1-2. Yumanyi yavula kumwekana neyi antu anapapatishewi, nawa yumanyi yimwatela kutoñojokahu?

 MWAMONAHU dehi izanvu dawantu anakupapatishewa? Mwatiyili chahosheliwu nakumwekesha chikuhwelelu chawu hakwiliwu malwihu ayedi henohu kanda apapatishewi. Mwamweni antaña niamabwambu jawu chazañaleliwu chikupu. Antu apapatisheweli chafuminiwu mumenji, mwatiyili nkoshi nawa mwamweni antu chatiyiliwu kuwaha. Mulungu-himulungu antu amavulu adihanaña kudi Yehova nawa apapatishewaña nakwikala aYinsahu jindi.

² Indochu enu? Neyi munakutoñojoka kupapatishewa, dikwila nawu mukwikala muntu walema nankashi mukanu kaayi katama muloña ‘munakumukeñakeña Yehova.’ (Mas. 14:1, 2) Yenu asonekeleliwu achinu chibaaba, chili mudi kansi hela mukulumpi. Ilaña ninetu apapatishewa dehi, tunakufwila kumukalakela Yehova haya nyaaka. Dichi tuhanjekenu hayuma yisatu yalema yaleteshaña tumukalakeleña Yehova.

3. Muloñadi ambuña aYehova chakeñelawu chalala nikuloña? (Isamu 119:128, 163)

³ Yehova wayilejeli antu jindi nindi ‘akeñi chalala.’ (Zek. 8:19) Yesu wayilejeli akakumulondela nindi afwileña yuma yaloña. (Mat. 5:6) Ichi chinatalishi mukwila nawu muntu watela kufwilaña chikupu kwila yuma yaloña, yayiwahi nawa yitooka kumesu aNzambi. Komana mwakeña chalala nikuloña? Tuneluki chikupu netu mwakeña chalala nikuloña. Mwahela kutwamba niyuma yejima yaheña nawa yatama. (Tañenu Isamu 119:128, 163.) Muntu watwambaña wamwimbujolaña Satana, nyuuli wakanu kaayi. (Yow. 8:44; 12:31) Chuma chimu chafwilañayi Satana, hikutamisha ijina dajila daYehova Nzambi. Satana natwalekihu kumutwambila Nzambi  yetu kufuma tuhu hadikañiliwu antu muEdeni. Wakeñeleña antu atoñojokeña nawu Yehova wadikeña yomweni nawa hiNyuuli wabula kushinshika wakiishaña antu jindi yuma yayiwahi. (Kutach. 3:1, 4, 5) Makudi aSatana amutwambililiyi Yehova anatwalekihu kuluwañesha yitoñojoka yawantu ninyichima yawu. Neyi antu afuukulahu kubula ‘kukeña chalala,’ Satana nateli kuyiletesha kwila yuma yashiyashana yabula kuloña niyatama.—Rom. 1:25-31.

4. Yehova wamwekeshaña ñahi nindi ‘hiNzambi yachalala’? (Talenu cheñi mwevulu.)

⁴ Yehova ‘hiNzambi yachalala,’ nawa wadizishaña chalala kudi antu ejima amukeña. (Mas. 31:5) Kuhitila mukwila mwenimu, wayikwashaña kulonda abuli kuluwankana namakudi aSatana. Yehova wadizishaña cheñi ambuñindi kwikala ashinshika nawa aloña. Chumichi chayikwashaña kwikala alema nikwikala nakuwunda kwamuyitoñojoka. (Yish. 13:5, 6) Komana nayikwashi ninenu chimunadizi Bayibolu? Munadizi nenu njila jaYehova jajiwahi kudi antu ejima nikudi enu halwenu. (Mas. 77:13) Dichi munakukeña kwila yuma yamonañayi Nzambi nindi yaloña. (Mat. 6:33) Munakukeña kuhakwilaku chalala nakumwekesha nenu nsañu yahosheliyi Satana hadi Nzambi yetu, Yehova, yakutwamba. Munateli kwila ñahi mwenimu?

5. Munateli kuhakwilaku ñahi chalala nikuloña?

⁵ Munateli kutondahu kwila yuma yinakumwekesha nawu munakuhosha nenu: “Nakaani makudi aSatana, nawa inakuhakwilaku chalala. Inakukeña Yehova ekali Mwanta wami Wabadika Chikupu, nawa inakukeña nileña yuma yejima yahoshañayi nindi yaloña.” Munateli kwila ñahi mwenimu? Mulombenu Yehova nawa dihanenu enu aweni kudi yena, kuhiñahu mwekeshenu kudi antu amavulu nenu munadihani kuhitila mukupapatishewa. Kukena yuma yalala niyaloña diyuma yinateli kumusañumuna muntu kufuukulahu kupapatishewa.

