CHIBAABA CHAKUDIZA 23
KAMINA 28 Kwikala Ibwambu daYehova
Yehova Nakututambika Nindi Twiikali Enyi Jindi
“Itenti dami dakekala nawena, nawa ami nakekala Nzambi yawu.”—EZEK. 37:27.
UKUDIZA
Chitwatela kuswejelaku kumwekesha kusakilila hamutambi waYehova wakwikala enyi mwitenti dindi dachifwikija nichatwakamenañayi muloña diyi watutambwilaña.
1-2. Mutambi wamuchidinyi wayitambikañayi Yehova akakudifukula indi ashinshika?
MWAMUMONAÑA ñahi Yehova? Hadaha mukwakula nenu, ‘Yehova hiTata yami, hiNzambi yami nawa hiIbwambu dami.’ Kudi cheñi nkumbu jikwawu hela mazu imunateli kuzatisha hakumutena Yehova. Hela chochu, komana mwamumonaña cheñi nenu diyi wayitambwila mwitenti dindi?
2 Mwanta Davidi wesekejeli wubwambu wekala hakachi kaYehova nawakakudifukula indi ashinshika nawubwambu wekala hakachi kamuntu nawenyi jindi anatambwiliyi. Wehwili nindi: “Eyi Yehova, hinyi wunateli kwikala mwenyi mwitenti deyi? Hinyi wunateli kushakama mumpidi yeyi yajila?” (Mas. 15:1) Kunawa mazu onenewa, twadizilañaku netu tunateli kwikala enyi jaYehova, dikwila nawu amabwambu jindi. Komana iwu himutambi walema kufuma kudi Yehovaku?
YEHOVA NAKUKEÑA NINDI TWIIKALI ENYI JINDI
3. Hinyi wadiña mwenyi waYehova watachi, nawa Yehova nimwenyi windi atiyili ñahi hakwikala hamu?
3 Henohu Yehova kanda aleñi yuma yejima, wadiña nkawindi. Ilaña hampinji yimu, watambwilili Mwanindi wawedi mwitenti dindi dachifwikija. Yehova watiyili kuwaha nankashi hakwikala namudimu wawuha wakwikala Mukakutambwila. Bayibolu yamwekeshaña nawu Yehova ‘wamukeñeli chikupu’ Mwanindi. Mwenyi windi watachi, niyena wadiña “nakuzañalela kumesu [aYehova] mpinji yonsu.”—Yish. 8:30.
4. Anyi amakwawu atambikiliyi Yehova kwikala enyi mwitenti dindi?
4 Kuhiñahu Yehova waleñeli yileñaleña yikwawu yakuspiritu, nakuyitambika kulonda niyena yiikali enyi jindi. Añelu jindi ayitenaña nawu ‘anyana kaNzambi’ nawa ayilumbulula nawu azañalalaña kwikala hamu naYehova. (Yoba 38:7; Dan. 7:10) Hadi yaaka yayivulu nankashi, amambwambu jaNzambi adiña hohu ana ashakamineñayi nawu mwiwulu. Nkumininaku, waleñeli antu nawa niwena wayitambikili kwikala enyi jindi. Mukuhita kwampinji, hakachi kanawa enyi hadiña Enoki, Nowa, Abarahama niYoba. Awa akakudifukula alala ayiteneni nawu amabwambu jaNzambi, hela netu antu endeli “naNzambi walala.”—Kutach. 5:24; 6:9; Yoba 29:4; Isa. 41:8.
5. Yumanyi yitunateli kudizila kuwuprofwetu wekala haEzekeli 37:26, 27?
5 Hadi yaaka yayivulu yahitilihu, Yehova watwalekelihu kutambika amabwambu jindi kwikala enyi jindi. (Tañenu Ezekeli 37:26,27.) Chakutalilahu, kutalisha kuwuprofwetu waEzekeli, twadizaña netu Nzambi wakeñeshaña nindi akakudifukula indi ashinshika ekali nawubwambu wawuwahi nayena. Wakana kutiyañana “nawu chitiyañenu chakuwunda.” Iwu wuprofwetu wahoshaña hampinji yakela owu akweti kuchiñeja kwakuya mwiwulu ninowu akweti kuchiñeja kwakushakama heseki hakekalawu anuñañana hamu mwitenti dachifwikija nakwikala “mukanka wumu.” (Yow. 10:16) Dichuma chinakumwekana chayinu mpinji!
