1. Tunateli kwikala ñahi namaana, nawa mwafumaña yumanyi?

YEHOVA diyi nsulu yamaana nawa wayinkaña antu maana indi namuchima wumu. Yakoba 1:5 yahosha nawu: “Neyi hakachi kenu hadi muntu wunabuli maana, yatwalekihu kulomba kudi Nzambi nawa wakamwinka . . . chakadi kuhoshola.” Njila yimu mutwekalilaña namaana aNzambi hikutambwila kufumba kwindi. Nawa awa maana akutukiña kuyilwilu yatama nikuwubanji wakuspiritu. (Yish. 2:10-12) Chikufumamu, ‘tukushakama mukukeña kwaNzambi, nakutalila wumi wahaya nyaaka.’—Yuda 21.

2. Tunateli kwiteja ñahi kufumba kwaNzambi?

² Hela chochu, nshidi jetu, yitachi yetu niyuma yikwawu yatuleteshaña kubula kutambwila kufumba hela kukwimona munjila yacheñi. Twatachikaña kukeña kufumba neyi tumona nkisu yafumañamu, yamwekeshaña nawu Nzambi watukeña. Yishimu 3:11, 12 yahosha nawu: “Eyi mwanami, chakubabeshañayi Yehova bayi wudiwulaña mwoku, . . . muloña Yehova wahosholaña antu akeñayi.” Mwamweni, twanukeña mpinji yejima netu Yehova watukeña chikupu. (Tañenu Aheberu 12:5-11.) Chineli Nzambi watwiluka chiwahi, kufumba kwindi mpinji yejima kwekala kwakuwahi nawa kwatelela. Tuhanjekenu hayuma yiwana yadibombela mukufumba:  (1) kudifumba etu aweni, (2) kufumba kwawanvwali, (3) muchipompelu chawakwaKristu ni (4) chuma chakataña chikupu kubadika chichakataña neyi anatufumbi.

3. Mwana nateli kutachika ñahi kudifumba yomweni? Shimunenu chakutalilahu.

³ Kudifumba etu aweni kwabombelamu kudiyuula etu aweni kulonda twikali nayilwilu niyitoñojoka yayiwahi. Hitwasemukaña nanichi chilwilu chakudifumba etu aweniku. Ilaña twatela kuchidiza. Chakutalilahu: Mwana neyi nakudiza nkinga, kakavulu nvwali wamukwatilañaku. Mukuhita kwampinji neyi mwana natachiki kwiluka, watachikaña kumulekelaku chovu-chovu. Chamonayi nindi nadizi wamulekelañaku. Munjila yoyimu, neyi anvwali adizishaña anyanawu mpinji yejima nawa mukudiwunjika “kuhitila mukuyifumba nikuyikonkomwena kwesekeja nachakeñañayi Yehova,” akuyikwasha kwinjilila kudifumba aweni nikwikala namaana.—Efwe. 6:4.

4, 5. (a) Kudifumba etu aweni kwalema ñahi hampinji yitunakuvwala “wuntu wawuha”? (b) Muloñadi chitukubulila kuleka kunyamuka hela chakwila tunadimbuki “mapampa katanu nakayedi”?

⁴ Yishina yoyimu yinateli kuzatika nikudi muntu wunamwiluki Yehova muwukulumpi. Hadaha wadifumbaña yomweni. Kuhosha hohu walala, kambanji wamuha wekalaña kanda yapami kuspritu. Ilaña nateli kutachika kupama kuspiritu neyi yadiza “kuvwala wuntu wawuha” wudi neyi waKristu. (Efwe. 4:23, 24) Kudifumba etu aweni kwalema neyi tunakukeña kupama kuspiritu. Neyi tudifumbaña, tukudiza “kukaana yilwilu yakubula kumwakama Nzambi nikufwila kwayuma yamukaayi, nakutoñojoka mwamaana, nakulondela mwaya kuloña nikumwekesha yilwilu yakumwakama Nzambi muyinu nshakaminu yamakonu.”—Tit. 2:12.

⁵ Hela chochu, wejima wetu twakoñaña nshidi. (Mukwa. 7:20) Neyi muntu yavulumuna, hichinayi mukwila nawu wazeya hela nawu hadifumbaña yomweniku. Yishimu 24:16. yahosha nawu: “Muntu waloña wadimbukaña mapampa katanu nakayedi chanyamukayi hohu.” Chumanyi chamukwashaña kunyamuka? Bayi nañovu jindi yomweniku, ilaña naspiritu yaNzambi. (Tañenu Afwilipi 4:13.) Mukabu waniyi spiritu mwabombela kudihemba, chilwilu chadifwana nakudifumba etu aweni.

