1, 2. (a) Anvwali akwaKristu amakwawu elaña ñahi neyi mwanawu nakukeña kupapatishewa? (b) Muloñadi antu anakuya nakupapatishewa chayihwilañawu neyi chakwila anadihani kudi Yehova? (Talenu mwevulu wakutachikilahu.)

ANVWALI akwaKristu adiña nakutala mwanawu wamumbanda wejina daMaria, wemeni hamu nawakwawu ayileña nakupapatishewa. Wakwili malwihu ayedi ehwili nhoshi nezu datiyakana chikupu. Kuhiñahu wapapatisheweli.

² Anvwali jaMaria atiyili kuwaha chafuukwiliyi mwanawu wamumbanda kudihana chakufuma hamuchima kudi Yehova nikupapatishewa. Hela chochu, henohu kanda yapapatishewi, amama yindi adiña nakujinoka. Adiña nakutoñojoka nawu: ‘Maria wuchidi kansi. Komana neluki chikupu nindi neyi yapapatishewa watela kwila munakaniyi? Wadi kapapatishewa neyi nakuli.’ Anvwali amavulu akweti kukeña atoñojokaña muniyi njila neyi mwanawu nakukeña kupapatishewa. (Mukwa. 5:5) Kudihana  nichipapatishu dichuma chalema muchihandilu chawakwaKristu.—Talenu chikasha chinakwila nawu “ Komana mwadihana dehi kudi Yehova?”

3, 4. (a) Kapostolu Petulu walumbulwili ñahi kulema kwachipapatishu? (b) Muloñadi chitukwesekejela chipapatishu nawatu watuñiliwu mumafuku aNowa?

³ Hampinji yahosheleñayi hachipapatishu, kapostolu Petulu wahosheli hadi Nowa chatuñileñayi watu nindi: “Chipapatishu chesekana nanichi chuma chamwekeni, nichena chinakuyamwina enu.” (Tañenu 1 Petulu 3:20, 21.) Watu watuñiliyi Nowa wamwekesheli hatooka nawu wadihanini kwila nkeñelu yaNzambi. Nowa welili mwejima mwamulejeliwu kudi Yehova. Mwamweni, kumwekesha chikuhwelelu munyidimu dikwaletesheli Nowa nichisaka chindi kupuluka haDibaji. Petulu watalishili mudihi hakuhana ichi chakutalilahu?

⁴ Watu watuñiliyi Nowa wamwekesheli nawu wadiña nachikuhwelelu. Chipapatishu nichena chamwekeshaña wunsahu kudi antu anakutala. Chamwekeshaña wunsahwinyi? Chamwekeshaña nawu mukwaKristu nadihani yomweni kudi Yehova kuhitila mukukuhwelela mukusañuka kwaKristu. Kufwana Nowa, atumbanji adihana ovwahilaña kuzata nyidimu yayinkawu kudi Nzambi. Neyi chamupulwishiliwu Nowa haDibaji, antu apapatishewa nawa ashinshika akayipulwisha neyi kaayi hikakukuma. (Maku 13:10; Chim. 7:9, 10) Chumichi dichaletesha kudihana nichipapatishu kwikali kwalema. Muntu walabaña kupapatishewa washaña wumi windi wakushakama haya nyaaka hakatoña.

5. Tukuhanjekadi muchinu chibaaba?

⁵ Chineli chipapatishu chalema, twatela kwakula awa malwihu asatu. Bayibolu yahosha nawudi hachipapatishu? Yumanyi yatela kwilayi muntu henohu kanda yapapatishewi? Muloñadi mukwaKristu wunakudizisha chatelelayi  kumudizisha mwanindi hela kadizi waBayibolu kwiluka kulema kwachipapatishu?

6, 7. Lumbululenu mwatalishili chipapatishu chaYowanu. (b) Chipapatishwinyi chalema chapapatishiliyi Yowanu?