6. Yumanyi yashimunawu Hesamu 45:4 yikuyiletesha mumukeñi Yesu Kristu?

⁶ Mwamukeñeladi Yesu Kristu? Talenu yuma yayiwahi yaleteshaña yekala Hesamu 45:4. (Tañenu.) Yesu wakeña chalala, kudizoza nikuloña. Neyi mwakeña chalala nikuloña, dikwila nawu mwamukeña niYesu Kristu. Toñojokenu hadi Yesu chahamukiliyi  nakuhakwilaku yuma yalala nawa yaloña. (Yow. 18:37) Hanu dinu Yesu wamwekeshaña ñahi nindi wakeña kudizoza?

7. Indi kudizoza kwaYesu kwayileteshaña kwiladi?

⁷ Yesu wamwekeshaña nindi wadizoza kuhitila muyuma yelañayi. Chakutalilahu, wakeñaña nindi kalemesha kejima kayeña kudi Tata yindi, bayi kudi yenaku. (Maku 10:17, 18; Yow. 5:19) Kudizoza kwaYesu kwayileteshaña kwiladi? Komana hikwayisañumunaña kumukeña Mwana kaNzambi nikumulondelaku? Mwamweni, kwayisañumunaña. Muloñadi Yesu chekalilayi wadizoza? Muloña wamukeña nawa wamwimbujolaña Tata yindi wekala wadizoza. (Mas. 18:35; Heb. 1:3) Komana himwaswinaña kudi Yesu, wembujolaña chikupu yilwilu yaYehovaku?

8. Muloñadi chitwamukeñela Yesu hamu neyi Mwanta wetu?

⁸ Twamukeña Yesu hamu neyi Mwanta wetu muloña hiNyuuli wamuwahi. Yehova yomweni wamudizishili Mwanindi nawa wamutondeli kulonda ayuuleña. (Isa. 50:4, 5) Toñojokenu cheñi hakukeña kwakudihana kwamwekeshayi Yesu. (Yow. 13:1) Chineli Yesu hiMwanta wenu, mwatela kumukeña chikupu. Walumbulwili nindi antu amukeña chikupu, dikwila nawu, ana atenañayi nindi amabwambu jindi, amwekeshaña chamukeñawu kuhitila mukwovwahila nshimbi jindi. (Yow. 14:15; 15:14, 15) Hikukooleka chikupu kwikala ibwambu daMwana kaYehova!

9. Chipapatishu chawakaKristu chadifwana ñahi nachaKristu?

⁹ Lushimbi lumu hanshimbi jahanayi Yesu ludi lwakwila nawu akakumulondela atela kupapatishewa. (Mat. 28:19, 20) Wamwekesheli chatela kwilawu akakumulondela. Munjila jikwawu, chipapatishu chindi chambukaku nachipapatishu chawakakumulondela. (Talenu chikasha chinakwila nawu “ Chaambu Chekala Hakachi kaChipapashu chaYesu naChipapatishu Chawakakumulondela.”) Ilaña munjila jikwawu, yadifwana. Chapapatisheweliyi, Yesu wadihanini yomweni kwila nkeñelu yaTata yindi. (Heb. 10:7) Munjila yoyimu, akakumulondela Kristu apapatishewaña nakumwekesha kudi antu nawu anadihani awenawu kudi Yehova Nzambi. Haniyi mpinji, chuma chalema nankashi muchihandilu chawu, hikwila nkeñelu yaNzambi bayi yawuku. Dichi anakwimbujola Mwanta wawu.

10. Kukeña kumwamukeña Yesu kunateli kuyisañumuna ñahi kupapatishewa?

¹⁰ Mweteja nenu Yesu hiMwana kaYehova wumu hohu nawa nenu diyi Mwanta atondawu kudi Nzambi nindi atuyuuleña. Mwamumonaña Yesu nenu wadizoza nawa wamwimbujolaña Tata yindi chikupu. Mweluka nenu wadiishili adiña nanzala, wakundejeli aneñeli nikuuka akata. (Mat. 14:14-21) Mwamonaña chalombolañayi chipompelu chindi makonu. (Mat. 23:10) Nawa mweluka nenu wakazata nyidimu yayivulu kumbidi hamu neyi Mwanta waWanta waNzambi. Munateli kumwekesha ñahi nenu mwamukeña? Hikuhitila mukumwimbujola. (Yow. 14:21) Munateli kutachika kumwimbujola kuhitila mukudihana enu aweni kudi Yehova nakupapatishewa.

