1, 2. (a) Kunuñañananyi kudi hakukeña nichikuhwelelu? (b) Malwihwinyi itukuhanjekahu?

TWAMUKEÑA Yehova ‘muloña yena diyi wasambilili kutukeña.’ (1 Yow. 4:19) Hakwila yamwekeshi kukeña kwalala, Yehova diwatachikili kuyikiswila ambuñindi ashinshika. Chitwasweja kumukeña Nzambi, chikuhwelelu chetu chikukola nankashi, tukwiluka netu wudi kwoku nawa netu wasomwenaña chikupu antu akeñayi.—Tañenu Aheberu 11:6.

² Yehova chasomwenañayi chamwekeshaña chekalayi niyuma yelañayi. Tunateli kumukuhwelela chikupu hohu neyi twiluka netu Nzambi wasomwenaña antu amukeñakeñaña muloña ‘chikuhwelelu hikutalila yuma yalala yitwachiñejaña netu yakamwekana.’ (Heb. 11:1) Chikuhwelelu chabombelamu kuchiñeja yuma yatushiikayi Nzambi. Hanu dinu nkiswinyi yitwatambwilaña neyi tunakuchiñeja? Yehova wayisomweneni ñahi ambuñindi akunyima nawa wayisomwenaña ñahi makonu? Twayenu tutali.

3. Kushiikanyi kudi haMalaki 3:10?

³ Yehova Nzambi diyi watachikili kusomwena ambuñindi ashinshika, dichi nakututambika nindi twinzi yatukiswili. Twatañaña netu: ‘Yehova wamazaza nindi, Ñesekenu, mutali neyi nukubula kuyenzulwila njanina jamwiwulu, nakayihuñunwina nkisu yayivulu yakukañanya nihakuyitambwila.’ (Mal. 3:10) Twamwekeshaña netu twahamekaña nankashi neyi twiteja iwu mutambi waYehova.

4. Muloñadi chitwatela kukuhwelela mazu aYesu ekala haMatewu 6:33?

⁴ Yesu wayilejeli atumbanji twindi nindi neyi atwamijaku Wanta, wakayakamenaña. (Tañenu Matewu 6:33.) Yesu wahosheli awa mazu muloña welukili nindi yikaninu yaYehova yashindamenewa chikupu. Yesu welukili nindi Nzambi washikijaña mwahoshañayi. (Isa. 55:11) Ninetu twatela kukuhwelela netu neyi tumukuhwelela Yehova chikupu, wakashikija mwashiikayi nindi: “Hinamba kakulekaku, hela kukushiya hinakakushiyaku.” (Heb. 13:5) Tunateli kwesekeja awa mazu nachahosheliyi Yesu kutalisha hakutwamijaku Wanta waNzambi nikuloña kwindi.

5. Mazu aYesu amwakwiliyi Petulu atukoleshaña ñahi?

⁵ Kapostolu Petulu wamwinhwili Yesu nindi: “Tunashiyi yuma yejima, tunakulondeli; indi etu twakatambuladi?” (Mat. 19:27) Chatela yamuzuwili Petulu hakwihula ilu lwihu, Yesu walejeli atumbanji twindi nindi akayisomonna muloña wakudihana kwawu. Apostolu niantu amakwawu ashinshika akayuula hamu nindi mwiwulu. Hela chochu  tunakuhetelamu makonu. Yesu wahosheli nindi: “Ejima anashiyi hela matala, hela ana kwawu, hela ahelawu, hela atata jawu, hela amama jawu, hela anyana, hela maha, hansañu yejina dami, akatambwilamu nkulakaji, akaswana niwumi wahaya nyaka.” (Mat. 19:29) Atumbanji twindi akutambwila nkisu yabadika hakudihana kwawu kudi kwejima. Komana atata jetu, amama jetu, amanakwetu, aheletu nianyanetu akuspiritu hiyanabadiki yuma yejima yitunashiyi muloña wakutwamijaku Wantaku?

