1. Yumanyi yatela kwilawu anvwali akwaKristu henohu anyanawu kanda apapatishewi?

BLOSSOM BRANDT walumbulwili yuma yamwekeni henohu kanda yafuukulihu kupapatishewa. Wahosheli nindi: “Hadi tukweji twatuvulu nayilejeleña atata nawamama nami inakukeña kupapatishewa nawa ahosheleñahu kakavulu. Akeñeleña niluki chikupu yuma yabombela muchuma chinafuukwili. 31 December, 1934, hifuku dinakabula kujimbala muloña dihinashikijili munafuukwili.” Makonu, anvwali akwaKristu akweti muchima wowumu wakukwasha anyanawu kufuukula mwamaana. Kulaba kupapatishewa hela kuhembelela kwaletaña wubanji wakuspiritu. (Yak. 4:17) Hela chochu, anvwali atela kuzatisha maana kulonda akwashi anyanawu henohu kanda apapatishewi nikwiluka nawu anadiloñeshi aweni kwikala akwaKristu.

2. (a) Yumanyi yahayamishaña ankoñi añiinza amakwawu? (b) Tukuhanjekadi muchinu chibaaba?

² Ankoñi añiinza amakwawu ahayamanaña muloña awanaña  atwansi amavulu adi nayaaka yamuma 18 nakushika muma 20 nikubadikahu akulila muyisaka yawakwaKristu ilaña apapatishewa wanyi. Nawa awa atwansi amavulu apompaña mpinji yejima nikuya nakushimwina. Aditenaña nawu hiyaYinsahu jaYehova. Ilaña, tuneluki wanyi chaleteshaña abuleña kudihana kudi Yehova nikupapatishewa. Yumanyi yayikañeshaña kupapatishewa? Mpinji yikwawu, anvwali diwu ayilejaña kubula kupapatishewa swayi. Muchinu chibaaba, tukuhanjeka yuma yiwana yaleteshaña anvwali akwaKristu kubula kukwasha anyanawu kupapatishewa.

3. Anvwali jaBlossom akameneneñadi?

³ Anvwali jaBlossom, itwahanjekahu muparagilafu yakusambila, akameneneña neyi mwanawu wamubanda wakulili chakwila nateli kwiluka chalumbuluka chipapatishu. Anvwali anateli kwiluka ñahi nawu mwanawu nashikihu chikupu kudihana?

4. Kufumba kwaYesu kwekala haMatewu 28:19, 20 kunateli kukwasha ñahi anvwali kudizisha anyanawu?

⁴ Tañenu Matewu 28:19, 20. Neyi chitwahanjekeli muchibaaba chinafumihu, Bayibolu yashimuna wanyi yaaka yatela kupapatishewayi muntu. Hela chochu, anvwali atela kutoñojokahu chikupu mwatalisha kwilisha atumbanji. Izu dachiGiriki dekala haMatewu 28:19 dabalumunawu nawu “mwakelishi atumbanji,” dalumbulula kudizisha muntu namuchima wakumwilisha yekali kadizi hela kambanji. Kambanji himuntu wadizaña hela weluka ntañishilu yaYesu nawa wajilondelaña. Dichi, anvwali akwaKristu atela kudizisha anyanawu kufuma kuwukeki nankeñelu yakuyilisha ekali atumbanji twaKristu apapatishewa. Kuhosha hohu walala, mukeki hanashikilimu kupapatishewaku. Hela chochu, Bayibolu yamwekeshaña nawu nianyana anyanya anateli kutiya nikudiza chalala chamuBayibolu.

5, 6. (a) Kwesekeja nachahosha Bayibolu hadi Timotewu, tukukunkulula netudi kutalisha hachipapatishu? (b) Anvwali anateli kukwasha ñahi anyanawu munjila yayiwahi?