11. Chumanyi chacheni chalema chaleteshaña muntu apapatishewi, nawa muloñadi?

¹¹ Chumanyi chacheni chalema chaleteshaña muntu apapatishewi? Yesu wamwekesheli lushimbi lwabadika hanshimbi jaNzambi, hahosheliyi nindi: “Watela kukeña Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima ninañovu jeyi jejima.” (Maku 12:30) Komana dichimwamukeña Nzambi ninenu?

12. Mwamukeñeladi Yehova? (Talenu cheñi mwevulu.)

¹² Kudi yuma yayivulu yaleteshaña tumukeñi Yehova. Chakutalilahu, muneluki nenu diyi “nsulu yawumi” nawa nenu diyi wahanaña “chawaana chejima chachiwahi nichawaana chejima chabadika kuwaha.” (Mas. 36:9; Yak. 1:17) Yuma yejima yayiwahi yimwadiluñishaña yafumaña kudi Nzambi yetu wakukeña nawa wukweti chisambu.

13. Muloñadi ifutu danyiloña chidekalila chawaana chasweja kuwaha?

¹³ Ifutu danyiloña hichawaana chachiwahi chatwinkayi Yehova. Tukuhosheladi mwenimu? Talenu wubwambu wekala hadi Yehova naMwanindi. Yesu wahosheli nindi: ‘Tata wankeña’ ‘ninami namukeña Tata.’ (Yow. 10:17; 14:31) Wubwambu wawu wakoleleliku hadiñawu hamu hadi yaaka yayivulu. (Yish. 8:22, 23, 30) Toñojokenu chichamukatili Nzambi hakwiteja Mwanindi kukabakana nikufwa. Yehova wayikeña nankashi antu, kushilahu ninenu, chakwila wahanini Mwanindi wakeñayi chakufuma hamuchima kwikala mulambu wakuyikwasha enu niantu amakwawu kulonda mwakashakami haya nyaaka. (Yow. 3:16; Ñal. 2:20) Ichi dichuma chabadika chikuletesha tumukeñi Nzambi.

14. Chikonkwanyinyi chachiwahi chimwatela kutondahu muchihandilu chenu?

¹⁴ Munasweji kumukeña Yehova hampinji yimunadizilihu  yuma yayivulu hadi yena. Chakadi nikujina, munakukeña kuswina kwakwihi nayena chayinu mpinji nihaya nyaaka. Nawa mukutwesha. Wayikoleshaña nindi muzañalesheña muchima windi. (Yish. 23:15, 16) Munateli kwila mwenimu kuhitila muyuma yimwahoshaña niyimwelaña. Yuma yimwelaña muchihandilu chenu yinateli kumwekesha nawu chalala mwamukeña Yehova hela nehi. (1 Yow. 5:3) Ichi dichikonkwanyi chachiwahi chimwatela kutondahu muchihandilu chenu.

15. Munateli kumwekesha ñahi nenu mwamukeña Yehova?

¹⁵ Munateli kumwekesha ñahi nenu mwamukeña Yehova? Chatachi, lombenu kulomba kwadimena nakudihana kudi Nzambi walala wumu hohu. (Mas. 40:8) Kuhiñahu, mwekeshenu hatooka kudihana kwenu kuhitila mukupapatishewa. Neyi chitwahanjekahu hakusambila muchinu chibaaba, iyi yikwikala himpinji yamuzañalu nawa yalema muchihandilu chenu. Munatachiki chihandilu chakumuhandila Yehova, bayi enu aweniku. (Rom. 14:8; 1 Pet. 4:1, 2) Ichi chinateli kumwekana nehi hichuma chakala kufuukula, nawa diimu chakala. Ilaña chenzununaña njila yakwikala nachihandilu chachiwahi nankashi. Munjilanyi?

