‘Kutoñojoka Yuma yakuSpiritu hiWumi niKuwunda’
‘Antu endaña mwaya spiritu atoñojokaña yuma yaspiritu.’—ROM. 8:5.
TUMINA: 57, 52
1, 2. Muloñadi Aroma kapetulu 8 chiyayitiyishilaña akwaKristu awayishewa kuwaha?
MWATAÑAHU dehi Aroma 8:15-17 hampinji yakwanakana chanukishu chakufwa kwaYesu? Hekwawu. Iyi nsona yalumbululaña chelukañawu akwaKristu nawu anayiwayishi, nawu spiritu yajila yashimunaña wunsahu hamu naspiritu yawu. Vasi yakutachikilahu munaka kapetulu yatena “antu ekala mudi Kristu Yesu.” Komana kapetulu 8 kamukanda waAroma kahosha hohu hadi awayishewa? Tahindi kahosha nihadi akwaKristu ekala nakuchiñeja kwakushakama hamaseki?
2 Aka kapetulu kahosha nankashi hadi akwaKristu awayishewa. Atambwilaña “spiritu” ‘nakuchiñilila chakekalawu anyana chikupu, kwokukuula kwamba kakuulawu nyijimba yawu.’ (Rom. 8:23) Achiñejaña kwikala anyana kaNzambi mwiwulu. Ekalaña muniku kuchiñeja muloña neyi anekali dehi akwaKristu, anapapatishewi, Nzambi wazatishili ifutu danyiloña hadi wena, wayanakeneni nshidi jawu nawa wayiteneni kuloña nindi hiyanyana akuspiritu.—Rom. 3:23-26; 4:25; 8:30.
3. Tukuhosheladi netu aRoma kapetulu 8 yinakundami nikudi antu akweti kuchiñeja kwakushakama hamaseki?
3 Hela chochu, Aroma kapetulu 8 kayitiyishaña kuwaha ninana ekala nakuchiñeja kwakushakama hamaseki muloña Nzambi wayimonaña nindi aloña. Tuneluki mwenimu muloña wamazu asonekeliyi Pawulu hakutachika. Mukapetulu 4, wahosheli hadi Abarahama. Iwu iyala wachikuhwelelu wadiñaku henohu Yehova kanda yahani Nshimbi kudi aIsarela nawa henohu Yesu kanda yatufwili. Hela chochu, Yehova wamweni nindi Abarahama wadiña nachikuhwelelu cheneni nawa wamuteneni nindi waloña. (Tañenu Aroma 4:20-22.) Munjila yoyimu, nimakonu Yehova nateli kutena akwaKristu ashinshika kuloña akweti kuchiñeja kwakushakama hamaseki haya nyaaka. Niwena anateli kuhetela mukufumba kwekala mukapetulu 8 kamukanda waAroma kwafumbawu aloña.
4. Aroma 8:21 yikuletesha tutoñojoki hamalwihwinyi?
4 HaAroma 8:21, twawanañahu mazu amwekeshaña nawu ituña dadiha dakenza. Iyi vasi yahoshaña nawu “kuleña kwakweni kufumi muwuduñu wakutoka kwiñili muwaana wawanyana kaNzambi wowu waana walema.” Dichi chidi kudetu neyi tukuzata nañovu kulonda twakeñilimu hela twakatambwili iwu wuloku. Munakuhweleli nenu mukeñilamu? Kufumba kwekala muAroma kapetulu 8 kukuyikwasha kwila mwenimu.
‘YITOÑOJOKA YAMUJIMBA’
5. Nsañwinyi yalema yasonekeliyi Pawulu haAroma 8:4-13?
5 Tañenu Aroma 8:4-13. Aroma kapetulu 8 kahosha hadi antu ‘endaña mwaya mujimba’ chambukawu nawantu ‘endaña mwaya spiritu.’ Amakwawu anateli kuhosha nawu aka kapetulu kahosha hadi antu ekala muchalala nawantu abula kwikalamu hela akwaKristu nawabula kwikala akwaKristu. Hela chochu, Pawulu wasonekeleleña ‘ejima adiña muRoma akeñawu kudi Nzambi, atambikawu kwikala akwakujila.’ (Rom. 1:7) Dichi, Pawulu wambwileña akwaKristu endeleña mwaya mujimba nawakwaKristu endeleña mwaya spiritu. Chambwinyi chadiñahu?
