1-2. (a) Yehova wahanjekeleña ñahi nawantu kunyima, nawa wahanjekaña ñahi nanetu makonu? (b) Yumanyi yitukuhanjeka muchinu chibaaba?

YEHOVA watiyaña kuwaha kuhanjeka nanetu. Kunyima wazatishileña atuprofwetu, añelu niMwanindi, Yesu Kristu, kulonda twiluki yitoñojoka yindi. (Amosa 3:7; Ñal. 3:19; Chim. 1:1) Makonu, wahanjekaña nanetu kuzatisha Izu dindi Bayibolu. Watwinka Bayibolu kulonda twiluki chekala yitoñojoka yindi ninjila jindi.

² Hampinji yadiñayi Yesu heseki, Yehova wahosheli kufuma mwiwulu kapampa kasatu hampinji yashiyashana. Tuhanjekenu hamazu ahosheliyi Yehova, yuma yitunateli kudizila kumazu indi nichitunateli kwila hakwila awa mazu atukwashi.

3. Kwesekeja nachitwatañaña haMaku 1:9-11, Yehova wahosheli nindidi mpinji yamupapatishiliwu Yesu, nawa yumanyi yalema yamwekeshaña awa mazu?

³ Maku 1:9-11 yashimuna mpinji yatachi yahosheliyi Yehova kufuma mwiwulu. (Tañenu.) Wahosheli nindi: “Yeyi Mwanami, inakeña; inatiyaña kuwaha.” Yesu watiyili kuwaha hakutiya Tata yindi nakumuleja nindi wamukeña nawa wamukuhwelela. Mazu aYehova amwekeshaña yuma yisatu yalema hadi Yesu. Chatachi, Yesu hiMwanindi. Chamuchiyedi, Yehova wamukeña Mwanindi. Nawa chamuchisatu, Yehova wamutiyaña Mwanindi kuwaha. Tuhanjekenu hachimu chimu.

4. Hampinji yamupapatishileñawu, Yesu wekalili ñahi Mwana kaNzambi munjila yambukaku?

⁴ “Yeyi Mwanami.” Yehova chahosheliyi mazu akwila nawu Yesu hiMwanindi wakeñayi, wamwekesheli nindi Yesu wekalili  Mwanindi munjila yambukaku. Yesu hadiñayi mwiwulu, wadiña Mwana kaNzambi wakuspiritu. Ilaña hamupapatishileñawu amuwayishili naspiritu yajila. Haniyi mpinji, Nzambi wamumwekesheli Yesu nindi hiMwanindi wawayishiliyi wekalili nakuchiñeja kwakufunta mwiwulu kulonda amutondi kudi Nzambi kwikala Mwanta nawa Kapristu Muneni. (Luka 1:31-33; Heb. 1:8, 9; 2:17) Dimuloña waweni waletesheli Tata yindi kuhosha hampinji yamupapatishileñawu Yesu nindi: “Yeyi Mwanami.”—Luka 3:22.

5. Tunateli kumwimbujola ñahi Yehova chamwekeshañayi kukeña nikusakilila?

⁵ “Yeyi . . . Inakeña.” Yehova chamwekesheliyi kukeña nikusakilila, chatwanukishaña nawu ninetu twatela kukoleshaña akwetu. (Yow. 5:20) Twatiyaña kuwaha neyi atumwekeshela kukeña nikutuhameka kudi muntu hayuma yayiwahi yitwelaña. Munjila yoyimu, amanakwetu niahela muchipompelu, kushilahu tuhu niantu amuchisaka akeñaña kuyimwekeshela kukeña nikuyikolesha. Neyi tuyihamekaña akwetu, tukukolesha chikuhwelelu chawu nawa akutwalekahu kumukalakela Yehova nakashinshi. Sweje-e anvwali atela kukoleshaña anyanawu. Neyi anvwali akoleshaña anyanawu chakufuma hamuchima nikuyikeña, akupama kuspiritu.

