WEJIMA wetu tweluka netu Yehova nakulombola antu jindi nikuyinka yakuda yakuspiritu “mumafuku akukuminina.” (2 Tim. 3:1) Dichi, wejima wetu twatela kumwovwahila Yehova. Tudi neyi aIsarela hadiñawu muchinkalampata. Ateleleli kwilahu chuma chimu neyi atiya mpuña yinavumi.

Yehova wamulejeli Mosi kutuña mpuña jiyedi jakuchila jasiliva “jakutambikaña nachu chipompelu, kulonda kunyamwishaña nachu yilombu.” (Kuch. 10:2) Atupristu embileña mpuña munjila jamboka-mboka kulonda aleji antu yuma yatela kwilawu. (Kuch. 10:3-8) Makonu, antu jaNzambi atambwilaña wunlomboli munjila jashiyashana. Shinshikenu haniji njila jisatu jatwanukishaña mpuña jembileñawu kunyima. Antu jaNzambi makonu ayitambikaña kukupompa kwamaneni, akulumpi ayidizishaña mumashikola nawa nshimbi jatambwilañawu muyipompelu yejima jahimpikaña.

Neyi Yehova nakukeña “chipompelu chejima” kupompela kuchiisu chakabadi kakumusela katabanaka, atupristu embileña mpuña jejima jiyedi. (Kuch. 10:3) Nyichidi yejima yiwana yanyeñumukili tabanaka yatiyileña iyi mpuña. Antu ashakamineña kwakwihi nawiñililu enjileña swayi. Amakwawu ashakamineña kwakulehi, dichi akeñekeleña mpinji nikuzata nañovu hakwila nawu ashiki. Hichidi namuloña nakwashakamineñawuku, Yehova wakeñeleña wejima wawu kupompa hamu kulonda atambwili nshimbi.

Makonu hitwapompaña hatabanakaku, ilaña atutambikaña kukupompa kwawantu jaNzambi. Kupompa kweniku munabombeli kupompa kweluña nikupompa kukwawu kutwatambwilaña nsañu yalema ninshimbi. Mukaayi kejima, antu jaNzambi adiluñishaña kupompa kokumu. Dichi, ejima etejaña iwu mutambi waniku kupompa adiluñishaña kwikala hakachi kawantu akweti muzañalu. Amakwawu afumaña kwakulehi kubadika akwawu. Hela chochu, antu enzaña nakupompa ahetelañamu.

Indi mazanvu ashakamaña kwakulehi niwena ahetelañamu? Muloña wayuma yinakutuñawu, mazanvu ashakamaña mwamulehi niwena ahetelañamu muniku kupompa nawa atiyaña nawu adi hamu nawamanakwawu. Chakutalilahu, chelili ñimenu wakasanji keneni yendeli kasanji kamutayi kamuBenini, kasanji kasokankesheli iku kupompa kwizanvu dekala kuArlit muNiger, mbaka yanyigoti yidi muSahara Desert. Antu 21 apompeli,  munabombeli amanakwetu, ahela niantu amakwawu akweti mpwila. Hela adiña kwakulehi, atiyili nawu adi hakachi kawantu 44,131 apompeli. Manakwetu wumu wasonekeli nindi: “Tunasakilili nankashi chakufuma hamuchima hakutusokankesha kuniku kupompa. Chumichi chinamwekeshi nawu mwatukeña nankashi.”

Neyi atupristu amuIsarela avumisha mpuña kamu, “atulamba wowu anyanta amakombakaji,” diwu enjileña kwitenti dakubulakena. (Kuch. 10:4) Enjileña nakutambwila nshimbi nikuyidizisha kudi Mosi. Chumichi chayikwashileña kulombola chiwahi nyitaña yawu. Neyi mwadiña hakachi kanawa anyanta, ninenu mwadi kuzata nañovu kulonda mwinzi nakudizishewa.

