CHIBAABA CHAKUDIZA 25
KAMINA 7 Yehova, Ñovu Yetu
Anukenu Nenu Yehova “hiNzambi Wamumi”
“Yehova wamumi!”—MAS. 18:46.
TUKUDIZA
Yuma yayiwahi nankashi yafumañamu neyi twanukaña netu Nzambi itwadifukulañaku “hiNzambi wamumi.”
1. Chumanyi chakwashaña antu jaYehova kutwalekahu kudifukula kudi yena hela chakwila anakumona kukala?
“MPINJI jakala,” ichi dichashimuna Bayibolu kutalisha hamafuku itunakushakamamu. (2 Tim. 3:1) Kubombela hakukala kunakumonawu antu ejima muyinu nshakaminu yamakonu, antu jaYehova anakumona ikañesha niikabisha. Yumanyi yatukwashaña kutwalekahu kudifukula kudi Yehova hela chakwila tunakumona kukala kwamuchidiwu? Chuma chimu chatukwashaña chikupu chidi chakwila nawu tuneluki netu Yehova “hiNzambi wamumi.”—Yere. 10:10; 2 Tim. 1:12.
2. Munjilanyi Yehova mwekalilayi Nzambi wamumi?
2 Yehova wamonaña kukala kwejima kutwahitañamu nawa mpinji yejima wawanaña njila mwakutukwashila. (2 Kushi. 16:9; Mas. 23:4) Neyi tumumonaña netu hiNzambi wamumi, chumichi chikutukwasha kuumika kukala kwejima kutunateli kumona. Talenu chumichi chichamukwashili Mwanta Davidi.
3. Davidi watalishili mudihi chahosheliyi nindi “Yehova wamumi”?
3 Davidi wamwilukili Yehova nawa wamushindameneni. Chamukumpishileñawu kudi ayilumbu jindi, kushilahu niMwanta Sawulu, Davidi walombeli kudi Yehova kulonda amukwashi. (Mas. 18:6) Chelili Nzambi aakuli kulomba kwindi nawa amwamwini, Davidi wahosheli nindi: “Yehova wamumi!” (Mas. 18:46) Chahosheliyi awa mazu, Davidi watalishili hohu wanyi mukwila nindi Nzambi wekala kwoku. Davidi wakonkomweneneña nindi Yehova hiNzambi walala wakwashaña ambuñindi mpinji yejima. Mwamweni, yuma yahitilimu Davidi yamukwashili kwiluka nindi Nzambi yindi wadiña wamumi, nawa kukuhwelela muniyi njila kwamukwashili kwikala cheñi namuchima wakufwila kumukalakela Yehova nikumushimeka.—Mas. 18:28, 29, 49.
4. Yumanyi yayiwahi yafumañamu neyi tumumonaña Yehova netu hiNzambi wamumi?
4 Neyi tukuhwelela chikupu netu Yehova hiNzambi wamumi, chikutukwasha kumukalakela neyena. Tukwikalaña nañovu yakuumika kukala kutunakumona nimuchima wakufwila kutwalekahu kuzata nañovu mumudimu windi. Tukufwilaña cheñi kutwalekahu kwikala amabwambu jaYehova.
NZAMBI WAMUMI WUKUYINKAÑA ÑOVU
5. Chumanyi chinateli kutukwasha kubula kwakama neyi tunakumona kukala? (AFwilipi 4:13)
5 Tukutweshaña kuumika kukala kwejima kutunakumona, kwanyanya hela kweneni, neyi twanukaña netu Yehova wamumi nawa watukwashaña. Kafwampi, kwosi kukala kutunateli kumona kukukañanya kumanishayi Nzambi yetuku. Diyi Wañovu Jejima, nawa nateli kutwinka ñovu yakuumika. (Tañenu AFwilipi 4:13.) Dichi, hitwatela kwakama neyi tunakumona kukalaku. Chitwamonaña Yehova chatukwashañayi hampinji yitunakumona kukala kwanyanya, chatuleteshaña kukuhwelela chikupu netu wakatukwasha cheñi nihampinji yitwakamona kukala kwamaneni.
6. Yumanyi yamumwekeneni Davidi hachidiñayi kansi yamukwashili kumukuhwelela chikupu Yehova?
6 Talenu yuma yiyedi yamumwekeneni Davidi yamukwashili chikupu kumukuhwelela Yehova. Hampinji Davidi yadiñayi kabiña henohu wuchidi kansi, bera wakwatili mukoku hanyikoku yatata yindi nimutupa welili chochimu. Hanaka kapampa kejima kayedi, Davidi wahamukili nakukumpisha awa anyama nawa wamwinini anyikoku. Hela chochu, hatoñojokeli nindi wemikili awa anyama mushindu nañovu jindi yomweniku. Welukili nindi Yehova diyi wamukwashili. (1 Sam. 17:34-37) Davidi havulameneni iyi yuma yamwekeniku. Kuhitila mukutoñojoka chikupu haniyi yuma, chamukwashili kukuhwelela nindi Nzambi wamumi wakamwinkaña ñovu nikumbidi.
