1. Chumanyi chayitiyishaña kuwaha antu amavulu enzaña nakupompa nanetu? (Talenu cheñi mwevulu.)

 FWIKIJENU adisumbula anenzi nakupompa katachi Kwitala daWanta dawaYinsahu jaYehova. Anatiyi kuwaha nankashi chinayitambwiliwu nikukeña kunamoniwu hakachi kawantu amuchipompelu. Chinakombokiwu hampinji yinakuyawu kwitala, mumbanda nakumuleja nfumwindi nindi, ‘AYinsahu jaYehova anambukiku chikupu nawantu amakwawu, nawa natiyi kuwaha kupompa nawu.

2. Muloñadi antu amakwawu chalekelawu kumukalakela Yehova?

² Kukeña kwekala hakachi kawantu amuchipompelu chawakaKristu kwambukaku chikupu. Hela chochu, aYinsahu jaYehova hiyawaninaku? (1 Yow. 1:8) Dichi hampinji yitukuyilukaña nankashi antu amuchipompelu, dihu hichikwikala chaswayi kumona yiluwa yawu. (Rom. 3:23) Chawushona, amakwawu aleka kumukalakela Yehova muloña wayiluwa yawantu amakwawu.

3. Akakumulondela Yesu alala ayilukilaña kuchumanyi? (Yowanu 13:34, 35)

³ Talenu cheñi nsona hanashindameni achinu chibaaba. (Tañenu Yowanu 13:34, 35.) Chinjikijilwinyi chayilukilañaku akakumulondela Kristu alala? Hikukeña, bayi kuwaninaku. Talenu cheñi chumichi, Yesu wahosheli wanyi nindi: ‘Dihu himukwilukila nenu mudi atumbanji twami.’ Ilaña wahosheli nindi: “Dihu hakuyilukilawu kudi antu ejima nawu mudi atumbanji twami.” Dichi Yesu wamwekesheli nindi akakumulondela kushilahu niantu abula kwikala muchipompelu chawakaKristu, akeluka akakumulondela alala kuhitila mukukeña kwakufuma hamuchima kwadimwekeshelañawu.

4. Yumanyi yakeñañawu antu amakwawu kwiluka hadi akaKristu alala?

 ⁴ Antu amakwawu abula kwikala aYinsahu jaYehova anateli kujinoka nawu: ‘Kukeña kukuletesha ñahi kuyiluka akakumulondela Yesu alala? Yesu wamwekesheli ñahi nindi wayikeñeli apostolu indi? Nawa tunateli kumwimbujola ñahi Yesu makonu?’ Ninetu aYinsahu apapatishewa tukwila chiwahi neyi tukutoñojokaña hañakwilu yanawa malwihu. Kwila mwenimu kukutukwasha kumwekesha kukeña chikupu, sweje-e neyi akwetu anakuluwañesha.—Efwe. 5:2.

5. Lumbululenu mwatalisha mazu aYesu ekala haYowanu 15:12, 13.

⁵ Yesu wamwekesheli ahatooka nindi akakumulondela akayilukilaña kukukeña kwadimena kwakamwekeshañawu. (Tañenu Yowanu 15:12, 13.) Anukenu nenu Yesu wayilejeli nindi: “Mukeñañani neyi chinayikeña enu.” Awa mazu anatalishi mudihi? Kwesekeja nachalumbulwiliyi Yesu, iku hikukeña kwakudihana muntu yomweni, kukeña kunateli kuletesha mukaKristu kufwila mukwawu mukakwitiya neyi chinateleli. b

6. Izu daNzambi dakonkomwena ñahi nawu kukeña kwalema?

⁶ Izu daNzambi dakonkomwena nankashi hakukeña. Antu amavulu hamavasi akeñeshawu nankashi amuBayibolu abombelahu ninawa mavasi: “Nzambi hikukeña.” (1 Yow. 4:8) “Watela kukeña mukwenu neyi chiwadikeña eyi aweni.” (Mat. 22:39) “Kukeña kwabutaña hanshidi jajivulu.” (1 Pet. 4:8) “Kukeña hikwamanañaku.” (1 Kor. 13:8) Awa mavasi kushila nimavasi amakwawu amwekeshaña hatooka chichalemena kudi muntu wejima kwikala nanichi chilwilu chachiwahi nikuchimwekesha.