6. Muloñadi chitwatela kumukuhwelela Yesu Kristu?

⁶ “Inatiyaña kuwaha.” Awa mazu amwekeshaña nawu Yehova wakuhweleleli chikupu nindi Yesu wukutwalekahu kwila nkeñelu yaTata yindi. Yehova wamukuhweleleli chikupu Mwanindi, dichi ninetu twatela kumukuhwelela chikupu Yesu netu wakela yuma yejima yakanayi Yehova. (2 Kor. 1:20) Neyi tutoñojoka hayuma yeliliyi Yesu, chikutuleñela  kusweja kukeña kudizila kudi yena nikulondela muntampu yindi. Yehova wakuhwelela chikupu nindi etu ambuñindi ejima tukutwalekahu kudizila kudi Mwanindi.—1 Pet. 2:21.

7. Kwesekeja na Matewu 17:1-5, mpinjinyi yahosheliyi Yehova kufuma mwiwulu, nawa wahosheli nindidi?

⁷ Tañenu Matewu 17:1-5. Yehova wahosheli cheñi kamuchiyedi kufuma mwiwulu hampinji ‘yahimpikili mmwekenu yaYesu.’ Yesu wayilejeli aPetulu, Yakoba ni Yowanu kulonda amutwaliku hampidi yayilehi. Chadiñawu kumpidi, amweni chimwenu chakuhayamisha. Kumesu aYesu kwatoñekeli nawa yakuvwala yindi yatookeli nankashi neyi chejeji. Kwamwekeni antu ayedi, wumu wemeneneñaku Mosi mukwawu Elija, atachikili kuhanjeka naYesu hansañu yakufwa kwindi nikusañuka kwindi. Hela chakwila apostolu asatu “anoñokeleña,” amweni ichi chimwenu chelili tulu tunamani. (Luka 9:29-32) Kuhiñahu, Ivu ditooka dayibutili nawa atiyili izu daNzambi kufuma mwivu. Neyi chochamwekeni hamupapatishileñawu Yesu, Yehova wamwekesheli nindi wamukeña Mwanindi, nakuhosha nindi: “Iwu diyi Mwanami, inakeña, inatiyaña kuwaha.” Ilaña haniyi mpinji Yehova wabombelelihu nindi: “Mutiyililenu.”

8. Ichi chimwenu chamukwashili ñahi Yesu niatumbanji?

⁸ Ichi chimwenu chadiña nakumwekesha kulema niñovu yikekala naYesu hakekalayi Mwanta waWanta waNzambi. Chakadi nikujina, Kristu amukolesheli nikumwinka ñovu yakuumika makabi nikufwa kwayeña. Ichi chimwenu chakolesheli cheñi chikuhwelelu chawatumbanji. Chumichi chayikwashili kudiloñeshela chadimu hakukala kwayileñawu nakumona nimudimu weneni wayileñawu nakuzata. Chimwahitili yaaka 30, kapostolu Petulu wahosheli hanichi chimwenu chakuhimpika kwammwekenu, nindi wachidiña nakuchanuka.—2 Pet. 1:16-18.

9. Kufumbanyi kwalema kwayilejeliyi Yesu atumbanji twindi?

⁹ “Mutiyililenu.” Yehova wamwekesheli hatooka nindi wakeñaña nindi tutiyilileña mazu aMwanindi nikuyovwahila. Yumanyi yahosheliyi Yesu hampinji yadiñayi heseki? Wahosheli yuma yayivulu yalema yitwatela kutiyilila! Chakutalilahu, wayidizishili akwakumulondela chakushimwina nsañu yayiwahi nawa watwalekelihu kuyanukisha nindi ekali atona. (Mat. 24:42; 28:19, 20) Wayikonkomweneni cheñi nindi atela kuzata nañovu nawa wayikolesheli kubula kuzeya. (Luka 13:24) Yesu walejeli akwakumulondela nindi atela kudikeña wumu namukwawu, kwikala anuñañana nikulondela nshimbi jindi. (Yow. 15:10, 12, 13) Iku kufumba kwalejeliyi atumbanji twindi kwadiña kwalema. Kuna kufumba kunatwalekihu kwikala kwalema nimakonu neyi chochikwadiña hampinji yahaniniyi Yesu iku kufumba.

10-11. Tunateli kumwekesha ñahi netu twamutiyililaña Yesu?