7. Kumona yuma munjila yambukaku kwamukwashili ñahi Davidi kuzuña naGoliyati?
7 Mukuhita kwampinji, hadaha hachidiñayi kampululu, Davidi wayili kuchilombu chamashidika awaIsarela. Wawanini amashidika anatiyi woma muloña wakaFilisitinu wataluka wejina daGoliyati wenjili “[nakusupisha] izanvu dawamashidika awaIsarela.” (1 Sam. 17:10, 11) Amashidika atiyili woma muloña ashili muchima hakutaluka kwaGoliyati nimazu akasawuntu ayihosheleñayi. (1 Sam. 17:24, 25) Ilaña, Davidi wamweni yuma munjila yambukaku. Davidi welukili nindi Goliyati chasupishileñayi izanvu dawamashidika awaIsarela, dikwila nawu wahosheleña kasawuntu ‘Nzambi wamumi.’ (1 Sam. 17:26) Davidi watoñojokeleña hadi Yehova. Wakuhweleleli nindi Nzambi wamukwashili hadiñayi kabiña wukumukwasha cheñi muniku kukala. Muloña wakukuhwelela muwukwashu waNzambi, Davidi wazuñili naGoliyati nawa wamwimikili mushindu!—1 Sam. 17:45-51.
8. Yumanyi yitwatela kwila yikuletesha tukuhweleli chikupu netu Yehova wukutukwashaña mpinji yitunakumona kukala? (Talenu cheñi mwevulu.)
8 Ninetu tunateli kuumika kukala neyi twanukaña netu Nzambi wamumi wukutukwasha. (Mas. 118:6) Tunateli kukuhwelela netu wukutukwasha neyi tushinshikaña hayuma yelayi dehi kunyima. Tañenu nsañu yamuBayibolu yikuyanukisha Yehova chamwininiyi akakudifukula indi. (Isa. 37:17, 33-37) Cheñi, talenu malipoti adi hawebusayiti yetu ya jw.org anakumwekesha Yehova chinakukwashayi amanakwetu niahela makonu. Kubombelahu, anukenu mpinji yayikwashiliyi Yehova muchihandilu chenu. Hadaha munakutiya nenu Yehova hanayililihu chuma chakuhayamisha, chidi neyi kuyamwina kumutupa hela kuberaku. Chalala chidi chakwila nawu, Yehova nayilili yuma yayivulu muchihandilu chenu! Nayikoki kulonda mwiikali ibwambu dindi. (Yow. 6:44) Kushika niyinu mpinji, munatwalekihu kwikala muchalala muloña wawukwashu windi. Dichi mulombenu ayikwashi kwanuka mpinji yakwiliyi kulomba kwenu hayinkeliyi yuma yimwakeñeleña hampinji yatelela hela hayakameneniyi himwamweneña kukala. Neyi mutoñojokaña hayuma yamuchidiwu yayimwekeneni, chikuyikwasha kukuhwelela chikupu nenu Yehova wukutwalekahu kuyikwasha muchihandilu chenu.
Yuma yitwelaña hampinji yitunakumona kukala, yamutiyishaña Yehova kuwaha hela nehi (Talenu maparafilafu 8-9)
9. Twatela kumonaña ñahi kukala kutunakuhitamu? (Yishimu 27:11)
9 Neyi tumumonaña Yehova netu hiNzambi wamumi, chikutukwasha kumona kukala kutunakuhitamu munjila yayiwahi. Neyi tunakumona kukala, twatela kusha muchima hachuma chalema nankashi. Diyabolu wahoshaña nindi neyi tumona kukala tukumufutalela Yehova. Dichi yuma yitwelaña neyi tunakumona kukala yinateli kumuzañalesha Yehova hela nehi. (Yoba 1:10, 11; tañenu Yishimu 27:11.) Ilaña neyi twimika mushindu kukala kutunakuhitamu, twamwekeshaña netu twamukeña Yehova nawa netu Diyabolu hisakutwamba. Komana anakuyikañesha kudi nfulumendi, munakumona kukala kwamali muchihandilu, antu anakutiyilila wanyi kunsañu yimunakuyishimwina, indi kwiji kukala kukwawu? Neyi dichidi yuma, anukenu nenu kukala kumunakuhitamu kunakuyinka kukooleka kwakuzañalesha muchima waYehova. Anukenu cheñi nenu, haketeja kuyeseka kubadika muñovu jenuku. (1 Kor. 10:13) Wakayinka ñovu yakuumika.
