1-2. Neyi munadiloñeshi wanyi kupapatishewa, muloñadi chimwatela kubulila kuneña? (Talenu mwevulu wudi hakava.)

 NEYI munakukeña kupapatishewa, munaditondeli chikonkwanyi chachiwahi. Komana munadiloñeshi kupapatishewa chochichi? Neyi munamoni nenu munadiloñeshi nawa akulumpi aneteji, bayi mushintajala kupapatishewa hakupompa kwakalondelahuku. Chihandilu chachiwahi mumudimu waYehova chinakuyitalila.

² Indi neyi anayileji nawu mwatela kuzatila hayuma yimu henohu kanda mupapatishewi? Indi kwiji enu aweni yenu munamoni nenu kudi himwatela kuzatila? Neyi chidi mwenimu, bayi muneñaku. Munateli kuzatilahu kulonda mushikiji ichi chikonkwanyi chalema, chili mudi kansi hela mukulumpi.

3. Chilolu wamuchota mwini Etiyopiya wamwihwili Fwilipu nindidi, nawa lwihwinyi lutunateli kudihula? (Yilwilu 8:36, 38)

³ Tañenu Yilwilu 8:36, 38. Chilolu wamuchota wafumini kuEtiyopiya wamwihwili Fwilipu mukakushimwina nindi: “Chumanyi chikunkañesha kupapatishewa?” Iwu iyala mwini Etiyopiya wakeñeleña chikupu kupapatishewa, komana mwamweni wadiloñesheli kupapatishewa?

4. Mwini Etiyopiya wamwekesheli ñahi nindi wadiña neyena dakutwalekahu kudiza?

⁴ Iwu iyala mwini Etiyopiya “wayili kuYerusalema nakudifukula.” (Yilw. 8:27) Watela wabalumukili nakwikala kaYudeya, dikwila nawu wetejeli ntañishilu yawaYudeya. Chakadi nikujina, wadizili hadi Yehova munyikanda yajila yaNsona jachiHeberu. Hela chochu, wadiña neyena dakudizilahu nsañu yayivulu. Kafwampi, Fwilipu chamuwaniniyi iwu chilolu mumukwakwa, wamuwanini nakwiladi? Watañileña muvuñilu wasonekeli kaprofwetu Isaya. (Yilw. 8:28) Iyi yadiña yakuda  yakola yakuspiritu. Iwu chilolu wamuchota hakeñeleña hohu kudiza nsañu yanteshaku, ilaña wakeñeleña kutwalekahu kudiza.

5. Mwini Etiyopiya welili ñahi nayuma yadizileñayi?

⁵ Iwu iyala wadiña chilolu walema muchiyuulu chaKandesi Mwanta Wamumbanda wawaEtiyopiya; “diwahembeleña maheta indi ejima.” (Yilw. 8:27) Dichi watela wadiña nanyidimu yayivulu nankashi yazatileñayi. Hela chochu, wadiña nampinji yakudifukula kudi Yehova. Hadizileña hohu chalalaku, ilaña welileña yuma yadizileñayi. Dichi wafumini kuEtiyopiya kulonda ayi nakudifukula kudi Yehova hatembeli muYerusalema. Ilu lwendu lwatela lwamusendeleli mpinji yeneni nawa wazatishili yuma yayivulu, ilaña iwu iyala hetejeli chuma chidi chejima kumukañesha kudifukula kudi Yehovaku.

6-7. Kukeña kwamwini Etiyopiya kwakumukeña Yehova kwaswejeleleñaku ñahi?

⁶ Mwini Etiyopiya wadizilili kudi Fwilipu nsañu yalala yalema yabulili kwilukayi, kushilahu ninsañu yakumwiluka Mesiya. (Yilw. 8:34, 35) Iwu chilolu watiyili kuwaha chelukiliyi yuma yamwilililiwu kudi Yesu. Wadi kwila ñahi? Wadi kutwalekahu nakwikala iyala alemesheliwu, wabalumukili nakwikala kaYudeya. Ilaña, waswejeleliku kumukeña Yehova niMwanindi. Wafuukwilihu chuma chalema muchihandilu chindi kuhitila mukupapatishewa nakwikala mukakumulondela Yesu Kristu. Chamweniyi nindi iwu iyala nadiloñeshi, Fwilipu wamupapatishili.

⁷ Neyi mwila neyi cheliliyi mwini Etiyopiya, mukudiloñesha kupapatishewa. Ninenu mukuhosha chakufuma hamuchima nenu, “Chumanyi chikunkañesha kupapatishewa?” Tuhanjekenu hachimunateli kwila yuma yoyimu neyi yeliliyi mwini Etiyopiya: Watwalekelihu kudiza, welileña yuma yadizileñayi nawa watwalekelihu kumukeña chikupu Nzambi.