6, 7. (a) Izu ‘damujimba’ adizatishaña ñahi muBayibolu? (b) Pawulu watalishili mudihi hakuzatisha izu ‘damujimba’ haAroma 8:4-13?
6 Tuhoshenu ntahi hezu dakwila nawu ‘mujimba.’ Pawulu wateneneñadi? Bayibolu yazatisha izu ‘damujimba’ munjila yashiyashana. Mpinji yikwawu, yatenaña mujimba Rom. 2:28; 1 Kor. 15:39, 50) Adizatishaña cheñi hakutena akwawusoku. Yesu “wavwalikili kumutaña waDavidi wakumujimba,” nawa Pawulu wamweneña aYudeya neyi ‘antaña jami akumujimba.’—Rom. 1:3; 9:3.
wamuntu. (7 Hela chochu, mazu asonekeliyi Pawulu mukapetulu 7 atwikwashaña kwiluka mwatalisha izu ‘damujimba’ datenawu haAroma 8:4-13. Wesekejeli ‘kushakama mwaya mujimba’ ‘nakufwila nshidi’ yadiña ‘nakuzatika muyidi yawu yamujimba.’ (Rom. 7:5) Ichi chinatukwashi kutiyishisha mwatalishili mazu aPawulu akwila nawu ‘hiyachidiña kushakama mwaya mujimba, afwilileña yuma yakumujimba.’ Wateneneña antu aluwankana hela asha maana kuyuma yafwilañawu aweni. Awa diwu antu eñija nyitu yawu chikupu muyilwilu yawuvumbi hela yuma yikwawu.
8. Muloñadi akwaKristu awayishewa chayisoñamishililuwu kutalisha ‘hakwenda mwaya mujimba’?
8 Ilaña munateli kujinoka nenu muloñadi Pawulu chayisoñamishileñayi akwaKristu awayishewa kuwubanji wakushakama ‘mwaya munjimba.’ Komana akwaKristu makonu etejayi Nzambi kwikala amabwambu jindi nawa amonañayi kuloña anateli kwikala muwubanji wamuchidiwu? Chawushona, mukwaKristu wejima nateli kutachika kwenda mwaya mujimba wanshidi. Chakutalilahu, Pawulu wasonekeli nindi amanakwetu amakwawu muRoma adiña anduñu “amavumu awu,” dikwila nawu afwilileña wuvumbi, yakuda, yakunwa hela yuma yikwawu. Amakwawu adiña ‘nakudimbeka akadi maana.’ (Rom. 16:17, 18; Fwil. 3:18, 19; Yuda 4, 8, 12) Anukenu, mpinji yimu, manakwetu wumu muKorinda wakamineña “ñoda tata yindi.” (1 Kor. 5:1) Dichi, Nzambi wawahishili hakumuzatisha Pawulu kusoñamisha akwaKristu ‘kubula kwenda mwaya mujimba.’—Rom. 8:5, 6.
9. Yumanyi yabulili kutenayi Pawulu mukusoñamisha kudi haAroma 8:6?
9 Awa mazu akusoñamisha achidi kuzatika nikulelu. Hanyima yakumuzatila Nzambi hadi yaaka yayivulu, mukwaKristu wukutachika kusha maana hayuma yakumujimba. Hitunakutena mukwaKristu watoñojokaña hayakuda, mudimu, mpinji yakunooka hela hamawuluku. Iyi diyuma yakeñaña
ambuña aNzambi ejima. Yesu wadiileña yakuda nawa wadiishili antu. Welukili nindi kunooka kwakuwahi. Nawa Pawulu wahosheli nindi kubulakana kweyala namumbanda kwalema mumawulu.Nhoshelu yenu yamwekeshaña nawu mwatoñojokaña yuma yakuspiritu tahindi yakumujimba? (Talenu paragilafu 10, 11)
10. HaAroma 8:5, 6, izu dakwila nawu “kutoñojoka” datalisha mudihi?
10 Hanu dinu Pawulu watalishili mudihi hakuhosha nindi ‘kutoñojoka yuma yakumujimba’? Izu dachiGiriki dazatishiliyi Pawulu datalisha mukwila nawu “kusha yitoñojoka hela muchima hayuma, kutoñojoka chikupu hayuma yiwunakukeña kwila, sweje-e yuma yafwilaña mujimba weyi.” Antu ashakamaña kwesekeja namwaya mujimba etejaña nyijimba yawu yanshidi kuyilombola. Nkuluñaña wumu wahosheli kutalisha hamazu adi haAroma 8:5 akwila nawu: “Ashili yitoñojoka yawu nindi, akeñesha, ahoshaña nankashi hela adiñijaña muyuma yakumujimba.”
