1. Kubabesha akwishimuna ñahi muBayibolu?

MWATOÑOJOKAÑADI neyi mutiya izu dakwila nawu “kubabesha”? Hadaha mwashikenaña kutoñojoka hadi muntu anakukabishawu, ilaña mwabombela yuma yayivulu. MuBayibolu, kubabesha akwishimuna munjila yayiwahi, mpinji yikwawu akwitenena hamu namaana, kukeña niwumi. (Yish. 1:2-7; 4:11-13) Muloña kubabesha kwaNzambi kwamwekeshaña nawu watukeña nawa wakeñaña nindi twakashakameña haya nyaaka. (Heb. 12:6) Hela chakwila wababeshaña, ilaña hababeshaña munjila yalukambuku. Mwamweni, izu “dakubabesha” datalisha mukudizisha, neyi chadizishañayi nvwali mwana akeñayi.

2, 3. Kubabesha kwabombelamu ñahi kudizisha nikukabisha? (Talenu mwevulu wakutachikilahu.)

² Talenu chakutalilahu: Johnny kansi weyala nakuhemena ngunja mwitala. Mama yindi yamuleja nindi: “Johnny, lekaku kuhemena ngunja mwitala! Wukubalula yuma.” Ilaña yena yadiwula munamulejiwu kudi mama yindi nawa yatwalekahu kuhemena mwitala, kutwala muna yabalula niwumba. Mama yindi wukumubabesha  ñahi? Kubabesha kwindi kukubombelamu kumudizisha nikumukabisha. Hakumudizisha, wukumuleja Johnny nindi watamisha hakubula kumwovwahila. Wukumuleja chichawahila kwovwahila anvwali kuhitila mukumulumbulwila nindi nshimbi jawanvwali jajiwahi nawa jakwashanaña. Hakwila yakoleshi munahoshiyi, wukumukabishaku chanti munjila yayiwahi. Chakutalilahu, nateli kumutambula Johnny ngunja hadi mafuku antesha. Chumichi chikumudizisha nawu kubula kwovwahila kwatama.

³ Etu akwaKristu ejima amuchipompelu, twekala amwitala daNzambi. (1 Tim. 3:15) Dichi twatela kulemesha nshimbi jashaku Yehova nikwiteja kutubabesha neyi tunajifumpi. Kubombelahu, neyi yuma yituneli yinaleti jomisha mbaña, kubabesha kwindi kukutwanukishaña kulema kwakumwovwahila Tata yetu wamwiwulu. (Ñal. 6:7) Nzambi watwakamenaña nawa hakeñaña nindi twileña yuma yikutuneñeshaku.—1 Pet. 5:6, 7.

4. (a) Yehova wakiswilaña kudizisha kwamuchidinyi? (b) Tukuhanjekadi muchinu chibaaba?

⁴ Neyi tuzatisha kubabesha kwamuNsona tukumukwasha mwanetu hela kadizi waBayibolu kwikala mukwakumulondela Kristu. Izu daNzambi, chozelu chitwazatishaña hakudizisha, datukwashaña “kubabesha nachu munjila yakuloña.” Dichi tunateli kumukwasha mwanetu hela kadizi waBayibolu kwiluka ‘nikuhemba yuma yejima yatulejeliyi Yesu.’ (2 Tim. 3:16; Mat. 28:19, 20) Yehova wakiswilaña neyi tudizisha antu muniyi njila, kudizisha kwamuchidiwu kwakwashaña amavulu kwikala atumbanji twaKristu. (Tañenu Titusa 2:11-14.) Ichi dinu tuhanjekenu hañakwilu yamalwihu asatu alema: (1) Kubabesha kwaNzambi kwamwekeshaña ñahi nawu watukeña? (2) Chumanyi chitukudizila kudi antu ababesheliyi Nzambi? ni (3) Neyi tunakubabesha, tunateli kumwimbujola ñahi Yehova niMwanindi?

5. Kubabesha kwaYehova kwamwekeshaña ñahi nawu watukeña?

⁵ Kukeña kwamusañumunaña Yehova kwolola, kutañisha nikutudizisha kulonda tutwalekihu kushakama mukukeña kwindi nikwikala munjila yaya kuwumi. (1 Yow. 4:16) Hatudiwulaña hela kutuhosha mazu akasawuntu, akutuleñela tudimoneña neyi tudi amukunkulwayiku. (Yish. 12:18) Ilaña, Yehova watulemesha, wamonaña yuma yayiwahi yidi mumuchima nawa walemesha wuswa wetu wakudifuukwila. Komana dichimwamonaña kufumba kwaNzambi, hela chakwila kunenjili Mwizu dindi, munyikanda yashindamena haBayibolu, mudi anvwali akwaKristu niaeluda amuchipompelu? Mwamweni, aeluda atufumbaña munjila yakuwunda nawa yakukeña neyi ‘tunakoñi chuma chatama,’ hadaha chakubula kwiluka, amwekeshaña kukeña kwatukeñayi Yehova.—Ñal. 6:1.

