1, 2. (a) Muloñadi wutwatela kubulila kuhayama neyi tunakwakama? (Talenu mwevulu wakutachikilahu.) (b) Yumanyi yikutukuhanjeka muchinu chibaaba?

TUNAKUSHAKAMA mumpinji yakala. Satana Diyabolu nazuwi chikupu nawa ‘nakutambatamba nakukeñakeña akudayi, neyi mutupa wabulumaña.’ (1 Pet. 5:8; Chim. 12:17) Dichi, ninetu ambuña aNzambi twakamaña mpinji yikwawu. Kunyima, ambuña aYehova adi neyi Mwanta Davidi, mpinji yikwawu ‘akamineña.’ (Mas. 13:2) Anukenu cheñi nenu, kapostolu Pawulu ‘wakameni yipompelu yejima.’ (2 Kor. 11:28) Ilaña tunateli kwila ñahi neyi tunakwakama?

² Tata yetu wukweti kukeña wekala mwiwulu wakwashili ambuñindi kunyima nawa watukwashaña nimakonu kulonda tubuleña kwakama. Bayibolu yatulejaña nawu: “Mutwikenu kwakama kwenu kwejima, muloña yena wayihembaña.” (1 Pet. 5:7) Hanu dinu, munateli kwila ñahi mwenimu? Tuhanjekenu hanjila jiwana jikuyikwasha kwila mwenimu, kulomba  chakufuma hamuchima, kutaña Izu daNzambi nikutoñojokahu, kulomba spiritu yaYehova yajila nikuhanjeka namuntu imwakuhwelela. Chitukuhanjekaña haniyi yikuma, toñojokenu himunateli kuzatila.

3. Munateli ‘kumbila ñahi chiteli chenu hadi Yehova’ kuhitila mukulomba?

³ Chuma chatachi chitwatela kwila hikulomba kudi Yehova. Neyi mudi mukukala kunateli kuyiletesha kwakama, mwatela kumuleja Tata yenu wamwiwulu wukweti kukeña. Davidi ñimbi yamasamu wamulembeleli Yehova nindi: “Tiyililaku munukulomba, eyi Nzambi.” Mwisamu dodimu, wahosheli nindi: “Umbilaku chiteli cheyi hadi Yehova, yena wukukukwashaku.” (Mas. 55:1, 22) Neyi munazati dehi nañovu kumanisha kukala kwenu, kulomba kwakufuma hamuchima kukuyikwasha kubula kwakama. Hanu dinu kulomba kunateli kuyikwasha ñahi kubula kusweja kwakama?—Mas. 94:18, 19.

4. Kulomba kwalemenadi neyi tunakwakama?

⁴ Tañenu Afwilipi 4:6, 7. Yehova nateli kwakula kulomba kwetu kwakufuma hamuchima nakulembelela. Munjilanyi? Nateli kutukwasha kwikala nakuwunda kwamuyitoñojoka nimumuchima kulonda tubuleña kwakama. Antu amavulu anateli kwiteja chumichi, kwesekeja nachayikwashiliyi. Nzambi wayikwashili, kwikala mukuwunda hampinji yadiñawu mukwakama kwasweja. Ninenu dichi munateli kutiya. Dichi “kuwunda kwaNzambi” kunateli kushinda kukala kwejima kumunateli kumona. Mwatela kumukuhwelela chikupu Yehova chayishiikayi nindi: “Bayi wuyeñashanaku, ami yami Nzambi yeyi, nakakwinkaña ñovu; chalala nakakukwashañaku.”—Isa. 41:10.

5. Izu daNzambi dinateli kutukwasha ñahi kwikala nakuwunda muyitoñojoka?

⁵ Njila yamuchiyedi yikutukwasha kwikala nakuwunda hikutaña Bayibolu nikutoñojokahu chikupu. Muloñadi chikwalemena? MuBayibolu mwekala kufumba kunateli kuyikwasha kukehesha hela kuleka kwakama. Bayi mudiwula Izu daNzambi, dinateli kuyikwasha muloña mwekala maana aNleñi yomweni. Chimukutoñojokaña hayitoñojoka yaNzambi mwaana hela wufuku nikutala chimunateli kuzatisha kufumba kwamuBayibolu, mukukoleshewa chikupu. Yehova wesekejeli kutaña Izu dindi ‘nakudikwatisha nikuumika chikupu’ bayi ‘kutiya woma nakwakamaku.’—Yosh. 1:7-9.

