Hakwila tumuzañalesheña Yehova, twatela kwikala nachikuhwelelu. Hela chochu, Bayibolu yahosha nawu “chikuhwelelu chawantu ejima wanyi.” (2 Tes. 3:2) Hampinji yahosheliyi kapostolu Pawulu awa mazu, watalishileña kudi “antu atama nawa ambanji,” amukabishileña. Ilaña mazu ahosheliyi kutalisha hachikuhwelelu amakwawu ayitiyilaña mwacheñi. Antu amu adiwulaña wunsahu wamwekeshaña nawu kwekala Nleñi, Nzambi. (Rom. 1:20) Amakwawu anateli kuhosha nawu akuhwelela muchuma hela muntu wasweja ñovu. Ilaña kukuhwelela hohu muniyi njila bayi neyi dichikuhwelelu chakeñekaña hakwila tumuzañaleshi Yehovaku.

Twatela kukuhwelela chikupu netu Yehova wekala kwoku nawa netu diyi “mukakufweta” antu akweti chikuhwelelu chakola. (Heb. 11:⁠6) Chikuhwelelu chekala hakachi kanyikaabu yaspiritu yindi yajila. Nawa hakwila tutambwili spiritu yajila, twatela kumulomba Yehova hakwila atwinki. (Luka 11:9, 10, 13) Chuma chikwawu chalema chinateli kutukwasha kutambwila iyi spiritu hikutañaña Izu daNzambi donenewa. Kufumahu twatela kutoñojoka hayuma yitunatañi nikufwila kuzatisha yuma yitunadizi. Neyi twila mwenimu, tukwiteja spiritu yaYehova kulonda yitukwashi kwila yuma muchihandilu chetu munjila yikumwekesha nawu tukweti chikuhwelelu chamuzañaleshaña.