¹⁰ Yesu wahosheli nindi: “Muntu wejima wakeña chalala, watiyililaña kwizu dami.” (Yow. 18:37) Twamwekeshaña netu tunakwovwahila kwizu dindi neyi “[tuditiiyililaña] wumu namukwawu nikudanakena wumu namukwawu chakufuma kumuchima.” (Kol. 3:13; Luka 17:3, 4) Twamwekeshaña cheñi netu twatiyililaña kwizu dindi neyi tushimwinaña nañovu nsañu yayiwahi “mumpinji yayiwahi nimumpinji yakala.”—2 Tim. 4:2.

¹¹ Yesu wahosheli nindi: “Anyikoku ami atiyaña izu dami.” (Yow. 10:27) Antu amulondelaña Kristu amwekeshaña nawu amutiyililaña Yesu kuhitila mukutiyilila kumazu indi  nikuyizatisha. Hiyaluwankanaña ‘nakwakama kwamuwumiku.’ (Luka 21:34) Ilaña ovwahilaña nshimbi jaYesu muchihandilu chawu hela chakwila yuma yinakali chamuchidinyi. Amanakwetu amavulu anakuumika kukala kwakuvulu, kudi neyi kuyilukuka kudi akwankunyi nawu, wuzweñi wasweja niwubanji wadimwekenaña. Hela chakwila anakumona kukala kwamuchidiwu, atwalekañahu kwikala ashinshika kudi Yehova. Akuhwelela mazu aYesu akwila nawu: “Muntu wejima wukweti nshimbi jami nawa wajihembaña, yenowu diyi wankeña. Nawa, muntu wejima wukunkeña, niyena akumukeña kudi Tata yami.”—Yow. 14:21.

12. Njilanyi yikwawu mutunateli kumwekeshela netu tunakumutiyilila Yesu?

¹² Njila yikwawu mutunateli kumutiyilila Yesu, hikwovwahila antu atondayi kulombola mukachi ketu. (Heb. 13:7, 17) Hadi yaaka yinahitihu, mukuloñesha kwaNzambi mudi kuhimpika kwakuvulu, kushilahu chakuzatisha yozelu yayiha ninjila jakushimwinamu, chakupompa mukachi kamulungu, chakutuña, kutuñulula nikuwahisha Matala aWanta. Iwu wunlomboli watukwashaña nawa wamwekeshaña chatukeñayi Nzambi. Dichi twatela kuwulondelaña. Yehova wukutukwashaña kulondela wulomboli wudi mukuloñesha.

13. Yumanyi yayiwahi yafumaña mukumutiyilila Yesu?

¹³ Kutiyilila kuyuma yejima yatañishileñayi Yesu kwatukwashaña. Yesu wayikanini atumbanji twindi nindi ntañishilu yindi yakayihizumwisha. Wahosheli nindi: “Mukuhizumuka. Muloña mpaanda yami yaswayi kusenda nawa chiteli chami chapepela.” (Mat. 11:28-30) Izu daNzambi, munabombeli nyikanda yiwana yaNsañu Yayiwahi yahosha hachihandilu chaYesu nimudimu windi wakushimwina, datuhizumwishaña, datukoleshaña kuspiritu nikutukwasha kwikala namaana. (Mas. 19:7; 23:3) Yesu washimwini nindi: “Adi namuzañalu wowu antu atiyaña izu daNzambi nikudihemba!”—Luka 11:28.

14-15. (a) Mpinjinyi yamuchisatu yahosheliyi Yehova kufuma mwiwulu mazu ekala haYowanu 12:27, 28? (b) Muloñadi mazu aYehova chamukundejeliwu nikumukolesha Yesu?

¹⁴ Tañenu Yowanu 12:27, 28. Nsañu Yayiwahi Yowanu yashimuna mpinji yamuchisatu yahosheliyi Yehova kufuma mwiwulu. Chikwashalili mafuku antesha nakufwa kwindi, Yesu wadiña muYerusalema nakwanakana  Chipandakenu chakukumishaku. Wahosheli nindi: “Innakudishona.” Kuhiñahu walombeli nindi: “Tata, lemeshaku ijina deyi.” Tata yindi wahosheli kufuma mwiwulu nindi: “Nadilemesha dehi, inakudilemesha nawa cheñi.”

