Malwihu Kufuma Kudi Antañi
Komana izu dakwila nawu “wakayihemba,” didi haIsamu 12:7, datalisha kudi “antu anakukabakana” (vasi 5) tahindi “[ku]mazu aYehova” (vasi 6)?
Nsañu yekalamu yamwekeshaña nawu iyi vasi yatalisha kudi antu.
HaIsamu 12:1-4, twatañañahu netu “antu ashinshika ananooñi hakachi kawantu.” Ichi dinu talenu Isamu 12:5-7, mavasi itunakuhanjekahu.
“‘Muloña antu anakukabakana anakuyikabisha,
Muloña wakwaaba kwawatuzweñi,
Nakanyamuka nakukoñahu chuma,’ dichinahoshiyi Yehova.
‘Nakayamwina kudi antu ayisawulaña.’
Mazu aYehova atooka;
Adi neyi siliva yakweñunwina muluteñu lwewumba, yakweñununa mapampa 7.
Wakayihemba, eyi Yehova;
Wakakiña muntu-himuntu hakachi kawu kufuma hanidi ikiñu haya nyaaka.”
Vasi 5 yinakuhosha hachuma chakayililayi Nzambi “antu anakukabakana.” Wakayamwina.
Vasi 6 yabombelahu nawu “mazu aYehova atooka,” ‘neyi siliva yakweñununa.’ Awa diwu mazu akuhwelelawu chikupu kudi akaKristu adihana.—Mas. 18:30; 119:140.
Ichi dinu talenu chahosha vasi yalondelahu, Isamu 12:7: “Wakayihemba, eyi Yehova; wakakiña muntu-himuntu hakachi kawu kufuma hanidi ikiñu haya nyaaka.” Izu dakwila nawu “wakayihemba” datalisha kudanyi?
Chineli vasi 7 yalondela hamazu adi muvasi 6, ahosha nawu “mazu aYehova,” antu amakwawu anateli kukunkulula nawu izu dakwila nawu “wakayihemba” datalisha kumazu aNzambi. Nawa tweluka netu Nzambi nahembi Bayibolu hela chakwila akakudimbulula anazati chamuchidinyi nawu akañesheña antu kuyizatisha nawa ayikisañani.—Isa. 40:8; 1 Pet. 1:25.
Hela chochu, mazu ahoshawu muvasi 5 niwena alala. Yehova wakwashaña nikwamwina “antu anakukabakana” ‘nianakukabishawu,’ nawa wakatwalekahu kwila mwenimu.—Yoba 36:15; Mas. 6:4; 31:1, 2; 54:7; 145:20.
Dichi dinu, izu dakwila nawu “wakayihemba” did muvasi 7 datalisha kudanyi?
Neyi tushinshika nankashi hanidi isamu, tukukunkulula netu izu dakwila nawu “wakayihemba” datalisha kudi antu.
Isamu 12:1 dahosha hakukala kwamonañawu “antu ashinshika” alejañawu nsañu yakutwamba. Kuhiñahu, twawanaña mazu amwekeshaña nawu Yehova wakayimakena antu azatishaña idimi dawu chatama. Isamu datuleja nawu tunateli kumukuhwelela Nzambi netu wakaamwina antu jindi muloña mazu indi atooka.
Dichi vasi 7 yinakuhosha nawu Yehova “wakayihemba” nikuyikiña, dikwila nawu, antu akabishañawu kudi antu atama.
Izu dakwila nawu “wakayihemba” adizatishili muniyi vasi kwesekeja nachahosha nyivuñilu yakuhwelelawu yaNsona jachiHeberu. Izu dakwila nawu “wakatuhemba” adizatishili kapampa kayedi muvasi 7 mukubalumuna kwatachi kwaNsona jachiHeberu nakutwala muchiGiriki. Dichi, idi izu datalisha kudi antu ashinshika anakukabakana nawa anakukabishawu. Nkumininaku, vasi 7 yahosha nawu “muntu-himuntu” hakachi kawantu ashinshika akamukiña “hanidi ikiñu” dawantu atiyakeshaña yuma yatama. (Mas. 12:7, 8) MuBayibolu yaNsona jachiHeberu yabalumwiniwu mwidimi dachiAramayiki, chibalu chatachi chaniyi vasi nichena chazatisha “wakayihemba” nawa yatañewaña nawu: “Eyi MWANTA, wakayikiña aloña, wakayihemba kunidi ikiñu datama haya nyaaka.” Iwu hiwunsahu wukwawu wamwekeshaña hatooka nawu Isamu 12:7 hidatalisha kumazu aNzambiku.
Dichi, iyi vasi yakwashaña “antu ashinshika” kwikala nakuchiñeja kwakwila nawu, Nzambi wakayamwina.
