1. Muloñadi antu amakwawu chitwatela kuyilemeshela, nawa malwihwinyi itukuhanjekahu?

KULEMESHA muntu kwatalisha mukumutiyilila chikupu nikumwinka kavumbi. Tunateli kumutiyilila chikupu nikumwinka kavumbi neyi neli chuma chachiwahi chatela kumulemeshelahu hela neyi wudi nachifulu cheneni. Dichi tunateli kudihula netu, Hinyi itwatela kulemesha nawa muloñadi chitwatela kumulemeshela?

2, 3. (a) Muloñadi Yehova chatelelayi kulemeshewa? (Talenu mwevulu wakutachikilahu.) (b) Mwana kaMukoku atenawu haChimwekeshu 5:13 hinyi, nawa muloñadi chatelelayi kulemeshewa?

² Chimwekeshu 5:13, yamwekeshaña nawu ‘Owu washakama hetanda niMwana kaMukoku’ atelela kulemeshewa. Kapetulu 4 kamukanda wowumu wamuBayibolu kashimuna chuma chacheni chitwatela kumulemeshela Yehova. Yileñaleña yalema yamwiwulu yakwitanda yabidikaña nakumuhameka Yehova nawu, “Owu wahandaña haya nyaaka nanyaaka. Yehova Nzambi yetu, watelela kutambwila kulema, kalemesha niñovu, muloña yeyi  waleñeli yuma yejima nawa muloña wankeñelu yeyi, dichiyekalililiku nawa dichiwayileñeleli.”—Chim. 4:9-11.

³ Mwana kaMukoku hiYesu Kristu, “Mwana kaMukoku waNzambi owu wafumishaña nshidi yakaayi.” (Yow. 1:29) Bayibolu yatulejaña nawu wekala walema kubadika anyanta ejima adiku hela adiñaku. Yalumbulula nawu: “Yena diyi Mwanta wawanyanta nawa diyi Nkaaka yawankaaka, yena kankawindi wabulaña kufwa nawa washakamaña muchejeji mwabulaña kushikawu, yenowu abula kumonawu dehi kudi muntu hela wumu nawa hiyakutwesha kumumonaku.” (1 Tim. 6:14-16) Anyantanyi amakwawu adihanahu dehi kutufwila nakwikala ifutu danyiloña hanshidi jetu? Twatiyaña kuwaha kudibomba nanyikanka yayileñaleña yamwiwulu nakubidika netu: “Mwana kaMukoku ajahiliwu watelela kutambwila ñovu nimaheta nimaana niwuswa nikalemesha nikulema ninkisu.”—Chim. 5:12.

4. Muloñadi wejima wetu chitwatelela kumulemesha Yehova niKristu?

⁴ Wejima wetu twatela kumulemesha Yehova niKristu. Twatela kuyilemesha hakwila nawu twakaheti wumi wahaya nyaaka. Mazu aYesu itwatañaña haYowanu 5:22, 23 atukwashaña kutiyishisha ichi chikuma: “Tata hasompeshaña muntu niwumuku, ilaña wamwinka Mwanindi wuswa wejima wakusompesha, kulonda antu ejima amulemesheña Mwana neyi chamulemeshañawu Tata. Muntu wejima wabulaña kulemesha Mwana, halemeshaña niTata wamutemesheliku.”—Tañenu Masamu 2:11, 12.

5. Muloñadi chitwatela kulemeshela antu ejima?

⁵ Antu ayileñeli neyi “chochekalayi Nzambi.” (Kutach. 1:27) Dichi, antu ejima hela chakwila ambuka, kudi yilwilu yaNzambi yamwekeshañawu. Amwekeshaña kukeña, luwi, niwushona kudi akwawu. Chineli antu ayileñeli nachinleji, chayikwashaña kwiluka yuma yatama niyayiwahi, yaheña niyoloka nikwikala washinshika hela wabula kushinshika hela chakwila mpinji yikwawu afuukulaña mwaluwa. (Rom. 2:14, 15) Antu amavulu akeña yuma yayiwahi nawa yakadi majilu. Akeñaña kushakama nawakwawu mukuwunda. Hela chakwila eluka hela nehi, amwekeshaña kulema kwaYehova, dichi twatela kuyinka kavumbi nikalemesha.—Mas. 8:5.

6, 7. A Yinsahu jaYehova ambukaku ñahi nawantu amavulu kutalisha hakulemesha antu?