6. Muloñadi Yehova chashiikilayi ambuñindi kuyisomona?

⁶ Yehova wayikwashaña ambuñidi mumpinji yakala kuhitila mukuyishiika kuyilila yuma yayiwahi. Yehova Nzambi wayikiswilaña ambuñindi ashinshika makonu nawa wakayikiswila chikupu kumbidi. (1 Tim. 4:8) Kwiluka netu Yehova “wasomonaña antu amukeñakeñaña” kukutukwasha kwikala nachikuhwelelu chakola.—Heb. 11:6.

7. Kuchiñeja kwekala ñahi neyi chikuñu chakwimika nachu watu?

⁷ Mumpanji yindi yahaMpidi, Yesu wahosheli nindi: “Zañalalenu, luñenu chacheni, muloña akayisomona masomu amaneni mwiwulu; muloña dichi chakabishiluwu niatuprofwetu asambililenu.” (Mat. 5:12) Neyi chochekala antu akatambwila wuloku wakuya mwiwulu, kwikala nakuchiñeja kwakushakama muparadisa hamaseki kwatela ‘kutuzañalesha nikuluña chikupu.’ (Mas. 37:11; Luka 18:30) Hela chakwila twachiñejaña kuya mwiwulu hela nehi, “kuchiñejoku kwemikishaña wumi wetu, neyi chikuñu chakwimikisha nachu watu; kwalala, kwakola.” (Heb. 6:17-20) Neyi chochemikaña chikuñu watu neyi kudi mpepela, kuchiñeja kwetu kwatukwatukwashaña kwikala akola. Kunateli kutwikwasha kushinda makabi.

8. Kuchiñeja kwatukwashaña ñahi kukeheshaku kwakama?

⁸ Yuma yekala muBayibolu yitwachiñejaña yatukwashaña kukeheshaku kwakama. Yikaninu yaNzambi yidi neyi manji amawahi okaña nyichima yetu yinakwakama. Chatukundejaña kwiluka netu neyi ‘tumbila chiteli chetu hadi Yehova wukutukwasha’! (Mas. 55:22) Twatela kumukuhwelela chikupu Nzambi netu “natweshi kwila chakubadika nankashi mutukulomba hela mutukutoñojoka mwejima.” (Efwes. 3:20) Mwalala, nateli kwila chakubadika nankashi mutukumulomba.

9. Tunateli kukuhwelela ñahi netu Yehova wukatukiswila?

⁹ Hakwila tukatambwili masomu, twatela kumukuhwelela chikupu Yehova nikulondela nshimbi jindi. Mosi walejeli aIsarela: “Yehova wakabadika kukukoolekesha mwituña dakukwinkayi Yehova Nzambi yeyi dawuswana wakuheta; neyi wakatiyilila chachiwahi mwizu daYehova Nzambi yeyi nakusha muchima wakwila kulejiku kwejima kunukukuleja lelu. Muloña Yehova Nzambi yeyi wakakukoolekesha mwakukaniniyi.” (Kuhit. 15:4-6) Mwamukuhwelela chikupu Yehova nenu wakayikiswila neyi mutwalekahu kwikala ashinshika? Mwatela kumukuhwelela.

10, 11. Yehova wamusomweneni ñahi Yosefu?

¹⁰ Bayibolu ayisonekeli kulonda yitukwasheña. Mwekala nsañu yamwekeshaña Nzambi chakiswilañayi ambuñindi ashinshika.  (Rom. 15:4) Yosefu amukiswilili. Amanakwindi amuheleli nawa ñoda nkaka yindi wamutwambilili, dichaletesheli amushi mukaleya muEjipitu. Komana Nzambi walekeli kumwakamena? Inehi! “Yehova wadiñi naYosefu, wamumwekesheleli luwi lwasweja . . . Yehova wadiñi nindi, niyuma yeliliyi Yosefu yejima Yehova wayiwahishili.” (Kutach. 39:21-23) Yosefu, wadiña nakumuhembelela Nzambi yindi hadiñayi muyina mpinji yakala.