6. Kubabesha kunabombelimu kumutambula muntu kukooleka, kwamwekeshaña ñahi kukeña kwaNzambi?

⁶ Hela chochu, mpinji yikwawu, kubabesha kwabombelamu yuma yayivulu kubadika hohu kufumba hela kwolola. Neyi muntu nankoñi nshidi yeneni, anateli kumutambula kukooleka muchipompelu. Hela chakwila anamutambuli kukooleka, iku kubabesha kwamwekeshaña nawu Nzambi watukeña. Chakutalilahu, muntu neyi anamutambuli kukooleka chikumukwasha kutoñojoka hakulema kwakudiza Bayibolu nkawindi, kutoñojokahu chikupu nikulomba. Chumichi chikumukwasha kwikala wakola kuspiritu. (Mas. 19:7) Mukuhita kwampinji, anateli kumufuntishila cheñi kukooleka. Kuhaña muntu muchipompelu nikwena kwamwekeshaña kukeña kwaYehova, muloña kwakiñaña chipompelu. (1 Kor. 5:6, 7, 11) Chineli Nzambi wababeshaña munjila yaloña, neyi amuhaña muchipompelu wukwiluka nindi waluwañesheli nawa wukubalumuka mumuchima.—Yilw. 3:19.

7. Shebina wadiñanyi, nawa watachikili kwikala nayilwilwinyi yatama?

⁷ Hakwila twiluki kulema kwakubabesha, twayenu tushinshiki antu eyedi ababesheliwu kudi Yehova: Shebina, wadiñaku mumafuku aMwanta Hezekiya niGraham, manakwetu wamunanu mafuku. Chineli wadiña ‘mukwakutala kwitala,’ hadaha daHezekiya, Shebina wadiña nawuswa chikupu. (Isa. 22:15) Chawushona, wadivwimbili nawa wakeñeleña kumulemesha. Wadimbilili niijamu dadiwahi nawa wendeleleña ‘mumakalu akulema’!—Isa. 22:16-18.

8. Yehova wamubabesheli ñahi Shebina, nawa yumanyi yafuminimu?

⁸ Muloña wakwila Shebina watachikili kudilemesha, Nzambi ‘wamunañumwini hakulema’ nakuhiñishahu Eliyakimi. (Isa. 22:19-21) Chumichi chamwekeni hampinji yakeñeleñayi Mwanta Senakeribi wakuAshuri kulukuka Yerusalema. Chimwahitili mpinji, iwu mwanta watemesheli akulumpi niamashidika amavulu kuYerusalema, kulonda yayichiinishi aYudeya niHezekiya kulonda adihani. (2 Anya. 18:17-25) Eliyakimu amutemesheli kuya nakuhosha nawakulumpi, ilaña wadiña nkawindi wanyi. Wayili nawakwawu ayedi, hakachi kawu hadiña Shebina, wadiña nsoneki haniyi mpinji. Komana chumichi chinakumwekesha wanyi nawu Shebina hahililiku nawa wadizozeli kutambwila chifulu chaheshina chakadi kuhemba nkunyi? Neyi dicheliliyi, yumanyi yitwatela kudizila kuniyi nsañu? Tuhanjekenu yuma yisatu yitukudizilaku.

9-11. (a) Yikumanyi yalema yitukudizila kudi Shebina? (b) Yehova chamufumbiliyi Shebina chinatukwashi ñahi?

⁹ Chatachi, Shebina amutambwili chifulu. Chakutalilahu chindi chatusoñamishaña nawu “kudinka wanta kwasambilaña, kujilumuka kwakumininaña; muchima wakudivuna wasambilaña, kudimbuka kwakumininaña.” (Yish. 16:18) Neyi mukweti kukooleka muchipompelu, hadaha chifulu cheneni, komana mukutwalekahu kwikala adizoza? Komana mukumulemesha Yehova hawaana wumukweti hela hayuma yimunazati mumudimu wunayinkiwu? (1 Kor. 4:7) Kapostolu Pawulu wasonekeli nindi: “Inakuleja muntu-himuntu hakachi kenu nami, bayi yatoñojoka nindi walema kubadika chekalayiku, ilaña muntu-himuntu yatoñojokeña kwesekeja nachekalayi.”—Rom. 12:3.

