1. Kukalanyi kwamweniwu akwaKristu amumafuku awapostolu?

MWATELA mwadiña muchaaka cha 62, 63 indi kwiji 64 C.E., mwayisonekeleliyi kapostolu Petulu ‘antu ashakamineña neyi akwakwenda mwambala mukanu kaayi, apalañeneni muPontu, muÑalija, muKapadosiya, muAsiya nimuBitiniya.’ (1 Pet. 1:1) Iyi yipompelu yamuAsia Minor yaluwankeni nachisemwa, yakeñekeleña kuyikolesha nikuyilombola. Antu amuniyi yipompelu adiña nakuyikabisha nikuyihosha chatama. Amweneña kukala “kudi neyi kesi.” Nawa ashakamineña mumpinji yakala. Petulu wasonekeli nindi: “Kukuma kwayuma yejima kunaswini dehi kwakwihi.” Mwamweni, kukuma kwanshakaminu yawaYudeya kwadi kumana muyaaka yantesha. Yumanyi yadi kuyikwasha akwaKristu kwejima kwadiñawu kuumika muyina mpinji yakala?—1 Pet. 4:4, 7, 12.

2, 3. Muloñadi Petulu chakonkomweneniyi amanakwindi kumwekesha chisambu? (Talenu mwevulu wakutachikilahu.)

² Kubombela hayuma yahosheliyi, Petulu wayilejeli amanakwindi nindi: “Ikalenu nachisambu kudi wumu namukwawu.” (1 Pet. 4:9) MuchiGiriki izu dakwila nawu “chisambu” dalumbuluka nawu “kukeña  hela kumwekeshela luwi antu imwabula kwiluka.” Hela chochu, anukenu nenu, Petulu walejeleña amanakwindi niahela akwaKristu kumwekesha chisambu “kudi wumu namukwawu,” antu iyelukiliwu dehi nawa iyahanjekeleña nawu. Chisambu chadi kuyikwasha ñahi?

³ Chisambu chadi kuyinuñañesha. Toñojokenu chuma chayimwekeneni enu aweni. Ayitambikahu dehi kudi manakwenu kwitala dindi? Komana himwanukaña yuma yayiwahi yamwekeniku? Komana wubwambu wenu nawamanakwenu wakoleleliku wanyi chimwahosheli nsañu yayitiyishili kuwaha? Neyi tutambikaña amanakwetu niahela kumatala, tukuyiluka chiwahi kubadika chitwatela kuyiluka kumaluña amakwawu. AkwaKristu adiñaku mumafuku aPetulu ateleleli kudikunda chikupu chineli yuma yataminineñaku. NiakwaKristu alala atela kudikunda munanu “mafuku akukuminina.”—2 Tim. 3:1.

4. Malwihwinyi itukushinshikahu muchinu chibaaba?

⁴ Mpinjinyi yayiwahi yitwatela kumwekesha chisambu “kudi wumu namukwawu”? Tunateli kutondolwela ñahi yuma yinateli kutukañesha kumwekesha chisambu? Yumanyi yitwatela kwila neyi anatumwekesheli chisambu?

5. Tunateli kumwekesha ñahi chisambu hakupompa kwetu kwawakwaKristu?

⁵ Hakupompa: Twashikijaña akwetu akwaKristu ejima mwatutambikilañawu kwinza nakuda yakuda yakuspiritu. Yehova nikuloñesha kwindi diwu atutambikaña. (Rom. 15:7) Neyi antu amaha anenzi nakupompa, twayitambwilaña hela chakwila yetu twayitambikaña wanyi. Komana kwila tuyishikija awa amaha, hela chakwila nvwalilu nimmwekenu yawu hiyidi chiwahiku? (Yak. 2:1-4) Neyi tumona wamuha nashakami nkawindi, kwila tumutambika kulonda tushakami nindi nehi? Chikumupepelelaku kulondela progilamu yakupompa hadaha nikumukwashaku kuwana nsona. Hinjila yayiwahi yakumwekeshelamu “chisambu mpinji yejima.”—Rom. 12:13.