¹¹ Chimwahitili yaaka, Fwaro wamumbiliku Yosefu mukaleya nakumwilisha mulopu muEjipitu. (Kutach. 41:1, 37-43) Ñodindi chavwalili anyana ayedi awamayala, “Yosefu wamutumbili ijina dindi, nindi Manase; nindi, Nzambi nanvulamishi mwejima munakabakani, niakumukala watata ejima. Wamuchiyedi wamutumbili ijina dindi, nindi Efweremi, nindi, Nzambi nanyinki Iusemu Iwami mwituña dinamoni lukadi.” (Kutach. 41:51, 52) Hamuloña wakwila Yosefu wadiña washinshika kudi Nzambi, amukiswilili chikupu chakwila aIsarela niaEjipitu ayipulwishili muloña wayena. Dichi, Yosefu welukili nindi Yehova diyi wamusomweneni nikumukiswila.—Kutach. 45:5-9.

12. Yesu watwalekelihu ñahi kwikala washinshika hampinji yamwesekeliwu?

¹² Yesu Kristu niyena wamwovwahili Nzambi hela chakwila wahitili mukukala kwashiyashana, nawa amusomweneni. Chumanyi chamukwashili kuumika? Izu daNzambi dalumbululaña nawu: ‘Yena hansañu yamuzañalu wamushililuwu kumesu indi womikili hamutondu wakuyandishila, wadiwili nsonyi.’ (Heb. 12:2) Yesu watiyileña kuwaha kujilika ijina daNzambi. Dichi, amusomweneni kudi tata yindi nawa amwinkeli nyidimu yayiwahi yayivulu. Bayibolu yahosha nawu “nashakami dehi kuchikasa chachidiilu chetanda daNzambi.” Nsona yikwawu yahosha nawu: “Nzambi wamutuumbakesheli nakumwinka chifulu chahewulu niijina dabadika majina ejima.”—Fwi. 2:9.

13, 14. Yehova watiyaña ñahi nayuma yitwamwililaña?

¹³ Yehova watiyaña kuwaha nachitwazataña nahakumina ñovu jetu. Weluka yuma yejima yatwakameshaña. Watutiyilaña luwi neyi tudi nakukala kwamali, yikatu hela tunaneñi chakwila tunakukañanya nikumukalakela nankashi mumudimu windi. Yehova watutiyilaña luwi neyi tutwalekahu kwikala ashinshika.—Tañenu Aheberu 6:10, 11.

¹⁴ Ilukenu nenu, tunateli kulomba kudi “watiyaña mwalombañawu” nakukuhwelela netu wukutiya mutunalombi. (Mas. 65:2) “Tata wavulishaña luwi, Nzambi wakukundeja kwejima” wakatukwasha kuspiritu nikumujimba, hadaha kuhitila mudi akwetu akwaKristu. (2 Kor. 1:3) Yehova watiyaña kuwaha neyi tutiyilaña akwetu luwi. “Muntu wamutiyilaña kazweñi luwi wudi nakusondamisha Yehova, yena wakamufweta cheñi nachuma chachiwahi chaneliyi.” (Yish. 19:17; Mat. 6:3, 4) Dichi, neyi tukwasha antu adi mukala chakufuma hamuchima, dikwila nawu tunakusondamisha Yehova. Nawa washiika nindi wakatufweta.

15. Wulokwinyi wumunakutalila? (Talenu mwevulu wakutachikilahu.)

¹⁵ AkwaKristu awayishewa naspiritu akoleshewaña nakuchiñeja kwakutambwila “chibaaba chakuloña, chakayinkawu  kudi Mwanta, mukwakusompesha waloña, hefuku odu.” (2 Tim. 4:7, 8) Dichi mwatela kuneña wanyi neyi Nzambi yayinka kuchiñeja kwacheñi. Yihita ‘yanyikoku yacheñi’ yaYesu atalililaña kutambwila wuloku wawumi wahaya nyaaka muparadisa hamaseki. “Akatiya kuwaha nankashi nakushakama chachiwahi chamwena.”—Yow. 10:16; Mas. 37:11.