8. Yowanu 17:3 yahosha nawu mwatela kwiladi?

⁸ Tañenu Yowanu 17:3. Komana awa mazu aYesu diwu ayiletesheli mufuukulihu kudiza Bayibolu? Diwu atuletesheli etu amavulu. Komana awa mazu wowamu atulejaña cheñi nawu twatela kutwalekahu kudiza? Eña. Hitwakaleka ‘kumwiluka Nzambi walala wumu hohuku.’ (Mukwa. 3:11) Twakatwalekahu kudiza haya nyaaka nanyaaka. Chitukudizaña mpinji yejima tukuswinaña chikupu kwakwihi naYehova.—Mas. 73:28.

9. Yumanyi yitwatela kwila hanyima yakudiza ntañishilu yamuBayibolu yakutachikilahu?

⁹ Chakadi nikujina, neyi tunakudiza hadi Yehova twatachikaña nantañishilu yamuBayibolu yakutachikilahu. Mumukanda windi wayisonekeleliyi aHeberu, kapostolu Pawulu  wateneni ntañishilu yakutachikilahu nindi “yuma yakutachikilahu.” Hatalishili mukwila nindi “ntañishilu yatachi” yamukunkulwayiku; wadiña nakuyesekeja namayeli akoleshaña mukeki. (Heb. 5:12; 6:1) Ilaña wayikonkomweneni cheñi akaKristu ejima nindi kubombela haniyi ntañishilu yatachi atela kwilukilahu yuma yikwawu nikudiza chalala chakunama chaMwizu daNzambi. Komana mukweti muchima wakufwila chikupu kwiluka ntañishilu yakunama yamuBayibolu? Komana munakufwila kutwalekahu kupaminaku, kutwalekahu kudiza hadi Yehova ninkeñelu yindi?

10. Muloñadi antu amakwawu chichayikalilaña kudiza nkawawu?

¹⁰ Hela chochu, etu amavulu chatukalilaña kudiza nkawetu. Indi enu? Komana kushikola mwadizili chakutaña nikudiza chiwahi nkawenu? Mwadiluñishileña kudiza nkawenu nakumona nenu munelukilihu yuma yayivulu? Tahindi mwakunkulwili nenu mweluka chakudiza chiwahi wanyi munyikanda? Neyi diimu, himudi nkawenuku. Hela chochu, Yehova nateli kuyikwasha. Wawanina nawa hiNtañishi wamuwahi chikupu.

11. Yehova wamwekeshaña ñahi nindi ‘hiNtañishi Wabadika’?

¹¹ Yehova waditenaña yomweni nindi “Ntañishi yenu Wabadika.” (Isa. 30:20, 21) HiNtañishi wadiwunjika, waluwi nawa watoñojokelañaku. Watalaña hayuma yayiwahi mudi atudizi indi. (Mas. 130:3) Nawa hakeñaña nindi twileña yuma yinabadiki muñovu jetuku. Anukenu, watuñili woñu wenu, chawaana chachiwahi nankashi. (Mas. 139:14) Watuleña nampwila yakudiza. Nleñi yetu wakeñaña nindi tutwalekeñahu kudiza haya nyaaka nikudiluñisha kudiza. Dichi chayinu mpinji, chalema “kufwila chikupu” chalala chamuBayibolu. (1 Pet. 2:2) Imikenu yikonkwanyi yimunateli kushikija, nawa kakelenu kundandanda yakutaña Bayibolu nikudiza halwenu. (Yosh. 1:8) Nawukwashu waYehova, mukudiluñishaña kutaña nikudiza hadi yena chikupu.

12. Muloñadi chitwatela kushila muchima hachihandilu nimudimu waYesu hampinji yitunakudiza nkawetu?

¹² Mpinji yejima ikalenuña nampinji yakutoñojokahu chikupu hachihandilu nimudimu waYesu. Neyi tulondelaña chikupu mumahaji aYesu dichuma chikutukwasha kumukalakela Yehova, sweje-e muyinu mpinji yakala. (1 Pet. 2:21) Yesu wahosheli chakadi kuhita mumbadi hakukala kwakamonañawu akakumulondela. (Luka 14:27, 28) Ilaña, welukili chikupu nindi akakumulondela alala akashinda, neyi chashindiliyi yena. (Yow. 16:33) Dizenu hansañu yahosha hachihandilu chaYesu, nawa imikenu yikonkwanyi kulonda mumwimbujoleña muyuma yimwelaña hefuku-hefuku muchihandilu chenu.