NZAMBI WAMUMI WAKAYIFWETA
10. Chumanyi chakayililayi Nzambi wamumi antu adifukulaña kudi yena?
10 Yehova diyi Mukakufweta antu adifukulaña kudi yena. (Heb. 11:6) Watukwashaña kwikala mukuwunda nikuzañalala nayuma yitukweti chayinu mpinji nawa wakatwinka wumi wahaya nyaaka kumbidi. Twatela kumuchiñejaña Yehova, nakukuhwelela netu wukweti muchima wakufwila niñovu yakutufweta. Nawa muloña wakukuhwelela muniyi njila, twatwalekañahu kumukalakela hakumina ñovu jetu mukudifukula kwetu neyi chelileña ambuñindi ashinshika akunyima. Dichuma cheliliyi Timotewu.—Heb. 6:10-12.
11. Chumanyi chamukwashili Timotewu kudikita chikupu muchipompelu? (1 Timotewu 4:10)
11 Tañenu 1 Timotewu 4:10. Timotewu wamukuhweleleli Nzambi wamumi. Dichi, kudi chuma chachiwahi chamukojejeli kudikita chikupu nikudishaku. Munjilanyi? Kapostolu Pawulu wamukolesheli kwikala ntañishi wamuwahi mumudimu wakushimwina nimuchipompelu. Timotewu wateleleli cheñi kwikala wakutalilahu wamuwahi kudi akwawu akakwitiya, atwansi niakulumpi. Nawa amwinkeli nyidimu yakala, mwabombeleli kufumba antu akeñekeleña kuyifumba chakadi kuyihita mumbadi, ilaña munjila yakukeña. (1 Tim. 4:11-16; 2 Tim. 4:1-5) Mpinji jikwawu, antu hiyamweneña nyidimu yazatileñayi Timotewu hela kumusakilila haniyi nyidimuku, ilaña yena wakuhweleleli nindi Yehova wakamufweta.—Rom. 2:6, 7.
12. Chumanyi chinateli kuyisañumuna akulumpi kutwalekahu kudikita munyidimu yawu? (Talenu cheñi mwevulu.)
12 Makonu, akulumpi niwena atela kukuhwelela nawu Yehova wamona nawa walemeshaña nyidimu yawu yayiwahi. Kubombela hamudimu wakubiña, kutañisha nikushimwina, akulumpi amavulu akwashanaña munyidimu yakutuña nimumudimu wakukwasha adi muwubanji. Amakwawu ekala muKometi Yawakulumpi Ayaña naKuhempula Ayeji hela muKometi Yatiyañanaña naYipatela. Akulumpi adikitaña muniyi nyidimu amonaña chipompelu nawu chambala chaYehova, bayi neyi chamuntuku. Chafumañamu, azataña namuchima wejima nyidimu yawu nawa akuhwelelaña chikupu nawu Nzambi wakayifweta hanyidimu yazatañawu.—Kol. 3:23, 24.
Nzambi wamumi wakayifweta chimunakuzata nañovu kwakamena chipompelu (Talenu maparafilafu 12-13)
13. Yehova watiyaña ñahi chitwamuzatilaña hamuntu-hamuntu kwesekeja nahakumina ñovu jetu?
13 Bayi neyi ejima atela kwikala akulumpiku. Ilaña wejima wetu kudi yuma yitwatela kumwinka Yehova. Nzambi yetu wasakililaña neyi tuzata hakumina ñovu jetu kumukalakela. Wamonaña yawaana yetu yitwahanaña kumudimu wamukaayi kejima, hela chakwila yanyanya ñahi. Watiyaña kuwaha neyi twolola chikasa kulonda twakulihu hakupompa hela chakwila tukweti nsonyi, nawa wazañalalaña neyi tudiwula chiluwa chinatukoñiyi mukwetu nawa tumwanakena. Hela chakwila munakutiya nenu himukutwesha kuzata kwesekeja nachimunakukeña ku, kuhwelelenu nenu Yehova walemesha mudimu wumunateli kuzata kwesekeja nahakumini ñovu jenu. Wayikeña muloña wachumichi nawa wakayifweta.—Luka 21:1-4.