6. Mazu aYesu akuyikwasha ñahi?

⁶ Mwizu daNzambi twawanañamu mazu aYesu akukolesha. Mazu indi nintañishilu yindi yadiña nakukolesha antiyilili jindi. Antu amavulu enjileña kudi yena muloña wadiña nakuwundisha antu adiña nanyichima yachikeka, kukolesha azeya nikukundeja aneña. (Tañenu Matewu 11:28-30.) Wamwekesheleña antu kukeña kuhitila mukuyikwasha kuspiritu, muyitoñojoka nikumujimba. (Maku 6:30-32) Yesu wuchidi kukwasha antu niyinu mpinji. Ninenu munateli kutiya neyi chatiyileña atumbanji twaYesu hakwenda nindi. Bayi neyi munateli kukoleshewa hohu chiña neyi munakumumona Yesuku. Hamu neyi Mwanta wamwiwulu, Yesu natwalekihu kwikala nikumwekesha luwi. Dichi, neyi munakwakama, nateli ‘kuyikwasha hampinji yatelela.’ Yesu wukuyikwasha kuumika kukala kwejima nawa wukuyikwasha kwikala ahamuka.—Heb. 2:17, 18; 4:16.

7. Mukuhetelamu ñahi neyi Nzambi yayinka spiritu yajila yimwamulomba?

⁷ Yesu wahosheli nindi Tata yetu wamwiwulu wukakañanya wanyi kwinka spiritu yajila ejima Amulombaña. (Luka 11:10-13) Ichi dichuma chamuchisatu chinateli kuyikwasha kumanisha kwakama, mukabu waspiritu. Iyi yilwilu yayiwahi yitwekalañanayu muloña wañovu jaNzambi yamwekeshaña chekalayi Nzambi wañovu. (Tañenu Aŋalija 5:22, 23; Kol. 3:10) Neyi mwikala nanyikabu yakuspiritu, wubwambu wenu nawakwenu wukukola. Dichi, kukala kunateli kuleñela kwakama kukwikalaku wanyi. Shinshikenu hachinateli kuyikwasha nyikabu yakuspiritu.

8-12. Nyikabu yaspiritu yajila yaNzambi yinateli kuyikwasha ñahi neyi munakwakama?

⁸ “Kukeña, muzañalu, kuwunda.” Neyi mutiyañanaña nawantu, chikuyipelela kumanisha kukala kumukweti enu aweni. Munjilanyi? Neyi tukeñañana nawamakwetu, tuyitila wushona nikuyilemesha tukutondolwela yuma yinateli kutuletesha kwakama.—Rom. 12:10.

⁹ “Kukaba kabe-e, luwi, kuwaha.” Munateli kuleta kuwunda chimovwahila kufumba kwakwila nawu: “Dikokwejenu muntu namukwawu; ikalenu namuchima wawushona; danakenenu muntu namukwawu.” (Efwes. 4:32) Neyi mwila mwenimu, mukukañesha yuma yinateli kuletesha kwakama. Cheñi, munateli kushinda kukala kwenzeña muloña wakubula kuwanina.

¹⁰ “Chikuhwelelu.” Makonu, twakamaña nankashi chakuwana mali niyuma yakumujimba. (Yish. 18:11) Dichi, kumukuhwelela chikupu Yehova kunateli kuyikwasha kubula kwakama. Munjilanyi? Tunateli kuleka kwakama nankashi neyi twovwahila kufumba kwaPawulu kwakumona “yuma yimudi nayu nenu yinawani.” Pawulu wabombelelihu nindi: “Muloña [Nzambi] yomweni nahoshi nindi, Hinamba kakulekaku, hela kukushiya hinakakushiyaku. Dichi twahoshaña chakadi woma netu, Yehova diyi nkwashi yami, hinukutiya womaku, antu akuñila chumanyi?”—Heb. 13:5, 6.