6. Anyi itwatwela kusambila kutambika kumatala etu?

⁶ Hakuda: Kunyima, chisambu chabombelelimu kutambika muntu kwitala kulonda adiili nindi hamu yakuda. (Kutach. 18:1-8; Ansomp. 13:15; Luka 24:28-30) Kuyitambika antu kulonda adiili hamu nawu yakuda kwayikwashileña kwikala amabwambu nikushakama mukuwunda. Anyi itwatela kusambila kutambika? Antu itwahandaña nawu mpinji yejima, amanakwetu niahela amuchipompelu. Neyi tudi mukukala, komana hitukukeña wukwashu kudi akwetuku? Twatela kwikala ashinshika nawa awunda nawamanakwetu niahela ejima. Mu 2011, Izanvu Dalombolaña dahimpili mpinji yakudizilamu Kaposhi Kakutalila muchisaka chaBeteli chakuUnited States, kufuma ha 18:45 kuyileta ha 18:15. Muloñadi chahimpililiwu? Habidikileñawu ashimwini nawu chumichi chikuyikwashaña amanakwetu amuchisaka chaBeteli kumwekesha chisambu neyi amanisha kupompa swayi. Tusanji tukwawu nitwena twahimpili mpinji. Iyi ntanjikilu yinakwashi yisaka yaBeteli kudikunda chikupu.

7, 8. Tunateli kumwekesha ñahi chisambu kudi añimenu amukuloñesha kwaYehova atuhempulaña?

⁷ Neyi anhoshi akuyipompelu yacheñi, ankoñi añiinza, mpinji yikwawu niañimenu amutayi ahakasanji kamwituña detu anatwendeli, diyi mpinji yitwatela kumwekesha chisambu. (Tañenu 3 Yowanu 5-8.) Njila yayiwahi yakumwekeshelamu chisambu hikuyiloñeshela yakuda. Kwila mwila mwenimu nehi?

⁸ Muhela wumu wakuUnited States chanukiliyi wahosheli nindi: “Hadi yaaka yayivulu, ami ninfumwami twatambikileña anhoshi amavulu niañodi jawu kwitala detu. Mpinji yejima twatiyileña kuwaha, kuseha nawa chabadika  kulema twakoleleñaku kuspiritu. Hitwaditoñeshañaku.”

9, 10. (a) Anyi akeñekaña kuyimwekeshela chisambu hampinji yayilehi? (b) Komana antu akweti matala anyanya anateli kutambwila enyi? Lumbululenu.

⁹ Enyi ashimbulaña: Kunyima, kumwekesha chisambu kakavulu kwabombelelimu kuyiloñeshela enyi elukawu chiwahi hakukaama. (Yoba 31:32; Fwile. 22.) Nimunanu mafuku, twatela kwila mwomumu. Kakavulu ankoñi akeñekaña hakukama neyi anendeli yipopmpelu. Akashikola ayaña kumashikola aWanta niakwakudihana mumudimu wakutuña akeñaña matala akushakamamu. Wubanji wadimwekenaña washiyaña yisaka yikwawu makasa mushiñu nawa akeñekaña hakukaama sampu anatuñululi matalawu. Bayi tuhoshaña netu akwetu adi namatala amawahi diwu atela kutambwila enyiku, hadaha anakwashani kapampa kakavulu. Kwila mutambwila enyi hela chakwila itala denu danyanya nehi?

¹⁰ Manakwetu wakuSouth Korea wanukaña chatambwililiyi akashikola ayili kushikola yaWanta. Wasonekeli nindi: “Najinokeleña kuyitambwila muloña dihu hitwadisumbwili tuhu nawa twashakamineña mwitala danyanya. Ilaña chitwayitambwilili twazañaleli chikupu. Chineli dihitwafumini hakudisumbula, twadizili adisumbula chiyanateli kwikala namuzañalu neyi amukalakela Yehova nikwilila hamu yuma yakuspiritu.”