11. Yumanyi yitwatela kutoñojokahu neyi hitukudihula netu, ‘Yumanyi yitwalemesha nankashi muwumi?’
11 Dichi akwaKristu amuRoma ateleli kutoñojoka chikupu hayuma yalemesheliwu. Komana aswejeli kukeña ‘yuma yakumujimba’? Dichi ninetu twatela kutoñojoka chikupu hayuma yitwalemesha muwumi. Yumanyi yitwakeña nankashi nawa nhoshelu yetu yamwekeshañadi? Yumanyi yitwafwilaña hefuku hefuku? Amakwawu ashaña maana hakutompa vinyu yayiha, kuwahisha itala, kulanda yakuvwala yayiha, kwila bizininsi, kuya nakunooka niyuma yikwawu. Iyi yuma yatama wanyi; hiyuma yitwafwilaña. Chakutalilahu, mpinji yimu Yesu welishili vinyu nawa Pawulu wamulejeli Timotewu nindi yanweña “tuvinyu twanti.” (1 Tim. 5:23; Yow. 2:3-11) Komana Yesu niPawulu “ahosheleña mpinji yejima” havinyu? Komana dikuyashiliwu maana nakuhoshahu mpinji yejima? Inehi. Indochu etu? Yumanyi yitwalemesha nankashi muwumi?
12, 13. Muloñadi chitwatelela kubabala nayuma yitwatoñojokaña?
12 Kudishinshika kwalema. Muloñadi? Pawulu wasonekeli nindi: ‘Yitoñojoka yamujmba hikufwa.’ (Rom. 8:6) Dikwila nawu tukufwa kuspiritu chayinu mpinji nawa twakafwa kumujimba kumbidi. Hela chochu, Pawulu wahosheleña wanyi nindi neyi muntu yekala ‘nayitoñojoka yamujimba’ dikwila nawu wakafwa. Muntu nateli kuhimpa. Toñojokenu hadi iyala wadiña nayilwilu yatama muKorinda weliliña yuma ‘yakumujimba’ nawa wahañiliwu muchipompelu. Ilaña wahimpili. Walekeli kwenda mwaya mujimba nawa watachikili kwenda munjila yoloka.—2 Kor. 2:6-8.
13 Chineli ona muntu wahimpili, dikwila nawu mukwaKristu niyena makonu nateli kuhimpa, sweje-e neyi nakwila wanyi yuma yatama yelileñayi ona iyala muKorinda. Dichi kusoñamisha kwaPawulu hayuma yafumaña ‘mukutoñojoka yuma yakumujimba’ kwatela kukwasha akwaKristu kuhimpa!
‘KUTOÑOJOKA YUMA YAKUSPIRITU’
14, 15. (a) Twatela ‘kutoñojoka hayumanyi’? (b) ‘Kutoñojoka yuma yakuspiritu’ kwatalisha mudihi?
14 Hanyima yakutusoñamisha ‘hakutoñojoka yuma yakumujimba,’ kapostolu wahosheli mazu akukolesha nindi: ‘Kutoñojoka yuma yakuspiritu hiwumi nikuwunda.’ Wuloku wutwakatambwila wawuwahi, wumi nikuwunda. Tunateli kutambwila ñahi iwu wuloku?
15 ‘Kutoñojoka yuma yakuspiritu’ bayi neyi chinayi mukwila nawu muntu wukwilaña wanyi yuma yakumujimba. Watela wanyi kutoñojoka hohu nikuhosha hadi Bayibolu Maku 6:3; 1 Tesa. 2:9.
hela hawubwambu windi naNzambi nihakuchiñeja kwindi kwakumbidi. Anukenu nenu Pawulu niantu amakwawu amumafuku awapostolu amukalakeleleña Nzambi adiña nakwila yuma yeleñawu antu ejima. Adiileña nikunwa. Amavulu asumbwili, adiña nawanyana nawa azatileña nyidimu yakumujimba.—16. Hela chakwila wazatileñaku nyidimu yashiyashana, Pawulu washili maana hanka?