¹¹ “Kwovwaha, kudihemba.” Toñojokenu chimunateli kuhetelamu neyi mwikala naniyi yilwilu. Mukwila wanyi yuma yinateli kuyiletesha kwakama nawa chikuyikwasha neyi mubula kwikala naniyi yilwilu yidi neyi “ndulu, nindombu, nikuzuwa, nimapumba, nikutukana.”—Efwes. 4:31.

¹² Mwatela kwikala adizoza kulonda mwovwahili “chikasa chaNzambi chañovu” ‘nikumutwika kwakama kwenu kwejima.’ (1 Pet. 5:6, 7) Neyi mwikala adizoza, mukwikala nawuselewa waNzambi nawa wukuyikwashaña. (Mika 6:8) Neyi mwiluka hakumina ñovu jenu, mukwakamaña nankashi wanyi muloña mukushindamenaña hadi Nzambi.

13. Yesu watalishili mudihi chahosheliyi nindi: “Bayi mwakamaku”?

¹³ HaMatewu 6:34 (tañenu), hekala kufumba kwakuwahi kwaYesu kwakwila nawu: “Bayi mwakamaku.” Chinateli kumwekana neyi chakala kulondela iku kufumba. Yesu watalishili mudihi chahosheliyi nindi: “Bayi mwakamaku”? Watalishili wanyi mukwila nindi kambuña Nzambi kwila yakama nehi mukuhanda kwindi kwejima, twahajekahu  dehi hamazu ahosheliyi Davidi niPawulu haniyi nsañu. Ilaña Yesu wakwashileña atumbanji twindi kwiluka nawu kwakama kwabula kutelela hela kwasweja, kwamanishaña wanyi kukala. AkwaKristu hiyatela kwakama yuma yakunyima hela yakumbidiku muloña ifuku dejima dikweti kukala kwadu. Kulondela kufumba kwaYesu kunateli kuyikwasha ñahi kubula kwakama nankashi?

14. Munateli kwila ñahi neyi munakwakama yuma yimwelili kunyima?

¹⁴ Antu amakwawu akamaña muloña wayuma yeliliwu kunyima. Anateli kutwalekahu kuditoñesha nayiluwa yakoñeliwu kunyima hela chakwila munahiti yaaka yayivulu. Mpinji yikwawu Mwanta Davidi watiyileña nindi ‘kuluwaluwa kwindi kwabadikili nihamutu windi.’ Wahosheli nindi: “Nabulumi chakubuluma nakutaza mumuchima wami.” (Mas. 38:3, 4, 8, 18) Hanu dinu, Davidi wadi kwila ñahi? Welili ñahi? Wamukuhweleleli Yehova nindi wukumutiyila luwi nikumwanakena. Wahosheli nindi: “Nakooleki yenowu anaanakenuwu muloña windi.”—Tañenu Masamu 32:1-3, 5.

15. (a) Muloñadi chimwatela kubulila kwakama nakukala kumukweti? (b) Mwatela kwiladi kulonda mubuleña kwakama nankashi? (Talenu chikasha chinakwila nawu “Yuma Yikuyikwasha Kubula Kwakama Nankashi.”)

¹⁵ Mpinji yikwawu munateli kwakama nakukala kumukweti. Chakutalilahu, Davidi hasonekeliyi Masamu 55, wakameneni nindi akumujaha. (Mas. 55:2-5) Hela chochu, wetejeli wanyi kwakama kuzeyeshi chikuhwelelu chindi mudi Yehova. Davidi walombeleña mpinji yejima haniku kukala nawa welukili nindi watela kuzatila hayuma yeletesheleña yakameña. (2 Sam. 15:30-34) Dizilenu kudi Davidi. Chatela mwakameña nakukala kumukweti, zatenu hakumina ñovu jenu kumanisha kukala kwenu nawa shilenu jejima mukasa aYehova.