¹⁵ Yesu wadiña nakwakama muloña wamudimu weneni wadiñayi nawu wakutwalekahu kwikala washinshika kudi Yehova. Yesu welukili nindi akumukabisha nankashi nawa akumujaha munjila yatama. (Mat. 26:38) Chuma chalema chakeñeleñayi Yesu kwila, hikulemesha ijina daTata yindi. Yesu amwinkeli muloña nawu wadiña nakutukana, dichi wadiña nakwakama nindi kufwa kwindi keña kuleta kasawuntu hadi Nzambi. Mazu aYehova amukolesheli chikupu Yesu. Welukili nindi ijina daYehova akudilemesha. Mazu aTata yindi amukundejeli Yesu nikumukolesha kulonda yakatweshi kuumika kukala kwayileñayi nakumona. Hela chakwila Yesu hohu diyi welukili mwatalishili mazu ahosheli Tata yindi haniyi mpinji, Yehova watusonekeleli wejima wetu.—Yow. 12:29, 30.

16. Muloñadi chitunateli kwakamena mpinji yikwawu hakasawuntu kaletañawu hejina daNzambi?

¹⁶ Ninetu twatela kwakamena neyi cheliliyi Yesu hakasawuntu kaletañawu hejina daYehova. Hadaha ninetu atwilaña chatama neyi chamwililiwu Yesu. Indi kwiji tunateli kuluwankana nansañu yakutwamba yinakutandishawu antu atuhela. Tunateli kutachika kutoñojoka haniyi nsañu chiyinakuleta kasawuntu  hejina daYehova nikuloñesha kwindi. Hampinji yamuchidiwu, mazu aYehova anateli kutukundeja chikupu. Bayi tusweja kwakamaku. Twatela kwiluka netu “kuwunda kwaNzambi kwabadika kwiluka kwejima kwakahemba nyichima [yetu] niyitoñojoka [yetu] kuhitila mudi Kristu Yesu.” (Fwi. 4:6, 7) Yehova wukutwalekahu kulemesha ijina dindi. Wakazatisha Wanta windi kufumishahu yuma yatama yaletayi Satana niyinakuleta kaayi hadi ambuña aNzambi ashinshika.—Mas. 94:22, 23; Isa. 65:17.

17. Kwesekeja naIsaya 30:21, Yehova wahoshaña ñahi nanetu makonu?

¹⁷ Yehova wuchidi kuhosha nanetu nimakonu. (Tañenu Isaya 30:21.) Hela chochu, hitwamutiyaña Nzambi nakuhosha nanetu mwiwuluku. Ilaña watwinka Izu dindi, Bayibolu, mwatwinkelañayi nshimbi. Kubombelahu, spiritu yaYehova yakwashaña “ñamba washinshika” kutwalekahu kwinka ambuña indi yakuda. (Luka 12:42) Tukweti nyikanda yayivulu yakupulinta niyahaintaneti kushilahu mavidiyo, ninyikanda yakukwata mumazu yinateli kutukwasha kukolesha chikuhwelelu chetu.

18. Mazu aYehova anakoleshi ñahi chikuhwelelu chenu nikuyikwasha kwikala ahamuka?

¹⁸ Tutwalekenuhu kwanuka mazu ahosheliyi Yehova henohu Mwanindi wuchidi hanu heseki. Mazu aNzambi asonekawu muBayibolu, atukwashi kumukuhwelela chikupu netu Yehova wukweti ñovu hayuma yejima nawa wakawahisha yuma yejima yaletayi Satana nikaayi kindi katama hadi etu. Dichi tutiyilileña chikupu kwizu daYehova. Neyi twila mwenimu, tukutwesha kuumika kukala kwejima kutunakumona chayinu mpinji nikutukamona kumbidi. Bayibolu yatwanukishaña nawu: “Enu munakukeñeka kuumika, kulonda neyi munamanishi dehi kwila nkeñelu yaNzambi, mutweshi kutambwila yuma yakaniniyi.”—Heb. 10:36.