13. Chumanyi chimwatela kumulombaña Yehova, nawa muloñadi?

¹³ Kwiluka hohu nkawaku hikunashikiliku. Kwiluka kwalema muloña kukuyikwasha kwilukilahu yuma yayivulu hadi Yehova nikwikala nayilwilu yidi neyi, kumukeña Yehova nikumukuhwelela. (1 Kor. 8:1-3) Chimukudizaña, mulombenuña Yehova ayikwashi kulonda chikuhwelelu chenu chivulileñaku. (Luka 17:5) Wakulaña kulomba kwamuchidiwu namuchima wumu. Chikuhwelelu chalala chashindamena hakwiluka kwalala kwakumwiluka Nzambi yetu chikuyikwasha kupaminaku.—Yak. 2:26.

14. Kapostolu Petulu wakonkomweneni ñahi kulema kwakwila yuma yitunadizi?(Talenu cheñi mwevulu.)

¹⁴ Kapostolu Petulu wakonkomweneni chichalemena kudi akakumulondela Kristu kwilaña yuma yinakudizawu. Wahosheli hansañu yamuBayibolu yahosha hadi Nowa. Yehova  wamulejeli Nowa nindi wakajilumuna antu atama adiñaku munana mafuku kuzatisha dibaji. Kwiluka hohu nawu dibaji dakenza hikwadi kumupulwisha Nowa nichisaka chindiku. Ilukenu nenu Petulu watalishileña kumpinji yakwila Dibaji kanda nawa “iku watu anakuwutuña.” (1 Pet. 3:20) Eña, Nowa nichisaka chindi elili yuma yayilejeliwu kudi Nzambi kuhitila mukutuña watu weneni. (Heb. 11:7) Petulu wesekejeli chuma cheliliyi Nowa nachipapatishu, hasonekeliyi nindi: “Chipapatishu chesekana nanichi chuma chamwekeni, nichena chinakuyamwina enu.” (1 Pet. 3:21) Dichi, tunateli kwesekeja mudimu wumunakuzata chayinu mpinji wakudiloñesha kupapatishewa namudimu wakutuña watu wazatili Nowa nichisaka chindi hadi yaaka yayivulu. Mudimwinyi wumwatela kuzata hakwila mudiloñeshi kupapatishewa?

15. Kubalumuka chikupu mumuchima munabombelidi?

¹⁵ Chuma chatachi chitwatela kwila, hikubalumuka chikupu mumuchima nakuleka nshidi jetu. (Yilw. 2:37, 38) Neyi tubalumuka chikupu mumuchima, tukuhimpa chikupu yilwilu yetu. Komana mwaleka dehi kwila yuma yamuneñeshaña Yehova, chidi neyi wuvumbi, kunwa makanya hela nhoshelu yatama? (1 Kor. 6:9, 10; 2 Kor. 7:1; Efwe. 4:29) Neyi kanda, twalekenuhu kuzata nañovu kulonda muhimpi. Hanjekenu namuntu wunakuyidizisha Bayibolu, hela lejenu akulumpi muchipompelu kulonda ayikwashi nikuyilombola. Neyi mudi kansi nawa mwashakamaña nawanvwali jenu, yilejenu ayikwashi kulonda muleki yilwilu yejima yinateli kuyikañesha kupapatishewa.

16. Yumanyi yinabombeli mukwila yuma yakuspiritu mpinji yejima?

¹⁶ Chalema cheñi kwila yuma yakuspiritu mpinji yejima. Muniyi yuma munabombeli kuya kukupompa kwawakaKristu nikwakulahu. (Heb. 10:24, 25) Nawa neyi munashikihu dehi kutachika kuya nakushimwina, ilenuña mwenimu mpinji yejima. Neyi mukuzataña nankashi mumudimu wakushimwina, mukudiluñishaña chikupu. (2 Tim. 4:5) Neyi muchidi kansi nawa mwashakamaña nawanvwali jenu, dihulenu nenu: ‘Komana anvwali jami atela kuñanukishaña mpinji yejima nawu natela kuya nakupompa hela nakushimwina? Tahindi nadanukishaña ami aweni?’ Neyi mudililaña iyi yuma halwenu, mukumwekesha nenu  mwamukuhwelela, mwamukeña nawa mwamusakililaña Yehova Nzambi. Iyi “[hinyidimu] yakumwakama Nzambi,” yawaana yimwamwinkaña Yehova. (2 Pet. 3:11; Heb. 13:15) Yawaana yejima yitwamwinkaña Yehova chakufuma hamuchima nawa chakadi kutukanjikija, yamuzañaleshaña Nzambi yetu. (Esekejenu 2 AKorinda 9:7.) Twelaña mwenimu muloña twatiyaña kuwaha kumwinka Yehova kwesekeja nahanakumini ñovu jetu.

