Kuhosha hohu walala, makonu kwosi muntu weluka chamwekeneñayi Pawulu. Nyevulu yakuleña yitwazatishaña munyikanda yetu hakumumwekesha Pawulu yakufwikija, hiyashindamena hawunsahu walala wawanawu akwakusandujolaku.

Hela chochu, kudi wunsahu wamwekeshaña chamwekeneñayi Pawulu. Chakutalilahu, Zion’s Watch Tower yaMarch 1, 1902, yahosheleña hawunsahu wumu nawu: “Kutalisha hachamwekeneñayi Pawulu: . . . Mukanda wa‘Acts of Paul and Thecla ,’ wasonekeliwu mu A. D. 150, walumbulwili chamwekeneñayi Pawulu, nawa iwu wunsahu watela walala nawa wesekana nachisemwa chindi. Muniwu mukanda, amushimuna nawu wadiña wanyanya mujimba, wadiña nebala, wadiña namangobe, wadiña natusafu, wadiña nankuñu yabulakana ninamuzulu wawulehi.’”

The Oxford Dictionary of the Christian Church (yamu 1997) yahosha hansañu yakunyima nawu: “Mumukanda ‘waActs’ mwekala nsañu yalala yakunyaaka.” Mukanda waActs of Paul and Thecla adiña nakuwuzatisha mumafuku awapostolu, muloña wukweti mamanyusikiliputi 80 achiGiriki, nawa wudi mumadimi amakwawu. Dichi, nyevulu yetu yesekana nansañu yikwawu yasonekawu munyikanda yakunyaaka yalumbulula chamwekeneñayi iwu kapostolu.

Hela chochu, anukenu nenu, kudi yuma yikwawu yalema kubadika kwiluka hohu chamwekeneñayi Pawulu. Nihampinji yadiña nakushimwinayi, antu amakwawu ahosheleña nawu “wamwekanaña kuzeya nimazu ahoshañayi atiyakanaña wanyi.” (2 Kor. 10:10) Ilaña twatela kwanukaña netu amubalumwini kwikala mukwaKristu kudi Yesu muchihayamisha. Twatela cheñi kutoñojoka hayuma yeliliyi Pawulu hamu neyi ‘iyala atondeliwu kudi Kristu kulonda yashimuni ijina daYesu kudi akwanyuza.’ (Yilw. 9:3-5, 15; 22:6-8) Nawa toñojokenu cheñi hanyikanda yamuBayibolu yamoneneniwu Pawulu kusoneka kudi Yehova chiyinateli kutukwasha.

Pawulu hadisambileña nayuma yelileñayi henohu kanda yekali mukwaKristu, hela kudilumbulula yomweni chamwekeneñayiku. (Yilw. 26:4, 5; Fwi. 3:4-6) Wahosheli nindi: “Yami nakehelamu hakachi kawapostolu, nawa ami nateleli wanyi kuntena nawu kapostolu.” (1 Kor. 15: 9) Wasonekeli nindi: “Ami wabadika kukeha chikupu mukachi kawakwakujila ejima asweja kukeha, antiyilili luwi lwasweja kulonda nishimwini nsañu yayiwahi kudi akwanyuza yahosha hayuma yayiwahi yaKristu yakadi kutwesha kutiyishisha yejima.” (Efwe. 3:8) Iyi nsañu diyalema kubadika kwakamena hachamwekeneñayi Pawulu.