16. Chalumbuluka ijina daNzambi chinateli kukolesha ñahi chikuhwelelu chenu?

¹⁶ Kwakama kukwawu kwenzaña neyi mukwaKristu nakutoñojoka hakukala kwakumbidi. Hela chochu, mwatela kwakama wanyi nakukala kumunabuli nikwiluka. Muloñadi? Muloña yuma yekalaña wanyi neyi chitwatoñojokaña netu dichiyikekala. Nawa kwosi kukala kudi kwejima kumunateli kumumbila Nzambi yakañanya kukwimanisha. Ijina dindi datalisha mukwila nawu “Wakojejaña Yuma Kwikalaku.” (Kwid. 3:14) Chalumbuluka ijina daNzambi chatukwashaña kwiluka nawu Nzambi wukweti ñovu yakwila munakeñiyi kulonda yakwashi ambuñindi. Mwatela kukuhwelela chikupu nenu Nzambi wakalambula ambuñindi ashinshika nawa wukuyikwashaña chakwila neyi anakwakama hakukala kwakunyima, kunakumona nikwakumbindi.

17, 18. Kuhanjeka chiwahi kunateli kuyikwasha ñahi kubula kwakama?

¹⁷ Njila yamuchiwana yinateli kuyikwasha kubula kusweja kwakama hikuhanjeka namuntu imwakuhwelela. Mwinikwenu, ibwambu denu hela aeluda muchipompelu anateli kuyikwasha kubula kwakama nankashi. “Kaneñu mumuchima wamuntu kaleta kuzembesha nyima; ilaña izu dadiwahi daletesha kutiya kuwaha.” (Yish. 12:25) Kuhosha chakadi kuhita mumbadi kukuleñela ayikwashi kumanisha kukala kwenu. Bayibolu yatulejaña nawu: “Habula mpuña yuma yiwafuukwili kwila hiyamwekanañaku; ilaña havula akwakushakama hampuña yakolaña.”—Yish. 15:22.

¹⁸ Yehova wakwashaña cheñi akwaKristu kubula kwakama kuhitila mukupompa kwamulungu nimulungu. Haniku kupompa, mukwikalaña nawakwenu akwakwitiya ayikeña nawa afwilaña kudikolesha wumu namukwawu. (Heb. 10:24, 25) Iku ‘kukwashañana’ kukuyikolesha nawa chikuyipelela kubula kwakama.—Rom. 1:12.

19. Muloñadi chimunateli kukuhwelela nenu wubwambu wenu naNzambi wunateli kuyikolesha?

¹⁹ Talenu eluda wumu wakuCanada chelukiliyi kulema kwakumbila kwakama kwindi hadi Yehova. Wazataña mudimu wakola wawuntañishi nawa himukwakuleja akashikola maana, cheñi wakata chikatu chaletaña kwakama. Iwu manakwetu wamanishili ñahi iku kukala? Wahosheli nindi: “Kuzata nañovu kukolesha wubwambu wami naYehova kwankwashaña kumanisha kukala kwami kwamuyitoñojoka. Amabwambu jami niamanakwami akuspiritu ankwashaña. Nahoshaña nañodami chinnakutiya chakadi kumuhita mumbadi. Akwetu aeluda ninkoñi wetu wañinza akwashaña nankashi. Nenhwili andotolu, nahimpili chakuzatisha mpinji yami nawa nekalileña nampinji yakunooka nikuhema. Natachikili kuleka kwakama chovu-chovu. Neyi kukala kunasweji, namulombaña Yehova kunkwasha.”

20. (a) Tunateli kumbila ñahi kwakama kwetu hadi Nzambi? (b) Tukahanjekadi muchibaaba chinalondelihu?

²⁰ Muwihi, tunahanjeki chichawahila kumutwika Nzambi kwakama kwetu kuhitila mukulomba chakufuma hamuchima nikutaña Izu dindi nakutoñojokahu. Twahanjeka cheñi chichawahila kwikala nanyikabu yakuspiritu, kulejaku antu itwakuhwelela kukala kutukwetu nikukoleshewa nawamanakwetu akwaKristu. Chibaaba chinalondelihu chikahosha hadi Yehova chatukwashañayi kwikala nakuchiñeja.—Heb. 11:6.