1. Muloñadi chitwatela kutiyilila kukusoñamisha kwaYesu?

YESU wahosheli muwuprofwetu windi kutalisha kumafuku akukuminina nindi: “Babalenu kulonda nyichima yenu yibuli kulema namuloña wakusweja . . . kwakama kwamuwumi [hela kwakama kwakukeña kwikala namali amavulu; kwakama kwanshakaminu].” (Luka 21:34) Twatela kutiyilila kuniku kusoñamisha. Muloñadi? Muloña yinu mpinji, tunakumona kukula kunakumonawu antu ejima.

2. Kukalanyi kwamonañawu amanakwetu niahela?

² Mpinji yikwawu, tunateli kumona kukala kwakuvulu hampinji yoyimu. Shinshikenu yakutalilahu yinalondelihu. Chinsahu wejina daJohn, * wakatili chikatu chamawutipo sikelelosisi waneñeli chikupu chelili ñodindi ashakaminiyi nindi yaaka 19 muwulu yamutemuki. Kuhiñahu, anyanindi ayedi awambanda alekeli kumukalakela Yehova. Amanakwetu aBob niañodawu aLinda amweni kukala kwakuvulu. Wejima wawu nyidimu yamanini, nawa nkumininaku, afumini mwitala mwashakamineñawu nakuya mukanyanya. Kubombela haniku kukala, muhela Linda wakatili chikatu chafwana chakumuchima nawa chikatu chikwawu chatachikili kukisañana yiidi yikwawu yamumujimba.

3. Kwesekeja na Afwilipi 4:6, 7, yumanyi yitwatela kukuhwelela?

³ Twatela kukuhwelela netu Nleñi yetu nawa Tata yetu wukweti kukeña, Yehova, wamonaña yihuñu yitwahitañamu. Nawa nakukeña kutukwasha kuumika yihuñu yitwamonaña. (Tañenu Afwilipi 4:6, 7.) Mwizu daNzambi mwekala nsañu yayivulu yashimuna hakukala kwomikiliwu ambuñindi. Dalumbulula cheñi Yehova chayikwashiliyi kuumika kukala  kwamweniwu. Tuhanjekenu hayakutalilahu yantesha.

4. Kukalanyi kwamweniyi Elija, nawa chumanyi cheliliyi hadi Yehova?

⁴ Elija wamukalakeleli Yehova mumpinji jakala nawa wamweni kukala kwasweja. Mwanta Ahabi, wumu hadi anyanta abula kushinshika ayulili muIsarela, wasumbwili Yezebeli, muntu watama wadifukwileña kudi Bayali. Wejima wawu ayedi enzesheli kudifukula kwaBayali mwituña dejima nawa ajahili atuprofwetu amavulu aYehova. Elija watemukili. Wapulukili cheñi kunzala yakapwelendendi kuhitila mukumushindamena Yehova. (1 Anya. 17:2-4, 14-16) Kubombelahu, Elija washindameneni hadi Yehova hakukonkolola atuprofwetu twaBayali. Wayilejeli aIsarela kukalakela Yehova. (1 Anya. 18:21-24, 36-38) Elija wadiña nawunsahu wawuvulu wamwekesheleña nawu Yehova wadiña nakumukwasha muniyi mpinji yakala.

5-6. Kwesekeja na 1 Anyanta 19:1-4, Elija watiyili ñahi, nawa Yehova wamwekesheli ñahi nindi wamukeña?

⁵ Tañenu 1 Anyanta 19:1-4. Hela chochu, Elija watiyili woma chamuchinishiliwu kudi mwadi Yezebeli nindi wukumujaha. Dichi, watemukilili kuBerisheba. Wazeyeli chakwila ‘walombeli nindi yafwi.’ Chumanyi chaletesheli yatiyi muniyi njila? Elija wadiña muntu wabula kuwanina, “muntu watiyileña neyi chitwatiyaña etu.” (Yak. 5:17) Hadaha wazeyeli muloña wachineñi nimuloña wakuzeya chikupu kumujimba. Chinamwekani neyi Elija  watoñojokeleña nindi mudimu windi wakutiyakesha kudifukula kwalala, wayili mumenji. Hadaha watoñojokeli cheñi nindi kwosi yuma yinahimpiki muIsarelaku nawa yena hohu diyi wachidiña nakudifukula kudi Yehova. (1 Anya. 18:3, 4, 13; 19:10, 14) Hadaha tunateli kuhayama nachuma cheliliyi iwu kaprofwetu washinshika. Ilaña Yehova welukili chatiyileñayi Elija.

⁶ Yehova wamuhosholeli wanyi Elija muloña wakulumbulula chatiyileñayi. Ilaña wamukwashili Elija kwikala cheñi nañovu. (1 Anya. 19:5-7) Mukuhita kwampinji, Yehova wamukwashili Elija kuhimpa yitoñojoka yindi kuhitila mukumumwekeshela ñovu Yindi yabadika. Nkumininaku Yehova wamulejeli nindi muIsarela mwachidiña cheñi antu jindi 7,000, abulileña kudifukula kudi Bayali. (1 Anya. 19:11-18) Yehova chamulejeleñayi Elija iyi yakutalilahu, wadiña nakumuleja nindi wamukeña.