⁶ Twatela kwiluka kalemesha kitwatela kwinka antu amakwawu nihakukumina. Antu amavulu abula kuwanina anakuyiluwañesha chikupu kudi spiritu yamukaayi kaSatana. Dichinaleteshi antu kudifukula kudi amayala niambanda amakwawu chatela ayilemesheña hohu nikuyinka kavumbi katelela. Alemeshaña akulumpi jansakililu, akulumpi jamapolitiki, antu aya mpuhu muyisela yakudibecha, akwayisela, niantu amakwawu aya mpuhu chakwila ayimonaña neyi hiyantu alema chikupu. Dichi, atwansi niakulumpi akeñaña chikupu kuyimbujola, hadaha akeñaña kuyimbujola munvwalilu nimuyilwilu.

⁷ AkwaKristu alala hiyalemeshaña antu muniyi njilaku. Kristu diyi muntu hohu itwatela kwimbujola. (1 Pet. 2:21) Nzambi wukutiya kutama neyi tukusweja kulemesha antu kubadika chitwatela kuyilemesha. Twatela kwanuka walala wakwila nawu: “Antu ejima anavulumuni, nawa anakañanyi kushika mukulema kwaNzambi.” (Rom. 3:23) Kuhosha hohu chalala,  kwosi muntu wutwatela kulemesha munjila yinakumwekesha nawu tunakudifukula kudi yena.

8, 9. (a) A Yinsahu jaYehova amonaña ñahi akulumpi janfulumendi? (b) Komana kulemesha akulumpi janfulumendi kudi nahakukumina?

⁸ Mujinfulumendi jawantu, antu amakwawu ekalaña nayifulu yamaneni. Akulumpi janfulumendi atela kulondela nshimbi nikwakamena antu amwituña dawu. Chumichi chakwashaña antu ejima. Kapostolu Pawulu wayifumbili akwaKristu nindi amoneña akulumpi janfulumendi jawantu nawu “akweti wuswa wabadika” nawa atelela kuyovwahila kudi akwaKristu ejima. Wayilejeli nindi: “Yinkenu antu ejima yuma yinakukeñawu; muntu wunakukeña musonku, mwinkenu musonku; . . . muntu wunakukeña kumulemesha, mulemeshenu.”—Rom. 13:1, 7.

⁹ A Yinsahu jaYehova alemeshaña akulumpi janfulumendi, neyi anakukeña kuyilemesha hela neyi anakukeña kuyilemesha neyi chochayilemeshañawu mwituña dawu. Twayovwahilaña neyi anakutulombola. Hela chochu, kalemesha ketu kekalaña namwakukumina, kwesekeja nachahosha Nsona. Bayi twovwahila antu chakwila tuleka nikumwovwahila Nzambi hela tutachika kudiñija munsañu jamatuña nachiyuuluku.—Tañenu 1 Petulu 2:13-17.

10. Ambuña aYehova akunyima atushila ñahi chakutalilahu chachiwahi chakwovwahila nfulumendi niakulumpi janfulumendi?

¹⁰ Ambuña aYehova akunyima atushila chakutalilahu chachiwahi nachovwahilileñawu nfulumendi niakulumpi janfulumendi. Chelili Chiyuulu chawaRoma chitachiki kuchinda antu jawu, Yosefu niMariya alondeleli ilu lushimbi. Ayili kuBetelemi hela chakwila Mariya wadiña kwakwihi nakuvwala mwana wawedi. (Luka 2:1-5) Pawulu niyena chamutwambililiwu nawu neli yuma yatama, wadihakwililiku yomweni nakalemesha katelela kudi Mwanta Herodi Agiripa nikudi Fesitusi, nguvulu wawaRoma muYudeya.—Yil. 25:1-12; 26:1-3.

11, 12. (a) Chambwinyi chekala hakachi kawakulumpi janfulumendi nawakulumpi jansakililu? (b) Yumanyi yayiwahi yafuminimu chelili Chinsahu wakuAustria yalemeshi politishani?