¹⁰ Chamuchiyedi, Yehova chamubabesheleñayi Shebina, welukili nindi kubabesha kwindi kukumukwasha Shebina kuhimpa yilwilu yindi. (Yish. 3:11, 12) Antu ejima anatambuliwu kukooleka muchipompelu chaNzambi atela kudizila kuniyi nsañu. Chatela ahili hela  kuhemba ndulu, atela kutwalekahu kumukalakela Nzambi nañovu yawu yejima hela chakwila anayitambuli kukooleka nawa atela kumona nawu Yehova wayikeña hakuyibabesha. Twatela kwanuka netu, neyi tudizoza, Tata yetu wakatukiswila. (Tañenu 1 Petulu 5:6, 7.) Nzambi chatubabeshañayi munjila yakukeña chamwekeshaña nawu nakutuwumba, dichi twikaleña amwovu kutuwumba mumakasa indi.

¹¹ Chamuchisatu, Yehova chamubabesheliyi Shebina chadizishaña antu enkawu mudimu wakubabesha chikuma chalema, chidi neyi anvwali niatulama akwaKristu. Chikumanyi chiyakudizilaku? Hela chakwila kubabesha kwaYehova kwamwekeshaña nawu wahela nshidi, ilaña kwamwekeshaña cheñi nawu wamukeña muntu wunavulumuni. Neyi wudi nvwali hela kalama wukweti mudimu wakubabesha, komana wukwimbujola Yehova kuhitila mukuhela yuma yatama iku wunakumonamu yuma yayiwahi mudi mwaneyi hela mukwenu mukwakwitiya?—Yuda 22, 23.

12-14. (a) Antu amakwawu elaña ñahi neyi anayibabeshi kudi Nzambi? (b) Izu daNzambi dakwashili ñahi manakwetu wumu kuhimpa yilwilu yindi, nawa yumanyi yafuminimu?

¹² Chawushona, amakwawu neyi anayibabeshi, atwalekañahu kuneña hadaha nikudambula kudi Nzambi niantu jindi. (Heb. 3:12, 13) Komana chumichi chinayi mukwila nawu antu amuchidiwu kwila muyikwasha nehi? Talenu chakutalilahu chaGraham, ahañiliwu muchipompelu, mukuhita kwampinji amufuntishili ilaña mukuya kwamafuku wazeyeli kuspiritu. Chimwahitili yaaka, wamwilili eluda wadiña ibwambu dindi kulonda yamudizisheña Bayibolu.

¹³ Eluda wahosheli nindi: “Kukala kwadiña naGraham hikudivwimba. Wayihembeleli nkunyi aeluda adiña mukometi yawusompeshi hamuhañiliwu. Dichi hampinji yitwadizileña nindi, twahanjekeli hajinsona jahosha hakudivwimba niyuma yafumañamu. Graham watachikili kudishinshika yomweni muchibanjilu Chezu daNzambi nawa watiyili kutama yuma yamweniyi! Mwafumini yuma yayiwahi chikupu! Chelukiliyi nindi amuputishili kudi “chibalu” chakudivwimba nawa chelukiliyi nindi wadiña nakukala kwakuhemba nkunyi, watachikili kuhimpa swayi-swayi. Watachikili kupompa mpinji yejima, kudiza Izu daNzambi chikupu nikulomba ifuku dejima. Watachikili kwakamena chisaka chindi kuspiritu nawa ñodindi nianyanindi atiyili kuwaha.”—Luka 6:41, 42; Yak. 1:23-25.

¹⁴ Eluda watwalekelihu nindi: “Ifuku dimu, Graham wanlejeli chuma chantiyishili kuwaha. ‘Wahosheli nindi nashimbuli muchalala, nawa nakalakali niwupayiniya hadi yaaka yayivulu. Ilaña aha dinu dihinukuhosha nami namukeña Yehova.’ Hashimbwili wanyi, amwinkeli mudimu wakuhana yihoshelu Mwitala daWanta nawa watiyili kuwaha mudimu wamwinkeliwu. Chakutalilahu chindi chandizishili nawu, neyi muntu yadizoza kudi Nzambi nakwiteja kubabesha kwindi, mwafumaña nkisu jajivulu!”

15. Twatela kwiladi neyi tunakukeña netu kubabesha kwetu kuyishikeña antu hamuchima?

¹⁵ Hakwila twikali antañishi amawahi, twatela kwikala atudizi amawahi. (1 Tim. 4:15, 16) Munjila yoyimu, antu enkayi Nzambi mudimu wakufumba diwu atela kusambila kwovwahila chikupu nshimbi jaYehova. Neyi ovwahila muniyi njila, akuyilemeshaña nikuyitilila kudi antu anakudizishawu hela anakwololawu. Shinshikeni chakutalilahu chaYesu.