NZAMBI WATWAKAMENAÑA KWEJIMA KUTUDI
6. Muntu nateli kwikala ñahi mwenyi mwitenti daYehova, nawa kudihi kutunateli kuwana itenti Dindi?
6 Kunyima, itenti damuntu dadiña hiiluña dakunookela nawa dinateli kumukiña kunchiilu. Mwenyi wadiña munidi itenti wakuhweleleña nindi akumwakamena chiwahi. Neyi tudihana nakwikala amabwambu jaYehova, twekalaña enyi mwitenti dindi dachifwikija. (Mas. 61:4) Twadiluñishaña yakuda yakuspiritu yayivulu niwubwambu nawantu amakwawu enzaña niwena nakwikala enyi jaYehova. Itenti dindi dachifwikija hidekala heluña dimu hohuku. Mwatela mwayahu dehi kwituña dacheñi, hadaha kukupompa kweneni kwadimena, nawa mwawanini antu amakwawu adi namuzañalu hakwikala mwitenti daNzambi. Dawanikaña kwejima kwekalaña akakudifukula indi ovwahila.—Chim. 21:3.
7. Muloñadi wutukuhoshela netu ana antu ashinshika afwa dehi achidi enyi mwitenti daYehova? (Talenu cheñi mwevulu.)
7 Indi ana ashinshika afwa dehi? Komana tunateli kukunkulula netu achidi enyi mwitenti daYehova? Eña. Tunahoshelidi mwenimu? Muloña awa antu achidi kuyanuka kudi Yehova. Yesu walumbulwili nindi: “Nsañu yakwila nawu afu akasañuka, Mosi niyena wahoshelihu munsañu yahosha hachiputa, mwamuteneniyi Yehova nindi ‘Nzambi yaAbarahama, Nzambi yaIsaka nawa Nzambi yaYakoba.’ Yena hiNzambi yawantu amomi, bayi afwaku, muloña kudi yena ejima wawu amomi.”—Luka 20:37, 38.
Niantu ashinshika afwa dehi, Yehova wayimonaña nindi hiyenyi mwitenti dindi (Talenu paragilafu 7)
YUMA YAYIWAHI YITWADILUÑISHAÑA NIYUMA YITWATELA KWILA
8. Enyi jaYehova adiluñishaña ñahi kwikala mwitenti dindi?
8 Neyi itenti damuntu chidinateli kwikala iluña mwakunookela nawa dakiñaña antu kunchiilu, itenti daYehova dakiñaña enyi jindi kuyuma yinateli kuluwañesha wubwambu wawu nayena nawa dayikwashaña kwikala nakuchiñeja kwalala kwakumbidi. Neyi tutwalekahu kuswina kwakwihi naYehova, Satana hakutwesha kutukatisha haya nyaakaku. (Mas. 31:23; 1 Yow. 3:8) Mukaayi kakaha, Yehova wakatwalekahu kukiña amabwambu jindi ashinshika kuyuma yinateli kukisa wubwambu wawu nayena nikuyikiña kukufwa.—Chim. 21:4.