16. Kwesekeja nachahosha Isamu 41:12, Yehova wakayikiswila ñahi ana adihanaña nakumukalakela?

¹⁶ Yehova diyi Muntu wahanaña chikupu. Hela chakwila mukumwinka yuma yamuchidinyi, yena wukuyinkaña yuma yayivulu nakubadikahu. (Maku 10:29, 30) Wukuyinka wumi wawuwahi nawa wukuyitiyishaña kuwaha nichayinu mpinji mukanu kaayi katama. Nawa iyi hintachikilu hohu. Chihandilu chimwakatachika neyi munapapatishewi, hichatela kukumaku. Mwakatwalekahu kumukalakela Tata yenu imwakeña haya nyaaka. Kukeña kudi hakachi kenu naTata yenu kwakaswejelañaku nawa mwakashakamaña haya nyaaka nanyaaka neyi chashakamañayi yena.—Tañenu Isamu 41:12.

17. Chumanyi chimwatela kumwinka Yehova chabulayi?

¹⁷ Neyi mudihana nakupapatishewa, mukwikala nakukooleka kwakumwinka Tata yenu  chuma chasweja kulema. Yena wayinka yuma yejima yayiwahi, yuma yejima yayizañaleshaña, yimwadiluñishaña chikupu. Neyi mudihana nakupapatishewa, ninenu mukumwinka Mwini iwulu niiseki chuma chabulayi, dikwila nawu, kudihana kwenu kwakumukalakela chakufuma hamuchima. (Yoba 1:8; 41:11; Yish. 27:11) Ichi dichuma chachiwahi nankashi chimwatela kwila muchihandilu chenu! Chakadi nikujina, kukeña kumwamukeña Yehova dikukuyiletesha mupapatishewi.

18. Malwihwinyi imwatela kudihula?

¹⁸ Munateli kwakula nenudi ilu lwihu, Komana mwakapapatishewa? Mwatela kudakwila enu aweni. Ilaña chikuwaha neyi mudihula enu aweni nenu, ‘Inakuhembeleladi?’ (Yilw. 8:36) Anukenu yuma yisatu yitunahanjekihu. Chatachi, mwakeña chalala nikuloña. Dihulenu nenu, ‘Komana inakukeña kumona ifuku hakela antu ejima anakuhosha chalala nikwila yuma yaloña?’ Chamuchiyedi, mwamukeña Yesu Kristu. Dihulenu nenu, ‘Komana inakukeña Mwana kaNzambi kwikala Mwanta wami, nawa inakukeña kumwimbujola?’ Chamuchisatu, chasweja kulema, mwamukeña Yehova. Dihulenu nenu, ‘Komana inakukeña kuzañalesha muchima waYehova kuhitila mukumukalakela hamu neyi Nzambi yami?’ Neyi ñakwilu yenu kunawa malwihu yidi nawu, eña, hanu dinu munabulilidi kupapatishewa? Munakuhembeleladi?—Yilw. 16:33.

19. Muloñadi chimwatela kubulila kushintajala kupapatishewa? Lumbululenu. (Yowanu 4:34)

¹⁹ Neyi munakushintajala kupapatishewa, talenu chakutalilahu chazatishiliyi Yesu. (Tañenu Yowanu 4:34.) Neyi chimweluka Yesu wesekejeli kwila nkeñelu yaTata yindi nayakuda. Muloñadi? Yakuda yatukwashaña. Yesu welukili nindi yuma yejima yatulejañayi Yehova nindi twileña yatukwashaña. Yehova hakeñaña nindi twileña yuma yinateli kutukatishaku. Komana Yehova nakukeña nindi mupapatishewi? Eña. (Yilw. 2:38) Dichi mwatela kukuhwelela chikupu nenu neyi mwovwahila lushimbi lwakupapatishewa mukufuma yuma yayiwahi. Neyi chakwila himwashintajalaña kuda yakuda yayiwahiku, muloñadi chimukushintajalila kupapatishewa?

20. Twakahanjekadi muchibaaba chinalondelihu?

²⁰ Munakuhembeleladi? Amavulu anateli kwakula nawu, “Kanda nidiloñeshi.” Walala wudi wakwila nawu chuma chalema nankashi chimunateli kufuukulahu muchihandilu chenu hikudihana enu aweni kudi Yehova nikupapatishewa. Dichi mwatela kwikala nampinji, kutoñojokahu chiwahi nikuzata nañovu hakwila mushikihu. Ilaña neyi munakufwila chikupu kupapatishewa, yumanyi yimwatela kwila chayinu mpinji hakwila mudiloñeshi kupapatishewa? Tukahanjeka ñakwilu yanilu lwihu muchibaaba chinalondelihu.