11. Muloñadi chimwatelela kumwekesha chisambu kudi antu amaha muchipompelu chenu?

¹¹ Antu anabukili muchipompelu chetu: Amanakwetu ajiki hela antu adisumbula anateli kubukila mwiluña detu. Amakwawu enzaña nakukalakela kudi kukaankila. Hadaha apayiniya adimena anayitumi kwinza nakukwasha chipompelu chenu. Yuma yejima hakusambila yekalaña yawenyi kudi wena, chidi neyi iluña, chipompelu hadaha idimi hela chisemwa. Neyi tuyitambika kulonda tudiili hamu nawu hela kuhema hamu nawu chikuyikwasha kwikala nawamabwambu amaha nawa akwinjilila swayi odu iluña.

12. Shimunenu chakutalilahu chinakumwekesha nawu twatela kumwekesha chisambu hela chakwila hitukweti yuma yayivuluku?

¹² Twatela kumwekwesha chisambu hela chakwila hitukweti yuma yayivuluku. (Tañenu Luka 10:41, 42.) Manakwetu wumu chanukiliyi mpinji yatachikiliyi wumishonali, wahosheli nindi: “Twadiñi atwansi, kwosi yuma yitwelukili nawa twanukileña kumukala wetu. Ifuku dimu namelela, ñodami wanukili kumukala nawa nesekeli kumukundeja ilaña watwalekelihu kwanuka. Dichi mpinji chiyashikili kuma 19:30, twatiyili muntu nakukonkwesha kuchiisu. Chitwashinkwili kuchiisu twawanini kadizi waBayibolu natuleteli maorenji asatu. Wenjili nakwimusha amishonali amaha enjili. Weñilili nawa twamwinkeli menji akunwa. Nawa twapangili tii nichocolate yitata nankashi. Twelukili wanyi idimi daSwahili dahosheleñayi nawa niyena welukili Chizungu wanyi. Ilaña chenjiliyi chatuzañalesheli nawa twatachikili kudikunda nawamanakwetu itwawanini.”

13. Yumanyi yayiwahi yafumaña mukumwekesha chisambu?

¹³ Komana kudihu mpinji yimwakeñeleña kumwekesha chisambu ilaña mudifuntamu? Neyi mwadifuntilimu, mwapulwishili kukooleka kwakuzañalela hamu nawamanakwenu nikwikala nawubwambu wakola nawena. Chisambu chatukwashaña kumanisha chineñi. Hanu dinu, chumanyi chaleteshaña antu anakwawu abuleña kumwekesha chisambu? Kudi yuma yaleteshaña abuleña kumwekesha chisambu.

14. Twatela kwiladi neyi twekala wanyi nampinji niñovu yakumwekesha hela kwiteja chisambu?

¹⁴ Mpinji niñovu: Ambuña aYehova ekalaña nampinji wanyi nawa kakavulu ekalaña nayuma  yikwawu yakwila. Amakwawu amonaña nawu adana mpinji niñovu yakumwekesha chisambu. Neyi dichimwamonaña, mwatela kushinshika chimwazataña nyidimu yenu. Mwatela kuzata nañovu kulonda mwikaleñaku nampinji niñovu yakumwekesha chisambu nikwiteja neyi ayimwekeshela chisambu. Muloña Nsona yashimuna nawu akwaKristu ejima atela kumwekesha chisambu. (Heb. 13:2) Chatama wanyi kwikala nampinji yakwila mwenimu. Dichuma chachiwahi chitwatela kwila. Hela chochu, twatela kukeheshaku nyidimu yikwawu kulonda twileña mwenimu.