Makonu akulumpi muchipompelu hiyekala “anyanta”; hela kwikala anyanta hadi nyikoku yaNzambi yakamenañawuku. (1 Pet. 5:1-3) Ilaña azataña nañovu hakubiña nyikoku. Dichi, neyi ayitambika nawu ayidizishi, chidi neyi kuShikola yaMudimu waWanta, ayaña. Kunawa mashikola, akulumpi adizaña chakuzata chiwahi nyidimu yachipoompelu. Chumichi chaleteshaña antu ejima muchipompelu kukundama kwakwihi naNzambi. Hela chakwila kanda muwanikeñaku dehi kuniyi shikola, chakadi nikujina anakuyikwasha kudi antu ayaku dehi.

Mpinji yikwawu atupristu awaIsarela embileña mpuña yamboka-mboka. Chumichi chamwekesheleña nawu Yehova nakukeña chilombu chejima kunyamuka. (Kuch. 10:5, 6) Neyi chilombu hichikunyamuka, chanyamukileña mumaseka-mumaseka, ilaña chakeñekeleña kuzata nañovu. Hadaha amakwawu adiña nakushintajala hakwila nawu anyamuki. Muloñadi?

Hadaha amakwawu adiña nakutoñojoka nawu anasweji kutuntujoka mwanti-mwanti nawa nawu anakuyikasumwisha. “Hekwawu ivu dashakamini kufumisha kumelela nakushika kubudidi.” Ilaña mpinji yikwawu “himafuku ayedi indi kwiji hikakweji indi kwiji himwaka” hakwila dinyamuki. (Kuch. 9:21, 22) Chilombu chatuntujokeli mapampa añahi? Kuchinda kapetulu 23 kashimuna maluña 40 ashakaminiwu aIsarela.

Mpinji yikwawu, amakwawu ashakamineña mumaluña mwadiña wulelu. Maluña amuchidiwu atela ayitiyishileña kuwaha “mwisaña dejima dina dasweja kutoha, dikweti woma nankashi.” (Kuhit. 1:19) Dichi, atela atoñojokeleña nawu neyi atuntuluka akuya kumaluña atama.

Neyi yilombu hiyikutuntuluka, amakwawu chayikalilileña kuhembelela mpinji yatela kunyamukawu. Ejima atiyileña neyi mpuña yinavumi, ilaña hiyanyamukilileña hamuku. Iyi mpuña yavumineña yadiña nakuleja nyichidi yadiña kumusela yidi neyi Yuda, Isakari niZebuluni nawu yatela kunyamuka. (Kuch. 2:3-7; 10:5, 6) Neyi ananyamuki dehi, atupristu avumishileña mpuña kamuchiyedi kulonda aleji nyichidi yisatu yidi kukabeta kakuchimunswa nawu yinyamuki. Dichelileñawu atupritu sampu chilombu chejima chinayi.

Hadaha chayikalilili kwiteja kuhimpika kwadiña mukuloñesha. Hadaha mwatoñojokeli nenu kuhimpika kunasweji. Indi kwiji mwakeñeli yuma chiyadiña kunyima nawa himwakeñeleña kuyihimpaku. Hichidi namuloña nachumichiku, hadaha chayikalilili kudiwunjika hakwila nawu mwinjilili naniku kuhimpika. Hela chochu, neyi twiteja iku kuhimpika, tukumona netu kwakuwahi nawa chumichi chikumuzañalesha Yehova.

Mumafuku aMosi, Yehova walombweli mamiliyoni awantu muchinkalampata, amayala, ambanda nianyana. Chakadi yena kuyakamena nikuyilombola, hiyadi kuhandaku. Makonu, tunakuhanda kuspiritu muloña wakwila Yehova nakutulombola. Tudi nachikuhwelelu chakola mudi yena. Dichi tutwalekihu kwovwahila neyi chovwahililiwu aIsarela ashinshika kumpuña jamboka-mboka javumishileñawu.