7. Muloñadi Satana chabulilañayi kunuñañesha antu mukukeña kwalala?

 ⁷ Antu amavulu adihulaña nawu: ‘Nateli kwiluka ñahi kudifukula kwalala? Kudifukula kwejima kwahoshaña nawu kwatañishaña chalala, ilaña kudifukula-hikudifukula kwatañishaña nsañu yashiyashana hadi Nzambi.’ Satana naluwañeshi antu kuhitila mukuletesha kwiikali kudifukula kwakutwamba kwakuvulu. Ilaña kwila ekala nezanvu dawamanakwamuntu akaKristu adikeña wumu namukwawu mukaayi kejimaku. Yehova hohu diyi wunateli kwikala nanidi izanvu. Tuneluki chumichi muloña kukeña kwalala kwafumaña hohu kudi Yehova nawa wenkaña idi izanvu dawakakudifukula spiritu yindi nikuyikiswila. (1 Yow. 4:7) Dichahosheleliyi Yesu nindi akakumulondela alala akayilukila hohu kukukeña kwalala kwadimwekeshelañawu.

8-9. Kukeña kwekala hakachi kawaYinsahu jaYehova kunakwashi ñahi antu amavulu?

⁸ Neyi chashimwineñahu dehi Yesu, antu amavulu ayilukilaña akakumulondela indi alala kukukeña kwadimwekeshelañawu. Chakutalilahu, manakwetu Ian wanukaña kupompa kweluña kwapompeliyi katachi, kwadiña mwibulu dangunja dadiña kwakwihi nakwashakamineñayi. Hadi tukweji twantesha twahitilihu henohu iku kupompa kanda, Ian wayili nakutala ngunja kunidi ibulu. Wahosheli nindi: “Antu haniku kupompa adiña ambukaku. AYinsahu adiña nakavumbi, avwalili chachiwahi nawa anyanawu adiña nayilwilu yayiwahi.” Wabombelelihu nindi: “Chuma chasweja kubadika, awa antu amwekeneña neyi azañaleleña nayuma yadiñawu nayu nawa adiña mukuwunda, chuma chinakeñesheleña muchihandilu chami. Nanukaña wanyi mpanji jahaniniwu adina ifuku, ilaña nanukaña yilwilu yayiwahi yamwekesheliwu aYinsahu.” c Kuhosha hohu chalala, twamwekeshaña iyi yilwilu muloña wakukeña kwalala kutwadikeña wumu namukwawu. Muloña wakwila twayikeña amanakwetu niahela, twayitiyilaña luwi nikuyilemesha.

⁹ Manakwetu John wadiña nayitoñojoka yoyimu hampinji yatachikiliyi kupompa, wahosheli nindi: “Natiyili kuwaha chantambwililiwu chiwahi . . .wejima wawu, amwekeneña neyi awanina. Kukeña kwawu kwakufuma hamuchima kwanletesheli kwiluka nami nawani kudifukula kwalala.” d Mpinji yejima, yuma yamuchidiwu yamwekeshaña nawu antu jaYehova adimwekeshaña nawu hiyakaKristu alala.

10. Mpinjinyi sweje-e yitwatela kumwekesha kukeña kwawakaKristu? (Talenu cheñi tumazu twaheshina.)

¹⁰ Neyi chitwashimuna kumatachikilu, akwetu akakwitiya ejima awanina wanyi. Mpinji jikwawu anateli kuhosha hela kwila yuma yikutuneñesha. e (Yak. 3:2) Sweje-e hampinji jamuchidiwu, dihitwatela kumwekesha kukeña kwawakaKristu kuhitila muyuma yitukuhosha hela kwila. Tunateli kumwimbujola ñahi Yesu neyi chuma chamuchidiwu chinamwekani?—Yow. 13:15.