16 Hela chochu, ana ambuña aNzambi hiyishili hohu maana haniyi yuma muchihandilu chawuku. Hela chakwila Pawulu wadiña nakuchima matenti, nsona jamwekeshaña nawu: Washili muchima hamudimu wakushimwina nikutañisha. (Tañenu Yililu 18:2-4; 20:20, 21, 34, 35.) Walejeliyi amanakwidi niahela muRoma kwila mwelileñayi. Pawulu washili maana hayuma yakuspiritu nawa wazatileña ninyidimu. AkwaRoma ateleleli kumwimbujola nawa ninetu twatela kumwimbujola.—Rom. 15:15, 16.
17. Tukwikala nachihandilu chamuchidinyi neyi ‘tutoñojokaña yuma yakuspiritu?’
17 Yumanyi yinateli kufumamu neyi tusha maana hayuma yakuspiritu? Aroma 8:6 yakula hatooka nawu: ‘Kutoñojoka yuma yakuspiritu hiwumi nikuwunda.’ Dikwila nawu twatela kwiteja yitoñojoka yetu kuyilombola kudi spiritu yajila nawa toñojokeña neyi chatoñojokañayi Nzambi. Tukwikala nachihandilu chachiwahi neyi atwilombolaña kudi ‘spiritu.’ Nawa kumbidi twakaheta wumi wahaya nyaaka, chili mwiwulu hela hamaseki.
18. Twekalaña ñahi mukuwunda neyi ‘tutoñojokaña hayuma yakuspiritu’?
18 Tuhanjekenu hamazu akwila nawu ‘kutoñojoka hayuma yakuspiritu hikuwunda.’ Antu amavulu adana kuwunda kwamuyitoñojoka. Hampinji yinakululutawu nakukeña kuwunda, etu tudi nakuwunda kwamuyitoñojoka. Twekala nakuwunda muloña twafwilaña kwikala mukuwunda nawataña jetu niamanakwetu nihela muchipompelu. Tweluka netu wejima wetu twawanina wanyi. Dichi mpinji yikwawu kukala kwenzaña, ilaña twatela kulondela kufumba kwaYesu kwakwila nawu: ‘Tiyañanaku namana kweyi.’ (Mat. 5:24) Chumichi chikutupelela neyi twanuka netu manakwetu hela muhela niyena nakumukalakela ‘Nzambi wahanaña kuwunda.’—Rom. 15:33; 16:20.
19. Kuwunda kwamuchidinyi kutwekalaña naku neyi tutoñojokaña hayuma yakuspiritu?
19 Kudi kuwunda kukwawu kwasweja kulema. Twekalaña mukuwunda naNleñi yetu neyi ‘tutoñojokaña hayuma yakuspiritu.’ Isaya wasonekeli mazu ashikijeweli hayina mpinji, nawa anakushikijewa chikupu makonu akwila nawu: “Muntu wukweti yitoñojoka yashindamena hadeyi [Yehova] wakamuhemba, wakatula muchima windi mwivumu hi-i nanochu chakukuhwelelayi eyi.”—Isa. 26:3; tañenu Aroma 5:1.
20. Muloñadi wutwatela kusakilila kufumba kwekala mumukanda waAroma kapetulu 8?
20 Hela chakwila tukaya mwiwulu hela tudi nakuchiñeja kwakushakama muparadisa hamaseki, wejima wetu tunateli kuhetelamu mumukanda waAroma kapetulu 8. Twasakililaña nankashi hakutukolesha kubula kulemesha yuma ‘yakumujimba’ muchihandilu chetu! Ilaña tweluka netu kwovwahila kufumba kwakwila nawu: ‘Kutoñojoka hayuma yakuspiritu hiwumi nikuwunda.’ Wuloku wakwila mwenimu hiwumi wahaya nyaaka, muloña Pawulu wasonekeli nindi: “Wufwetu wanshidi hikufwa, ilaña chamukunkulu chaNzambi hiwumi wahaya nyaka, mudi Kristu Yesu, Mwanta wetu.”—Rom. 6:23.