15. Yumanyi yaleteshaña antu amakwawu kubula kumwekesha chisambu?

¹⁵ Chimwadimonaña enu aweni: Kudihu mpinji yimwakeñeleña kumwekesha chisambu ilaña mumona nenu mukutwesha wanyi? Amakwawu atiyaña nsonyi hela achinaña nawu antu akutambikawu akuhosha nawu kwosi jadiñaku jalumbwa. Amakwawu adana mali amavulu nawa amonaña nawu hiyanateli kudiisha amanakwawu neyi chelañawu akwawu muchipompeluku. Anukenu nenu, bayi neyi kumukwesha chisambu chiña wudi nayuma yayivuluku, ilaña chikuwaha neyi mwikala awunyonji nawa akasanuka.

16, 17. Yumanyi yinateli kutukwasha kubula kwakama neyi tunakukeña kutambika antu kwitala?

¹⁶ Neyi mwachinaña kutambika antu kwitala denu, hiyenu hohu nkawenuku. Eluda wakuBritain wahosheli nindi: “Wejima wetu twakamenaña neyi tunakukeña kutambika antu kwitala. Ilaña mwafumaña yuma yayiwahi. Chatukwashaña kumukalakela Yehova nikwikala namuzañalu. Natiyaña kuwaha kunwa kofi nikuhanjeka nawantu itunatambiki.” Anukenu nenu chachiwahi kwikala akasunuka nawantu imunatambiki. (Fwi. 2:4) Amavulu atiyaña kuwaha kushimuna yuma yinamoniwu muchihandilu. Hampinji yitunatambiki antu, amakwawu dihavulawu kwihula yuma yitwahitilimu kunyima. Eluda mukwawu wasonekeli nindi: “Kutambika amanakwetu amuchipompelu kwitala kwankwashaña kuyiluka chiwahi sweje-e kwiluka chadiziliwu chalala.” Twazañalalaña neyi tumwekesha kukeña.

¹⁷ Muhela payiniya watambwilileña atudizi enjileña kumashikola awanta ashiyashana, wahosheli nindi: “Hakusambila, najinokeleña muloña nadiña netala danyanya nawa nadiña nayitwamu yayaaka. Ñoda manakwetu wadizishileña akashikola wanlejeli kubula kwakama. Wahosheli nindi yena ninfumwindi neyi adi mumudimu wakwenda, nyilungu yadiluñishañawu hinyilungu yashakamañawu namuntu wabula yuma yayivulu ilaña washa maana hakumukalakela Yehova nawa wapelesha chihandilu chindi. Chumichi chañanukishili chatudizishileñawu amama hitwadiña atwansi nawu: ‘Kuda mafu oku kwekala kukeña, kunabadiki kuda ñombi wakudiisha chachiwahi abombelaku ninkunyi.’” (Yish. 15:17) Bayi mwakamaku, ilaña lekenu kukeña kwenu kuyisañumuni kumwekesha chisambu.

18, 19. Chisambu chatukwashaña ñahi kubula kumona yilwilu yatama mudi akwetu?

¹⁸ Chimwayimonaña akwenu: Komana muchipompelu chenu mudi muntu wayihilishaña? Neyi kuzatilahu nehi, munateli kutwalekahu kumuhela manakwenu. Kwambuka kwayilwilu yawamanakwetu kunateli kuyiletesha mubuli kuyimwekeshala chisambu. Hela chinateli kuyikalila kujimbala yuma yatama yayililiyi manakwenu kunyima.