9. Yehova wakeñaña nindi enyi jindi eleñadi?
9 Mwamweni hikukooleka chikupu kwikala enyi mwitenti daYehova, dikwila nawu kudiluñisha wubwambu wabulaña kumana nayena. Chumanyi chitwatela kwila neyi tunakukeña kutwalekahu kwikala enyi jindi? Neyi muntu ayitambika kwitala dindi, mukufwila kwiluka yuma yikukeñayi nindi mwili. Chakutalilahu, hadaha wukukeña nindi musubuli nsapatu henohu kanda mwiñili mwitala, nawa dichuma chimukwila. Munjila yoyimu, tunakukeña kwiluka yuma yakeñañayi Yehova yatela kwilawu antu anakukeña kutwalekahu kwikala enyi mwitenti dindi. Kukeña kutwamukeña Yehova kwatuleteshaña kuzata hakumina ñovu jetu “[kumutiyisha] kuwaha chikupu.” (Kol. 1:10) Mwamweni, twamonaña Yehova netu hiIbwambu detu, ilaña twatela kwiluka cheñi netu hiNzambi yetu nawa hiTata yetu itwatela kulemesha. (Mas. 25:14) Hitwatela kuvulamena chumichiku, nawa twatela kumulemeshaña mpinji yejima. Kumulemesha chikupu kukutukwasha kutondolwela kwila yuma yikumuneñesha. Mpinji yejima tunakukeña ‘kwenda naNzambi yetu nakudikehesha.’—Mika 6:8.
YEHOVA CHAMWEKESHELIYI MUCHINKALAMPATA NINDI HAKWETI CHAAMBUKU
10-11. Yehova cheliliyi nawaIsarela mwisaña daSinayi chamwekesheli ñahi nawu wudana chaambu?
10 Yehova wayimwekeshelaña enyi jindi chaambu wanyi. (Rom. 2:11) Tunateli kwiluka netu Yehova wamwekeshaña chaambu wanyi neyi tushinshika cheliliyi nawaIsarela mwisaña daSinayi.
11 Hanyima yakuyifumisha antu jindi muwuduñu muEjipitu, Yehova watondeli atupristu kulonda akalakeleña hatabanaka. Wenkeli aLevi nyidimu yikwawu yakuzata hanidi itenti dajila. Komana Yehova wahembeleña chiwahi ana antu azatilileña hatabanaka hela ashakamineña kwakwihi kubadika antu amakwawu? Inehi! Yehova hakweti chaambuku.
12. Yehova wamwekesheli ñahi nindi wudana chaambu nacheliliyi namuza waIsarela? (Kwidika 40:38) (Talenu cheñi mwevulu.)
12 KaIsarela wejima wadiña nakukooleka kwakwikala nawubwambu wakola naYehova, chili wazatilileña hatabanaka hela nehi, indi kwiji washakamineña kwakwihi natabanaka hela nehi. Chakutalilahu, Yehova welishili muza wejima kumona chishimi cheevu dachihayamisha nichishimi chakesi chashiliwu hewulu databanaka. (Tañenu Kwidika 40:38.) Neyi ivu ditachika kuya kwiluña dadiha, ninana ashakamineña hahalehi natabanaka amweneña, aloñesheleña yuma yawu, kulemuna matenti ayisaka yawu nikwendela hamu namuza wejima. (Kuch. 9:15-23) Ejima wawu adiña nakutiya yivumina yafumineña kumpuña jiyedi jasiliva jadiña nakuyikwasha kwiluka nawu atela kutachika kwenda. (Kuch. 10:2) Chakadi nikujina, kushakama kwakwihi natabanaka hikwamwekesheleña nawu muntu wukweti wubwambu wakola naYehovaku. Ilaña kaIsarela wejima wateleleli kwikala mwenyi waYehova nikukuhwelela nindi wukumulombolaña nikumukiña. Munjila yoyimu, nimakonu hichikweti muloña nakutwashakamañaku, Yehova watukeña, watwakamenaña nawa watukiñaña.