¹¹ Hela chochu, aYinsahu jaYehova akaanaña kulemesha chikupu akulumpi jansakililu hela chakwila wena akeñaña kuyilemesha chikupu. Nsakililu yakutwamba yamwimenañaku Nzambi munjila yatama nawa yalumbululaña Izu dindi munjila yacheñi. Dichi, twamonaña akulumpi jansakililu neyi chochitwamonaña antu ejima, ilaña hitwatela kuyilemesha chikupuku. Tweluka netu Yesu wateneni amayala amuchidiwu amumafuku indi nindi anfwikiji nawa anlomboli aputa mesu. (Mat. 23:23, 24) Kwambukaku, neyi tuhanaña kalemesha katelela kudi akulumpi janfulumendi munateli kufuma yuma yayiwahi yitunateli nikubula kukuhwelela.

¹² Leopold Engleitner hiChinsahu wadikita wakuAustria akasiliwu kudi chiyuulu chawaNazi nawa amutwalili kuchilombu chakuBuchenwald. Dr. Heinrich Gleissner niyena wadiña kayili muyayitwalililiwu hamu musitima. Wadiña politishani muAustria. Hela chochu, amukasili kudi aNazi. Hampinji yayitwalileñawu kuchilombu, Manakwetu Engleitner wamushimwinini Gleissner, nawa watiyililili nakanañachima. Chamanini njita yakaayi yamuchiyedi, Gleissner watachikili kuyikwasha aYinsahu muAustria. Hadaha munateli kwanuka yakutalilahu yamwekeshaña aYinsahu chamwekesheliwu kalemesha katelela kudi akulumpi janfulumendi, ayilemesheli kwesekeja nachahosha Bayibolu hakalemesha katela kumwekeshawu akwaKristu.

13. Anyi atelela kulemeshewa nikuyinka kavumbi, nawa muloñadi?

¹³ Akwetu akwakwitiya atelela kulemeshewa nikuyinka kavumbi. Sweje-e aeluda anakulombola atelela kulemeshewa. (Tañenu 1 Timotewu 5:17.) Twayilemeshaña awa amanakwetu hichidi namuloña netuña kwafumawu, shikola yatañawu, kwashakamañawu hela mali akwetiwuku. Bayibolu yayitenaña nawu ‘yawaana yawamayala,’ nawa diwu akamenaña antu mukuloñesha kwaNzambi. (Efwes. 4:8) Toñojokenu hadi aeluda amuchipompelu, ankoñi añinza, amamembala amuKometi yaMutayi niamamembala aMwizanvu Dalombolaña. Amanakwetu niahela amuyaaka yawapostolu alemesheli chikupu amanakwetu alombweleña, ninetu makonu dichitunakwila. Twadifukulaña wanyi kudi añimenu yachipompelu chawakwaKristu hela kuyimona nawu hiyañelu neyi tudi nawu. Hela chochu, twayinkaña kavumbi nikalemesha awa amanakwetu hanyidimu yakalakalañawu nihakudizoza kwawu.—Tañenu 2 Akorinda 1:24; Chimwekeshu 19:10.

14, 15. Chambwinyi chekala hadi atubiña twawakwaKristu nawantu aditenaña nawu hiyatubiña.

¹⁴ Awa eluda ekala atubiña akuspiritu adizoza. Chineli ekala adizoza akaanaña kuyilemesha neyi chalemeshañawu antu aya mpuhu muyisela. Ichi chaletesha ambuki nawakulumpi jansakililu amakonu ninawakulumpi jansakililu ateneniyi Yesu muyaaka yawapostolu nindi: “Akeñaña kushakama mumaluña alema hakuda yakuda yamelela, mumasinagogi nimwena akeñaña kushakama hayitwamu yakumbidi nawa akeñaña nawu ayimusheña muyisankanu.”—Mat. 23:6, 7.

¹⁵ Atubiña alala akwaKristu adizoza alondelaña mazu aYesu akwila nawu: “Bayi ayitena kudi antu nawu Rabiku, muloña Ntañishi yenu wumu hohu nawa wejima wenu mudi amanakwamuntu. Cheñi nawa, bayi mutena muntu wejima hanu hamaseki nenu tata yenuku, muloña Tata yenu wumu hohu, Yowu wekala mwiwulu. Nawa bayi ayitena nawu anlomboliku, muloña Nlomboli yenu wumu hohu, yowu Kristu. Dichi, wabadika hakachi kenu watela kwikala mukwakuyizatila. Muntu wejima waditoheshaña, akamukehesha, nawa muntu wejima wadikeheshaña, akamutohesha.” (Mat. 23:8-12) Ichi dichaleteshaña aeluda amuyipompelu yejima yamukaayi ayikeñi, kuyinka kavumbi nikalemesha kudi akwawu aYinsahu.