7. Chamukwashiliwu Elija kudi Yehova chatukoleshaña ñahi?

⁷ Komana ninenu munakumona kukala? Chatukundejaña hakwiluka netu Yehova watiyishishili yihuñu yamweneñayi Elija. Chumichi chinakutwanukisha nawu Yehova wamonaña kukala kutwahitañamu. Weluka yuma yitwatela kwila niyitunateli kukañanya kwila nawa weluka yuma yitwatoñojokaña nichitwatiyaña. (Mas. 103:14; 139:3, 4) Neyi tumwimbujola Elija kuhitila mukushindamena hadi Yehova, wukutukwasha kumanisha kukala kwaletaña chineñi.—Mas. 55:22.

8. Yehova nateli kuyikwasha ñahi kumanisha chineñi?

⁸ Chineñi chinateli kuyileñela kwikala nayitoñojoka yatama hela kuyizeyesha. Neyi chumichi chiyimwekena, anukenuña nenu Yehova nateli kuyikwasha kumanisha chineñi. Nateli kuyikwasha ñahi? Wakeñaña nindi mumulejeña kukala kumunakumona nichimunakutiya. Nawa wukutiya kwaba kwenu. (Mas. 5:3; 1 Pet. 5:7) Dichi mpinji yejima lombenuña kudi Yehova neyi mudi nakukala. Hakuhosha nanenu neyi chahosheliyi naElijaku, ilaña wukuhosha nanenu kuhitila Mwizu dindi Bayibolu nikuloñesha kwindi. Nsañu yimukutaña muBayibolu yinateli kuyikundeja nikuyikwasha kuchiñeja. Cheñi amanakwenu niahela anateli kuyikolesha.—Rom. 15:4; Heb. 10:24, 25.

9. Ibwambu detu itwakuhwelela nateli kutukwasha ñahi?

⁹ Yehova chamulejeliyi Elija nindi yamwinki Elisha mudimu wazatileñayi, wamwinkeleña ibwambu wunateli kumukwasha kuumika chineñi chindi. Munjila yoyimu, neyi tumulejamu ibwambu detu chitunakutiya, nateli kutukwasha kuumika kukala kutukweti. (2 Anya. 2:2; Yish. 17:17) Neyi kwosi muntu imwatela kulejamu kukala kwenu, lombenu kudi Yehova kulonda yayikwashi kuwana mukaKristu wapama wunateli kuyikwasha kuumika kukala kumukweti.

10. Chakutalilahu chaElija chatuleñelaña ñahi kwikala nakuchiñeja, nawa chikaninu chekala haIsaya 40:28, 29 chatukwashaña ñahi?

¹⁰ Yehova wamukwashili Elija kuumika chineñi nawa wamukwashili kutwalekahu kukalakala hadi yaaka yayivulu. Chakutalilahu chaElija chatuleñelaña kuchiñeja. Mpinji yikwawu tunateli kwikala nachineñi chasweja chinateli kutuzeyesha kumujimba nimuyitoñojoka. Hela chochu, neyi tushindamena hadi Yehova, wukutwinka ñovu yitwakeñaña kulonda tutwalekihu kumukalakela.—Tañenu Isaya 40:28, 29.

11-13. Chineñi chayileñeleli ambuña aNzambi asatu akunyima kwiladi?

¹¹ Antu amakwawu ashimunawu muBayibolu aneñeli chikupu. Chakutalilahu, Hana  waneñeli chikupu muloña wakwila wavwalileña anyana wanyi nawa muhadika nindi wadiña nakumuvuloka nankashi. (1 Sam. 1:2, 6) Chineñi chaHana chamuletesheli kutiya kutama nankashi chakwila wadilili chikupu nawa chipepa chakuda chamanini.—1 Sam. 1:7, 10.

¹² Mpinji yikwawu Mwanta Davidi waneñeleña chikupu. Toñojokenu hakukala kwamweniyi. Wadinkeleña nyiloña hayiluwa yakoñeliyi. (Mas. 40:12) Mwanindi Abisalomi wadikañili nindi, nkumininaku wafwili. (2 Sam. 15:13, 14; 18:33) Nawa ibwambu daDavidi wadikundiliyi nindi wamufukejeleli. (2 Sam. 16:23–17:2; Mas. 55:12-14) Masamu amavulu asonekeliyi Davidi mwekala chineñi chatiyiliyi kushilahu nichikuhwelelu chindi chakola mudi Yehova.—Mas. 38:5-10; 94:17-19.