11. Yilwilwinyi yatama yamwekesheliwu aYakoba naYowanu? (Talenu cheñi mwevulu.)

¹¹ Yesu hakeñeleña nindi akakumulondela ekali awaninaku. Ilaña wayikwashili munjila  yayiwahi kulonda azatili hakuzeyazeya kwawu nikuhimpa yilwilu yawu kulonda amutiyisheña Yehova kuwaha. Mpinji yimu apostolu ayedi, aYakoba naYowanu amulejeli mama yawu nawu amulombi Yesu ayinki yifulu yalema muWanta. (Mat. 20:20, 21) Dichi aYakoba naYowanu amwekesheli chilwilu chakudinka wanta nawa akeñeleña kwikala alema.—Yish. 16:18.

12. Komana aYakoba naYowanu diwu hohu amwekesheli yilwilu yatama? Lumbululenu.

¹² Bayi neyi aYakoba naYowanu diwu amwekesheli hohu yilwilu yatama hayina mpinjiku. Talenu cheliliwu akwawu apostolu: “Chelili akwawu 10 atiyi chumichi, ahilili nachuma cheliliwu awa akansi namukulumpi.” (Mat. 20:24) Chakadi nikujina, aYakoba naYowanu atela abobweli chikupu nawakwawu apostolu. Hadaha akwawu ahosheli nawu: ‘Yenu anyi mwaka mulombeña yifulu yamaneni muWanta? Hiyenu hohu munakalakali naYesu chikupuku. Wejima wetu twashikahu kwikala nayifulu yalema!’ Hichikweti muloña nayuma yatoñojokeleñawu hela yahosheliwuku, ilaña avulameneniku nawu atela kudimwekeshelaña kukeña niluwi mpinji yejima.

13. Yesu welili ñahi nayiluwa yawapostolu indi? (Matewu 20:25-28)

¹³ Yesu welili ñahi naniku kukala kwamwekeni? Wahilili wanyi. Wahosheli wanyi nindi wukukeña apostolu acheñi, amayala adizoza  nankashi nawa adi kudimwekeshelaña kukeña mpinji yejima. Ilaña Yesu wadiwunjikili nakuhanjika nanawa amayala ashinshika. (Tañenu Matewu 20:25-28.) Watwalekelihu kuyimwekeshela kukeña, hela chakwila aka hidiku kadiña katachi hela kakukumishaku hakeñeleñawu apostolu kwiluka wabadika chikupu hakachi kawuku.—Maku 9:34; Luka 22:24.

14. Apostolu aYesu akulilili mwiluña mwadiña antu amuchidinyi?

¹⁴ Chakadi nikujina, Yesu watoñojokeli hankulilu yawapostolu. (Yow. 2:24, 25) Akulilili mwiluña mwadiña anlomboli jakwitiya afwilileña nankashi kulema niyifulu. (Mat. 23:6) Anlomboli jakwitiya kwawaYudeya adimweneña cheñi kuloña. f (Luka 18:9-12) Yesu welukili nindi kukulila mwiluña damuchidiwu kwatela kwayiletesheli apostolu kudimona awenawu niakwawu munjila yambukaku. (Yish. 19:11) Welukili nindi atumbanji twindi akuluwañeshaña nawa wadiwunjikileña neyi aluwañesha. Welukili nindi adiña nanyichima yayiwahi, dichi wadiwunjikili nakuyikwasha kulonda aleki kudinka wanta nikukeña kwikala alema, ilaña ekaleña nakukeña.