TWALEKENUHU KWIKALA KWAKWIHI NANZAMBI WAMUMI
14. Kwikala nawubwambu wakola naYehova kunateli kutukwasha ñahi kutwalekahu kwikala ashinshika? (Talenu cheñi mwevulu.)
14 Neyi tukweti wubwambu wakola naYehova, chikutupelelaña kutwalekahu kwikala ashinshika kudi yena. Dichichadiña nikudi Yosefu. Wakaanini chikupu kwila wuvumbi. Wadiña nawubwambu wakola naNzambi, nawa hakeñeleña kumuneñeshaku. (Kutach. 39:9) Hakwila twiikali nawubwambu wakola naYehova, twatela kwikalaña nampinji yakulomba kudi yena nikudiza Izu dindi. Dichi wubwambu wetu nayena wakekala wakola. Kufwana Yosefu, neyi tukweti wubwambu wakola naYehova, hitukufwilaña kwila chuma chinateli kumuneñeshaku.—Yak. 4:8.
Kuswina kwakwihi naNzambi wamumi kukuyikwasha kutwalekahu kwikala ashinshika (Talenu maparafilafu 14-15)
15. Chumanyi chitunateli kudizila kuchuma chayimwekeneni aIsarela muchinkalampata? (AHeberu 3:12)
15 Antu avulamenaña nawu Yehova hiNzambi wamumi chinateli kwikala chaswayi kubula kwikala ashinshika kudi yena. Talenu chuma chamwekeni kudi aIsarela hampinji yadiñawu muchinkalampata. Elukili nawu Yehova wekala kwoku, ilaña atachikili kujinoka neyi chakwila wukuyinkaña yuma yinakukeñawu. Nawa ehwili nawu: “Komana Yehova wudi mukachi ketu tahindi nehi?” (Kwid. 17:2, 7) Kufumahu, adikañili naNzambi. Twatela kutondolwela chikupu kwila chuma chatama cheliliwu.—Tañenu AHeberu 3:12.
16. Chumanyi chinateli kweseka chikuhwelelu chetu?
16 Yuma yinakumwekana mukaayi yaleteshaña chitukalileña kwikala nawubwambu wakola naYehova. Amavulu akaanaña nawu Nzambi wekalaku wanyi. Kakavulu, ana adiwulaña yuma yakeñañayi Nzambi amwekanaña neyi yuma yinakuyiwahila. Neyi tumona chuma chamuchidiwu chinakumwekana, chikuhwelelu chetu chinateli kwikala mukweseka. Hela chakwila twakuhwelela netu Nzambi wekala kwoku, hadaha tunateli kutachika kujinoka neyi chakwila wakatukwasha. Dichuma chamumwekeneni nsoneki Wesamu 73. Wamweni antu adikumashaniniwu nawu anakudiwula nshimbi jaNzambi nawa yuma yinakuyiwahila. Chafuminimu, watachikili kujinoka neyi chakwila chadiña hohu chiwahi kumukalakela Nzambi.—Mas. 73:11-13.
17. Chumanyi chinateli kutukwasha kutwalekahu kwikala nawubwambu wakola naYehova?
17 Chumanyi chamukwashili ñimbi yamasamu kwolola yitoñojoka yindi? Watachikili kutoñojoka chikupu hachuma chakayimwekena amuvulamenaña Yehova. (Mas. 73:18, 19, 27) Watoñojokeli cheñi hayuma yayiwahi yafumaña mukumukalakela Nzambi. (Mas. 73:24) Ninetu twatela kutoñojoka hayuma yayiwahi yatwinkayi Yehova. Nawa fwikijenu chihandilu chetu chichadi kwikala neyi chakwila hitwamukalakeleleña Yehovaku. Kwila mwenimu kukutukwasha kutwalekahu kwikala ashinshika nawa tukukunkulula neyi chakunkulwili ñimbi yamasamu netu: “Ami kwami, chachiwahi kuswina kwakwihi naNzambi.”—Mas. 73:28.
18. Muloñadi wutwatelela kubula kutiya woma yuma yikamwekana kumbidi?
18 Tunateli kuumika kukala kwejima kutunateli kumona munanu mafuku akukuminina muloña “[twakalakelaña] Nzambi wamumi nawa walala.” (1 Tes. 1:9) Nzambi yetu wekala kwoku nawa wakwashaña antu adifukulaña kudi yena. Wayikwashileña ambuñindi kunyima, nawa watukwashaña ninetu makonu. Katataka tumoni lukadi lwabadika hanu hamaseki. Ilaña hampinji yitwakamonaña ilu lukadi, hitwakekala nkawetuku. (Isa. 41:10) Dichi wejima wetu “twiikali nawulobu nakuhosha netu: ‘Yehova hinkwashi yami; hinukutiya womaku.’”—Heb. 13:5, 6.
KAMINA 3 Ñovu Yetu, Kuchiñeja, Itwashindamena