¹³ Nkumininaku, ñimbi yamasamu watachikili kutiyila antu atama ichima muloña wachihandilu chawu. Hadaha wafumini kumutaña waLevi, Asafwi nawa wakalakeleleña “mumalala aNzambi”. Iwu ñimbi yamasamu waneñeli chikupu, chakwila chamuletesheli kubula kwikala namuzañalu nikubula kuzañalala nayuma yadiñayi nayu. Watachikili nikujinoka yuma yayiwahi yafumaña mukumukalakela Yehova.—Mas. 73:2-5, 7, 12-14, 16, 17, 21.

14-15. Yumanyi yitunadizili kudi antu asatu ashimunawu muBayibolu kutalisha hakutambwila wukwashu kudi Yehova?

¹⁴ Ambuña aNzambi asatu ejima itunashimuni ashindameneni hawukwashu waYehova. Amulejelimu Yehova kwakama kwawu kwejima mukulomba. Ahanjekeli nindi mukulomba chakadi kumusweka muloña waweni waneñeleliwu. Nawa atwalekelihu kuya kwitala daYehova dakudifukwila.—1 Sam. 1:9, 10; Mas. 55:22; 73:17; 122:1.

¹⁵ Yehova wayakwili wejima wawu hamuntu-hamuntu. Hana wekalili nakuwunda  kwamuyitoñojoka. (1 Sam. 1:18) Davidi wasonekeli nindi: “Yuma yakala yamonawu aloña yayivulu; ilaña yejima Yehova wayipulwishañamu.” (Mas. 34:19) Nawa nkumininaku ñimbi yamasamu watiyili neyi Yehova namukwatili “kuchikasa [chindi] chachidiilu,” nakumulombola. Wembili nindi: “Ami kwami chachiwahi kukundama kwakwihi naNzambi: namwila dehi Mwanta Yehova nami dimu mwami mwakubatamina.” (Mas. 73:23, 24, 28) Yumanyi yitukudizila kudi awa antu? Mpinji yikwawu kukala kunateli kutumwekena nawa tunateli kuneña. Ilaña tunateli kushinda neyi tutoñojokaña chikupu Yehova chakwashiliyi antu amakwawu, kumushindamena mukulomba nikumwovwahila kuhitila mukwila yuma yatulejañayi nindi twileña.—Mas. 143:1, 4-8.

16-17. (a) Muloñadi chitwatela kubulila kudambula nawakwetu? (b) Tunateli kwikala ñahi nañovu?

¹⁶ Awa antu asatu anakutudizisha cheñi chuma chalema, dichi bayi tudambuleña kudi Yehova niantu jindiku. (Yish. 18:1) Nancy waneñeli nankashi hamuloña wakumutemuka kudi mfumwindi wahosheli nindi: “Kakavulu hinakeñeleña kudimona hela kuhanjeka namuntuku.  Ilaña naswejeleña kuneña muloña wakudambula nawantu.” Yuma yahimpikili chelili Nancy yakeñi njila jakukwashilamu antu adiña mukukala. Wahosheli nindi: “Nadiña nakutiyilila neyi antu anakulumbulula kukala kunakumonawu. Chinatachika kutoñojoka hadi awa antu nikukala kwamweneñawu, nalekeleña kutoñojoka hakukala kwami.”

¹⁷ Kupompa kukutukwasha kwikala cheñi nañovu. Neyi tudii kukupompa, twamwitejaña cheñi Yehova kwikala ‘nkwashi yetu nawa mukwakutukundeja.’ (Mas. 86:17) Kukupompa watukoleshaña naspiritu yajila, Izu dindi niantu jindi. Hakupompa twekalaña nakukooleka ‘kwakudikolesha.’ (Rom. 1:11, 12) Muhela Sophia wahosheli nindi: “Yehova niamanakwetu anankwashi kuumika. Chuma chasweja kulema chinankwashi, hikupompa. Chuma chankwashaña kuumika chineñi nikwakama kwami, hikupompa nikudikita nankashi mumudimu wakushimwina.”

18. Chumanyi chinateli kutwinkayi Yehova neyi tunaneñi?

¹⁸ Neyi tunaneñi, twanukeña netu Yehova watukana nindi wakafumishahu chineñi kumbidi haya nyaaka nawa nichayinu mpinji watukwashaña kuumika chineñi. Watwinkaña “muchima wakufwila kukoña yuma niñovu yakwilamu” kulonda tutondolweli chineñi nikuzeya zeya.—Fwi. 2:13.

19. Chikaninu chekala haAroma 8:37-39 chatukoleshaña ñahi?

¹⁹ Tañenu Aroma 8:37-39. Kapostolu Pawulu watukolesheli nindi kwosi chuma chinateli kutwambula kukukeña kwaNzambiku. Tunateli kukwasha ñahi amanakwetu niahela anakuumika chineñi? Chibaaba chinalondelihu chikashimuna chitunateli kumwimbujola Yehova kuhitila mukumwekesha wushona nichitunateli kukwasha amanakwetu niahela neyi ananeñi.