IFUKU dimu nantetemena kwatutili nankashi muBrookings, South Dakota, U.S.A. Chañanukishili nami keña kutachiki kutuuta. Mukuhayama hakutiya nenu hanidi ifuku twadiña mwitala mwakuhembela ayimuna niyakuda nakuzala mashika. Twemeni kwakwihi namungomu wadiña namenji atuuta mwanwineña ayimuna. Twayenu niyileji nsañu yami kulonda mwiluki chichadiña.

Navwalikili haMarch 7, 1936, nawa yami kabinda. Twashakamineña hafamu kueastern South Dakota. Kuhemba yimuna nikudima dichuma chadiña chalema muchihandilu, ilaña bayi neyi dichadiña chasweja kulema muchihandiluku. Anvwali jami apapatisheweli nakwikala aYinsahu jaYehova mu 1934. Amukanini Tata yetu wamwiwulu, Yehova nawu kwila nkeñelu yaNzambi dichuma chatachi chakwilañawu muchihandilu chawu. Atata ansema aClarence, niatata awakulumpi aAlfred adiña nakukalakala neyi nkoñi mukwakulombola chipompelu (wutunakutena netu nloñeshi wezanvu dawaeluda) muchipompelu chetu chamu Conde, South Dakota.

Chisaka chetu chayileña nakupompa kwawakwaKristu nikushimwina kwitala nikwitala mpinji yejima nakuleja antu ejima kuchiñeja kwakuwahi kwakumbidi kwekala muBayibolu. Chakutalilahu chawanvwali chatukwashili etu atwansi. Ami namuhelami, Dorothy, twekalili akwakushimwina aWanta henohu tudi nayaaka 6. Mu 1943, nasonekesheli muShikola Yawakwakushimwina, yitunakupompaña makonu.

Twayileña mpinji yejima nakupompa kupompa kwanyanya nikwamaneni. Manakwetu Grant Suiter diyi wadiña nhoshi mwenyi wahakupompa kweneni mu 1949 kuSioux Falls, South Dakota. Nichidi kwanuka mutu wampanji yawu  wahosheleña nawu, “Kukuma Kunashiki Dehi Kwakwihi Chikupu!” Akonkomweneni nawu akwaKristu ejima adihana atela kuzatisha chihandilu chawu chejima kutandisha nsañu yayiwahi yaWanta waNzambi wunakuyuula. Chumichi chanletesheli nidihani kudi Yehova. Hakupompa kukwawu kwanyanya, kuBrookings, nadiwanini amaweni cheñi mudina itala mwakuhembela ayimuna niyakuda dinatena hakusambila, inakuhembelela kumpapatisha. Wejima wetu awaana twapapatisheweli munona “mungomu” haNovember 12, 1949.

Dichi nafwilileña kuzata wupayiniya. Natachikili wupayiniya haJanuary 1, 1952, henohu nidi nayaaka 15. Bayibolu yahosha nawu: “Endaku nawakwamaana nineyi wakekala mukwamaana,” nawa muchisaka chetu mwadiña antu amavulu akweti maana ankwashili kuzata wupayiniya. (Yish. 13:20) Nadiña nakuzata wupayiniya nawatata awakulumpi aJulius, adiña nayaaka 60. Hela chakwila twadishili chikupu muyaaka, ilaña twadiluñisheleña kuzatila hamu mumudimu wakushimwina. Nekalili namaana nankashi chinadikundili nawu. Kuhiñahu, Dorothy niyena watachikili wupayiniya.

Hampinji yinadiña kansi, anvwali jami adiña nakutambika ankoñi endaña niañodi jawu kulonda tushakami nawu. Ankoñi amu ankwashili chikupu adiña aJesse nawañodawu aLynn Cantwell. Diwu ankwashili kutachika kuzata wupayiniya. Wukwashu wawu wankwashili kutachika kwikala nayikonkwanyi yakuspiritu. Neyi anakuzatila muyipompelu yamukamwihi, mpinji yikwawu antambikileña kuya nakuzata nawu. Chumichi chadiña chachiwahi nawa chankwashili chikupu!

Bud Miller niñodindi, Joan, diwu asinsili mumudimu wakwenda. Haniyi mpinji nadiña nayaaka 18 nawa akeñeleña nawu niñili wushidika. Antu adiña nakutonda antu akwiñila wushidika añilili nawu nili chuma chabula kwesekana namazu aYesu afumbiliyi atumbanji twindi akubula kudiñija mujipolitiki. Nawa nakeñeleña kushimwina nsañu yayiwahi yaWanta. (Yow. 15:19) Nalejeli muntu wadiña nakutonda antu akwiñila wushidika nami nidi mukwakushimwina.

