka Nzambi.”—2 Kor. 10:5.