Munakwanuka?
Komana mwatañili nakanañachima yibaaba yakatataka yaKaposhi Kakutalila? Talenu neyi mukutwesha kwakula awa malwihu:
Nshidi yamuchidinyi yateneniyi Yesu mukufumba kwekala haMatewu 18:15-17?
Wateneneña tuyiluwa twekalaña hakachi kawakwaKristu. Ilaña nshidi yinateli kwikala yeneni neyi muntu yaakana kumanisha kukala nawa anateli kumuhana nimuchipompelu. Chakutalilahu, nshidi yinateli kwikala wupwapoki nimatuñu.—w16.05, ifu 7.
Munateli kwila ñahi kulonda muhetelelamu mukutaña Bayibolu?
Mwatela kwila iyi yuma yinalondelihu: Tañenu nakanañachima, sandujolenu, dihulenu enu aweni malwihu adi neyi ‘Nukuzatisha ñahi iyi nsañu muchihandilu chami?; nawa zatishenu yitwa yakusandujola kulonda musandujoli hansañu yimunafumi nakutaña.—w16.05, mafu 28-31.
Komana chatama kudi mukwaKristu kuneña hela chakwila wakuhwelela mukusañuka?
Kukuhwelela mukusañaku bayi neyi kwaleteshaña mukwaKristu kubula kutiya kutama neyi nafwishiku. Abarahama wadilili hafwiliyi Sara. (Kuch. 23:2) Mukuhita kwampinji, chineñi chamanaña.—wp16.3, ifu 4.
Indi iyala wadiña naluseñu lwawulombu lwamukwakusoneka watenawu mukunda waEzekeli kapetulu 9 niamayala 6 adiña nayitwa yakujaha nachu hiyanyi?
Emenañaku ñovu yamwiwulu yazatishiliwu hakujilumuna Yerusalema nawa yakazatishawu hakujilumuna kaayi katama haAmagedoni. Makonu, iyala wadiña naluseñu lwawulombu wemenañaku Yesu, wakafundaña antu akapuluka.—w16.06, mafu 16-17.
Bayibolu yapulukili kuyumanyi?
Yapulukili (1) muloña nyilela niyitembi hasonekeliwu yakisikili wanyi; (2) kudi akwapolitiki niakulumpi jansakililu akeñeleña kuyijiyisha nawa (3) ayimpili wanyi kudi antu akeñeleña kuyihimpa.—wp16.4, mafu 4-7.
MukwaKristu nateli kupeleshela ñahi chihandilu?
Ilukenu yuma yimunakaankili nawa bayi mulanda yuma yinakubula kukeñeka. Loñeshenu bajeti yashikila. Landishenu yuma yimwabulaña kuzatisha nawa fwetenu nyikudi yejima yimukweti. Keheshenuku mpinji yimwazataña mudimu nawa toñojokenu chimunateli kuzata nankashi mumudimu wakushimwina.—w16.07, ifu 10.
Bayibolu yatena yumanyi yalema kubadika wuru hela siliva?
Yoba 28:12, 15 yamwekeshaña nawu maana afuma kudi Nzambi abadika wuru nisiliva. Dichi twatela kwikala adizoza nawa ashinshika neyi tunakukeña kwikala nanawamaana.—w16.08, mafu 18-19.
Komana manakwetu nateli kuhemba wevu makonu?
Muyisemwa yikwawu, eteja kuhemba wevu nikuwuteta chiwahi, chumichi hichinateli kukañesha antu kutambwila nsañu yaWantaku. Hela chochu, amanakwetu amakwawu akeñaña wanyi kuhemba wevu. (1 Kor. 8:9) Muyisemwa yikwawu hela mumaluña amakwawu, ahembaña wanyi wevu nawa amonaña nawu mukwaKristu hatelela kuhemba wevuku.—w16.09, ifu 21.
Muloñadi chatela kwitejela netu Davidi naGoliyati azuñili?
Goliyati waleheli mamita 2.9 kubadika muntu wamulehi nankashi munanu mafuku. Davidi wadiña muntu yomweni neyi chamwekeshaña nsañu yakunyaka yahoshaña hetala daDavidi nichahosheliyi Yesu. Nsañu yahosha hamaluña kwashakamineñawu yesekana nansañu yitweluka.—wp16.5, ifu 13.
Munateli kwambula ñahi maana, kwiluka nikutiyishisha?
Muntu weluka, wekalaña nansañu hela yikuma yayivulu. Muntu watiyishishaña wamonaña chikuma chimu chichinadifwani nachikwawu. Muntu wukweti maana weluka nikutiyishisha chiwahi kulonda jimukwashi kuzata munjila yayiwahi.—w16.10, ifu 18.