17-18. Chilwilwinyi chalema chinateli kuyikwasha kushikahu kupapatishewa, nawa muloñadi? (Yishimu 3:3-6)

¹⁷ Hampinji yimukuzataña nañovu hakwila mushikihu kupapatishewa, mukumonaña kukala kwashiyashana. Antu amakwawu anateli kuyiseha hayuma yayiha yimunakuhweleli; anateli nikuyikañesha hela kuyikabisha. (2 Tim. 3:12) Hampinji yimunakuzata nañovu kulonda muleki chaaku chatama, hadaha mpinji yikwawu munateli kuchiila cheñi. Hadaha munateli kuneña nakutoñojoka nenu mwakahimpa swayi wanyi. Chumanyi chinateli kuyikwasha kubula kuzeya? Chilwilu chalema chikuyikwasha, hikumukeña Yehova.

¹⁸ Kukeña kumwamukeña Yehova, dichilwilu chachiwahi chikupu chimukweti. (Tañenu Yishimu 3:3-6.) Kukeña kutwamukeña Nzambi kunateli kutukwasha kuumika kukala kutwamonaña muchihandilu. Kakavulu Bayibolu yahoshaña hakukeña kwaYehova kwakashinshi kwayimwekeshelañayi ambuñindi. Kukeña kwakashinshi kwatalisha mukwila nawu hamba kayishiya ambuñindi hela kuleka kuyikeñaku. (Mas. 100:5) Ayileña muchifwanisha chaNzambi. (Kutach. 1:26) Munateli kumwekesha ñahi kukeña kwamuchidiwu?

19. Munateli kumwekesha ñahi kusakilila chikupu hayuma yejima yayililayi Yehova? (AÑalija 2:20)

¹⁹ Mwekeshenuña kusakilila. (1 Tes. 5:18) Ifuku niifuku dihulenuña nenu, ‘Yehova nammwekesheli ñahi kukeña?’ Kuhiñahu, musakililenuña Yehova mukulomba kuhitila mukutena yuma yinayililiyi. Ilukenu nenu Yehova wayililaña yuma yayiwahi halwenu muloña wayikeña, neyi chelukiliyi kapostolu Pawulu hadi Yehova. (Tañenu AÑalija 2:20.) Dihulenu nenu, ‘Komana ninami inakukeña kumumwekeshela kukeña?’ Kukeña kumwamukeña Yehova kukuyikwasha kutwalekahu kushinda kweseka nikuumika kukala kwejima. Kukuyisañumuna kutwalekahu kwila yuma yakuspiritu, nakumwekesha ifuku niifuku nenu mwamukeña Tata yenu.

20. Yumanyi yabombela mukudihana enu aweni kudi Yehova, nawa iku kufuukula kwalemenadi?

 ²⁰ Mukuhita kwampinji, kukeña kumwamukeña Yehova kukuyiletesha mulombi kulomba kwadimena. Mukudihana enu aweni kudi Nzambi. Anukenu nenu neyi mudihana kudi Yehova, mukwikala naniku kuchiñeja kwakuwahi: Mukwikala kukabadi kindi haya nyaaka nanyaaka. Neyi mudihana kudi Yehova, dikwila nawu munamukani kutwalekahu kumukalakela mumpinji yayiwahi niyatama. Himwakakeñekaña kumukana cheñiku. Mwamweni, neyi tudihana, dikwila nawu tunafuukuli chuma chalema. Ilaña toñojokenu hachumichi: Kudi yuma yayivulu yimwakafuukula muchihandilu chenu, yikwawu yakekala yayiwahi nankashi, ilaña kwosi chuma chachiwahi chimwakafuukula chakabadika kudihana kudi Yehovaku. (Mas. 50:14) Satana wukufwilaña kuyilekesha kumukeña Tata yenu, nakukuhwelela nindi mukuleka kutwalekahu kwikala ashinshika. Bayi mumwiteja Satana ayishindiku! (Yoba 27:5) Kukeña kumwamukeña Yehova chikupu kukuyikwasha kutwalekahu kuhemba chikaninu chenu chakumukalakela haya nyaaka nikuswina kwakwihi naTata yenu wamwiwulu.

21. Muloñadi chitukuhoshela netu chipapatishu hidikukumaku, ilaña hintachikilu hohu?

²¹ Hanyima yakudihana kudi Yehova, lejenu akulumpi muchipompelu chenu nenu munakukeña kupapatishewa. Hela chochu, anukenuña mpinji yejima nenu chipapatishu hidikukumaku, ilaña hintachikilu hohu. Diyi ntachikilu yachihandilu chabulaña kumana chakumukalakela Yehova. Dichi swejenu kumukeña Tata yenu yoyinu mpinji. Imikenu yikonkwanyi kulonda kukeña kwenu kuswejeleñaku hefuku-hefuku. Neyi mwila mwenimu, chakayikwasha kupapatishewa. Idi dakekala hiifuku damuzañalu chikupu. Ilaña iyi hintachikilu hohu. Dichi kukeña kumwamukeña Yehova niMwanindi kuswejeleñaku haya nyaaka!