6. Tunateli kwikala ñahi atudizi amawahi Ezu daNzambi? (Talenu mwevulu wakutachikilahu.)

⁶ Yuma yikwawu yikutukwasha kudifumbaña etu aweni hikulomba kwakufuma hamuchima, kudiza Bayibolu nikutoñojokahu chikupu. Indi neyi chayikalilaña kudiza Izu daNzambi? Hadaha mwadimonaña enu aweni nenu mukutwesha wanyi kudiza. Hela chochu, ilukenu nenu Yehova wukuyikwasha neyi mumulomba. Nateli kuyikwasha ‘kufwila chikupu’ kudiza Izu dindi. (1 Pet. 2:2) Chatachi, mulombenu Yehova yayikwashi mudifumbeña enu aweni kulonda mudizeña Izu dindi. Kuhiñahu, zatenu nañovu mwileña yuma kwesekeja nakulomba kwenu, hadaha mwatela kwihihishaku mpinji yakudiza. Mukuhita kwampinji, kudiza kukuyipelelaña nawa mukudiluñishaña! Mwamweni, mukumona kulema kwakudiza chimukwiluka chekala yitoñojoka yaYehova yasweja kuwaha.—1 Tim. 4:15.

7. Kudifumba etu aweni kunateli kutukwasha ñahi kuzataku nyidimu yakuspiritu?

⁷ Kudifumba etu aweni kwatukwashaña kuzataku nyidimu yakuspiritu. Shinshikenu chakutatalilahu cheyala wukweti chisaka wamweni nindi iyena dindi dayileña nakumana. Chumanyi cheliliyi? Wafuukwilihu kuzata wupayiniya wampinji yejima nikutaña yibaaba yamumagazini etu yahosha hakwikala neyena. Kulomba nikwena kwamukwashili nikumukolesha kuspiritu.  Watachikili kuzataku wupayiniya wakukwasha mutukweji tukwawu. Chumanyi chafuminimu? Hela chakwila kwadiña yuma yamukañesheleña, wafwilileña chikupu kwikala payiniya wampinji yejima nawa nkumininaku wekalili payiniya wampinji yejima.

8-10. Yumanyi yinateli kukwasha anvwali akwaKristu kukulisha anyanawu namuchima wakumukalakela Yehova? Shimunenu chakutalilahu.

⁸ Anvwali akwaKristu adi namudimu walema chikupu wakukulisha anyana “kuhitila mukuyifumba nikuyikonkomwena kwesekeja nachakeñañayi Yehova.” (Efwe. 6:4) Iwu himudimu weneni, sweje-e mukanu kaayi kamakonu. (2 Tim. 3:1-5) Hela chochu, mwana neyi navwaliki hekalaña nawuswa wakwambula yayiwahi nayatamaku. Ilaña wasemukaña nachinlenji chakwiluka yuma chakeñekaña kuchidizisha nikuchifumba. (Rom. 2:14, 15) Mukanda wumu wahosha haBayibolu washimuna nawu izu dachiGiriki dabalumunawu nawu “kufumba” anateli kudibalumuna nawu “kukulisha mwana.”

⁹ Anyana afumbawu chiwahi kakavulu ekalaña akiñewa. Eluka nawu wuswa wawu wakufuukula wukweti mwakukumina nawa eluka cheñi nawu yuma yafuukulañawu niyuma yelañawu mwafumaña yuma yayiwahi hela yatama. Dichi, anvwali akwaKristu atela kulomba wukwashu kudi Yehova. Anukenu nenu njila yakulishilamu anyana yambuka kwesekeja nachisemwa nikiñu. Hakwila nawu anvwali akulishi chiwahi anyanawu atela kumwovwahila Nzambi, bayi kushindamena hadi antu hela hayitoñojoka yawuntuku.

¹⁰ Tudizilenu kuchakutalilahu chaNowa. Chamulejeliwu kudi Yehova nawu yatuñi watu, Nowa hashindameneni hamaana indiku. Wadiña kanda yatuñeñahu dehi watu. Dichi washindamena hadi Yehova nawa mwejima mwamulejeliwu kudi Yehova “dimu mweliliyi.” (Kutach. 6:22) Yumanyi yafuminimu? Nowa watwesheli kutuña watu katachi. Mwamweni, watuñili! Nowa wahembeli chisaka chindi chiwahi nawa kukuhwelela mumaana aNzambi dikwamukwashili kwila mwenimu. Dichi wadizishili anyanindi chiwahi nawa embujolileña yuma yayiwahi yelileñayi, chuma chadiña chakala munana mafuku atama adiñaku henohu Dibaji kanda.—Kutach. 6:5.