¹⁹ Bayibolu yatulejaña kwikala nachisambu hakwila nawu wubwambu wetu nawamanakwetu wutwalekihu, hela nawayilumbu jetu. (Tañenu Yishimu 25:21, 22.) Kumumwekeshela muntu chisambu kukutukwasha kutiyashana nikubula kudihela. Kukutukwasha kumona yilwilu yayiwahi yikweti manakwetu itunatambiki, yilwilu yamweniyi Yehova mudi yena  hakumuleta muchalala. (Yow. 6:44) Neyi tumwekesha kukeña kuhitila mukutambika muntu wabula kukuhwelela nindi tukumutambika, tukwikala amabwambu chikupu nayena. Tukumwekesha ñahi netu kukeña dikunakutusañumuna kumwekesha chisambu? Njila yimu hikulondela kufumba kwekala haAfwilipi 2:3, kwahosha nawu: “Dizozenuña nakumona akwenu nenu ayibadika enu.” Neyi tumonaña amanakwetu niahela netu atubadika, muchikuhwelelu, mukuumika, mukuhamuka hela muyilwilu yikwawu yawakwaKristu, chikutukwasha kuyikeña chikupu nikuyimwekeshela chisambu chakufuma hamuchima.

20. Muloñadi chitwatelela kuya neyi anatutambiki, nawa munjilanyi?

²⁰ Ñimbi yamasamu Davidi wehwili nindi: “Eyi Yehova, wukushakama mwitenti deyi hinyi?” (Mas. 15:1) Wakwili ilu lwihu kuhitila mukushimuna yilwilu yakuspiritu yakeñañayi Nzambi mudi antu atela kushakamamu. Chiliwilu chimu hikwila mutunahoshi: “Yowu welaña chakusanyikayi hela chakudibonda kubalumunamu nawa cheñi nehi.” (Mas. 15:4) Neyi atutambika nawa twiteja, twatela kushikijamu. Muntu wunatutambiki wazata nañovu kudiloñesha, dichi neyi tubula kuyaku ñovu jindi jikuya mumenji. (Mat. 5:37) Amakwawu akanaña kuya kwayitambikiliwu hatachi kulonda ayi kunayitambikiwu kunamoniwu nawu kudi chiwahi. Komana chumichi chikumwekesha kukeña hela kalemesha? Twatela kwiteja yuma yidi yejima yinatuloñesheliwu namuchima wakusakilila. (Luka 10:7) Neyi kudi yuma yikuleñela tubuli kuya, tukumwekesha kukeña neyi tumulejamu chadimu manakwetu watutambikili.

21. Kulemesha yisemwa kwatukwashaña ñahi kumwekesha kalemesha neyi anatutambiki?

²¹ Chachiwahi cheñi mpinji yikwawu kulemesha yisemwa. Muyisemwa yikwawu, muntu nateli kuya hela amutambika wanyi; ilaña muyisemwa yikwawu chiña anakutambiki. Kumaluña amakwawu, enyi diwu enkañawu yakuda yayiwahi kubadika antu amuchisaka; ilaña kukwawu enyi nienimatala adilaña hamu. Kumaluña amakwawu, antu anatambikiwu niwena aletaña yuma yakuzatisha; ilaña kukwawu antu anakutambika akwawu diwu hohu aloñeshaña. Nawa muyisemwa yikwawu, muntu neyi anamutambiki wakaanaña kamu hela kayedi dinu hakwiteja; ilaña muyisemwa yikwawu neyi muntu yakaana namwekeshi kadiwu. Twitejeña neyi anatutambiki kulonda tuyitiyisheña kuwaha antu anatutambiki.

22. Muloñadi chitwatelela kwikala “nachisambu kudi wumu namukwawu”?

²² Chuma chalema chidi chakwila nawu, “kukuma kwayuma yejima kunaswini dehi kwakwihi.” (1 Pet. 4:7) Tunakumona lukadi lwasweja lwabulahu dehi kumwekana hamaseki. Yihuñu chiyikuswejelaku, twatela kuyikeña chikupu amanakwetu niahela. Yinu diyi mpinji yitwatela kuzatisha chikupu kufumba kwaPetulu kwafumbiliyi akwaKristu nindi: “Ikalenu nachisambu kudi wumu namukwawu,” kufumba kwakuwahi kukabula kumana.—1 Pet. 4:9.