16. Yumanyi yitukudizila kudi Yesu chababesheleñayi nikutañisha munjila yayiwahi?

¹⁶ Yesu wovwahilileña Tata yindi mpinji yejima,  hela chakwila yuma yinakali. (Mat. 26:39) Wakeñeleña kalemesha nimpuhu kuya kudi Tata yindi hayuma yatañishileñayi nihamaana indi. (Yow. 5:19, 30) Muloña wakwila Yesu wadiña wadizoza nawa wovwahila, wakokweli antu akweti nyichima yayovu. Antu chayiliwu kudi yena, chamukwashili kuyitiyila wushona nikuyitañisha chiwahi. (Tañenu Luka 4:22.) Mazwindi awushona akwashili antu adiña nanyichima neyi iteti dachikeka hela wanda wamwinoñu wunakukeña kujima. (Mat. 12:20) Hela chakwila amwesekeleña, Yesu wamwekesheleña luwi nikukeña. Chumichi chamwekeni mpinji yayikwashiliyi atumbanji twindi chamwekesheliwu muchima wakudinyamuna.—Maku 9:33-37; Luka 22:24-27.

17. Yilwilwinyi yayiwahi yinateli kukwasha aeluda kwikala atubiña amawahi anyikoku yaNzambi?

¹⁷ Antu ejima enkawu mudimu wakubabesha kushindamena haNsona atela kwimbujola chakutalilahu chaKristu. Mwamweni, neyi amwimbujola, akumwekesha nawu anakufwila kuyiwumba kudi Nzambi niMwanindi. Kapostolu Petulu wasonekeli nindi: “Biñenuña mukanka wanyikoku yaNzambi wunayikunjikiwu nawu muwuhembeña, hakwikala atulama, bayi mukalakaleña chakuyikanjikijaku, ilaña mukalakaleña namuchima wakudihana kudi Nzambi; bayi kufwila kuheta munjila yawupwapokiku, ilaña mukudikeñela chikupu; bayi mwikala anyanta jawantu anekali answana jaNzambiku, ilaña ikalenuña akutalilahu kudi mukanka wanyikoku.” (1 Pet. 5:2-4) Ilukenu nenu, neyi atulama afwilaña kumwovwahila Nzambi niKristu, mutu wachipompelu, mukufuma yuma yayiwahi yikuyikwasha wena niantu anakubiñawu.—Isa. 32:1, 2, 17, 18.

18. (a) Yehova wakeñaña nindi anvwali eleñadi? (b) Nzambi wakwashaña ñahi anvwali kuzata nyidimu yawu?

¹⁸ Yishina yoyimu yinateli kuzatika nimuchisaka. Nyitu yayisaka ayileja nawu: “Bayi muhilishaña anyanenuku, ilaña yikulishenuña kuhitila mukuyifumba nikuyikonkomwena kwesekeja nachakeñañayi Yehova.” (Efwe. 6:4) Muloñadi anvwali chatelelawu kulondela iku kufumba? Yishimu 19:18 yahosha nawu: ‘Babeshaku mwaneyi hohanu hikuchidi chikuhwelelu, bayi wukaleñeli mwaneyi yakafwiku.’ Mwamweni, Yehova wakayisompesha anvwali akwaKristu neyi abula kuyibabesha anyanawu munjila yatelela! (1 Sam. 3:12-14) Hela chochu, Yehova wenkaña anvwali maana niñovu neyi amulomba mukudizoza nawa neyi atañaña Izu dindi nikwiteja kuyilombola naspiritu yajila.—Tañenu Yakoba 1:5.

19, 20. (a) Nkiswinyi yafumaña mukutambwila kufumba kwaNzambi? (b) Yumanyi yitukahanjeka muchibaaba chinalondelihu?

¹⁹ Hitukutwesha kuchinda nkisu yejima yafumaña mukwiteja kubabesha kwaNzambi nimukwimbujola Yehova niYesu neyi tunakubabesha amakwawuku. Hakachi kaniji nkisu, yisaka niyipompelu yikwikala mukuwunda. Nawa ejima wetu tukumonaña netu atukeña, atulemesha nawa twakiñewa, yuma yitwakadiluñishaña kumbidi. (Mas. 72:7) Mwamweni, neyi Yehova yatubabesha, nakutudizisha chakushakama hamu haya nyaaka mukuwunda nawa neyi chisaka chanuñañana chinakulombolawu kudi yena hamu neyi tata yetu. (Tañenu Isaya 11:9.) Neyi tumonaña kubabesha kwaNzambi muniyi njila, tukwiluka chekalilaku kubabesha: chuma chamwekeshaña nawu Nzambi watukeña chikupu.

²⁰ Muchibaaba chinalondelihu, tukashinshika yuma yabombela mukubabesha kwamuchisaka nimuchipompelu. Tukahanjeka cheñi chitunateli kudifumba etu aweni nichuma chikwawu chakataña chikupu kubadika chichakataña neyi anatufumbi.