⁶ Chipapatishu chatachi chitwatañaña muBayibolu hichipapatishu chapapatishileñayi Yowanu Mupapatishi. (Mat. 3:1-6) Antu apapatishileñayi Yowanu amwekesheleña nawu anabalumuki mumuchima nakuleka nshidi kwesekeja naNshimbi jaMosi. Hela chochu, chipapatishu chimu chalema cheliliyi Yowanu hichadiña chakubalumuka mumuchimaku. Yowanu wadiña nakukooleka kwakumupapatisha Yesu, Mwana kaNzambi wawanina. (Mat. 3:13-17) Yesu hadiña nanshidiku, dichi hateleleli kubalumuka mumuchimaku. (1 Pet. 2:22) Ilaña chipapatishu chindi chamwekesheli nawu wadihanini kwila nkeñelu yaNzambi.—Heb. 10:7.

⁷ Hampinji yadiñayi Yesu nakuzata mudimu wakushimwina hamaseki, atumbanji twindi niwena adiña nakupapatisha antu. (Yow. 3:22; 4:1, 2) Iku kupapatisha kwamwekesheleña nawu antu anabalumuki mumuchima nakuleka nshidi kwesekeja naNshimbi jaMosi neyi chapapatishileñayi Yowanu. Hela chochu, hanyima yakufwa nikusañuka kwaYesu, chipapatishu chatachikili kwimenaku chuma chacheñi kudi atumbanji twindi.

8. (a) Yesu wenkeli atumbanji twindi mudimwinyi hanyima yakusañuka? (b) Lumbululenu chichalemena mukwaKristu kupapatishewa.

⁸ Mu 33 C.E., Yesu asañwiliwu wamwekeni kudi izaza dawamayala nawambanda akubadika ha 500, hadaha hadiña nianyana. Hekwawu diyi mpinji yahosheliyi nindi: “Dichi, yenu mwakelishi antu akunyuza yejima ekali atumbanji, muyipapatisheña mwijina daTata nidaMwana nidaspiritu yajila, muyidizisheña ahembeña yuma yejima yinnayileji enu.” (Mat. 28:19, 20; 1 Kor. 15:6) Eña, chinakumwekesha neyi hampinji yahanineñayi Yesu iwu mudimu hadiña atumbanji twindi amavulu. Dichi Yesu wamwekesheli nindi antu ejima akusenda mpaanda yakwikala akwaKristu atela kupapatishewa. (Mat. 11:29, 30) Muntu wejima wakeñeleña kumukalakela Nzambi munjila yatelela wateleleli kwiluka nikwiteja mudimu wazatañayi Yesu hakushikija nkeñelu yaYehova. Kufumahu dinu, hakupapatishewa. Dichipapatishu chamenji chetejeliyi hohu Nzambi. Bayibolu yashimuna wunsahu wawuvulu kutalisha kumafuku awapostolu nawu atumbanji amaha aKristu elukili kulema kwachipapatishu. Nawa hiyashintajalileña kupapatishewaku.—Yilw. 2:41; 9:18; 16:14, 15, 32, 33.

9, 10. Chumanyi chitunateli kudizila kudi iyala kaEtiyopiya nikudi kapostolu Pawulu kutalisha hachipapatishu?

⁹ Tañenu Yilwilu 8:35, 36. Shinshikenu chakutalilahu cheyala kaEtiyopiya wafumineña kuYerusalema nakudifukula. Kañelu kaYehova kamulombweli Fwilipu kuya nakuwana iyala kaEtiyopiya nawa “wamushimwinini nsañu yayiwahi yaYesu.” Chumanyi cheliliyi kaEtiyopiya? Chuma cheliliyi chamwekesheli muchima wakusakilila hachalala chamudizishiliwu. Wafwilileña kwila yuma kwesekeja nachakeñañayi Yehova, dichi wapapatisheweli chakadi kulaba.