15. Yumanyi yitwatela kudizila kuchuma chamwekeni kudi aYakoba naYowanu?

¹⁵ Tunateli kudizilaku yuma yayivulu kuchuma chamwekeni kudi aYakoba naYowanu. Aluwañesheli hakulomba yifulu yamaneni muWanta. Ilaña akwawu apostolu niwena aluwañesheli hakwiteja iku kukala kuluwañeshi kunuñañana kwadiña hakachi kawu. Hela chochu, Yesu wayimwekesheleli apostolu ejima 12 luwi nikukeña. Chumanyi chitunakudizilaku? Hitwatela hohu kusha muchima kuyuma yatama yineliwu antuku, ilaña twatela cheñi kusha muchima kuchitwelaña neyi anatwili katama. Yumanyi yinateli kutukwasha? Neyi mukwetu mukakwitiya natuneñeshi twatela kudihula netu: ‘Chuma chelayi chinanneñeshelidi nankashi? Komana chinankwashi kwiluka kuzeyazeya kunukweti kunatela kuzatilahu? Tahindi muntu wunanneñeshi wudi nakukala kunakumonayi? Hela chakwila neluki nami chuma chelayi chatama, komana kwila nimumwekeshela kukeña kwakufuma hamuchima kuhitila mukudiwula chiluwa chakoñayi nehi?’ Neyi tuswejaña kumwekeshela akwetu kukeña, tukumwekesha netu tudi akakumulondela Yesu alala.

16. Chumanyi chikwawu chitunateli kudizila kudi Yesu?

¹⁶ Chuma cheliliyi Yesu chatudizishaña cheñi kufwila kuyiluka akwetu akakwitiya chekalawu. (Yish. 20:5) Yesu welukileña jadiña munyichima yawantu. Etu hitukutweshaku. Ilaña tunateli kudiwunjika neyi amanakwetu niahela anatuneñeshi. (Efwe. 4:1, 2; 1 Pet. 3:8) Chinateli kwikala chaswayi kwila mwenimu neyi twiluka nkulilu yawu. Talenu ichi chuma chamwekeni.

17. Chumanyi chachiwahi chafuminimu helili nkoñi wañinza wumu amwiluki chiwahi mukwawu mukakwitiya?

¹⁷ Nkoñi wendaña wakalakeleli kuEast Africa wanukaña manakwetu wumu wamweneñayi nindi wakalisha. Iwu nkoñi wañinza welili ñahi? Wahosheli nindi: “Chatela nimutondolweleña manakwetu, nafwilileña kumwilukisha chiwahi.” Kuhitila mukwila mwenimu, nkoñi wañinza welukili yuma yayivulu kutalisha hankulilu yamanakwetu yaletesheli  ekali wakalisha. Nkoñi wañinza watwalekelihu nindi: “Chinelukili iwu manakwetu chazatiliyi nañovu hakwila ahimpi yilwilu yindi nichahimpiliyi, wantiyishili kuwaha. Twekalili amabwambu amawahi.” Mwamweni, neyi tuyiluka amanakwetu niahela chiwahi, chatupelelaña kuyimwekeshela kukeña.

18. Malwihwinyi itunateli kudihula neyi anatuneñeshi kudi mukwetu mukakwitiya? (Yishimu 26:20)

¹⁸ Mpinji yikwawu tunateli kukeña kuya nakumuwana mukwetu mukakwitiya wunatuneñeshi. Hela chochu, twatela kusambila kudihula malwihu adi neyi: ‘Komana nikweti wunsahu wejima?’ (Yish. 18:13) ‘Tahindi welilamu hohu wanyi?’ (Mukwa. 7:20) ‘Kanda niluwañesheñahu dehi muniyi njila?’ (Mukwa. 7:21, 22) ‘Neyi niya nakumuwana, komana nukuletesha kukala kutohelaku kubadika iku kwinnakukeña kumanisha?’ (Tañenu Yishimu 26:20.) Neyi tutoñojokaña hamalwihu amuchidawa, tunateli kukunkulula netu kukeña kutwamukeña manakwetu kukutuletesha tudiwuliku hohu kuchuma chinatwiliyi.

19. Chumanyi chimukufwilaña kwila?

¹⁹ AYinsahu jaYehova anakumwekesha hatooka nawu hiyatumbanji twaYesu alala hamu neyi izanvu. Twamwekeshaña hamuntu-hamuntu netu tudi akakumulondela Yesu alala neyi tuyimwekesheleña amanakwetu niahela kukeña kwakufuma hamuchima hela chakwila aluwañeshaña. Neyi twilaña mwenimu, tunateli kukwasha antu kwiluka kudifukula kwalala nawa akudibomba nanetu nakutachika kudifukula kudi Yehova, Nzambi wakukeña. Dichi tufwilenuña kutwalekahu kumwekesha kukeña kwayilukilañawu akaKristu alala.