⁵ Kambanji Timotewu wadizili chalala hadiñayi kansi. Kapostolu Pawulu wahosheli nindi Timotewu wadizili chalala kufuma kuwukeki. Hela chakwila wakulilili muchisaka chadambula mukudifukula, ilaña mama yindi kaYudeya ninkaka yindi wamubanda amudizishili Nsona, neyi chadiziliwu aYudeya. Chafuminimu, wadiña nachikuhwelelu chakola chikupu. (2 Tim. 1:5; 3:14, 15) Chashikijiliyi yaaka yakukumishaku yawukampululu hela yakutachika muma 20, Timotewu wekalili kambanji mukwaKristu enkeliwu nyidimu yadimena muchipompelu.—Yilw. 16:1-3.

⁶ Atwansi akulaña munjila yashiyashana; amakwawu akulaña swayi-swayi amakwawu nehi. Amakwawu ekalaña namaana akwiluka yuma nawa afwilaña kupapatishewa henohu achidi atwansi. Amakwawu akeñaña kupapatishewa neyi anakuliku dehi. Dichi, anvwali eluka chikupu chalumbuluka chipapatishu hiyakanjikijaña anyanawu kupapatishewaku. Ilaña, akwashaña mwana himwana kwesekeja nayaaka niwuswa wukwetiyi wakuhemba nsañu. Anvwali atiyaña kuwaha neyi mwnawu yeluka chalumbuluka nsona yaYishimu 27:11. (Tañenu.) Hela chochu, atela kwanukaña mudimu wawu wakwilisha anyanawu kwikala atumbanji twaKristu. Chumichi chikuyiletesha anvwali kudihula nawu, ‘Komana mwanami nashikihu kudihana kudi Nzambi nikupapatishewa nansañu yinadiziyi?’

7. Komana muntu wunakukeña kupapatishewa watela kwiluka yuma yejima yekala muBayibolu? Lumbululenu.

⁷ Chineli anvwali diwu antañishi muchisaka, atela kukwasha anyanawu kulonda ekali nachikuku chakola hakushindamena kudihana kwawu. Hela chochu, bayi neyi chinayi mukwila nawu muntu watela kwiluka yuma yejima henohu kanda yadihani kudi Nzambi nikupapatishewaku. Muntu chapapatishewayi, watwalekañahu kudiza kulonda yekali nakwiluka kwalala. (Tañenu Akolosi 1:9, 10.) Hanu dinu muntu watela kudiza kushika hadihi hakwila yapapatishewi?

8, 9. Yumanyi yitukudizila kunsañu yaPawulu namukwakuhemba kaleya?

⁸ Chakutalilahu chachisaka chimu chadiñaku mumafuku awapostolu chikukwasha anvwali makonu. (Yilw. 16:25-33) Pawulu wahempwili musumba waFwilipu mulwendu lwindi lwamuchiyedi lwawumishonali mu 50 C.E. Hadiñayi muniwu musumba, yena nimulunda nindi Silasi ayitwambilili nawa ayikwatili nakuyisha mukaleya. Nawufuku, kwenjili mutentashi nawa wanyinkesheli yikuku yakaleya nawa yenzelu yejima yenzunukili. Mukwakuhemba kaleya wakeñeleña kudijaha chamweniyi nindi atuyili anatemuki, ilaña Pawulu wamukaanishili. Pawulu naSilasi amushimwinini mukwakuhemba kaleya nichisaka chindi. Chalala chadiziliwu hadi Yesu chayileñeleli ashikeni kwiladi? Ashikeneni dakupapatishewa chakadi kulaba. Chumanyi chitukudizila kuniyi nsañu?

⁹ Hayina mpinji, muntu atondeleñawu kwikala mukwakuhemba kaleya chiña wadiñahu dehi mushidika. Iwu muntu wadiña weluka Nsona wanyi. Dichi hakwila yeluki chahosha Nsona, wateleli kudiza chalala chantesha chamuBayibolu, chidi neyi chalumbuluka kwikala kambuña aNzambi nawa nakufwila kwovwahila ntañishilu yaYesu. Mukapinji kantesha hohu, hanyima yakudiza chalala chantesha chamuNsona nichamweniyi kulema kwayuma yadiziliyi, washikeneni kupapatishewa. Chakadi nikujina, watwalekelihu kudiza yuma yayivulu hanyima yakupapatishewa. Kwesekeja nanichi chakutalilahu, mukwila ñahi neyi mwanenu yayileja nindi nakukeña kupapatishewa hanyima yakudiza chalala chantesha chamuNsona, chidi neyi nadizi chalumbuluka kudihana nikulema kwachipapatishu? Enu anvwali mwatela kuya nakuyileja aeluda amuchipompelu kulonda amoni neyi nashikihu kupapatishewa hela nehi. * Neyi chelañawu atumbanji ejima apapatishewa, niyena wukutwalekahu kudiza hankeñelu yaYehova muchihandilu chindi chejima, hela haya nyaaka.—Rom. 11:33, 34.