¹⁰ Chamuchiyedi hichakutalilahu cheyala kaYudeya wakabishileña akwaKristu. Wavwalikilili mumuza wadihana kudi Nzambi. Hela chochu, aYudeya ajimbesheli wubwambu wawu wadimena naYehova. Iwu iyala washili maana kutushidikilu twawaYudeya, ilaña wenjili nakuhimpa. Amushimwinini kudi Yesu Kristu asañwiliwu nawa alemesheliwu.  Chumanyi cheliliyi iwu iyala? Wetejeli wukwashu kudi kambanji mukwaKristu Ananiya. Bayibolu yahosha kutalisha hadi iwu iyala nawu: “Kuhiñahu wanyamukili, amupapatishili.” (Yilw. 9:17, 18; Ñal. 1:14) Munashikeni chikupu kwiluka nenu iwu iyala kaYudeya diyi ona wekalili kapostolu Pawulu. Ilaña shinshikenu chuma cheliliyi. Chelukiliyi chalala kutalisha hamudimu wekala naYesu hakushikija nkeñelu yaNzambi, welilihu chuma chimu. Wapapatisheweli chakadi kulaba.—Tañenu Yilwilu 22:12-16.

11. (a) Chumanyi chaleteshaña atudizi aBayibolu makonu kupapatishewa? (b) Twatiyaña ñahi neyi tumona atumbanji amaha anadihani kupapatishewa?

¹¹ Dichatela kwilawu atudizi aBayibolu makonu, chili hiyatwansi hela akulumpi. Antu adi nachikuhwelelu nawa anadizi chikupu chalala chamuBayibolu afwilaña kudihana nikupapatishewa. Hakupompa kwejima kwañiinza nikweluña hekalaña mpanji yachipapatishu yakundamaña sweje-e kudi antu anakuya nakupapatishewa. A Yinsahu jaYehova atiyaña kuwaha neyi kadizi waBayibolu yeteja chalala nawa yashika nikuchipapatishu chamumenji. Komana anvwali akwaKristu azañalalaña wanyi kumona anyanawu adi hakachi kawatumbanji amaha anakuya nakupapatishewa? Muchaaka chamudimu cha 2017, antu akweti “nyichima yashinshika” kubadika ha 284,000, adihanini kudi Yehova kuhitila mukupapatishewa mumenji. (Yilw. 13:48) Mwamweni, awa atumbanji amaha elukili chikupu nawu akwaKristu atela kupapatishewa. Yumanyi yeliliwu hakwila apapatishewi?

12. Yumanyi yatela kwilayi kadizi waBayibolu henohu kanda yapapatishewi?

¹² Henohu muntu kanda yapapatishewi, chikuhwelelu chindi chatela kushindamena hakwiluka kwalala kwakwiluka Nzambi, nkeñelu Yindi ninjila yashaku yakupulukila. (1 Tim. 2:3-6) Chikuhwelelu chamuchidiwu chamukwashaña kadizi kutondolwela yilwilu yamuneñeshaña Nzambi nakwila yuma kwesekeja nanshimbi jaYehova jaloña. (Yilw. 3:19) Kuhosha hohu chalala, muntu kwila yadihana kudi Nzambi iku nakwila yuma yatama yikaleñela yakabuli kuswana Wanta nehi, neyi yadihana kudihana kwindi kwamukunkulwayi. (1 Kor. 6:9, 10) Ilaña watela kwila cheñi yuma yikwawu kubadika hohu kulondela nshimbi jaYehova jaloña. Muntu wunakukabila kuloña watela cheñi kuyaña nakupompa nikudikita chikupu mumudimu wakupulwisha mawumi nawa wakwilisha atumbanji. Yesu wahosheli nindi iwu mudimu akawuzataña kudi atumbanji twindi alala. (Yilw. 1:8) Kambanji wamuha watela kwila iyi yuma yejima kuhiñahu dihu hakudihana kudi Yehova mukulomba kwankawindi nikudihana hamesu awantu amavulu kuhitila mukupapatishewa.

13. Muloñadi antañishi aBayibolu chatelela kwanukawu nawu mukwaKristu wejima watela kwikala wapapatishewa?

¹³ Hampinji yitunakukwasha anyanetu niatudizi aBayibolu kwila yuma yalema, twatela kwanuka netu kwikala kambanji walala kwabombelamu kupapatishewa. Neyi twanukaña chumichi, tukuyikwasha chiwahi atudizi etu. Tukuhanjeka nawu chiwahi hampinji yatelela chichalemena kudihana nikupapatishewa. Mwamweni, tunakukeña anyanetu niatudizi aBayibolu ashiki kuchipapatishu!