Natiyili kuwaha muloña nadiña naManakwetu Miller hampinji yinayileña kudi awantu adiña nakutonda antu akwiñila wushidika nawa watiyileña chinahosheleña. Neyi chochekala antu ejima,  niyena wadiña wahamuka kuhosha nawantu. Kwikala namuntu wakuspiritu wamuchidiwu kwankwashili kwikala wahamuka! Hanyima yakutiya chinahosheli, antu adiña nakutonda antu akwiñila wushidika añilukili nawu nidi mukwakushimwina kumakumishilu amayinza mu 1954. Chumichi chankwashili kushikija chikonkwanyi chami chikwawu chakuspiritu.

Haniyi mpinji, antambikili kuya nakuzatila kuBeteli, yateneneñawu hayina mpinji nawu Watchtower Farm, kuStaten Island muNew York. Nazatiliku yaaka yisatu. Nawa nadizili yuma yayivulu muloña nawanini antu amavulu amaana inazatileña nawu.

Chikunzulemba chaWBBR chadiña kufamu yadiña kuStaten Island. Chadiña nakubidikilahu aYinsahu jaYehova nsañu kufuma mu 1924 kushika mu 1957. Amamembala 15 nakushika ku 20 achisaka chaBeteli diwu hohu azatilileña hafamu. Etu amavulu twadiña atwansi nawa twadiña kanda tukulukili. Ilaña etu twadiña naEldon Woodworth, manakwetu wachikulumpi wawayishewa. Wamwekesheli chikupu nindi wadiña namaana. Wadiña neyi tata yetu nawa watudizishili yuma yayivulu. Mpinji yikwawu neyi tunakutiyashana wanyi, Manakwetu Woodworth wahosheleña nindi, “Hikukooleka kweneni chikupu kuzata mudimu wunatwinkiyi Mwanta nindi tuzati.”

Twadiña cheñi nakukooleka kwakwikala naManakwetu Frederick W. Franz. Wadiña namaana nawa welukili Nsona chikupu, dichi twadizilililiku kudi yena, nawa wadiña nakutukwasha hamuntu-hamuntu. Harry Peterson diyi wadiña nakututelekela yakuda; twadiña nakumutena ijina dachisemwa muloña didadiña daswayi kutena kubadika ijina dindi daPapargyropoulos. Niyena wadiña wawayishewa nawa wadiña nakudikita chikupu mudimu wakushimwina. Manakwetu Peterson wazatili mudimu windi haBeteli chachiwahi ilaña walekeli wanyi mudimu wakushimwina. Wahanineña magazini etu amavulu nankashi hakakweji. Niyena welukili chikupu Nsona nawa wadiña nakwakula malwihu amavulu itwamwihwileña.

Twadiña nakudima nyikabu nimafu nawa twayikamwineña nakuyihemba. Hachaaka twakamwineña malita 42,600 kufuma kunyikabu yadiileña  chisaka chejima chaBeteli. Nadiña nakukooleka kwakuzata naEtta Huth, muhela wamaana chikupu. Diyi wadiña nakutuleja chakuzatisha yozelu yakukamuna nachu. Neyi mpinji yakukamuna yinashiki, ahela amuyipompelu enjileña nakutukwasha nawa Etta wayilejeleña chakuzata. Hela chakwila Etta diyi wazatileña mudimu weneni hakukamuna, ilaña wadiña nakulemesha amanakwetu adiña nakulombola hafamu. Namumweni nami nateli kwovwahila chikupu wumutu mumudimu wawanta.

Angela Romano niyena wadiña hakachi kawahela enjileña nakukwasha mudimu wakukamuna. Etta diyi wamudizishili kulonda yekali muchalala. Dichi, henohu nichidi kuzatila haBeteli, nadiwanini namuntu mukwawu wamaana inazati nindi hadi yaaka 58. Twadisumbwili naAngie muApril 1958, nawa tunazatili hamu nyidimu yayivulu. Hadi yaaka yayivulu yinahitihu, Angie washinshika kudi Yehova nawa chumichi chanaleteshi wulu wetu kukola. Hela chakwila kunamwekani kukala kwamuchidinyi, nashindameneneña hadi yena.

Chalandishiliwu chikunzulemba chadiña kuStaten Island chaWBBR mu1957, nayili nakuzatila kuBeteli yakuBrooklyn hakapinji kantesha. Kuhiñahu twadisumbwila naAngie, dichi nafumini haBeteli, chimwahitili yaaka yisatu, twayili nakuzata wupayiniya kuStaten Island. Nawa nazatilili nikunichi chikunzulemba chalandishiliwu nawa chahimpiliwu ijina kudi achilandili nawu WPOW.