10, 11. (a) Anvwali amakwawu ahoshaña nawudi? (b) Anvwali atela kutwamijaku chumanyi?

¹⁰ Anvwali amakwawu alejaña anyanawu nawu akapapatishewa kumbidi neyi anatañi dehi shikola hela neyi aneñili dehi nyidimu. Iyi yitoñojoka yayiwahi, ilaña mwalala yikukwasha mwanawu kwikala namuzañalu walala? Komana mwalala iyi yitoñojoka yinesekani nachahosha Nsona? Izu daYehova dahosha nawudi?—Tañenu Mukwakutañisha 12:1.

¹¹ Chalema nankashi kwanukaña netu kanu kaayi niyuma yekalamu yinambuki nachatoñojokañayi  nichakeñañayi Yehova. (Yak. 4:7, 8; 1 Yow. 2:15-17; 5:19) Kwikala nawubwambu wawuwahi naYehova dikunateli kumukiña mwanenu kudi Satana, kaayi kindi niyitoñojoka yatama. Dichi neyi nvwali yalejaña mwana kufwila yuma yakumujimba, mwana wukuluwankana nawa wukwiluka wanyi yuma yalala yatela kwilayi. Komana anvwali akwaKristu akweti kukeña, mwalala anateli kwiteja mwanawu kumuluwañesha nayitoñojoka yamukaayi? Kuhosha hohu walala, twekalaña namuzañalu walala neyi tumutwamijaku Yehova muchihandilu chetu.—Tañenu Masamu 1:2, 3.

12. Muloñadi anvwali amakwawu chakañeshelañawu anyanawu kupapatishewa?

¹² Halumbulwileñayi muhela mukwaKristu wumu chakañesheleñayi mwanindi wamumbanda kupapatishewa, wahosheli nindi, “Inakutiya nsonyi kuhosha nami nachinineña nami akamuhaña muchipompelu.” Kufwana iwu muhela, anvwali amakwawu atoñojokaña nawu mwanawu wuchidi chikwata manoka, dichi wakapapatishewa neyi nakuli dehi muyitoñojoka. (Kutach. 8:21; Yish. 22:15) Dichi atoñojokaña nawu, ‘Neyi mwanani wapapatishewa wanyi, hiyakumuhaña muchipompeluku.’ Yitoñojoka yamuchidiwu yaluwa.—Yak. 1:22.

13. Neyi muntu nakulaba kupapatishewa, komana chinayi mukwila nawu hiyakamusompesha kudi Yehovaku? Lumbululenu.

¹³ Kuhosha hohu walala, kwosi nvwali mukwaKristu wakeñaña nindi mwanindi yapapatishewi henohu kanda yashikihu kudihanaku. Hela chochu, hichinayi mukwila nawu mwana neyi yabula kupapatishewa hiyakamusompesha kudi Yehovaku. Tunahoshelidi mwenimu? Bayi neyi Yehova wakasompesha antu muloña wakupapatishewaku. Ilaña, mwana akamusompesha kudi Nzambi neyi nashiki hachipimu chakwiluka yayiwahi niyatama kwesekeja nachamonañayi Yehova. (Tañenu Yakoba 4:17.) Dichi, enu anvwali, chatela mukañesheña mwana kupapatishewa, zatenu nañovu kulonda mwanenu yayimbujoleña. Mwatela kumudizisha mwanenu kwikala namuchima wakwovwahila nshimbi jaYehova jaloña kufuma kuwukeki. (Luka 6:40) Neyi yatachika kwovwahilia, chikamukwasha kumbidi, muloña mwanenu wukwinjilila kwila yuma yakeñañayi Yehova.—Isa. 35:8.