Ntanjikilu yatabanaka yashiliku Nzambi yamwekesheleña nawu hakweti chaambuku (Talenu paragilafu 12)
YEHOVA CHAMWEKESHAÑAYI MAKONU NINDI HAKWETI CHAAMBUKU
13. Yehova wamwekeshaña ñahi makonu nindi hakweti chaambuku?
13 Makonu, antu amakwawu hakachi kawantu jaNzambi ashakamaña kwakwihi nakasanji keneni mukaayi hela kasanji kamutayi kawaYinsahu jaYehova. Amakwawu azatilaña hanawa maluña. Chafumañamu, awa antu azataña nyidimu yayivulu yekala hanawa maluña nawa adikundaña nanowu anakulombola. Amakwawu azataña neyi ankoñi endaña hela munyidimu yikwawu yamudimu wampinji yejima wadimena. Neyi mudi hakachi kawantu amavulu anakubula kuzata iyi nyidimu yinateniwu, ilukenu chikupu nenu Mukakututambwila, Yehova, wakeña enyi jindi ejima. Nawa wayakamenaña wejima wawu. (1 Pet. 5:7) Yehova wayinkaña antu jindi ejima yakuda yakuspiritu, wayilombolaña nawa wayikiñaña.
14. Njilanyi yikwawu mwamwekeshelañayi Yehova nindi hiMukakututambwila wabula chaambu?
14 Njila yikwawu mwamwekeshelañayi Yehova nindi hiMukakutambwila wabula chaambu yidi yakwila nawu, waletesha chiikali chaswayi antu mukaayi kejima ekali nakukooleka kwakwikala naBayibolu. Hakusambila, Nsona Yajila ayisonekeli mumadimi asatu: chiHeberu, chiAramayiki nichiGiriki. Komana ana atañaña Bayibolu munawa madimi mwayisonekeliwu hakusambila ekala nawubwambu wakola naYehova kubadika abulaña kutaña awa madimi? Inehi.—Mat. 11:25.
15. Yumanyi yamwekeshaña hatooka nawu Yehova hakweti chaambuku? (Talenu cheñi mwevulu.)
15 Wubwambu wetu naYehova hiwashindamena hashikola yitwataña indi kwiji hakwiluka madimi mwasonekeliwu Bayibolu hakusambilaku. Chatela eteji hohu antu ataña kwikala naBayibolu, Yehova weteja antu ejima mukaayi kwikala nayu, chili ataña hela nehi. Izu dindi donenewa, Bayibolu, anayibalumuni mumadimi amavulu nankashi, dichi, yuma yatañishaña Bayibolu yinateli kukwasha antu mukaayi kejima nawa yikuyikwasha kwiluka yuma yatela kwilawu hakwila ekali amabwambu jindi.—2 Tim. 3:16, 17.
Chineli antu amavulu akweti Bayibolu, chinakumwekesha hatooka nawu Nzamb hakweti chaambuku (Talenu paragilafu 15)
TWALEKENUHU KWIKALA ENYI JAYEHOVA
16. Kwesekeja naYilwilu 10:34, 35, tunateli kutwalekahu ñahi kwikala enyi jaYehova?
16 Hikukooleka chikupu kututambwila kudi Yehova hamu neyi enyi amwitenti dindi dachifwikija. HiMukakutambwila wukweti luwi, kukeña nichisambu chabadika. Kubombelahu, hakweti chaambuku, watutambwilaña wejima wetu hichikweti muloña nakutwafuma, nkulilu yetu, shikola yitwataña, ikowa, muchidi, yaaka, indi kwiji tudi muntu wamumbanda hela weyalaku. Ilaña, ana hohu ovwahilaña nshimbi jindi diwu etejañayi kwikala enyi jindi.—Tañenu Yilwilu 10:34, 35.
17. Kudihi kutwakawana yuma yikwawu yahosha hachitunateli kwikala enyi mwitenti daYehova?
17 Neyi chasonekawu haIsamu 15:1, Davidi wehwili nindi: “Eyi Yehova, hinyi wunateli kwikala mwenyi mwitenti deyi? Hinyi wunateli kushakama mumpidi yeyi yajila?” Ñimbi yaMasamu amwoneneni kwakula awa malwihu. Chibaaba chinalondelihu chakashimuna yuma yitwatela kwila kulonda tutwalekihu kwikala enyi jaYehova.
KAMINA 32 Ikalenu Kudi Yehova!