Paul wahosheli nindi: “Chelili musonyami yanvuloki, nashikeneni dakumukwata hamudiwu nikumuchikita nami nimujahi.”

Marco wahosheli nindi: “Hetala nahilileña swayi nihanabuli kutelela. Nadiña nakukisañana yitwamu niyuma yejima yadiñi mukamwihi.”

Etu amakwawu hitunateli kuhila muniyi njilaku. Hela chochu, wejima wetu mpinji jikwawu chatukalilaña kudihemba. Muloña wanshidi yitwaswanini kudi iyala watachi, Adama. (Rom. 5:12) Kufwana Paul niMarco, amakwawu chayikalilaña kudihemba neyi anahili. Amakwawu niwena chinateli kuyikalila kuhemba yitoñojoka yawu. Atwalekañahu kutoñojoka hayuma yayitiyishaña woma hela yayineñeshaña. Hela chochu, amakwawu chayikalilaña kutondolwela mpwila yakwila wuvumbi, kusweja kunwa walwa hela kuzatisha chatama yitumbu yashetana.

Antu abulaña kuhemba yitoñojoka yawu, kufwila kwawu niyilwilu yawu anateli kujimbesha wumi wawu. Ilaña tunateli kutondolwela chumichi. Munjilanyi? Kuhitila mukwikala nachilwilu chakudihemba. Hakwila twikali nanichi chilwilu, tuhanjekenu hamalwihu asatu: (1) Kudihemba hichumanyi? (2) Kwalemenadi? (3) Tunateli kwikala ñahi nanichi chilwilu chidi hakachi ‘kanyikabu yaspiritu’? (Ñal. 5:22, 23) Nkumininaku, tukuhanjeka chitwatela kwila hamuntu-hamuntu neyi chakwila mpinji yikwawu chatukalilaña kudihemba.

Muntu wadihemba hashikenaña dakwila chuma chidi chejimaku. Ilaña wadiwunjikaña kulonda yabuli kuhosha hela kwila yuma yamuneñeshaña Nzambi.

Yesu wamwekesheli mwatalisha kudihemba. Bayibolu yahosha nawu: “Chadiña nakumutukawu, yena hafuntishili cheñi matukaku. Chakabakeneñayi, hayitiyishili woma antu amuleñeleli yakabakaniku, ilaña wadikunjikili yomweni kudi Owu wasompaña mwaloña.” (1 Pet. 2:23) Yesu wadihembeli nihampinji yamusupishileñawu kudi ayilumbu jindi hampinji yamupopeliwu hamutondu wakuyandishila. (Mat. 27:39-44) Hakusambila wadihembeli hampinji yamwihwileñawu kudi akulumpi jansakililu kulonda awani hakumwinkela muloña namazu akuhoshayi. (Mat. 22:15-22) Wadihembeli cheñi chelili aYudeya anoni malola nawu amwasi. Chatela yayili chatama, “Yesu waswamini nawa wafuminimu mutembeli.”—Yow. 8:57-59.

Komana tunateli kumwimbujola Yesu? Eña, tunateli. Kapostolu Petulu wasonekeli nindi: “Kristu niyena wakabakeni kukoola enu, nakuyishila chakutalilahu kulonda enu mulondeleña chikupu muntampu jindi.” (1 Pet. 2:21) Hela  chakwila twawanina wanyi, tunateli kwimbujola chikupu chakutaalilahu chaYesu chakudihemba. Chalemenadi kwila mwenimu?

Twatela kwikala nachilwilu chakudihemba hakwila nawu Yehova yatutiyi kuwaha. Hela chakwila tunamukalakeli Yehova nakashinshi yaaka yayivulu, tunateli kujimbesha wubwambu wetu nayena neyi tubula kudihemba muyuma yitwelaña niyitwahoshaña.

Toñojokenu hadi Mosi wadiña “mwovu nankashi, kubadika amayala ejima ekala heseki dejima.” (Kuch. 12:3) Hanyima yakuumika hadi yaaka yayivulu nakutooba kwawaIsarela, ifuku dimu Mosi wakañenyi kudihemba. Wahilili chatoobeliwu cheñi muloña wakubula menji. Wayihosholeli antu nindi: “Tiyenu dinu enu akwakudikaña tuyiidishili meji mwilolidi tahindi?”—Kuch. 20:2-11.

Mosi wakañenyi kudihemba. Wamulemesheli wanyi Yehova hakuyinka menji muchihayamisha. (Mas. 106:32, 33) Chafuminimu, Yehova wamwitejeli wanyi kwiñila Mwituña daChikaninu. (Kuch. 20:12) Hadaha Mosi waditoñesheleña hakubula kudihemba kushika tuhu nifuku dafwiliyi.—Kuhit. 3:23-27.