14. Aeluda atela kukwasha ñahi anvwali anakukwasha anyanawu anakukeña kupapatishewa?

¹⁴ Aeluda amuchipompelu, atela kukwasha mudimu wawanvwali kuhitila mukuhosha hayuma yakuspiritu yatela kwilawu anyanawu. Muhela wumu wazatili wupayiniya hadi yaaka kubadika ha 70, wanukili mpinji yahanjekeliyi naManakwetu Charles T. Russell henohu wudi nayaaka 6. Wahosheli nindi, “Twahanjekeli hayuma yakuspiritu yinafwilileña kwila hadi maminiti 15.” Mwamweni, neyi mukolesha muntu namazu amawahi, wakayanukaña mpinji yejima. (Yish. 25:11) Aeluda anateli cheñi kwinka anvwali nianyanawu nyidimu yakuwahisha Itala daWanta, anyana anateli kuyinka nyidimu yinesekani nayaaka yikwetiwu.

15. Antu amuchipompelu anateli kukwasha ñahi atwansi?

¹⁵ Antu amuchipompelu niwena atela kukwashana kuhitila mukudikunda nawatwansi amuchipompelu. Munabombeli kumona neyi anakupaminaku kuspiritu. Komana kansi neyi nakwakula, wakulaña chakufuma hamuchima hela wahanaña chiwahi mpanji hakupompa kwamukachi kamulungu? Komana washindahu dehi kweseka  hela washimwinahu dehi akwawu akashikola? Nyakalenuña kuyisakilila atwansi chakufuma hamuchima. Komana kwila muhanjekaña nawatwansi henohu kupompa kanda hela hanyima yakupompa nehi? Neyi twilaña mwenimu nikwila yuma yikwawu, atwansi akumona nawu niwena ekala “muchipompelu cheneni.”—Mas. 35:18.

16, 17. (a) Chipapatishu chinateli kumukwasha ñahi muntu kwikala nawumi kumbidi? (b) Anvwali akwaKristu atela kufwila kwikala namuzañalu wamuchidinyi? (Talenu mwevulu wakutachikilahu.)

¹⁶ Kukulisha anyana “kuhitila mukuyifumba nikuyikonkomwena kwesekeja nachakeñañayi Yehova,” himudimu wekala hakachi kanyidimu yamaneni yikwetiwu anvwali akwaKristu. (Efwe. 6:4; Mas. 127:3) Kwambukaku nawanyana avwalikileña muIsarela adihana dehi, anyana kawanvwali akwaKristu makonu hiyavwalikaña adihana dehi kudi Yehovaku. Kubombelahu, hitwavwalikaña namuchima wakumukeña Nzambi hela kukeña chalalaku. Mwana chavwalikayi hohu, anvwali atela kutachika kumudizisha kulonda yekali kambanji, kumukwasha kulonda yekali wadihana nikwikala kambuña Yehova wapapatishewa. Kwila mwenimu kwalemenadi? Kudihana, chipapatishu nikumukalakela Nzambi nakashinshi, yumiyi diyikamukwasha muntu kupuluka halukadi lwasweja lunakwinza.—Mat. 24:13.

¹⁷ Blossom Brandt chalejeliyi anvwali jindi nindi nakukeña kupapatishewa, anvwali jindi amwakamaña Nzambi akeñeleña kumona chikupu neyi nashikihu kwila mwanafuukuliyi. Chamweniwu nawu nashikihu kudihana, etejeli mwafuukwiliyi. Chelili nawu kumadiki wakapapatishewa, atata yindi elili chuma chachiwahi nawufuku. Blossom wahosheli nind: “Atulejeli wejima wetu kufukama nawa alombeli. Amulejili Yehova nawu atiyili kuwaha nachafuukwili mwanawu wumumbanda hakuhana wumi windi kudi Yena.” Chimwahitili yaaka 60, Blossom wahosheli nindi: “Inakuyileja nami, hela nashinakaji, nakajimbala wanyi wuna wufuku!” Enu anvwali, zatenuña nañovu hakwila mwikali namuzañalu wenzaña hakumona anyanenu anadihani nakwikala ambuña aYehova apapatishewa.