HENOHU yumiyi kanda yimwekani, nelili natachika dehi kudiza chalala nawa chanshikili hamuchima. Amama atambwili mukanda wamuBayibolu nawa nawutañili chikupu, sweje-e yakutalilahu yadiñamu. A tata ayikaanishileña amama kunlejaku yuma yadizileñawu. Ilaña, nakeñeleña kwiluka nawa nayihwileña malwihu, dichi atachikili kundizisha neyi atata anafumi hetala. Chafuminimu, ninami nafuukwili nami natela kudihana kudi Yehova. Napapatisheweli kuBlackpool, England, mu 1943 henohu nidi nayaaka ikumi.

Kufuma haniyi mpinji, nayileña nawamama mwiha mpinji yejima. Hakushimwina nsañu yayiwahi yamuBayibolu, twazatishileña yisanji. Iyi yisanji yadiña yamaneni nawa yalema makeji 4.5. toñojokenu, kansi wudi neyi ami nasendi chuma walema!

Chinashikijili yaaka 14, nakeñeleña kwikala payiniya. Amama anlejeli nawu nisambili kuhosha nañamba yawamanakwetu (wunakutenawu makonu nawu nkoñi wañinza). Ñamba wanlejeli nindi natela kudiza  mudimu wakuwaninamu mali akudikwasha nachu muwupayiniya. Dichinelili. Hanyima yakuzata hadi yaaka yiyedi, nenhwili nkoñi wañinza mukwawu kutalisha hansañu yawupayiniya. Yena nindi, “Wunateli kutachika!”

Dichi, muApril 1949, twalandishili yitwamu yadiña mwitala mutwasonkeleleña nawamama, twayili mumusumba waMiddleton, kwakwihi namusumba waManchester, kutwatachikilili wupayiniya. Chimwahitili tukweji tuwana, nakeñeli manakwetu wakuzata nindi wupayiniya. Kasanji kamutayi katulejeli nawu tuyi kuchipompelu chatuñiliwu katataka muIrlam. Amama azatileña wupayiniya namuhela wamuchipompelu chikwawu.

Hela nadiña nayaaka 17, ami nimukwetu atwinkeli mudimu wakulombola kupompa muloña muchipompelu mutwayili mwadiña amanakwetu ashikahu antesha hohu. Nkumininaku, ami añilili nawu niyi muChipompelu chaBuxton, chipompelu chadiña nawakwakushimwina antesha nawa chadiña mukukaankila. Natoñojokaña nami yuma yejimiyi yankwashileña kuzata chiwahi nyidimu yanyinkeliwu kumbidi.

Mu 1951, nasonekeli fomu yakukeña kuya kuWatchtower Bible School of Gilead. Ilaña, in December 1952, antambikili nawu niyi nakwiñila wushidika. Nalombeli wukwashu  nami abuli kuñushahu muloña nadiña nkoñi wampinji yejima, ilaña akwachota akaanini nawa ankasili hadi tukweji 6. Mukaleya, natambwilili mukanda wakuntambika kushikola yaGileyadi yanaamba 22. MuJuly 1953, nakandamini mbopolu yaGeorgic, yayileña kuNew York.

Chinashikili, nawanikili kukupompa kwaNew World Society Assembly mu 1953. Nayili cheñi namasuwa kuSouth Lansing, New York, kwadiña shikola. Chineli dihu nafumini mukaleya, nadiña nakadali kantesha. Chinasulukili mumasuwa, nakandamini basi yakuya kuSouth Lansing, dichi nakongweli mali 25-cent kudi mukwetu mukwakwenda kulonda nendeli.

Shikola yaGileyadi yankwashili chikupu kulonda ‘nikali yuma yejima kudi antu ejima’ muwumishonali. (1 Kor. 9:22) Muwusatu wetu, ami, Paul Bruun niRaymond Leach, atutemesheli kuPhilippines. Twashakamini tukweji twatuvulu hakwila nawu mavisa etu ediki; twanyamukili nakuya nambopolu kuhitila muRotterdam, muKaluñalwiji kaMediterranean, munfumba yaSuez Canal, Indian Ocean, Malaysia niHong Kong, twendeli hamenji mafuku 47. Nkumininaku, twashikili muManila haNovember 19, 1954.

Twatachikili kudijilila nawantu itwaweni, ituña nikudiza idimi. Hela chochu, wejima wetu asambili kutwisha muchipompelu chimu mumusumba waQuezon mwadiña amanakwetu ahosheleña Chizungu. Chimwahitili tukweji 6, twelukili hohu mazu antesha muchiTagalog. Iku kukala kwamanini chatwinkeliwu mudimu wukwawu.

Ifuku dimu muMay 1955, chitwashikili hetala kufuma kutwayili nakushimwina, ami niManakwetu Leach twawanini ndaama yanyikanda mukapeka ketu. Munyikanda atulejeli nawu anatwinki mudimu wakwikala ankoñi añinza. Nadiña hohu nayaaka 22, iwu mudimu wanyikeli mpinji ‘yakwikala yuma yejima kudi antu ejima’ munjila jambokamboka.