14. Muloñadi chitukubulila kukanjikija muntu wudi wejima kupapatishewa?

¹⁴ Kwosi muntu atela kukanjikijawu kupapatishewa kudi anvwali jindi, muntu wunakumudizisha Bayibolu hela muntu wudi wejima muchipompelu. Yehova hakeñaña nindi tukanjikijeña  antuku. (1 Yow. 4:8) Ilaña, hampinji yitunakumudizisha, twatela kukonkomwena hakulema kwakwikala nawubwambu wawuwahi naNzambi. Muchima wakusakilila chalala chinadiziyi nikufwila kusenda mpaanda yawakwaKristu diyuma yikumuletesha kadizi kupapatishewa.—2 Kor. 5:14, 15.

15, 16. (a) Muntu watela kupapatishewa nayaaka yiñahi? Lumbululenu. (b) Kadizi waBayibolu wateleladi kupapatishewa nakwikala Chinsahu chaYehova hela chakwila wapapatisheweli munsakililu yacheñi?

¹⁵ Hosi hashimunawu nawu muntu watela kupapatishewa nayaaka mukanaña. Kadizi wejima wakulaña nikupama munjila yashiyashana. Amavulu apapatishewaña iku achidi atwansi nawa atwalekañahu kwikala ashinshika kudi Yehova. Atudizi amakwawu amonaña kulema kwakupapatishewa hanyima yakudiza chalala chamuBayibolu muwushinakaji. Amakwawu apapatishewaña iku anabadiki dehi yaaka 100!

¹⁶ Kadizi waBayibolu wumu wakula dehi wehwili muntu wamudizishileña neyi chakwila wateleleli kupapatishewa cheñi, muloña wadiña wapapatishewa dehi munsakililu yacheñi. Iwu kadizi nintañishi yindi ashinshikili chiwahi nsona yamuBayibolu. Kadizi welukili chahosha Bayibolu kutalisha hachipapatishu nawa hashimwibwili wanyi wapapatisheweli. Hela chakwila wadiña nayaaka 70, wamweni nindi watela kupapatishewa. Mwamweni, chipapatishu chalala chashindamena hakwiluka kwalala kwakwiluka nkeñelu yaYehova. Dichi atumbanji amaha atela kupapatishewa hela chakwila apapatisheweli munsakililu yacheñi.—Tañenu Yilwilu 19:3-5.

17. Yumanyi yitwatela kutoñojokahu hefuku dachipapatishu?

¹⁷ Ifuku dachipapatishu hifuku dakuzañalala chikupu. Dekala cheñi ifuku dakutoñojokahu chikupu. Twatela kuzata nañovu hakwila twili kwesekeja nakudihana kwetu. Dihafumini Yesu hakuyesekeja akwaKristu nampaanda. Atumbanji twaYesu atela wanyi “kudihandila awenawu, ilaña amuhandili owu wayifwilili nawa asañwiliwu.”—2 Kor. 5:15; Mat. 16:24.

18. Malwihwinyi itukahanjekahu muchibaaba chinalondelihu?

¹⁸ Mama yaMaria watoñojokeleña haniyi yuma hampinji yatoñojokeleñayi mazu itwashimuna hakusambila. Neyi mudi anvwali, hadaha mwadihulahu dehi nenu: ‘Komana mwanami mwalala nashikihu kupapatishewa? Komana neluki chikupu yuma yakeñekaña hakwila nawu muntu yapapatishewi? Kwila yatañahu shikola hela kwiñila mudimu nehi? Indi neyi yavulumuna hanyima yakupapatishewa?’ Muchibaaba chinalondelihu, twakahanjeka hanawa malwihu nichatela kwilawu anvwali akwaKristu kulonda amoneña chipapatishu munjila yatelela.