11. Muloñadi anvwali chatelelawu kuzata nañovu kudizisha anyanawu?

¹¹ Enu anvwali, munateli kwila ñahi “mweliliyi” kumesu aNzambi? Mutiyililenuña Yehova. Itejenu yayilomboleña hampinji yimunakukulisha anyanenu kuhitila Mwizu dindi nimukufumba kutwatambwilaña mukuloñesha kwindi. Mukuhita kwampinji, anyanenu akayisakilila hamudimu imunakuzata. Manakwetu wumu wudi nayaaka 21 wasonekeli nindi: “Nasakililaña nankashi chanhembeliwu anvwali jami. Azatili nañovu kunshika hamuchima. Nasakilila  nankashi chankwashiliwu kupama kuspiritu.” Hela chakwila anvwali anazati nañovu, anyana amakwawu amushiyaña Yehova. Hela chochu, anvwali anazati nañovu kudizisha anyanawu chalala ekalaña nachinleji chachiwahi. Atela cheñi kukuhwelela nawu mwanawu wunapwapuki wakafunta cheñi “hetala” kudi Yehova.

12, 13. (a) Anvwali akwaKristu amwekeshaña ñahi nawu amovwahila Nzambi neyi mwanawu anamuhañi muchipompelu? (b) Yumanyi yayiwahi yafuminimu chelili anvwali amu amwovwahili Yehova?

¹² Anvwali amakwawu chayikalilaña kwovwahila lushimbi lwakubula kudikunda namwanawu ahañawu muchipompelu. Shinshikenu chakutalilahu chanvwali wamubanda wadiña namwanindi ahañiliwu muchipompelu nawa wafumini hetala. Mama yindi wahosheli nindi: “Nakeñakeñeleña tuyiluwa munyikanda yetu kulonda nihanjekeña mpinji yeneni namwanami nimwanindi.” Wabombelelihu nindi: “Ilaña nfumwami wankwashili nindi mwanetu wafuma dehi mumakasa etu, dichi hitwatela kudikunda nindi cheñiku.”

¹³ Chimwahitili yaaka, mwanindi amufuntishili. Mama yindi wahosheli nindi: “Ichi dinu wantuminaña foni nimameseji ifuku dejima! Nawa wanlemesha ami ninfumwami muloña weluka nindi twamwovwahilili Nzambi. Ichi tunadikundi chikupu.” Neyi mwanenu amuhaña muchipompelu, komana ‘mukumukuhwelela Yehova namuchima wenu wejima, chakadi kushindamena kukashinshi kenu enu aweni’? (Yish. 3:5, 6) Anukenu nenu, kufumba kwaYehova kwamwekeshaña nawu wukweti maana nawa watukeña. Anukenu cheñi nenu, waheni Mwanindi kudi antu ejima, kubombelahu nimwanenu. Nzambi wakeñaña nindi antu ejima akapuluki. (Tañenu 2 Petulu 3:9.) Dichi ovwahilenu kufumba niwunlomboli waYehova. Enu anvwali, ilenuña yuma yejima yahoshayi Yehova hela chakwila yinakuyikalila kuyila. Eña, itejenuña kufumba kwaNzambi, bayi mukukaanañaku.

14. Nshimbi jaYehova jahanañayi kuhitila mudi “ñamba washinshika” jatukwashaña ñahi?

¹⁴ Yehova wakana kuhemba, kukiña nikulombola chipompelu chawakwaKristu. Welaña mwenimu munjila jajivulu. Chakutalilahu, wenka chipompelu mumakasa aMwanindi. Mwanindi niyena watonda “ñamba washinshika” waloñeshaña yakuda yakuspiritu hampinji yatelela. (Luka 12:42) Waloñeshaña yakuda munjila yashiyashana, wahanaña nshimbi jajiwahi hela kufumba munjila yayiwahi. Dihulenu enu aweni nenu, ‘Komana kudihu mpanji hela chibaaba chitwadizili chankwashili kuhimpa yitoñojoka hela yilwilu yami?’ Neyi mwahimpili, mwelili chiwahi! Munakwiteja Yehova kuyiwumba hela kuyifumba kulonda mumweneñamu kuwaha.—Yish. 2:1-5.

15, 16. (a) ‘Amayala ekala yawaana’ muchipompelu anateli kutukwasha munjilanyi? (b) Tunateli kupeleshaku ñahi mudimu wawaeluda?

¹⁵ Kristu watonda cheñi muchipompelu “amayala kwikala yawaana,” hela netu aeluda kulonda abiñeña nyikoku yaNzambi. (Efwe. 4:8, 11-13) Munjilanyi muyinateli kutukwashila iyi yawaana? Njila yimu hikwimbujola chikuhwelelu chawaeluda niyuma yayiwahi yelañawu. Njila yikwawu hikulondela kufumba kwawu kwamuNsona. (Tañenu Aheberu 13:7, 17.) Anukenu nenu aeluda atukeña nawa akeñaña nawu tupameña kuspiritu. Chakutalilahu, neyi amona nawu tunakujiña kukupompa hela iyena detu dinakumana, chakadi nikujina akunyakala kutukwasha. Akututiyilila nawa akutukolesha chiwahi nikutufumba munjila yayiwahi kuzatisha Nsona. Komana mwamonaña wukwashu wamuchidiwu nenu hinjila mwamwekeshelañayi Yehova nindi wayikeña?

