WUBWAMBU wawuwahi walema nawa wubwambu walala wavula kumwekana wanyi. Neyi wubwambu wudi mukukala, tunateli kwila ñahi hakwila nawu tutwalekihu? Tunateli kudizila yuma yayivulu kudi antu amavulu ashimunawu muBayibolu adiña nawubwambu walala ilaña mukuhita kwampinji wubwambu wawu wekalili mukukala.

Davidi kabiña nawa mwanta, chakadi nikujina wadiña nawamabwambu amawahi. Hadaha munanuki Jonatani wadiña hakachi kawamabwambu jindi. (1 Sam. 18:1) Ilaña Davidi wadiña nawamabwambu amakwawu, adi neyi kaprofwetu Natani. Bayibolu yashimuna wanyi mpinji yatachikili wubwambu wawu. Ilaña mpinji yimu Davidi wamulejeli Natani nsañu yakujinda neyi chochelaña muntu nebwambu dindi. Davidi wakeñeleña kumutuñila Yehova itala. Mwanta watela walemesheli mwahosheliyi Natani hamu neyi ibwambu dindi nawa muntu wadiña naspiritu yaYehova.—2 Sam. 7:2, 3.

Hela chochu, kudi chuma chamwekeni chakeñeleña kumanisha wubwambu wawu.  Mwanta David welili wuvumbi naBatisheba kuhiñahu wajahili nfumwindi Uriya. (2 Sam. 11:2-21) Hadi yaaka yayivulu, Davidi wadiña washinshika kudi Yehova nawa wakakeleli kuwuñaji. Ilaña wakoñeli iyi nshidi yasweja kutama. Chumanyi chaletesheli mwanta wamuwahi kukoña mwenimu? Komana welukili wanyi nindi nakwila yuma yatama? Komana watoñojokeli nindi Nzambi wukumumona wanyi?

Natani wadi kwiladi? Wukuleka muntu wacheñi kulonda yamuleji mwanta? Antu amakwawu elukili kafuta kakasiliyi Davidi kakumujaha Uriya. Hanu dinu muloñadi Natani chakudiñijilayi muniyi nsañu nakusha wubwambu wawu wunashimbuli muwubanji? Chadi kuletesha Natani kujimbesha wumi windi neyi yamulejamu. Davidi wadiña wajaha dehi Uriya chakadi muloña.

Ilaña Natani wadiña mukwakumuhoshelaku Nzambi. Kaprofwetu welukili nindi neyi yamwena, wubwambu windi naDavidi wukuhimpa nawa chinleji chindi chikumukabishaña. Ibwambu dindi Davidi welili chuma chahelayi Yehova. Mwanta wakeñekeleña kumukwasha kulonda yekali nawubwambu cheñi naNzambi. Dichi, Davidi wakeñekeleña ibwambu walala chikupu. Nawa Natani diyi wadiña ibwambu walala chikupu. Watoñojokeleña chakutachika kuhosha nsañu kuzatisha chakutalilahu chadi kushika hamuchima waniwu muntu wadiña kabiña. Natani washimwini nsañu yaNzambi ilaña munjila yamukwashili Davidi kumona yiluwa yindi nikumukwasha kubalumuka.—2 Sam. 12:1-14.

Mukwila ñahi neyi mukweti ibwambu wunakoñi chiluwa hela nshidi yahamesu bwi-i? Hadaha munateli kutoñojoka nenu chimwamuleja chiluwa chinakoñiyi mukumanisha wubwambu wenu. Indi kwiji mukumona nenu neyi mumushimwinamu kudi aeluda, wubwambu wenu wukumana. Mukwila ñahi?

Gianni, itwatena hakutachika, wahosheli nindi: “Namweni nami yuma yinahimpi. Maurizio wahosheleña wanyi mukukasunuka neyi chichadiña hatachi. Dichi nakeñeleña kuhanjeka nindi, hela chakwila chadiña chakala kwila mwenimu. Nadihwili nami: ‘Nukumuleja yumanyi yabula kwilukayi? Nateli kuhila neyi nimulejamu!’ Ilaña chinanukili yuma yitwadiña nakudiza, nekalili nañovu yakuhosha nindi. Maurizio wankwashilihu mpinji yimu yinadiña mukukala. Dichi nakeñeleña wanyi kumanisha wubwambu wetu, ilaña nakeñeleña kumukwasha muloña namukeñeli.”

Maurizio wabombelelihu nindi: “Gianni welukili, nawa wadiña hohu chiwahi. Nelukili nami yuma yafumini muyuma yafuukwiliyi kwadiña kukala kwindi hela kwaYehova wanyi. Netejeli kufumba kwindi nawa mukuhita kwampinji nafuntili mukuloñesha.”

Davidi wadiña nawamabwambu jindi amakwawu adiña nakumukwasha mumpinji yakala. Ibwambu wamu hakachi kawu wadiña Hushayi, atenawu muBayibolu nawu “ibwambu daDavidi.” (2 Sam. 16:16; 1 Kushi. 27:33) Watela wadiña nsompeshi nawa ibwambu damwanta chikupu, mpinji yikwawu wahembeleña nsañu yakajindilu.