Chumanyi chitunadiziliku? Hela chakwila tunashimbuli muchalala, hitwatela kuyihosha chatama antu atuneñeshaña hela anakukeñeka kufumbewaku. (Efwe. 4:32; Kol. 3:12) Muntu neyi nakukula, mpinji yikwawu chakalaña kudihemba. Ilaña anukenuña Mosi. Hitunakukeña kutamisha ijina detu dadiwahi naYehova muloña wakubula kudihembaku. Hanu dinu tunateli kwila ñahi hakwila twikali nanichi chilwilu chalema?

Lombenuña spiritu yajila. Muloñadi? Muloña kudihemba hichilwilu chidi hakachi kanyikabu yaNzambi yaspiritu nawa Yehova wenkaña antu amulombaña spiritu yindi. (Luka 11:13) Yehova nateli kutwinka ñovu kuhitila muspiritu yindi. (Fwi. 4:13) Nateli cheñi kutukwasha kwikala nayilwilu yikwawu yanyikabu yaspiritu, yidi neyi kukeña, yinateli kutukwasha kudihemba.—1 Kor. 13:5.

Tondolwelenu yuma yinateli kuyikañesha kudihemba. Chakutalilahu, tondolwelenuña mawebusayiti ahaIntaneti niyisela mudi yilwilu yatama. (Efwe. 5:3, 4) Hela chochu, twatela kutondolwela yuma yejima yinateli kutuleñela  kwila yuma yatama. (Yish. 22:3; 1 Kor. 6:12) Chakutalilahu, neyi muntu wakañanyaña kutondolwela yilwilu yawuvumbi watela kutondolwela nyikanda hela mafwilimu anakuhosha hawuvumbi.

Chinateli kutukalila kuzatisha iku kufumba. Hela chochu, neyi tuzata nañovu, Yehova nateli kutwinka ñovu yakudihemba. (2 Pet. 1:5-8) Wukutukwasha kuyuula yitoñojoka yetu, nhoshelu yetu niyilwilu yetu. Neyi chelili Paul niMarco itwashimuna hakusambila, wejima wawu adizili chakutondolwela kuhila swayi. Fwikijenu cheñi manakwetu wahilileña swayi neyi nakwendesha motoka nikubobola nawakwawu. Welili ñahi? Wahosheli nindi: “Nalombeleña chikupu mafuku ejima. Natañileña yibaaba yahosha hakudihemba nikuhembela nsona jamuBayibolu kumutu. Hela chakwila nichidi kuzatila hachumichi, ifuku nifuku nazataña nañovu kulonda nidiyuuli. Nawa nadanukañaku kuya kumudimu kulonda nendesheña mumesu awunda.”

Mpinji yikwawu chatukalilaña kudihemba. Neyi chumichi chitumwekena, twakañanyaña kulomba kudi Yehova. Ilaña iyi diyi mpinji yitwatela kulomba chikupu. Dichi lombenu kudi Yehova swayi-swayi. Mulembelelenu yayanakeni, lombenu yayikwashi nawa bayi mufuntishahu chiluwa chochimuku. (Mas. 51:9-11) Yehova hakubula kwakula kulomba kwenu kumunalombi nenu yayanakeniku. (Mas. 102:17) Kapostolu Yowanu watulejaña nindi mashi aMwana kaNzambi “atutookeshaña kunshidi jejima.” (1 Yow. 1:7; 2:1; Mas. 86:5) Anukenu nenu Yehova walejaña ambuña indi kudanakena mpinji yejima. Dichi twatela kukuhwelela netu wukatwalekahu kutwanakena ninetu.—Mat. 18:21, 22; Kol. 3:13.

Yehova watiyili kutama chelili Mosi yabuli kudihemba muchinkalampata. Hela chochu, Yehova wamwanakeneni. Nawa Izu daNzambi damulumbulula Mosi nawu wadiña muntu washinshika itwatela kwimbujola. (Kuhit. 34:10; Heb. 11:24-28) Yehova hamwitejeli Mosi kwiñila Mwituña daChikaninuku, ilaña wakamwiteja kushakama muParadisa heseki nakwikala nakuchiñeja kwakushakama haya nyaaka. Ninetu tukekala naniku kuchiñeja neyi tutwalekahu kwikala nanichi chilwilu chalema chakudihemba.—1 Kor. 9:25.