¹⁶ Ilukenu nenu mpinji yikwawu aeluda chayikalilaña kutusolomoka kulonda atufumbi. Toñojokenu hanichi chakutalilahu, chatela chamukalilili chikupu kaprofwetu Natani kuhosha naDavidi wakeñeleña kusweka nshidi yindi  yahamesu bwi-i! (2 Sam. 12:1-14) Munjila yoyimu, kapostolu Pawulu watela wahamukili chikupu hakumufumba Petulu, wumu wahadi apostolu 12, wamwekesheli chaambu hakudikunda nawamanakwindi aYudeya. (Ñal. 2:11-14) Munateli kupelesha ñahi nyidimu yawaeluda muchipompelu? Ikalenu adizoza, aswayi kusolomoka nawa sakililenuña. Monenuña wukwashu wawu nenu Nzambi diyi wunakuyimwekeshela kukeña. Neyi mwila mwenimu chikuyikwasha enu nawa niwena akuzataña nyidimu yawu namuzañalu.

17. Muhela wumu amukwashili ñahi kudi aeluda muchipompelu?

¹⁷ Muhela wumu chamukalilileña kumukeña Yehova muloña wayuma yeliliyi kunyima. Wahosheli nindi: “Namweni nami natela kuhosha nawaeluda chinelukili nami yuma yinelili kunyima niyuma yikwawu yanzeyesheleña muyitoñojoka. Watwalekelihu nindi hiyanzuwilili hela kundiwulaku, ilaña ankwashili nawa ankolesheli. Mpinji yejima neyi tunamanishi kupompa, hela chakwila adi nanyidimu, ilaña wumu hakachi kawu chiña yenzi nakuñimusha. Hamuloña wayuma yinelili kunyima, namweneña nami Nzambi kwila yammwekeshela kukeña nehi. Hela chochu, kakavulu Yehova wazatishaña chipompelu niaeluda hakummwekeshela kukeña. Nalombaña nami nakabuli kumushiya.”

18, 19. Chumanyi chakataña chikupu kubadika chichakataña neyi anatufumbi? Shimunenu yakutalilahu.

¹⁸ Hela chakwila kufumba kwakataña kumuchima, ilaña kudi chuma chabadika kukata kutwatiyaña neyi anatufumbi, chuma chatama chafumaña mukubula kwiteja kufumba. (Heb. 12:11) Shinshikenu yakutalilahu yiyedi, Kena niMwanta Zedekiya. Kena chatachikiliyi kuhela manakwindi Abeli, Nzambi wamwihwili nindi: “Wunazuwilidi? Wunadihombelidi Kumesu? Neyi wukwila chachiwahi hiyakukitiyaku? Ilaña neyi hiwukwila chachiwahuku nshidi yinafukami kuchisu; wakata muchima hadeyi, nineyi wakela mwanta windi.” (Kutach. 4:6, 7) Kena hatiyililiku. Dichi nshidi niyena yamwimakeneni. Kena wadileteleli yomweni yihuñu nimakabi. (Kutach. 4:11, 12) Neyi watiyililili kufumba kwaYehova chiña mwafumini yuma yatama wanyi.

¹⁹ Zedekiya nyuuli wazeya nawa watama, wayuulileña hampinji yadiña Yerusalema mukukala. Kaprofwetu Yeremiya wamusoñamishileña Zedekiya kulonda yaleki yilwilu yatama, ilaña mwanta wakaanini mwamufumbiliwu. Dichi mwafumini yuma yatama. (Yere. 52:8-11) Yehova hakeñaña nindi tumoneña yihuñu yamuchidiwuku!—Tañenu Isaya 48:17, 18.

20. Yumanyi yikayimwekena antu atiyililaña kufumba kwaNzambi niakaanaña kufumba kwindi?

²⁰ Mukaayi antu hiyakeñaña kuyifumba hela kudifumba awenawuku. Ilaña yilwilu yamuchidiwu yawusupi katataka yiyileteli kukala. (Yish. 1:24-31) Dichi ‘tutiyilileña kufumba, kulonda twikali namaana.’ Neyi chahosha Yishimu 4:13 nawu: “Kwataku kufumbika mbe, bayi yena akukosomokaku; muhembi muloña yena diyi wumi weyi.”