Muloñadi iyala atenawu nawu ‘Kanaña’ chahosheleliyi nindi ‘wukukisañana’ wuswana windi neyi asumbula Luti? (Luti 4:1, 6)

Kunyima neyi iyala wasumbula afwa chakadi kuvwalahu mwana, kudi malwihu akeñekeleña ñakwilu: Chumanyi chadi kumwekana kumpata yindi? Komana ijina dachisaka chindi dadi kujiya? Nshimbi jaMosi jadiña nañakwilu yanawa malwihu.

Chumanyi chamwekeneña kumpata yamuntu weyala wunafwi hela wekalili kazweñi nawa alandisha mpata yindi? Manakwindi hela ntaña yindi chikupu wayikuulileña oyu mpata hela kuyilandulula. Chumichi chaletesheleña yitwalekihu kwikala yachisaka.—Lev. 25:23-28; Kuch. 27:8-11.

Elileña ñahi hakwila ijina dachisaka damuntu weyala wunafwi dibuli kujiya? Ntuluwa adiña nakumusumbula kudi mana kwanfumwindi, neyi chamwekeni kudi Luti. Owu iyala wasumbwileña ñoda manakwindi wunafwi nakuvwalilamu nswana wakaswana ijina danowu wafwili nimaheta indi. Iyi ntanjikilu yayiwahi yakwashileña nintuluwa.—Kuhit. 25:5-7; Mat. 22:23-28.

Talenu chuma chamwekeni kudi Nawomi. Amusumbwili kudi Elimeleki. Chafwiliyi nianyanindi awamayala ayedi, Nawomi washalili chakadi muntu wakumwakamena kumujimba. (Luti 1:1-5) Chafuntiliwu muYuda, Nawomi wamulejeli muku windi Luti nindi ayi nakumuleja Bowazi ekali mukakukuula mpata. Bowazi wadiña ntaña yaElimeleki. (Luti 2:1, 19, 20; 3:1-4) Ilaña Bowazi wenjili nakwiluka nindi kwadiña ntaña yindi mukwawu, owu atenawu muBayibolu nawu ‘Kanaña,’ wadiña ntaña yindi chikupu. Dichi yena diyi wateleleli kwikala watachi kufuukulahu kwikala mukakukuula.—Luti 3:9, 12, 13.

Hakusambila, ‘Kanaña’ wakeñeleña kukwashana. (Luti 4:1-4) Hela chakwila welukili nindi wukuzatisha mali amavulu, ilaña welukili cheñi nindi Nawomi wadiña wakula dehi nawa hadi kutwesha kuvwala mwana wadi kuswana mpata yaElimelekiku. Chadi kufumamu, iyi mpata adi kuyibombela kuwuswana waKanaña, nawa chadi kuletesha ekali nayuma yayivulu.

Ilaña Kanaña wahimpili yitoñojoka yindi chelukiliyi nindi wateleleli kusumbula Luti. Wahosheli nindi: “Hinukutwesha kuyilandululaku, muloña nakenda kakisañana wuswana wami.” (Luti 4:5, 6) Wahimpililidi yitoñojoka yindi?

Neyi Kanaña hela muntu wacheñi wamusumbwili Luti nakuvwalilamu mwana weyala, ona mwana wadi kuswana mpata yaElimeleki. Chumichi chadi ‘kukisañana’ ñahi “wuswana” waKanaña? Bayibolu yahoshahu wanyi, ilaña iyi yuma hadaha diyaletesheli.

• Chatachi, mali azatishiliyi adi kuya hohu mumenji, muloña mpata yaElimeleki hiyadi kutwalekahu kwikala yindiku. Yadi kwikala yamwana kaLuti weyala.

• Chamuchiyedi, wadi kwikala namudimu wakudiisha nikuyakamena aNawomi naLuti.

• Chamuchisatu, neyi Luti avwala anyana amakwawu naKanaña, adi kwanzañana wuswana nawanyana avweliyi Kanaña.

• Chamuchiwana, neyi chakwila Kanaña hadiña nawanyana akankawindiku, mwana weyala wadi kuvwalawu naLuti diyi wadi kwikala nawuswa hampata yaElimeleki niyaKanaña. Dichi mpata yindi yadi kwikala yamwana wadi kuswana ijina daElimeleki, bayi dindiku. Kanaña hakeñeleña kujimbesha wuswana windi hamuloña wakumukwasha hohu Nawomiku. Wafuukwilihu nindi mukakukuula wacheñi, dikwila nawu Bowazi, atambwili iwu mudimu. Bowazi wetejeli iwu mudimu muloña wakeñeleña nindi “ijina deyala wafwa difunti kuwuswana windi.”—Luti 4:10.

Hadaha chuma chafwilileñayi nankashi Kanaña, hikuhemba ijina dindi niwuswana. Waswejeli kudikeña yomweni. Hela chakwila Kanaña wakeñeleña kuhemba ijina dindi, makonu hitweluka niijina dindiku. Nikukooleka kwadimena kwatambwililiyi Bowazi, yena hakutambwililiku, kwakumusha hamajina awankakulula jaMesiya, Yesu Kristu. Chamutaminini nankashi Kanaña muloña wakaanini kukwasha muntu wakaankilili!—Mat. 1:5; Luka 3:23, 32.