16. 1 Yowanu 3:19, 20 yatukundejaña ñahi?

¹⁶ Mpinji jikwawu tunateli kutoñojoka netu tunakuzata nañovu wanyi, hela netu Yehova nakuzañalala wanyi nanyidimu yitunakumukalakela. Tunateli cheñi kujinoka netu hitwashikilamu kutambwila wuloku wudi wejimaku. Twanukeña netu “Nzambi wabadika nyichima yetu; weluka yuma yejima.” (Tañenu 1 Yowanu 3:19, 20.) Wasakililaña nyidimu yejima yajila yitwamukalakelaña chakufuma hamuchima muloña wachikuhwelelu nikukeña, hela chakwila yanyanya.—Maku 12:41-44.

17. Nkiswinyi yitunakudiluñisha makonu?

¹⁷ Nimunanu mafuku akukuminina akaayi kaSatana katama, Yehova nakukiswila antu jindi. Wenkaña akwakudifukula indi yakuda yayivulu yakuspiritu. (Isa. 54:13) Neyi chochashiikiliyi Yesu, Yehova nakutukiswila makonu kuhitila mutwiteja kwikala muchisaka chakuspiritu chawamanakwetu niahela mukaayi kejima. (Maku 10:29, 30) Kubombelahu, antu ejima amukeñakeñaña Nzambi ayikiswilaña kuhitila mukuyinka yitoñojoka yakuwunda, kumona yuma yikwetiwu nawu yinawanini nimuzañalu.—Fwi. 4:4-7.

18, 19. Ambuña aYehova atiyaña ñahi hankisu yatambwilañawu?

¹⁸ Ambuña aYehova kunyeñumuka kaayi anateli kwiteja nawu anakudiluñisha iyi nkisu. Chakutalilahu, Bianca wakuGermany wahosheli nindi: “Namusakililaña Yehova mafuku ejima hakunkwasha kubula kwakama nikwikala kukabadi kami. Kaayi kanatami chikupu. Ilaña chinamuzatilaña Yehova natiyaña kukiñewa. Mpinji yejima neyi nimulambula, wankiswilaña chakubadika.”

¹⁹ Toñojokenu hadi aPaula akuCanada akata nyima abulaña kwenda. Ahosheli nawu: “Kubula kwenda hikwanletesheli kuleka kushimwinaku. Nashimwinaña kuzatisha foni hela wunsahu wamumpanji. Nekala nakamukanda munasoneka nsona niyikuma yamunyikanda yetu munatalaña mpinji yejima kulonda yinkolesheña. Nakitenaña nami ‘Kamukanda Kami Kakunkwasha Kupuluka.’ Neyi tushinshikaña hayikaninu yaYehova kukala kukwikala hohu kwakapinji kantesha. Yehova watukwashaña mpinji yejima, hichikweti muloña nakukala kutukwetiku.” Kukala kumukweti kunateli kwambukaku nakwaBianca hela aPaula. Ilaña munateli kutoñojoka hachayikiswilayi Yehova enu niantu imweluka. Dichi twatela kutoñojokaña hachinakutukiswilayi Yehova makonu nichakatukiswilayi kumbidi.

20. Tukatambwiladi neyi tumukalakela Yehova nawumi wetu wejima?

²⁰ Anukenuña nenu kulomba kwenu kwafuma hamuchima nikumuleja Nzambi chakubula kuhita mumbadi ‘wakayifweta nfwetu jajivulu.’ Ilukenu nenu neyi “muneli dehi muchima waNzambi mwakatambula chikaninu.” (Heb. 10:35, 36) Dichi tutwalekenuhu kukolesha chikuhwelelu chetu nikumukalakela Yehova nawumi wetu wejima. Tunateli kwila mwennimu muloña tuneluki netu Yehova wakatusomona hampinji yatela.—Tañenu Akolose 3:23, 24.