16. Muloñadi chitwatela kutwalekahu nakukeña kwiluka Bayibolu chiyahosha kutalisha hakulemesha antu?

 ¹⁶ Hanateli kuhita mpinji hakwila nawu twiluki chitwatela kumwekesha kalemesha nimuntu wutwatela kulemesha. Chumichi dichayimwekeneni niakwaKristu akusambila. (Yil. 10:22-26; 3 Yow. 9, 10) Ilaña twatela kuzata nañovu hakwila tulondeleña chahosha Bayibolu kutalisha hakumwekesha kalemesha. Kwiluka mwakukumina neyi tunakulemesha antu kwaletaña muzañalu.

17. Kulemesha akulumpi janfulumendi kwawahiladi?

¹⁷ Neyi twinka kavumbi nikalemesha akulumpi janfulumendi, akuhakwilañaku wuswa wetu wakushimwina chakadi kutukañesha. Kakavulu, mudimu wetu wakushimwina awulemeshaña. Hadi yaaka yayivulu yinahitihu, aBirgit, apayiniya akuGermany, ayili kuchidika chamwanawu hamanishileñayi shikola. Antañishi ayilejeli aBirgit nawu tunadiluñishi kudizisha anyana kwawaYinsahu hadi yaaka yayivulu. Ahosheli cheñi nawu twadi kusawuka neyi twadiña wanyi nawanyana kawaYinsahu hashikola. A Birgit alumbulwili nawu: “Anyanetu twayidizishaña nshimbi jaNzambi nawa mwadibombela nikwinka kavumbi nikalemesha antañishi.” Ntañishi wumu wahosheli nindi, “Neyi anyana ejima adiña neyi anyanenu, chadi kutupelelaña kutañisha.” Chimwahitili nyilungu, ntañishi wumu wayili kukupompa kweneni kwadiñaku muLeipzig.

18, 19. Muloñadi chitwatelela kuyilemeshela aeluda munjila yatelela?

¹⁸ Kulemesha aeluda amuchipompelu kwashindamena hayishina yaloña nawa yamaana yekala Mwizu daNzambi. (Tañenu Aheberu 3:7, 17.) Twatela kuyisakilila hanyidimu yawu yalema yinakudikitawu nikuzata nañovu kulonda twovwahileña mwanakutulejawu. Neyi twila mwenimu chikuyikwasha kuzata mudimu wawu namuzañalu. Ilaña ichi hichinayi mukwila nawu twatela kwimbujola aeluda “elukewa” munvwalilu, chahoshañawu hadi antu amavulu hela chahanjekañawu nawantuku. Neyi twila mwenimu, dikwila nawu tunakuyilemesha munjila yatama. Twatela kwanuka netu niwena hiyantu abula kuwanina. Muntu wutwatela kwimbujola hiKristu hohu.

¹⁹ Tunateli kuyikwasha aeluda neyi tuyilemesha nikuyinka kavumbi munjila yatelela chatela tuyimoneña neyi kwiji hiyakwakuhema yisela. Twakeñaña netu abuli kwiñila mumuhetu wakudivwimba, kudimona nawu abadika akwawu hela kudimona nawu aloña nankashi.

20. Kulemesha antu munjila yatelela kwatukwashaña ñahi?

²⁰ Munjila yikwawu, tukwikala mukuwunda neyi tumwekeshaña kalemesha katelela kudi antu atelela. Chikutukwasha kubula kudimona kulema neyi antu amakwawu anakutulemesha. Chikutukwasha cheñi kwendela hamu nakuloñesha kwaYehova, kwabulaña kwiteja antu ejima, aYinsahu hela abula kwikala aYinsahu kuyilemesha kubadika chatela kuyilemeshawu. Kubombelahu, chikutukwasha kubula kutuntuka neyi antu itwalemesha anatuneñeshi.

21. Chumanyi chalema chitwelaña neyi tulemesha antu atelela kulemeshewa?

²¹ Twamutiyishaña Nzambi kuwaha neyi tulemesha antu atelela kulemeshewa munjila yatelela. Twelaña kwesekesha nachakeñayi nikuhemba kashinshi ketu kudi yena. Chumichi chatukwashaña kwakula antu amusawulaña. (Yish. 27:11) Mukaayi mudi antu abula kalemesha. Twasakililaña muloña etu tweluka chakulemesha antu kwesekeja nachakeñayi Yehova.