Hampinji yakeñeleñayi Abisalomi mwana kaDavidi kutambula wanta, aIsarela amavulu adiña kukabadi kaAbisalomi ilaña Hushayi nehi. Davidi chatemukileñayi, Hushayi wayili kudiyi. Davidi watiyili kutama chikupu muloña mwanindi wakudisemena niantu akuhweleleliyi amuheleli. Hela chochu, Hushayi wadiña washinshika, washili wumi windi hakatoña nikushimuna nsañu yafuñunwini tufuta. Bayi neyi Hushayi welili mwenimu muloña wakwila wadiña nsompeshiku. Ilaña wadiña ibwambu washinshika.—2 Sam. 15:13-17, 32-37; 16:15–17:16.

Chatuzañaleshaña hakumona amanakwetu niahela anuñañana nawa anakuzatila  hamu nyidimu yamuchipompelu. Yuma yelañawu yamwekeshaña neyi ahoshaña nawu, “Nidi ibwambu deyi, bayi neyi muloña natela kwikala ibwambu deyiku, ilaña muloña walema kudami.”

Ichi dichuma chamweniyi manakwetu Federico. Chamweniyi kukala muchihandilu chindi, ibwambu dindi Antonio wamukwashili. Federico wahosheli nindi: “Antonio chenjiliyi muchipompelu chetu, twekalili amabwambu. Wejima wetu twadiña ankoñi akuzatila, nawa twazatilileña hamu chiwahi. Kufumahu, amutondeli kwikala eluda. Wadiña ibwambu dami nawa wadiña nakunkwasha kuspiritu.” Ilaña Federico waluwañesheli. Watachikili kukeña wukwashu wakuspiritu, muloña hekalili nawa cheñi payiniya hela nkoñi wakuzatilaku. Hanu dinu Antonio welilidi?

Federico wahosheli nindi: “Antonio welukili chikupu nindi naneñi. Wesekeli nañovu jindi jejima kunkundeja. Wankwashili kulonda nikali wakola kuspiritu nawa hanshileña nkawamiku. Wankwashili kwikala wakola kuspiritu chakubula kufunta cheñi munyima.” Antonio walumbulwili nindi: “Twahanjekeleña nankashi naFederico. Nakeñeleña nami yekali wakasunuka kuhosha nanami, nikunleja hachaneñeliyi.” Chamuzañalu, mukuhita kwampinji Federico wakoleli cheñi kuspiritu nawa amutondeli cheñi kwikala payiniya ninkoñi wakuzatila. Antonio wakunkulwili nindi: “Hela chakwila tunakukalakela muyipompelu yashiyashana, ilaña tuchidi amabwambu chikupu.”

Mukutiya ñahi neyi ibwambu denu imwakeña yabula kuyikwasha hampinji yimudi mukukala? Mukutiya kutama nankashi. Munateli kumwanakena? Komana wubwambu wenu wukwikala wakola neyi chiwadiña hakusambila?

Toñojokenu chuma chamumwekeneni Yesu hamafuku akukumishaku hamaseki. Wadiña nawapostolu indi ashinshika hadi mpinji yayilehi nawa adiña anuñañana chikupu. Yesu wayiteneni nindi amabwambu  jami. (Yow. 15:15) Hanu dinu chumanyi cheliliwu hampinji yamukwatiliwu? Apostolu atemukili. Petulu washimwini hatooka nindi wukumushiya wanyi Mwanta windi, ilaña hawowuna wufuku, Petulu wamukaanini nindi wamwiluka wanyi Yesu!—Mat. 26:31-33, 56, 69-75.

Yesu welukili nindi akumushiya nkawindi. Hela chochu, wateleleli kuneña nikutiya kutama. Ilaña chahanjekeleñayi nawatumbanji twindi hanyima yakumusañula chamwekeshaña wanyi nawu waneñeli hela kutiya kutama. Yesu wachindili wanyi yiluwa yawatumbanji twindi, kubombelahu niyuma yeliliwu hawuna wufuku wamukwatiliwu.

Ilaña, Yesu wamukundejeli Petulu niapostolu amakwawu. Wamwekesheli nawu wayikuhweleleli nachayinkeliyi nshimbi yakuzatisha hampinji yakazatañawu mudimu weneni chikupu. Yesu watwalekelihu kuyimona apostolu indi nindi amabwambu. Kukeña kwayikeñeliyi kwayikundejeleña. Azatili nañovu kulonda abuli kumuneñesha Mwanta wawu. Mwalala, azatili chiwahi mudimu wayinkeliyi.—Yil. 1:8; Kol. 1:23.

Muhela Elvira wanukaña chiwahi mpinji yaditobwesheliwu nebwambu dindi Giuliana, Elvira wahosheli nindi: “Chanlejeliyi nindi waneñeli nayuma yinelili, natiyili kutama. Wateleleli kuzuwa. Ilaña chuma chanshikili hamuchima chadiña chakwila nawu wañakameneni nawa wakameneni yuma yinateli kufuma muyuma yinelili. Namusakililaña muloña yena washili wanyi maana hayuma yatama yinamwilileña, ilaña hakukala kunadileteleleña amaweni. Namusakililili Yehova hakunyinka ibwambu wadiña nakuñakamena.”

Ibwambu wamuwahi nateli kwila ñahi neyi wubwambu wenu wudi mukukala? Watela kuhosha nenu mukuwunda ilaña chakadi kuhita mumbadi. Ibwambu wamuchidiwu wukwikala neyi Natani naHushayi, atwalekelihu kwikala ashinshika mumpinji yakala, nawa kufwana Yesu, wanakeneneña. Komana mudi ibwambu wamuchidiwu?