Ami naAngie twakeñeleña kwikala nachihandilu chapela kulonda tutweshi kuzata kwejima kuyakututumawu. Dichi, mu1961 atutumini neyi apayiniya adimena muMusumba waFalls, Nebraska. Chelili atutumi neyi apayiniya atutambikili kuya kuShikola yaMudimu waWanta, iyi shikola yadiña yakakweji kamu kuSouth Lansing, New York. Twadiluñishili iyi shikola nawa twafwilileña kuzatisha chikupu yuma yitwadizili neyi tunafunti kuNebraska. Ilaña twahayamini muloña atutumini neyi amishonali muCambodia. Idi iluña dakuSoutheast Asia dalubanji chikupu nawa kanda tumoneñahu dehi iluña damuchidiwu. Twafwilileña kutandisha nsañu yayiwahi munidi ituña.

Hela chochu, munidi ituña mwadiña kukala kwamapolitiki, dichi twayili nakuzatila kuSouth Vietnam. Chawushona, chimwahitili yaaka yiyedi, nakatili chikupu, dichi atulejeli kufunta kumukala. Hahitili mpinji hakwila nawu nikoli, nawa chinakoleli twatwalekelihu mudimu wampinji yejima.

MuMarch 1965 twadiña nakukooleka kwakukalakela yipompelu mumudimu wakwenda. Ami naAngie twadiluñishili kuzata mudimu wawunkoñi wañinza niwankambi hadi yaaka 33 nawa twadiña nakuzata nyidimu yayivulu henohu kupompa kanda nihampinji yakupompa. Kupompa kwejima kwankwashileña nankashi, dichi nazatileña nañovu kulonda nikwashi mudimu wakuloñesha kupompa. Hadi yaaka yayivulu twadiña muMusumba waNew York, nawa kakavulu twapompeleleña muYankee Stadium.

Neyi chochekalañawu nanyidimu yayivulu antu ejima adi mumudimu wampinji yejima, ami naAngie twadiña nanyidimu yayivulu. Chakutalilahu mu1995, natachikili kudizisha akashikola enjileña  kuShikola yaKudiza Mudimu wawuNkoñi. Chimwahitili yaaka yisatu, atutambikili kuBeteli. Natiyili kuwaha kufunta kunatachikilili mudimu wadimena wampinji yejima hadi yaaka 40 yinahitihu. Nazatileña kuDipatimenti yaMudimu, nawa nadiña ntañishi kumashikola amavulu. Mu 2007 Izanvu Dalombolaña dashiliku maDipatimenti amaShikola aWanta, nawa nadiña nakukooleka kwakwikala mukulumpi hadi yaaka yantesha.

Tunamoni kuhimpika kwakuvulu kwalema kunahimpiwu katataka mumashikola awanta. Shikola yawaEluda Muchipompelu yatachikili mu 2008. Chimwahitili yaaka yiyedi, aeluda akubadika ha 12,000 ayidizishili kuPatterson nihaBeteli yakuBrooklyn. Iyi shikola yinakutwalekahu mumaluña ashiyashana nawa anakuyilombola kudi ankoñi adizishawu. Mu 2010 Shikola yaKudiza Mudimu wawuNkoñi atachikili kuyitena nawu Shikola yaKudiza Bayibolu Yawamana Kwetu Ajiki nawa ashiliku shikola yikwawu yayiha yatenañawu nawu Shikola yaKudiza Bayibolu yawakwaKristu Adisumbula.

Kutachika muchaaka chamudimu cha 2015, awa mashikola ayedi ayibombeli nakwikala shikola yimu yatenañawu nawu Shikola Yawakwakushimwina aWanta. Adizishaña amanakwetu niahela adisumbula hela ajiiki. Amanakwetu atiyili kuwaha chatiyiliwu nawu iyi shikola yikwikalañaku hatusanji twanyitayi twatuvulu. Inakutiya kuwaha hakumona antu afuma kuyitachi yashiyashana anakwinza kuniyi shikola nawa twahanjekaña nawu.

Neyi nanuka chinadiña henohu kanda nipapatishewi munona mungomu, namusakililaña Yehova hadi antu amaana ankwashili kwikala muchalala. Twadiña nayaaka niyitachi yashiyashana. Ilaña adiña antu eluka chalala. Kukeña kwamukeñeliwu Yehova kwamwekeneña muyuma yelileñawu nimuyilwilu yawu. Mukuloñesha kwindi, tukweti antu amavulu akweti maana itwatela kwenda nawu. Nendi nawu nawa anankwashi chikupu.