Chakutalilahu, nahanini mpanji yawantu amavulu yatachi neyi nkoñi wañinza mulubanza lwamukala. Nkumininaku, nelukili nami kwesekeja nachisemwa chamaPhilipines, mpanji yawantu amavulu yatela kwikala mulubanza lwamukala. Chinadiña nakwendela yipompelu yashiyashana, nahanineña jimpanji mujinzañu, hayisankanu, hajikansulu, kumabulu, maluña amawahi nimunyikwakwa. Ifuku dimu muSan Pablo City, nvula yankañesheli kuhana mpanji yawantu amavulu hachisankanu, dichi nayilejeli aeluda nami tuzatishi Itala daWanta. Nkumininaku, aeluda añihwili nawu neyi tupompela Mwitala daWanta kwiji tukwila netu hikupompa kwawantu amavulu chineli tunapompeli hanji wanyi.

Nakamineña mumatala awamanakwetu. Hela matalawu adiña anyanya, adiña awunyonji. Nakamineña hamaati yawuvuji yakwala hepulanga. Nadizili kuwelela hanji muloña kwadiña kwosi tupeka twakuwelela. Nazatishileña jeepney nibasi, mpinji yikwawu nayileña nawatu kuyituutu yikwawu. Kanda nilandeñahu dehi motoka muyaaka yejimiyi.

Kushimwina mwiha nikwendela yipompelu kunankwashi kudiza chiTagalog. Nayiluhu wanyi kushikola kwadizishañawu idi idimi, ilaña nadizili kuhitila mukutiya chahosheleñawu amanakwetu neyi anakushimwina nihakupompa. Amanakwetu akeñeleña nawu nidizi nawa nayisakililaña hakuñusha maana nimunhoshelu yawu.

 Chimwahitili mpinji, kukooleka kukwawu kwanyikeleñawu kwankwashili kuhimpa. Mu 1956, chelili Manakwetu Nathan Knorr yenzi, anyinkeli mudimu wakuhanjeka nawantu hakupompa kwetuña. Iwu mudimu nawilukili wanyi, akwetu ankwashili nankashi. Chaaka chamanini wanyi, kwadiña cheñi kupompa kukwawu kwetuña hampinji yenjiliyi Manakwetu Frederick Franz wafumini kukasanji keneni kamukaayi kejima. Chineli nadiña nkoñi wakupompa, nadizili jajivulu kudi Manakwetu Franz wahimpili nzatilu yindi kulonda antu ahetelimu. Amanakwetu amunidi iluña azañaleli hakumona Manakwetu Franz navwali yakuvwala yakuPhilipines yabarong Tagalog, hakuhana mpanji yawantu amavulu.

Nahimpili cheñi yilwilu yami hampinji yanlejeliwu kukalakala neyi nkoñi wankambi. Hayina mpinji, twatambishileña fyumu yaThe Happiness of the New World Society, mumaluña mwekalaña antu amavulu. Mpinji jikwawu, atububu apupileña. Apupileña muloña wachejeji chapulojekita nawa akakeleleña mupulojekita. Twamweneña kankwe-e hakwila tuyiwahishi. Nloñeshelu yakutambisha mafyumu yatukalileña, ilaña twatiyileña kuwaha hakumona antu chelukileñawu chekala kuloñesha kwaYehova.

Atupristu awakatolika ayimakeneneña akwanfulumendi nawu abuleña kutwinka  lusesa lwakupompa. Hela akutachika kuluwañesha progilamu yetu kuhitila mukwimba ngezu neyi tunakuhana jimpanji kwakwihi namachechi awu. Hela chochu, mudimu wendeli, amavulu munawa maluña ichi hiyakwakudifukula aYehova.

Mu 1959, natambwili mukanda wakunleja nawu ananyinki mudimu wakuzatila hakasanji kamutayi. Chumichi chanletesheli nidizi jajivulu. Mukuhita kwampinji, anleji nawu nukwendelaña tusanji twamumatuña acheñi. Halwendu lumu, natachikili kuhanjeka naJanet Dumond, mishonali wakuThailand. Twahanjekeleña nankashi nawa twadisumbwili. Tunashakami mumaluwi nakumuzatila Nzambi hamu hadi yaaka 51.

Nadiña nakukooleka kwakwendela antu jaYehova mumatuña 33. Hamuloña wanyidimu yanyinkeliwu hatachi, yankwashili kwiluka chakuzata nakukala kwashiyashana. Awa malwendu ankwashili kwiluka yuma yayivulu nikumona kukeña kwaYehova chikwakwashaña antu ejima.—Yililu 10:34, 35.

Natiyaña kuwaha kuzatila hamu nawamanakwetu muPhilippines. Ichi akwakushimwina anavuli nankashi kubadika chadiñawu hinenjili. Ami nimwinikwami Janet tuchidi kuzatila hakasanji kamutayi waPhilippines mumusumba waQuezon. Hela nazati yaaka 60 mwituña dacheñi, nichidi kuhimpa muyuma yejima yinakukeñayi Yehova kuhimpa. Kuhimpa kunakumwekana makonu mukuloñesha kunakumwekesha nawu twatela kwikala amwovu hakumuzatila Nzambi niamanakwetu.

Yitoñojoka yetu yidi yakwila nawu twatela kwiteja yuma yejima yitukumona netu hinkeñelu yaYehova, chumichi chatuzañaleshaña nankashi. Tuneseki cheñi kuhimpa yilwilu yetu nikukalakela amanakwetu chiwahi. Tunakufwila chikupu netu, neyi Yehova neteji, tunakukeña kwikala ‘yuma yejima kudi antu ejima.’